Lung Cancer: ಶ್ವಾಸಕೋಶ ಕ್ಯಾನ್ಸರ್‌ನ ಈ ಆರಂಭಿಕ ಲಕ್ಷಣಗಳನ್ನು ಅಪ್ಪಿತಪ್ಪಿಯೂ ನಿರ್ಲಕ್ಷಿಸ್ಬೇಡಿ

Lung Cancer Early Signs: ಕ್ಯಾನ್ಸರ್ ಆರಂಭದಲ್ಲಿ ಅಷ್ಟಾಗಿ ತೊಂದರೆ ಕೊಡದಿದ್ದರೂ, ಒಳಗೊಳಗೇ ಆರೋಗ್ಯವನ್ನು ಹದಗೆಡಿಸುವ ಒಂದು ಮಾರಕ ಕಾಯಿಲೆ. ಅದರಲ್ಲೂ ಶ್ವಾಸಕೋಶದ ಕ್ಯಾನ್ಸರ್ ಆರಂಭಿಕ ಹಂತದಲ್ಲಿ ಕೇವಲ ಸಾಮಾನ್ಯ ಕೆಮ್ಮು ಅಥವಾ ಸುಸ್ತಿನಂತೆ ಕಂಡುಬರುವುದರಿಂದ ಅನೇಕರು ಇದನ್ನು ನಿರ್ಲಕ್ಷಿಸುತ್ತಾರೆ. 

Image Credit : freepik

ಶ್ವಾಸಕೋಶದ ಕ್ಯಾನ್ಸರ್ ಶುರುವಾಗುವುದು ಹೇಗೆ?

ಶ್ವಾಸಕೋಶದ ಜೀವಕೋಶಗಳಲ್ಲಿ ಅಸಹಜ ಬೆಳವಣಿಗೆಯಿಂದ ಶ್ವಾಸಕೋಶದ ಕ್ಯಾನ್ಸರ್ ಶುರುವಾಗುತ್ತೆ. ನಮ್ಮ ಎದೆಯ ಭಾಗದಲ್ಲಿರುವ ಸ್ಪಾಂಜ್‌ನಂತಹ ಎರಡು ಅಂಗಗಳೇ ಶ್ವಾಸಕೋಶಗಳು. ಇವು ಉಸಿರಾಟವನ್ನು ನಿಯಂತ್ರಿಸುತ್ತವೆ. ಜಗತ್ತಿನಾದ್ಯಂತ ಕ್ಯಾನ್ಸರ್‌ನಿಂದ ಉಂಟಾಗುವ ಸಾವುಗಳಿಗೆ ಶ್ವಾಸಕೋಶದ ಕ್ಯಾನ್ಸರ್ ಒಂದು ಪ್ರಮುಖ ಕಾರಣವಾಗಿದೆ.

Image Credit : Getty

ಧೂಮಪಾನವು ಶ್ವಾಸಕೋಶದ ಕ್ಯಾನ್ಸರ್‌ಗೆ ಪ್ರಮುಖ ಕಾರಣ

ವಿಶ್ವ ಆರೋಗ್ಯ ಸಂಸ್ಥೆಯ (WHO) ಪ್ರಕಾರ, ಶ್ವಾಸಕೋಶದ ಕ್ಯಾನ್ಸರ್‌ಗೆ ಧೂಮಪಾನವೇ ಪ್ರಮುಖ ಕಾರಣ. ಸುಮಾರು 85% ಪ್ರಕರಣಗಳಿಗೆ ಇದೇ ಕಾರಣವಾಗುತ್ತೆ. ಹೆಚ್ಚಿನ ಜನರು ರೋಗದ ಆರಂಭಿಕ ಲಕ್ಷಣಗಳನ್ನು ಗಮನಿಸದೇ ಇರುವುದರಿಂದ ಸಮಸ್ಯೆ ಹೆಚ್ಚಾಗುತ್ತೆ. ಈ ಲಕ್ಷಣಗಳನ್ನು ಬೇಗ ಪತ್ತೆ ಮಾಡಿದರೆ, ಚಿಕಿತ್ಸೆ ಸುಲಭವಾಗುತ್ತೆ. ಶ್ವಾಸಕೋಶದ ಕ್ಯಾನ್ಸರ್‌ನ ಕೆಲವು ಪ್ರಮುಖ ಲಕ್ಷಣಗಳು ಇಲ್ಲಿವೆ.  

