ಹೋಟೆಲ್ ಸ್ಟೈಲ್ 'ಫ್ಲಫಿ' ಆಮ್ಲೆಟ್ ಬೇಕಾ?, ಹಾಗಾದ್ರೆ ಉಪ್ಪನ್ನು ಯಾವಾಗ ಸೇರಿಸ್ಬೇಕು ಅಂತ ತಿಳ್ಕೊಳ್ಳಿ
Fluffy omelet tips: ಆಮ್ಲೆಟ್ ತಯಾರಿಸುವುದು ಸುಲಭ ಎಂದು ಎಲ್ಲರೂ ಅಂದುಕೊಳ್ಳುತ್ತಾರೆ. ಆದರೆ ಉಪ್ಪು ಯಾವಾಗ ಸೇರಿಸಬೇಕು? ತರಕಾರಿ ಹೇಗೆ ಬಳಸಬೇಕು? ಎಂಬ ಸಣ್ಣ ವಿಷಯಗಳೇ ಗೊತ್ತಿರಲ್ಲ. ಹೋಟೆಲ್ ಶೈಲಿಯ ಆಮ್ಲೆಟ್ ಮನೆಯಲ್ಲೇ ಮಾಡಲು ನೀವು ಪಾಲಿಸಬೇಕಾದ ಕೆಲವು ಅದ್ಭುತ ಟಿಪ್ಸ್ ಇಲ್ಲಿವೆ.
ಆರೋಗ್ಯಕರವಾಗಿ ಬದಲಿಸಿಕೊಳ್ಳಲು ಪಾಲಿಸಬೇಕಾದ ಸೂತ್ರಗಳು
ಮಧ್ಯಾಹ್ನದ ಊಟವಿರಲಿ ಅಥವಾ ಬೆಳಗಿನ ಉಪಾಹಾರವಿರಲಿ..ಬಿಸಿ ಬಿಸಿ ಆಮ್ಲೆಟ್ ಇದ್ದರೆ ಅದರ ಮಜವೇ ಬೇರೆ. ಬ್ಯಾಚುಲರ್ಸ್ನಿಂದ ಹಿಡಿದು ಮಹಿಳೆಯರವರೆಗೆ ಎಲ್ಲರಿಗೂ ಇಷ್ಟವಾಗುವ, ಅತ್ಯಂತ ವೇಗವಾಗಿ ತಯಾರಾಗುವ ಅಡುಗೆ ಇದು. ಆದರೆ ತಯಾರಿಸುವುದು ಸುಲಭ ತಾನೇ ಎಂದು ನಾವು ಮಾಡುವ ಕೆಲವು ನಿರ್ಲಕ್ಷ್ಯಗಳು ಈ ಪೌಷ್ಟಿಕಾಹಾರವನ್ನು ಅನಾರೋಗ್ಯಕರವಾಗಿ ಬದಲಿಸಬಹುದು ಎಂದು ತಜ್ಞರು ಎಚ್ಚರಿಸುತ್ತಿದ್ದಾರೆ. ನಾವು ದಿನಾ ಮಾಡುವ ಆಮ್ಲೆಟ್ ಅನ್ನು ಮತ್ತಷ್ಟು ರುಚಿಯಾಗಿ ಮತ್ತು ಆರೋಗ್ಯಕರವಾಗಿ ಬದಲಿಸಿಕೊಳ್ಳಲು ಪಾಲಿಸಬೇಕಾದ ಸೂತ್ರಗಳು ಇಲ್ಲಿವೆ.
