21 ವರ್ಷ ಬಳಿಕ ಭಾರತಕ್ಕೆ ಮಿಸೆಸ್ ವರ್ಲ್ಡ್ ಪ್ರಶಸ್ತಿ: ಜಮ್ಮು ಕಾಶ್ಮೀರದ ಸರ್ಗಮ್ ಕೌಶಲ್‌ಗೆ ಕಿರೀಟ
63 ದೇಶಗಳ ಸ್ಪರ್ಧಿಗಳನ್ನು ಹಿಂದಿಕ್ಕಿದ ಶ್ರೀಮತಿ ಸರ್ಗಮ್ ಕೌಶಲ್ ಅವರು 21 ವರ್ಷಗಳ ನಂತರ ಭಾರತಕ್ಕೆ ಪ್ರಶಸ್ತಿಯನ್ನು ತಂದುಕೊಟ್ಟಿದ್ದಾರೆ.
21 ವರ್ಷಗಳ ಬಳಿಕ ಭಾರತಕ್ಕೆ (India) ಮತ್ತೆ ಮಿಸೆಸ್ ವರ್ಲ್ಡ್ (Mrs World) ಕಿರೀಟ ದೊರೆತಿದೆ. ಭಾರತವನ್ನು ಪ್ರತಿನಿಧಿಸುತ್ತಿರುವ ಸರ್ಗಮ್ ಕೌಶಲ್ (Sargam Koushal) ಅವರು ಇಂದು ಅಮೆರಿಕದ (United States of America) ಲಾಸ್ ವೇಗಾಸ್‌ನಲ್ಲಿ (Las Vegas) ನಡೆದ ಗಾಲಾ ಸಮಾರಂಭದಲ್ಲಿ ಈ ಪ್ರಶಸ್ತಿ ಪಡೆದಿದ್ದಾರೆ. 63 ದೇಶಗಳ ಸ್ಪರ್ಧಿಗಳನ್ನು ಹಿಂದಿಕ್ಕಿದ ಶ್ರೀಮತಿ ಸರ್ಗಮ್ ಕೌಶಲ್ ಅವರು 21 ವರ್ಷಗಳ ನಂತರ ಭಾರತಕ್ಕೆ ಪ್ರಶಸ್ತಿಯನ್ನು ತಂದುಕೊಟ್ಟಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ (Instagram) ಈ ಸುದ್ದಿಯನ್ನು ಹಂಚಿಕೊಂಡ ಮಿಸೆಸ್ ಇಂಡಿಯಾ ಸ್ಪರ್ಧೆಯ (Mrs India Pageant) ವ್ಯವಸ್ಥಾಪಕ ಸಂಸ್ಥೆ, "ದೀರ್ಘ ಕಾಯುವಿಕೆ ಮುಗಿದಿದೆ, 21 ವರ್ಷಗಳ ನಂತರ ನಾವು ಕಿರೀಟವನ್ನು ಮರಳಿ ಪಡೆದಿದ್ದೇವೆ!" ಎಂದು ಪೋಸ್ಟ್‌ ಮಾಡಿದ್ದಾರೆ.
ಜಮ್ಮು ಮತ್ತು ಕಾಶ್ಮೀರ ಮೂಲದ ಸರ್ಗಮ್ ಕೌಶಲ್ ಅವರು ಈ ಪ್ರಶಸ್ತಿಯನ್ನು ಗೆದ್ದಾಗ ಪಟ್ಟ ಸಂತಸವನ್ನು ವಿವರಿಸುವ ವಿಡಿಯೋವನ್ನು ಸಹ ಮಿಸೆಸ್ ಇಂಡಿಯಾ ಸ್ಪರ್ಧೆಯ ವ್ಯವಸ್ಥಾಪಕ ಸಂಸ್ಥೆ ಹಂಚಿಕೊಂಡಿದ್ದಾರೆ. “ನಾವು 21-22 ವರ್ಷಗಳ ನಂತರ ಕಿರೀಟವನ್ನು ಮರಳಿ ಪಡೆದಿದ್ದೇವೆ. ನಾನು ತುಂಬಾ ಉತ್ಸುಕನಾಗಿದ್ದೇನೆ. ಲವ್ ಯೂ ಇಂಡಿಯಾ, ಲವ್ ಯೂ ವರ್ಲ್ಡ್” ಎಂದು ಇತ್ತೀಚೆಗೆ ಕಿರೀಟ ಧರಿಸಿರುವ ಮಿಸೆಸ್ ವರ್ಲ್ಡ್ ಪ್ರತಿಕ್ರಿಯೆಯನ್ನೂ ನೀಡಿದ್ದಾರೆ.
