ಆಗಸ್ಟ್ 26ರಂದು 'ಟಾಕ್ಸಿಕ್' ಸಿನಿಮಾ ತೆರೆಗೆ ಬರಲು ಸಜ್ಜಾಗಿದ್ದು, ಇದೇ ವೇಳೆ ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ಯಶ್, ತಮ್ಮ ಸಹನಟಿ ಕಿಯಾರಾ ಅಡ್ವಾಣಿ ಬಗ್ಗೆ ಆಡಿರುವ ಮಾತುಗಳು ಇದೀಗ ಸಖತ್ ಗಮನ ಸೆಳೆಯುತ್ತಿವೆ.
ರಾಕಿಂಗ್ ಸ್ಟಾರ್ ಯಶ್ ಹಾಗೂ ಬಾಲಿವುಡ್ ನಟಿ ಕಿಯಾರಾ ಅಡ್ವಾಣಿ ಅಭಿನಯದ ಬಹುನಿರೀಕ್ಷಿತ ಸಿನಿಮಾ ‘ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್’ ಬಿಡುಗಡೆಗೆ ಕ್ಷಣಗಣನೆ ಶುರುವಾಗಿದೆ. ಆಗಸ್ಟ್ 26ರಂದು ಸಿನಿಮಾ ತೆರೆಗೆ ಬರಲು ಸಜ್ಜಾಗಿದ್ದು, ಇದೇ ವೇಳೆ ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ಯಶ್, ತಮ್ಮ ಸಹನಟಿ ಕಿಯಾರಾ ಅಡ್ವಾಣಿ ಬಗ್ಗೆ ಆಡಿರುವ ಮಾತುಗಳು ಇದೀಗ ಸಖತ್ ಗಮನ ಸೆಳೆಯುತ್ತಿವೆ.
ಹೈದರಾಬಾದ್ನಲ್ಲಿ ನಡೆದ ಅದ್ದೂರಿ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ಕಿಯಾರಾ ಭಾಗಿಯಾಗಿದ್ದರು. ಭಾರೀ ಸಂಖ್ಯೆಯಲ್ಲಿ ಅಭಿಮಾನಿಗಳು ಸೇರಿದ್ದ ಈ ಕಾರ್ಯಕ್ರಮದಲ್ಲಿ ಕಿಯಾರಾ ಗಮನ ಸೆಳೆದರು. ಇದೇ ವೇಳೆ ವೇದಿಕೆಯಲ್ಲಿ ಕಿಯಾರಾ ಅವರ ಅಭಿನಯವನ್ನು ಹಾಡಿಹೊಗಳಿದ ಯಶ್, ‘ಟಾಕ್ಸಿಕ್’ನಲ್ಲಿ ಅವರ ಹೊಸ ಅವತಾರವನ್ನು ನೋಡಿದ ಬಳಿಕ ಭಾರತ ಮತ್ತೆ ಕಿಯಾರಾ ಅವರನ್ನು ಇನ್ನೊಂದು ಮಟ್ಟದಲ್ಲಿ ಪ್ರೀತಿಸಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
‘ಕಿಯಾರಾ ಅದ್ಭುತ ನಟಿ, ಅದ್ಭುತ ಸಹನಟಿ!’