ಉಪ್ಪು ಸೇರಿಸುವ ವಿಷಯದಲ್ಲಿ ಜಾಗ್ರತೆ
ನಾವು ಮಾಡುವ ಅತಿದೊಡ್ಡ ತಪ್ಪು ಎಂದರೆ ಮೊಟ್ಟೆಯನ್ನು ಬೀಟ್ ಮಾಡುವ ಆರಂಭದಲ್ಲೇ ಉಪ್ಪು ಸೇರಿಸುವುದು. ಹೀಗೆ ಮಾಡುವುದರಿಂದ ಮೊಟ್ಟೆಯಲ್ಲಿನ ಪ್ರೋಟೀನ್ ರಚನೆಗೆ ಧಕ್ಕೆಯಾಗಿ, ಅದು ತೇವಾಂಶವನ್ನು ಬೇಗನೆ ಕಳೆದುಕೊಳ್ಳುತ್ತದೆ. ಫಲಿತಾಂಶವಾಗಿ ಆಮ್ಲೆಟ್ ಮೃದುತ್ವವನ್ನು ಕಳೆದುಕೊಂಡು ರಬ್ಬರ್ನಂತೆ ಅಥವಾ ದಪ್ಪವಾಗಿ ತಯಾರಾಗುತ್ತದೆ. ಮೊಟ್ಟೆಯ ಮಿಶ್ರಣವನ್ನು ಪ್ಯಾನ್ ಮೇಲೆ ಹಾಕುವ ಕೆಲವು ಸೆಕೆಂಡುಗಳ ಮೊದಲು ಮಾತ್ರ ಉಪ್ಪು ಸೇರಿಸಿ. ಇದರಿಂದ ಆಮ್ಲೆಟ್ ಚೆನ್ನಾಗಿ ಉಬ್ಬಿ ಬರುತ್ತದೆ.
ತರಕಾರಿಗಳಲ್ಲಿದೆ ಪೋಷಕಾಂಶ
ಬಹಳಷ್ಟು ಜನರು ಕೇವಲ ಮೊಟ್ಟೆಯನ್ನು ಒಡೆದು ಉಪ್ಪು, ಖಾರ ಹಾಕಿ ಆಮ್ಲೆಟ್ ಮಾಡುತ್ತಾರೆ. ಆದರೆ ಇದರಲ್ಲಿ ನಾರಿನಂಶ (Fibre) ಇರುವುದಿಲ್ಲ. ಕೇವಲ ಮೊಟ್ಟೆಯನ್ನು ಮಾತ್ರ ಸೇವಿಸುವುದರಿಂದ ಉಂಟಾಗುವ ಅಸಮತೋಲನವನ್ನು ಹೋಗಲಾಡಿಸಲು ಕಡ್ಡಾಯವಾಗಿ ತರಕಾರಿಗಳನ್ನು ಬಳಸಬೇಕು. ಈರುಳ್ಳಿ, ಟೊಮೆಟೊ, ಹಸಿಮೆಣಸಿನಕಾಯಿಯ ಜೊತೆಗೆ ಪಾಲಕ್, ಕ್ಯಾಪ್ಸಿಕಂ ಅಥವಾ ಕ್ಯಾರೆಟ್ ತುರಿಯನ್ನು ಕೂಡ ಬಳಸಬಹುದು. ನಾರಿನಂಶ ಹೆಚ್ಚಿರುವ ತರಕಾರಿಗಳನ್ನು ಸೇರಿಸುವುದರಿಂದ ಜೀರ್ಣಕ್ರಿಯೆ ಸುಧಾರಿಸುತ್ತದೆ.
