ಬಿಸಿಲಿನಿಂದ ಬಂದ ತಕ್ಷಣ AC ರೂಮಿಗೆ ಹೋಗ್ತೀರಾ? ಹಾಯಾದ ಅನುಭವದ ಹಿಂದಿದೆ ಈ ಸಮಸ್ಯೆ!
Health risks of AC after sun: ಸುಡುವ ಬಿಸಿಲಿನಿಂದ ಪಾರಾಗಲು AC ಕೋಣೆಗೆ ಹೋಗಿ ಕುಳಿತುಕೊಳ್ಳುವುದು ನಮಗೆ ತುಂಬಾ ಆರಾಮವೆನಿಸುತ್ತದೆ. ಆದರೆ ಈ ಹಠಾತ್ ತಾಪಮಾನದ ಬದಲಾವಣೆಯು ಅನೇಕ ಸಮಸ್ಯೆಗಳಿಗೆ ಕಾರಣವಾಗಬಹುದು ಅಂತಾರೆ ತಜ್ಞರು.
ಇದು ನಿಮಗೆ ತಿಳಿದಿದೆಯೇ?
ಸುಡುವ ಬಿಸಿಲಿನಲ್ಲಿ ಹೊರಗೆ ಹೋಗಿ ಬಂದ ತಕ್ಷಣ ಎಸಿ ಕೋಣೆಗೆ ಹೋದರೆ ಸಿಗುವ ಆರಾಮವೇ ಬೇರೆ. ಆದರೆ ಆ ಹಾಯಾದ ಅನುಭವದ ಹಿಂದೆ ಕೆಲವು ಆರೋಗ್ಯ ಸಮಸ್ಯೆಗಳು ಅಡಗಿವೆ ಎಂಬುದು ನಿಮಗೆ ತಿಳಿದಿದೆಯೇ? ಬಿಸಿಲಿನಿಂದ ಬಂದ ತಕ್ಷಣ ತಂಪಾದ ಎಸಿ ರೂಮಿಗೆ ಹೋಗುವುದರಿಂದ ಉಂಟಾಗುವ ಪರಿಣಾಮಗಳು ಮತ್ತು ನಾವು ತೆಗೆದುಕೊಳ್ಳಬೇಕಾದ ಜಾಗ್ರತೆಗಳ ಬಗ್ಗೆ ಈ ಲೇಖನದಲ್ಲಿ ತಿಳಿಯಿರಿ.
ಸೂಚಿಸುತ್ತಾರೆ ತಜ್ಞರು
ಬೇಸಿಗೆ ಕಾಲ ಬಂತೆಂದರೆ ಸಾಕು, ಬಿಸಿಲಿನ ಬೇಗೆ ತಾಳಲಾರದೆ ಎಲ್ಲರೂ ಎಸಿಗಳಿಗೆ ಮೊರೆ ಹೋಗುತ್ತಾರೆ. ಹೊರಗಿನಿಂದ ಬಂದ ತಕ್ಷಣ ಎಸಿ ಸ್ವಿಚ್ ಆನ್ ಮಾಡಿ ಅದರ ಮುಂದೆ ಕುಳಿತರೆ ತುಂಬಾ ರಿಲೀಫ್ ಎನಿಸುತ್ತದೆ. ಆದರೆ, ಈ ಸಣ್ಣ ಅಭ್ಯಾಸವು ನಿಮ್ಮ ಆರೋಗ್ಯವನ್ನು ಹಾಳುಮಾಡುವ ಸಾಧ್ಯತೆಯಿದೆ ಎಂದು ತಜ್ಞರು ಸೂಚಿಸುತ್ತಾರೆ.
