ಲಡಾಖ್‌ ಗಡಿ ಬಳಿ ಚೀನಾ ಯುದ್ಧವಿಮಾನ ಹಾರಾಟ; ಗಡಿಯಲ್ಲಿ ಭಾರತದಿಂದ ತೀವ್ರ ನಿಗಾ

ಬೆಂಗಳೂರು (ಜೂ. 02):  ಭಾರತ-ಚೀನಾ ನಡುವೆ ಗಡಿ ವಿಚಾರಕ್ಕೆ ಸಂಬಂಧಿಸಿದಂತೆ ತ್ವೇಷಮಯ ಸ್ಥಿತಿ ಸೃಷ್ಟಿಯಾಗಿರುವ ನಡುವೆಯೇ ಚೀನಾದ ಯುದ್ಧವಿಮಾನಗಳು ಪೂರ್ವ ಲಡಾಖ್‌ ಗಡಿಯಿಂದ 30 ಕಿ.ಮೀ. ದೂರದಲ್ಲಿ ಹಾರಾಟ ನಡೆಸಿರುವುದು ತಿಳಿದುಬಂದಿದೆ. ಈ ಹಿನ್ನೆಲೆಯಲ್ಲಿ ಲಡಾಖ್‌ ಗಡಿಯಲ್ಲಿ ಭಾರತ ತೀವ್ರ ನಿಗಾ ಇರಿಸಿದೆ.

ಪೂರ್ವ ಲಡಾಖ್‌ ಸಮೀಪ ಚೀನಾ ವಾಯುಪಡೆಯು ಹೋಟನ್‌ ಹಾಗೂ ಗರ್ಗುನ್ಸಾ ಎಂಬಲ್ಲಿ 2 ವಾಯುನೆಲೆ ಹೊಂದಿದೆ. ಈ ವಾಯುನೆಲೆಯಲ್ಲಿ 10-12 ಯುದ್ಧವಿಮಾನಗಳನ್ನು ಚೀನಾ ನಿಯೋಜಿಸಿದೆ. ಇವು ಪೂರ್ವ ಲಡಾಖ್‌ ಗಡಿಯಿಂದ 30 ಕಿ.ಮೀ. ದೂರದಲ್ಲಿ ಹಾರಾಟ ನಡೆಸಿರುವುದು ಕಂಡುಬಂದಿದೆ.

ಚೀನಾ ಗಡಿ ತಂಟೆಗೆ ಭಾರತ ಸಡ್ಡು: ತತ್ತರಿಸಿದ ಡ್ರ್ಯಾಗನ್!

‘ಗಡಿಯಿಂದ ವಿಮಾನಗಳು ಹಾರಿದ ದೂರವನ್ನು ಗಮನಿಸಿದರೆ ಆತಂಕವೇನೂ ಇಲ್ಲ. ಆದರೂ ಭಾರತವು ಈ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿದೆ. ಏಕೆಂದರೆ ಕೆಲವೇ ನಿಮಿಷಗಳಲ್ಲಿ ಈ ಯುದ್ಧ ವಿಮಾನಗಳು ನಮ್ಮ ಗಡಿವರೆಗೆ ಆಗಮಿಸಬಹುದು’ ಎಂದು ಭಾರತದ ಭದ್ರತಾ ಪಡೆ ಮೂಲಗಳು ತಿಳಸಿವೆ.