125 ವರ್ಷಗಳಿಂದ ಈ ಮರ ಕಂಬಿ ಹಿಂದೆ, ಮಾಡಿದ ಯಾವ ತಪ್ಪಿಗೆ ಈ ಶಿಕ್ಷೆ?
ಯಾರಾದರೂ ಅಪರಾಧ ಮಾಡಿದ್ರೆ ಮಾತ್ರ ಅವರನ್ನು ಬಂಧಿಸೋದನ್ನು ನೋಡಿರುತ್ತೀರಿ, ಆದ್ರೆ ಪಾಕಿಸ್ತಾನದ ಪೇಶಾವರದಲ್ಲಿ ಮರವನ್ನು ಬಂಧಿಸಲಾಗಿದೆ. ಇತ್ತೀಚೆಗೆ ಅಲ್ಲ, 125 ವರ್ಷಗಳಿಂದ. ಅದನ್ನು ಸರಪಳಿಗಳಿಂದ ಸುತ್ತಲಾಗಿದೆ. ಹಾಗಿದ್ರೆ ಈ ಮರ ಮಾಡಿದ್ದಂತಹ ಅಪರಾಧವಾದ್ರೂ ಏನು?
ಯಾರಾದರೂ ಅಪರಾಧ ಮಾಡಿದರೆ, ಅವರು ಕಾನೂನಿನಿಂದ ಶಿಕ್ಷೆಗೆ ಒಳಗಾಗುತ್ತಾರೆ. ಕಳ್ಳತನ, ದರೋಡೆ ಮತ್ತು ಅತ್ಯಾಚಾರದಂತಹ ಪ್ರಕರಣಗಳಲ್ಲಿ, ಪೊಲೀಸರು ತ್ವರಿತ ಕ್ರಮ ಕೈಗೊಂಡು ಆರೋಪಿಗಳನ್ನು ಬಂಧಿಸುವುದನ್ನು (arrest) ಕಾಣಬಹುದು. ಇದೆಲ್ಲವೂ ಮನುಷ್ಯರ ವಿಷಯದಲ್ಲಿ ಸಂಭವಿಸುತ್ತದೆ, ಯಾವುದೇ ಪ್ರಾಣಿ, ಮರ ಅಥವಾ ಪಕ್ಷಿಯನ್ನು ಅಪರಾಧ ಮಾಡಿದ್ದಕ್ಕೆ ಬಂಧಿಸೋಕೆ ಸಾಧ್ಯವೇ ಇಲ್ಲ ಇಲ್ವಾ?
ಕೇವಲ ಮನುಷ್ಯರು ಮಾತ್ರ ಕಾನೂನಿನಲ್ಲಿ ಅಪರಾಧಿಯಾಗ್ತಾರೆ ಎಂದು ನೀವು ಅಂದು ಕೊಂಡಿದ್ದರೆ ಅದು ತಪ್ಪು. ಯಾಕಂದ್ರೆ ಪಾಕಿಸ್ತಾನದ ಪೇಶಾವರದಲ್ಲಿ (Peshavar in Pakistan) ಒಂದು ಮರವನ್ನು ಅಪರಾಧಿ ಎಂದು ಬಂಧಿಸಲಾಗಿದೆ. ಅದೂ ಇತ್ತೀಚೆಗೆ ಅಲ್ಲ, ಬರೋಬ್ಬರಿ 125 ವರ್ಷಗಳಿಂದ ಸರಪಳಿಗಳಲ್ಲಿ ಆ ಮರವನ್ನು ಬಂಧಿಸಲಾಗಿದೆ.
ಮರದ ಅಪರಾಧ ಏನಾಗಿರಬಹುದು?
ಇದನ್ನು ಓದಿದ ನಂತರ, ಮರವನ್ನು ಏಕೆ ಮತ್ತು ಹೇಗೆ ಬಂಧಿಸಿರಬಹುದು ಎಂದು ನೀವು ತಲೆ ಕೆರೆದುಕೊಳ್ಳಲು ಪ್ರಾರಂಭಿಸಿರಬೇಕು. ಹಾಗಿದ್ರೆ ಮರದ ಅಪರಾಧ ಏನಾಗಿರಬಹುದು? ಎಂದು ನೀವು ಯೋಚನೆ ಮಾಡ್ತಿದ್ರೆ ಅದರ ಹಿಂದಿನ ಆಸಕ್ತಿದಾಯಕ ಕಥೆಯನ್ನು ನಾವು ಇಲ್ಲಿ ನಿಮಗೆ ಹೇಳಲಿದ್ದೇವೆ. ಇದೆಲ್ಲವೂ 125 ವರ್ಷಗಳ ಹಿಂದೆ ಟೋರ್ಖಾನ್ ಗಡಿಯ ಬಳಿಯ ಲ್ಯಾಂಡಿ ಕೊಟಾಲ್ ಎಂಬ ವಸಾಹತುವಿನಲ್ಲಿ ಬ್ರಿಟಿಷ್ ಅಧಿಕಾರಿಯಿಂದಾಗಿ ನಡೆಯಿತು.
tree arrested 3.