ಹಸಿಯಾಗಿ ಇರಬಾರದು
ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿಯನ್ನು ನೇರವಾಗಿ ಮೊಟ್ಟೆಯ ಮಿಶ್ರಣಕ್ಕೆ ಹಾಕಿ ಪ್ಯಾನ್ ಮೇಲೆ ಸುರಿದರೆ, ಆ ಕಡಿಮೆ ಸಮಯದಲ್ಲಿ ತರಕಾರಿಗಳು ಸರಿಯಾಗಿ ಬೇಯುವುದಿಲ್ಲ. ಇದರಿಂದ ತಿನ್ನುವಾಗ ಹಸಿ ವಾಸನೆ ಬರುವುದಲ್ಲದೆ, ರುಚಿಯೂ ಕಡಿಮೆಯಾಗುತ್ತದೆ. ಮೊದಲಿಗೆ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಅಥವಾ ಬೆಣ್ಣೆ ಹಾಕಿ ತರಕಾರಿಗಳನ್ನು ಹದವಾಗಿ ಹುರಿದುಕೊಳ್ಳಿ. ಅವು ಅರ್ಧ ಬೆಂದ ನಂತರವಷ್ಟೇ ಸಿದ್ಧಪಡಿಸಿದ ಮೊಟ್ಟೆಯ ಮಿಶ್ರಣವನ್ನು ಅದಕ್ಕೆ ಸೇರಿಸಿ. ಹೀಗೆ ಮಾಡುವುದರಿಂದ ತರಕಾರಿಗಳ ನೈಸರ್ಗಿಕ ರುಚಿ ಆಮ್ಲೆಟ್ಗೆ ಸೇರುತ್ತದೆ.
ಆಮ್ಲೆಟ್ Vs ಹಾಫ್ ಬಾಯಿಲ್
ಬಹಳಷ್ಟು ಜನರು ಮೊಟ್ಟೆಯನ್ನು ಒಡೆದು ಎರಡು ಬದಿಯಲ್ಲಿ ಬೇಯಿಸುವುದನ್ನೇ ಆಮ್ಲೆಟ್ ಎಂದುಕೊಳ್ಳುತ್ತಾರೆ. ತಾಂತ್ರಿಕವಾಗಿ ಇದು ಆಮ್ಲೆಟ್ ಅಲ್ಲದಿದ್ದರೂ ಆರೋಗ್ಯಕರವೇ. ಆದರೆ ಆಮ್ಲೆಟ್ ಎಂದರೆ ಎಲ್ಲಾ ಪದಾರ್ಥಗಳನ್ನು ಸಮಪ್ರಮಾಣದಲ್ಲಿ ಬೆರೆಸಿ ಒಂದು ಪದ್ಧತಿಯಂತೆ ಬೇಯಿಸುವುದು. ಬೇಯಿಸುವಾಗ ಅತಿಯಾಗಿ ಎಣ್ಣೆ ಬಳಸದೆ, ಕಡಿಮೆ ಉರಿಯಲ್ಲಿ ಬೇಯಿಸುವುದರಿಂದ ಮೊಟ್ಟೆಯಲ್ಲಿನ ಪೋಷಕಾಂಶಗಳು ಆವಿಯಾಗದಂತೆ ಇರುತ್ತವೆ.
ಗಮನವಿರಲಿ...
ಸಣ್ಣ ಬದಲಾವಣೆಗಳೇ ದೊಡ್ಡ ಫಲಿತಾಂಶ ನೀಡುತ್ತವೆ. ಆಮ್ಲೆಟ್ ತಯಾರಿಕೆಯಲ್ಲಿ ನೀವು ಈ ಜಾಗ್ರತೆ ವಹಿಸಿದರೆ, ಅದು ಕೇವಲ ಹೊಟ್ಟೆ ತುಂಬಿಸುವ ಆಹಾರ ಮಾತ್ರವಲ್ಲದೆ, ದೇಹಕ್ಕೆ ಅಗತ್ಯವಿರುವ ಪೂರ್ಣ ಪ್ರಮಾಣದ ಪ್ರೋಟೀನ್ ಮತ್ತು ವಿಟಮಿನ್ಗಳನ್ನು ಒದಗಿಸುವ ಅದ್ಭುತ ಆರೋಗ್ಯ ಸಂಪನ್ಮೂಲವಾಗಿ ಬದಲಾಗುತ್ತದೆ.
ಆರೋಗ್ಯ, ಸೌಂದರ್ಯ, ಫಿಟ್ನೆಸ್, ಕಿಚನ್ ಟಿಪ್ಸ್, ಸಂಬಂಧ, ಫ್ಯಾಷನ್, ರೆಸಿಪಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.