Image Credit : Getty

ಉಸಿರಾಟದ ತೊಂದರೆ ಅಥವಾ ಸುಸ್ತು, ಉಸಿರುಗಟ್ಟಿದಂತೆ ಆಗುವುದು

ಉಸಿರಾಟದ ತೊಂದರೆ ಅಥವಾ ಸುಸ್ತು ಇದರ ಮೊದಲ ಲಕ್ಷಣ. ದೈನಂದಿನ ಕೆಲಸಗಳ ನಡುವೆ ಉಸಿರುಗಟ್ಟಿದಂತೆ ಆಗುವುದು ಅಥವಾ ಸಾಮಾನ್ಯಕ್ಕಿಂತ ಹೆಚ್ಚು ಸುಸ್ತಾದಂತೆ ಅನಿಸುವುದು ಇದರ ಸಂಕೇತ.

Image Credit : Getty

ತೋಳಿನ ಒಳಭಾಗದಲ್ಲಿ ನಿರಂತರ ನೋವು ಕಾಣಿಸಿಕೊಂಡರೆ

ಭುಜ, ತೋಳಿನ ಮೇಲ್ಭಾಗ ಅಥವಾ ತೋಳಿನ ಒಳಭಾಗದಲ್ಲಿ ನಿರಂತರ ನೋವು ಕಾಣಿಸಿಕೊಂಡರೆ, ಅದು 'ಪ್ಯಾನ್‌ಕೋಸ್ಟ್ ಟ್ಯೂಮರ್'ನ ಲಕ್ಷಣವಾಗಿರಬಹುದು. ಇದು ಶ್ವಾಸಕೋಶದ ತುದಿಯಲ್ಲಿ, ಕುತ್ತಿಗೆಯ ಹತ್ತಿರ ರೂಪುಗೊಳ್ಳುವ ಒಂದು ಅಪರೂಪದ ಕ್ಯಾನ್ಸರ್. ಈ ಗಡ್ಡೆಗಳು ಹತ್ತಿರದ ನರಗಳು ಮತ್ತು ಪಕ್ಕೆಲುಬುಗಳ ಮೇಲೆ ಒತ್ತಡ ಹಾಕಿ, ಸಂಧಿವಾತದಂತಹ ನೋವನ್ನು ಉಂಟುಮಾಡುತ್ತವೆ. 

Image Credit : Getty

ಧ್ವನಿಯಲ್ಲಿ ಬದಲಾವಣೆ

ಧ್ವನಿಯಲ್ಲಿ ಬದಲಾವಣೆ ಆಗುವುದು ಮತ್ತೊಂದು ಲಕ್ಷಣ. ಇದರಿಂದ ಧ್ವನಿ ಒಡಕು, ಗಡಸಾಗಬಹುದು. ಇದು ಗಂಟಲು ನೋವಿಗಿಂತ (laryngitis) ಭಿನ್ನ. ಯಾಕಂದ್ರೆ ಇದರಲ್ಲಿ ಗಂಟಲು ಊದಿಕೊಳ್ಳುವುದು, ನುಂಗಲು ಕಷ್ಟ ಅಥವಾ ಕಿವಿನೋವು ಇರುವುದಿಲ್ಲ. ಧ್ವನಿ ಬದಲಾವಣೆ ಶ್ವಾಸಕೋಶ ಕ್ಯಾನ್ಸರ್‌ನ ಲಕ್ಷಣವಾಗಿರಬಹುದು. ಧೂಮಪಾನ ಮಾಡದವರಲ್ಲಿ ಉಸಿರಾಟದ ತೊಂದರೆ ಅಥವಾ ಅಸ್ತಮಾ ಹೆಚ್ಚಾಗುವುದೂ ಕೂಡ ಇದರ ಲಕ್ಷಣವೇ. 