Related Articles
ಕಿಯಾರಾ ಬಗ್ಗೆ ಮಾತನಾಡಿದ ಯಶ್, ಅವರ ಸರಳತೆ, ಮುಗ್ಧತೆ ಹಾಗೂ ನಟನಾ ಸಾಮರ್ಥ್ಯವನ್ನು ಮೆಚ್ಚಿಕೊಂಡಿದ್ದಾರೆ. “ಅದ್ಭುತ ನಟಿ, ಅದ್ಭುತ ಸಹನಟಿ! ಕಿಯಾರಾ ತುಂಬಾ ಸರಳ ಮತ್ತು ಪರಿಶುದ್ಧ ಮನಸ್ಸಿನವರು. ಅವರು ಅದ್ಭುತ ಕಲಾವಿದೆ. ಆದರೆ ಇಲ್ಲಿಯವರೆಗೆ ನೀವು ನೋಡಿರುವ ಕಿಯಾರಾ ಅವರಿಗಿಂತ ವಿಭಿನ್ನವಾದ ಮತ್ತೊಂದು ಮುಖವನ್ನು ಆಗಸ್ಟ್ 26ರಿಂದ ನೋಡಲಿದ್ದೀರಿ. ಭಾರತ ಮತ್ತೆ ಅವರನ್ನು ಪ್ರೀತಿಸಲಿದೆ, ಅದೂ ಇನ್ನೊಂದು ಮಟ್ಟದಲ್ಲಿ.” ಇದೇ ವೇಳೆ ‘ಟಾಕ್ಸಿಕ್’ನ ಭಾಗವಾಗಿದ್ದಕ್ಕಾಗಿ ಕಿಯಾರಾಗೆ ಧನ್ಯವಾದ ತಿಳಿಸಿದ ಯಶ್, ಚಿತ್ರದ ಮೂಲಕ ಪ್ರೇಕ್ಷಕರು ಅವರ ಹೊಸ ಪ್ರತಿಭೆಯನ್ನು ಕಂಡುಕೊಳ್ಳಲಿದ್ದಾರೆ ಎಂಬ ಸುಳಿವು ನೀಡಿದ್ದಾರೆ.
‘ಟಾಕ್ಸಿಕ್’ನಲ್ಲಿ ಕಿಯಾರಾ ಯಾರು?
ಗೀತು ಮೋಹನ್ದಾಸ್ ನಿರ್ದೇಶನದ ‘ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್’ ಸಿನಿಮಾದಲ್ಲಿ ಕಿಯಾರಾ ಅಡ್ವಾಣಿ ‘ನಾಡಿಯಾ’ ಎಂಬ ಸಂಕೀರ್ಣ ಹಾಗೂ ತೀವ್ರ ಸ್ವಭಾವದ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದು ಕಿಯಾರಾ ಅವರ ಕನ್ನಡ ಚಿತ್ರರಂಗದ ಚೊಚ್ಚಲ ಸಿನಿಮಾ ಕೂಡ ಹೌದು. ಈ ಪಾತ್ರಕ್ಕಾಗಿ ಅವರು ಭಾವನಾತ್ಮಕವಾಗಿ ವಿಭಿನ್ನ ಆಯಾಮಗಳನ್ನು ಅನ್ವೇಷಿಸುವುದರ ಜೊತೆಗೆ, ಹಲವು ಕಠಿಣ ಆ್ಯಕ್ಷನ್ ದೃಶ್ಯಗಳಲ್ಲೂ ಕಾಣಿಸಿಕೊಂಡಿದ್ದಾರೆ.ಹೀಗಾಗಿ, ಯಶ್ ಹೇಳಿರುವ ‘ಇಲ್ಲಿಯವರೆಗೆ ನೋಡಿರದ ಕಿಯಾರಾ’ ಯಾರು ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮತ್ತಷ್ಟು ಹೆಚ್ಚಾಗಿದೆ.
‘ಟಾಕ್ಸಿಕ್’ ನನ್ನನ್ನು ಕಂಫರ್ಟ್ ಝೋನ್ನಿಂದ ಹೊರಗೆ ತಂದಿತು!