ನೈಸರ್ಗಿಕವಾಗಿಯೇ ಇರುವ ರಕ್ಷಣಾ ವ್ಯವಸ್ಥೆ
ಸಾಮಾನ್ಯವಾಗಿ ನಮ್ಮ ದೇಹವು ಹೊರಗಿನ ತಾಪಮಾನಕ್ಕೆ ತಕ್ಕಂತೆ ತನ್ನನ್ನು ತಾನು ಹೊಂದಿಸಿಕೊಳ್ಳುವ ಶಕ್ತಿಯನ್ನು ಹೊಂದಿದೆ. ನಾವು ಬಿಸಿಲಿನಲ್ಲಿರುವಾಗ ಬೆವರುವಿಕೆ ಮತ್ತು ರಕ್ತನಾಳಗಳ ಹಿಗ್ಗುವಿಕೆಯಂತಹ ಪ್ರಕ್ರಿಯೆಗಳ ಮೂಲಕ ದೇಹವು ತನ್ನ ತಾಪಮಾನವನ್ನು ಸಮತೋಲನದಲ್ಲಿ ಇಟ್ಟುಕೊಳ್ಳುತ್ತದೆ. ಇದು ನಮ್ಮ ದೇಹದಲ್ಲಿ ನೈಸರ್ಗಿಕವಾಗಿಯೇ ಇರುವ ಒಂದು ರಕ್ಷಣಾ ವ್ಯವಸ್ಥೆಯಾಗಿದೆ.
ಏನೆಲ್ಲಾ ಸಮಸ್ಯೆಗಳು ಬರ್ತವೆ?
ಬಿಸಿಲಿನಿಂದ ಬಂದ ತಕ್ಷಣ ಏಕಾಏಕಿ ಅತೀ ಕಡಿಮೆ ತಾಪಮಾನವಿರುವ ಎಸಿ ಕೋಣೆಗೆ ಹೋದಾಗ, ನಮ್ಮ ದೇಹದ ನೈಸರ್ಗಿಕ ರಕ್ಷಣಾ ವ್ಯವಸ್ಥೆಗೆ ಧಕ್ಕೆ ಉಂಟಾಗುತ್ತದೆ. ತಾಪಮಾನದಲ್ಲಿ ಉಂಟಾಗುವ ಈ ಹಠಾತ್ ಬದಲಾವಣೆಗಳಿಂದಾಗಿ ಶೀತ, ಕೆಮ್ಮಿನಂತಹ ಸಮಸ್ಯೆಗಳ ಜೊತೆಗೆ ತೀವ್ರವಾದ ತಲೆನೋವು ಮತ್ತು ಸ್ನಾಯು ನೋವುಗಳು ಬರುವ ಸಾಧ್ಯತೆಯಿದೆ. ಅಷ್ಟೇ ಅಲ್ಲದೆ, ಇದು ನಮ್ಮ ರೋಗನಿರೋಧಕ ಶಕ್ತಿಯ ಮೇಲೂ ಪ್ರಭಾವ ಬೀರುತ್ತದೆ.
ಏನು ಮಾಡಬೇಕು?
ಬಿಸಿಲಿನಿಂದ ಮನೆಗೆ ಅಥವಾ ಕಚೇರಿಗೆ ಬಂದ ತಕ್ಷಣ ಸ್ವಲ್ಪ ಸಮಯ ನೆರಳಿನಲ್ಲಿ ಅಥವಾ ಫ್ಯಾನ್ ಕೆಳಗೆ ಕುಳಿತುಕೊಳ್ಳಬೇಕು. ದೇಹದ ತಾಪಮಾನವು ಸ್ವಲ್ಪ ಸಾಮಾನ್ಯ ಸ್ಥಿತಿಗೆ ಬಂದ ನಂತರವಷ್ಟೇ ಎಸಿ ಕೋಣೆಗೆ ಹೋಗುವುದು ಸುರಕ್ಷಿತ. ಹಾಗೆಯೇ ಎಸಿ ಕೋಣೆಗೆ ಹೋಗುವ ಮುನ್ನ ಅತೀ ತಂಪಾಗಿರುವ ನೀರನ್ನು ಕುಡಿಯುವುದು ಕೂಡ ಒಳ್ಳೆಯದಲ್ಲ. ಸ್ವಲ್ಪ ಸಮಯದ ಬಿಡುವು ನೀಡಿ ಹೋಗುವುದರಿಂದ ನೀವು ಆರೋಗ್ಯ ಸಮಸ್ಯೆಗಳಿಗೆ ತುತ್ತಾಗದಂತೆ ಇರಬಹುದು.
ಆರೋಗ್ಯ, ಸೌಂದರ್ಯ, ಫಿಟ್ನೆಸ್, ಕಿಚನ್ ಟಿಪ್ಸ್, ಸಂಬಂಧ, ಫ್ಯಾಷನ್, ರೆಸಿಪಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.