Image Credit : Getty

ಬ್ರಾಂಕೈಟಿಸ್ ಅಥವಾ ನ್ಯುಮೋನಿಯಾದಂತಹ ಶ್ವಾಸಕೋಶದ ಸೋಂಕು

ವಯಸ್ಕರಲ್ಲಿ ಪದೇ ಪದೇ ಬ್ರಾಂಕೈಟಿಸ್ ಅಥವಾ ನ್ಯುಮೋನಿಯಾದಂತಹ ಶ್ವಾಸಕೋಶದ ಸೋಂಕುಗಳು ಕಾಣಿಸಿಕೊಂಡರೆ ಅದನ್ನು ಎಂದಿಗೂ ನಿರ್ಲಕ್ಷಿಸಬಾರದು. ಇದು ಕೂಡ ಒಂದು ಎಚ್ಚರಿಕೆಯ ಗಂಟೆ.

Image Credit : Getty

ಅತಿಯಾದ ಬಾಯಾರಿಕೆ, ಪದೇ ಪದೇ ಮೂತ್ರ ವಿಸರ್ಜನೆ, ವಾಕರಿಕೆ, ಗೊಂದಲ

ಅತಿಯಾದ ಬಾಯಾರಿಕೆ (ಪಾಲಿಡಿಪ್ಸಿಯಾ), ಪದೇ ಪದೇ ಮೂತ್ರ ವಿಸರ್ಜನೆ (ಪಾಲಿಯೂರಿಯಾ), ವಾಕರಿಕೆ ಮತ್ತು ಗೊಂದಲ ಕೂಡ ಶ್ವಾಸಕೋಶದ ಕ್ಯಾನ್ಸರ್‌ನ ಲಕ್ಷಣಗಳಾಗಿರಬಹುದು. ಶ್ವಾಸಕೋಶದ ಗಡ್ಡೆಗಳು, ವಿಶೇಷವಾಗಿ ಸ್ಕ್ವಾಮಸ್ ಸೆಲ್ ಮಾದರಿಯವು, ಪ್ಯಾರಾಥೈರಾಯ್ಡ್ ಹಾರ್ಮೋನ್‌ಗೆ ಸಂಬಂಧಿಸಿದ ಪ್ರೋಟೀನ್‌ ಅನ್ನು ಸ್ರವಿಸುತ್ತವೆ. ಇದು ರಕ್ತದಲ್ಲಿ ಕ್ಯಾಲ್ಸಿಯಂ ಮಟ್ಟವನ್ನು ಹೆಚ್ಚಿಸಿ, ದೇಹವನ್ನು ನಿರ್ಜಲೀಕರಣಗೊಳಿಸುತ್ತದೆ.

Image Credit : Getty

3-4 ವಾರಗಳಿಗಿಂತ ಹೆಚ್ಚು ಕಾಲ ನಿರಂತರ ಕೆಮ್ಮು

3-4 ವಾರಗಳಿಗಿಂತ ಹೆಚ್ಚು ಕಾಲ ನಿರಂತರ ಕೆಮ್ಮು ಇದ್ದರೆ, ವಿಶೇಷವಾಗಿ ಧೂಮಪಾನ ಮಾಡದವರಲ್ಲಿ, ಅದನ್ನು ಗಂಭೀರವಾಗಿ ಪರಿಗಣಿಸಬೇಕು. ಕೆಮ್ಮು ಹೆಚ್ಚಾಗುವುದು ಅಥವಾ ಕಫದಲ್ಲಿ ರಕ್ತ ಕಾಣಿಸಿಕೊಳ್ಳುವುದು ಕೂಡ ಮತ್ತೊಂದು ಪ್ರಮುಖ ಲಕ್ಷಣವಾಗಿದೆ.