ಇದನ್ನು ಓದಿ: Mrs World 2022: ಅಂತಾರಾಷ್ಟ್ರಿಯ ವೇದಿಕೆಯಲ್ಲಿ ಮಿಂಚಿದ ನವದೀಪ್ ಕೌರ್ ಕುರಿತ ವಿಚಾರಗಳಿವು
ಶ್ರೀಮತಿ ಸರ್ಗಮ್ ಕೌಶಲ್ ಅವರ ಇನ್ಸ್ಟಾಗ್ರಾಮ್‌ ಪೋಸ್ಟ್‌ಗಳ ಪ್ರಕಾರ, ಅವರು ಇಂಗ್ಲಿಷ್ ಸಾಹಿತ್ಯದಲ್ಲಿ ಸ್ನಾತಕೋತ್ತರ ಪದವಿಯನ್ನು ಹೊಂದಿದ್ದಾರೆ. ಅವರು ಈ ಹಿಂದೆ ವಿಶಾಖಪಟ್ಟಣದಲ್ಲಿ ಶಿಕ್ಷಕರಾಗಿ ಕೆಲಸ ಮಾಡಿದ್ದಾರೆ ಮತ್ತು ಅವರ ಪತಿ ಭಾರತೀಯ ನೌಕಾಪಡೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ ಎಂದು ಸಹ ಹಂಚಿಕೊಂಡಿದ್ದಾರೆ.
ಮಿಸೆಸ್ ವರ್ಲ್ಡ್ ವಿವಾಹಿತ ಮಹಿಳೆಯರಿಗೆ ನಡೆಯುವ ಮೊದಲ ಸೌಂದರ್ಯ ಸ್ಪರ್ಧೆಯಾಗಿದೆ. ಈ ಸ್ಪರ್ಧೆಯನ್ನು 1984 ರಲ್ಲಿ ಆರಂಭಿಸಲಾಯಿತು. ಆರಂಭದಲ್ಲಿ, ಈ ಸ್ಪರ್ಧೆಯನ್ನು ಮಿಸೆಸ್ ವುಮನ್ ಆಫ್ ದಿ ವರ್ಲ್ಡ್ ಎಂದು ಕರೆಯಲಾಗುತ್ತಿತ್ತು. ಆದರೆ, ಇದು 1988 ರಿಂದ ಮಿಸೆಸ್ ವರ್ಲ್ಡ್ ಎಂದು ಕರೆಯಲ್ಪಟ್ಟಿತು. ಇನ್ನು, ಹಲವು ವರ್ಷಗಳಲ್ಲಿ, ಮಿಸೆಸ್ ವರ್ಲ್ಡ್ ಸ್ಪರ್ಧೆಗೆ 80 ಕ್ಕೂ ಹೆಚ್ಚು ದೇಶಗಳ ಮಹಿಳೆಯರು ಸ್ಪರ್ದೆ ಮಾಡಿದ್ದು ಮತ್ತು ಅಮೆರಿಕ ಹೆಚ್ಚು ಸಂಖ್ಯೆಯ ವಿಜೇತರನ್ನು ಹೊಂದಿದೆ ಎಂದೂ ತಿಳಿದುಬಂದಿದೆ.