ಈ ಹಿಂದೆ ‘ಟಾಕ್ಸಿಕ್’ನಲ್ಲಿ ಕೆಲಸ ಮಾಡಿದ ಅನುಭವದ ಬಗ್ಗೆ ಕಿಯಾರಾ ಕೂಡ ಮಾತನಾಡಿದ್ದರು. ಈ ಸಿನಿಮಾ ತಮ್ಮನ್ನು ಕಂಫರ್ಟ್ ಝೋನ್ನಿಂದ ಹೊರಗೆ ಬಂದು ಹೊಸದನ್ನು ಪ್ರಯತ್ನಿಸುವಂತೆ ಮಾಡಿತು ಎಂದು ಅವರು ಹೇಳಿಕೊಂಡಿದ್ದರು. ಇತ್ತೀಚೆಗೆ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಚಿತ್ರದ ಮೇಕಿಂಗ್ನ ಬಿಹೈಂಡ್ ದಿ ಸೀನ್ಸ್ ವಿಡಿಯೋ ಹಂಚಿಕೊಂಡಿದ್ದ ಕಿಯಾರಾ, ‘ಟಾಕ್ಸಿಕ್’ ಸಿನಿಮಾ ಮಾತ್ರವಲ್ಲ, ಅದನ್ನು ನಿರ್ಮಿಸುವ ಪ್ರಯಾಣವೂ ಒಂದು ಫೇರಿ ಟೇಲ್ನಂತಿತ್ತು ಎಂದು ಬಣ್ಣಿಸಿದ್ದರು. ಚಿತ್ರದ ಸೃಜನಶೀಲ ದೃಷ್ಟಿಕೋನ ಹಾಗೂ ವಿವಿಧ ಕ್ಷೇತ್ರಗಳ ಪ್ರತಿಭಾವಂತರು ಒಂದಾಗಿ ಕೆಲಸ ಮಾಡಿದ ರೀತಿ ತಮ್ಮನ್ನು ಸಾಕಷ್ಟು ಪ್ರಭಾವಿಸಿದೆ ಎಂದು ಅವರು ಹೇಳಿದ್ದರು.
‘ಭಯ ಹುಟ್ಟಿಸುವ ವಿಷಯಗಳಿಗೆ ಹೌದು ಎನ್ನುವುದೇ ಬೆಳವಣಿಗೆ’
‘ಟಾಕ್ಸಿಕ್’ ತಮ್ಮನ್ನು ಅಪರಿಚಿತ ಜಗತ್ತನ್ನು ಸ್ವೀಕರಿಸುವಂತೆ ಮಾಡಿತು ಎಂದು ಹೇಳಿರುವ ಕಿಯಾರಾ, ಹೊಸ ವಿಷಯಗಳನ್ನು ಕಲಿಯಲು, ಕುತೂಹಲದಿಂದ ಇರಲು ಮತ್ತು ಸವಾಲುಗಳನ್ನು ಸ್ವೀಕರಿಸಲು ಈ ಸಿನಿಮಾ ಕಲಿಸಿತು ಎಂದು ಹಂಚಿಕೊಂಡಿದ್ದಾರೆ. ತಮ್ಮ ಪಾಲಿಗೆ ಬೆಳವಣಿಗೆ ಎಂದರೆ, ಸ್ವಲ್ಪ ಭಯ ಹುಟ್ಟಿಸುವಂತಹ ಅವಕಾಶಗಳಿಗೂ ‘ಹೌದು’ ಎನ್ನುವುದು ಹಾಗೂ ಆ ನಂತರದ ಪ್ರಯಾಣವನ್ನು ಆನಂದಿಸುವುದು ಎಂದು ಕಿಯಾರಾ ಅಭಿಪ್ರಾಯಪಟ್ಟಿದ್ದಾರೆ.
ಒಟ್ಟಿನಲ್ಲಿ, ಯಶ್ ಅವರ ಭರ್ಜರಿ ಪ್ರಶಂಸೆ, ಕಿಯಾರಾ ಅವರ ವಿಭಿನ್ನ ಪಾತ್ರ, ಗೀತು ಮೋಹನ್ದಾಸ್ ಅವರ ನಿರ್ದೇಶನ ಹಾಗೂ ಬೃಹತ್ ಪ್ರಮಾಣದ ಆ್ಯಕ್ಷನ್-ಥ್ರಿಲ್ಲರ್ ಕಥಾಹಂದರದಿಂದ ‘ಟಾಕ್ಸಿಕ್’ ಮೇಲಿನ ನಿರೀಕ್ಷೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಆಗಸ್ಟ್ 26ರಂದು ತೆರೆಗೆ ಬರಲಿರುವ ಈ ಸಿನಿಮಾ ಕಿಯಾರಾ ಅವರ ಕನ್ನಡ ಚಿತ್ರರಂಗದ ಚೊಚ್ಚಲ ಹೆಜ್ಜೆಗೂ ಸಾಕ್ಷಿಯಾಗಲಿದೆ.