ಮರವನ್ನು ಕೂಡಲೇ ಬಂಧಿಸಬೇಕು' ಎಂದು ಆಗ್ರಹಿಸಿದ ಬ್ರಿಟೀಷ್ ಅಧಿಕಾರಿ
ಕಥೆಯ ಪ್ರಕಾರ, ಜೇಮ್ಸ್ ಸ್ಕ್ವಿಡ್ ಎಂಬ ಈ ಅಧಿಕಾರಿ ಒಂದು ದಿನ ಮಾದಕ ಪದಾರ್ಥದ ಸೇವನೆಯ ಮತ್ತಿನಲ್ಲಿದ್ದನು, ಈ ಸಂದರ್ಭದಲ್ಲಿ ಆತ ಈ ಮರವನ್ನು ಹಿಡಿಯಲು ಆಗುತ್ತಿಲ್ಲ, ಅದು ಮತ್ತೆ ಮತ್ತೆ ಓಡಿ ಹೋಗುತ್ತಿದೆ ಎಂದು ಹೇಳಿಕೊಂಡನು. ಅಷ್ಟೇ ಅಲ್ಲ ಈ ಮರವನ್ನು ಬಂಧಿಸಲು ಅವನು ತನ್ನ ಸೈನಿಕರಿಗೆ ಆದೇಶಿಸಿದನು.
ಜೇಮ್ಸ್ ಒಬ್ಬ ಕುಡುಕನಾಗಿದ್ದು, ಬಂಧನದ ಅಗತ್ಯ ಇಲ್ಲ ಎಂದು ಸೈನಿಕರು ಅರ್ಥಮಾಡಿಕೊಂಡರು ಆದರೆ ಅಧಿಕಾರಿಯ ಮುಂದೆ ಮಾತನಾಡಲು ಧೈರ್ಯ ಮಾಡಲಿಲ್ಲ. ಅದನ್ನು ತಡೆಯಲು ಅವರು ಪ್ರಯತ್ನಿಸಲಿಲ್ಲ, ಬದಲಾಗಿ ಅಧಿಕಾರಿ ಹೇಳಿದಂತೆ ಅವರು ಮರವನ್ನು ಅದರ ಸುತ್ತಲೂ ಸರಪಳಿಗಳಿಂದ ಕಟ್ಟಿದರು. ಅಂದಿನಿಂದ, ಮರವನ್ನು ಬಂಧಿಸಲಾಗಿದೆ ಮತ್ತು ಅದರ ಸರಪಳಿಗಳು ಹಾಗೇ ಉಳಿದಿವೆ.
tree arrested 5
'ಬ್ರಿಟಿಷ್ ಆಳ್ವಿಕೆಯ ದಬ್ಬಾಳಿಕೆಯ ಸಂಕೇತ'
ಮರದ ಮೇಲಿನ ಫಲಕವು ಪ್ರವಾಸಿಗರಿಗೆ ಇಡೀ ಕಥೆಯನ್ನು ವಿವರಿಸುತ್ತದೆ. ‘ನನ್ನನ್ನು ಬಂಧಿಸಲಾಗಿದೆ' ಎನ್ನುವ ತಲೆಬರಹದೊಂದಿಗೆ ಇಡೀ ಕಥೆಯ ಉಳಿದ ಭಾಗವನ್ನು ಸಹ ವಿವರವಾಗಿ ಬರೆಯಲಾಗಿದೆ. ಲಾಂಡಿ ಕೊಟಾಲ್ ಮಾರ್ಗದ ಖೈಬರ್ ರೈಫಲ್ಸ್ ಅಧಿಕಾರಿಗಳ ಮೆಸ್ ಬಳಿ ಇರುವ ಈ ಸರಪಳಿ ಮರವು ಪ್ರವಾಸಿಗರ ಗಮನ ಸೆಳೆಯುತ್ತದೆ. ಆದಾಗ್ಯೂ, ಸ್ಥಳೀಯರು ಈ ಮರವನ್ನು ದೇಶದಲ್ಲಿ ಬ್ರಿಟಿಷ್ ಆಳ್ವಿಕೆಯ (British Rule) ದಬ್ಬಾಳಿಕೆಯ ಸಂಕೇತವೆಂದು ಪರಿಗಣಿಸುತ್ತಾರೆ.
ಪ್ರವಾಸಿ ಆಕರ್ಷಣೆ ಉಳಿದಿದೆ
"ಈ ಮರವನ್ನು ಬಂಧಿಸುವ ಮೂಲಕ, ಬ್ರಿಟಿಷರು ಮೂಲತಃ ಬುಡಕಟ್ಟು ಜನಾಂಗದವರಿಗೆ ಬ್ರಿಟಿಷ್ ಸರ್ಕಾರದ ವಿರುದ್ಧ ತಿರುಗಿ ಬೀಳುವ ಧೈರ್ಯ ಮಾಡಿದರೆ, ಅವರನ್ನು ಸಹ ಇದೇ ರೀತಿಯಲ್ಲಿ ಶಿಕ್ಷಿಸಲಾಗುವುದು ಎಂದು ಎಚ್ಚರಿಕೆ ನೀಡಿದ್ದರು" ಎಂದು ಸ್ಥಳೀಯರೊಬ್ಬರು ಹೇಳಿದರು. ಮರದ ವಿವಾದಾತ್ಮಕ ಗತಕಾಲದ ಹೊರತಾಗಿಯೂ, ಪೇಶಾವರದ ಸರಪಳಿ ಮರವು ಒಂದು ಪ್ರಮುಖ ಪ್ರವಾಸಿ ತಾಣವಾಗಿ ಉಳಿದಿದೆ.