ಇದನ್ನೂ ಓದಿ: ಕರ್ನಾಟಕದ ಶಿಲ್ಪಾ, ರಶ್ಮಿ, ಸುಪ್ರೀತಾ, ಕಾವ್ಯಾಗೆ ಮಿಸೆಸ್ ಇಂಡಿಯಾ ಕಿರೀಟ
ಇನ್ನು, ಈ ಹಿಂದೆ 2001 ರಲ್ಲಿ ಡಾ. ಅದಿತಿ ಗೋವಿತ್ರಿಕರ್ ಈ ಅಂತಾರಾಷ್ಟ್ರೀಯ ಕಿರೀಟವನ್ನು ಪಡೆಯುವ ಮೂಲಕ ಭಾರತವು ಒಮ್ಮೆ ಮಾತ್ರ ಮಿಸೆಸ್ ವರ್ಲ್ಡ್ ಪ್ರಶಸ್ತಿಯನ್ನು ಗೆದ್ದಿತ್ತು. ಡಾ ಗೋವಿತ್ರಿಕರ್ ಅವರು ಈಗ ಮಿಸೆಸ್ ಇಂಡಿಯಾ ಇಂಕ್ 2022-23 ರ ನ್ಯಾಯಾಧೀಶರಾಗಿ ಸೇವೆ ಸಲ್ಲಿಸಿದ್ದಾರೆ. ಅವರ ನಂತರ ಈಗ ಎರಡನೇ ಬಾರಿಗೆ 21 ವರ್ಷಗಳ ಬಳಿಕ ಸರ್ಗಮ್ ಕೌಶಲ್ ಅವರು ಮಿಸೆಸ್ ವರ್ಲ್ಡ್ ಕಿರೀಟ ಗೆದ್ದಿದ್ದಾರೆ.
ಈ ಮಧ್ಯೆ, ಅದಿತಿ ಗೋವಿತ್ರಿಕರ್ ಅವರು ಶ್ರೀಮತಿ ಸರ್ಗಮ್ ಕೌಶಲ್ ಅವರ ಸಾಧನೆಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಹೃದಯಪೂರ್ವಕ ಅಭಿನಂದನೆಗಳು @sargam3 @mrsindiainc ಪ್ರಯಾಣದ ಭಾಗವಾಗಿರುವುದಕ್ಕೆ ತುಂಬಾ ಸಂತೋಷವಾಗಿದೆ. 21 ವರ್ಷಗಳ ನಂತರ ಕಿರೀಟವು ಮರಳಿ ಬಂದ ಸಮಯ ಎಂದು ಶ್ರೀಮತಿ ಅದಿತಿ ಗೋವಿತ್ರಿಕರ್ ಬರೆದಿದ್ದಾರೆ: ಇನ್ನೊಂದೆಡೆ, ಸರ್ಗಮ್ ಕೌಶಲ್ ಅವರು ತಮ್ಮ ಅಂತಿಮ ಸುತ್ತಿನಲ್ಲಿ, ಭಾವನಾ ರಾವ್ ವಿನ್ಯಾಸಗೊಳಿಸಿದ ಗುಲಾಬಿ ಬಣ್ಣದ ಸೆಂಟರ್ ಸ್ಲಿಟ್ ಗ್ಲಿಟರಿ ಗೌನ್ ಅನ್ನು ಧರಿಸಿದ್ದರು ಮತ್ತು ಸ್ಪರ್ಧೆಯ ಮಹಿಳಾ ತಜ್ಞರು ಹಾಗೂ ರೂಪದರ್ಶಿ ಅಲೆಸಿಯಾ ರಾವುತ್ ರನ್‌ವೇಗೆ ಮೆಂಟರ್‌ ಮಾಡಿದ್ದರು ಎಂದೂ ತಿಳಿದುಬಂದಿದೆ.
ಇದನ್ನೂ ಓದಿ: ವಿಚ್ಛೇದಿತೆ ಎಂದು ಮಿಸಸ್ ಶ್ರೀಲಂಕಾ ಸ್ಪರ್ಧೆ ವಿಜೇತೆ ಕಿರೀಟ ಕಸಿದರು!
