ಸಂಘರ್ಷದ ಈ ಸಮಯದಲ್ಲಿ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರವನ್ನು ಮರಳಿ ಪಡೆಯಬಹುದೇ ಭಾರತ?

ಪಾಕ್ ಆಕ್ರಮಿತ ಕಾಶ್ಮೀರ (ಪಿಒಕೆ) ಭಾರತಕ್ಕೆ ಸೇರಿದ್ದು, ಅದನ್ನು ಹಿಂದಕ್ಕೆ ಪಡೆಯುವ ಬಗ್ಗೆ ಬಿಜೆಪಿ ನಾಯಕರು ಹೇಳಿಕೆ ನೀಡಿದ್ದಾರೆ. ಯುದ್ಧ, ಸೈನಿಕ ಶಕ್ತಿ, ಅಥವಾ ರಾಜತಾಂತ್ರಿಕ ಮಾತುಕತೆಯ ಮೂಲಕ ಪಿಒಕೆಯನ್ನು ವಶಪಡಿಸಿಕೊಳ್ಳುವುದು ಸಾಧ್ಯವೇ ಎಂಬುದನ್ನು ಈ ಲೇಖನ ವಿಶ್ಲೇಷಿಸುತ್ತದೆ.

ಈ ಪ್ರಶ್ನೆ ಈಗ ಬಹಳ ಚರ್ಚೆಯಲ್ಲಿದೆ. ಭಾರತೀಯ ಜನತಾ ಪಕ್ಷದ (ಬಿಜೆಪಿ) ನಾಯಕರಾದ ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ ಮತ್ತು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸೇರಿದಂತೆ ಹಲವರು, " ಪಾಕ್ ಆಕ್ರಮಿತ ಕಾಶ್ಮೀರ (ಪಿಒಕೆ) ಭಾರತಕ್ಕೆ ಸೇರಿದ್ದು, ಅದನ್ನು ಹಿಂದಕ್ಕೆ ಪಡೆದೇ ಪಡೆಯುತ್ತೇವೆ" ಎಂದು ಸ್ಪಷ್ಟವಾಗಿ ಹೇಳಿದ್ದಾರೆ. ಈ ಮಾತನ್ನು ಸಂಸತ್ತಿನಲ್ಲಿಯೂ ಪುನರಾವರ್ತಿಸಿದ್ದಾರೆ. ಹೀಗಾಗಿ, ಜನರು ಪ್ರಶ್ನಿಸುತ್ತಿದ್ದಾರೆ  ಪಿಒಕೆಯನ್ನು ಭಾರತವು ಯುದ್ಧ, ಸೈನಿಕ ಶಕ್ತಿ, ಅಥವಾ ರಾಜತಾಂತ್ರಿಕ ಮಾತುಕತೆಯ ಮೂಲಕ ವಶಪಡಿಸಿಕೊಳ್ಳುವುದು ಸಾಧ್ಯವೇ? ಇಲ್ಲಿದೆ ಈ ಬಗ್ಗೆ ಸಂಪೂರ್ಣ ಮಾಹಿತಿ.

ಪಿಒಕೆಯ ಬದಲಾವಣೆಗೊಂಡ ಭೂಮಿ
ಭಾರತ ವಿಭಜನೆಯಾದ ಕೂಡಲೇ, ಜಮ್ಮು ಮತ್ತು ಕಾಶ್ಮೀರದ ಅಂದಿನ ಮಹಾರಾಜರಾದ ಹರಿ ಸಿಂಗ್ ಅವರು ಭಾರತದ ಪ್ರವೇಶ ಸಾಧನಕ್ಕೆ ಸಹಿ ಹಾಕುವ ಮೂಲಕ ಭಾರತೀಯ ಒಕ್ಕೂಟಕ್ಕೆ ಸೇರಲು ಒಪ್ಪಿಕೊಂಡರು. ಅಂದಿನಿಂದ ಪಿಒಕೆ ಕಾನೂನುಬದ್ಧವಾಗಿ ಭಾರತದ ಅಂತರ್ಗತ ಭಾಗವಾಗಿದೆ. ಆದರೆ ಅಕ್ಟೋಬರ್ 1947 ರವರೆಗೆ ಜಮ್ಮು ಮತ್ತು ಕಾಶ್ಮೀರ ರಾಜ್ಯದ ಭಾಗವಾಗಿದ್ದ ಪ್ರದೇಶವನ್ನು ಪಾಕಿಸ್ತಾನಿ ಸೇನೆ "ಕಬೈಲಿಗಳು"  ಎಂಬ ಬುಡಕಟ್ಟು ಜನಾಂಗದ ರೂಪದಲ್ಲಿ ದಾಳಿ ನಡೆಸಿತು. ಈ ಆಕ್ರಮಣದ ನಂತರ, ಜಮ್ಮು ಮತ್ತು ಕಾಶ್ಮೀರದ ರಾಜನು ಭಾರತ ಸರ್ಕಾರದೊಂದಿಗೆ ವಿಲೀನವಾಗಲು ಒಪ್ಪಿಕೊಂಡಿದ್ದಾಗೇ ಕೆಲವು ಭಾಗಗಳು ಪಾಕಿಸ್ತಾನಿಯರ ವಶವಾಗಿಬಿಟ್ಟಿದ್ದವು. ಆಗ ಭಾರತ ಸೇನೆ ಮಧ್ಯೆ ಪ್ರವೇಶಿಸಿ ಹೋರಾಟ ನಡೆಸಿದರೂ, ಸಮಯ ಮೀರಿ ಹೋಗಿತ್ತು. ಇಂದು  ಪಾಕಿಸ್ತಾನವು ಸುಮಾರು 13,297 ಚದರ ಕಿಲೋಮೀಟರ್ ಪಿಒಕೆ ಮತ್ತು 72,971 ಚದರ ಕಿಲೋಮೀಟರ್ ಗಿಲ್ಗಿಟ್-ಬಾಲ್ಟಿಸ್ತಾನ್ ಪ್ರದೇಶವನ್ನು ತನ್ನ ಹತ್ತಿರ ಇಟ್ಟುಕೊಂಡಿದೆ.

ಭಾರತದ ಸೇನೆಯ ಶಕ್ತಿ, ಪಿಒಕೆ ಮೇಲೆ ದಾಳಿ ಸಾಧ್ಯವೇ?
ಸೈನಿಕ ಶಕ್ತಿಯ ದೃಷ್ಟಿಯಿಂದ ನೋಡಿದರೆ, ಭಾರತ ಪಿಒಕೆ ಅನ್ನು ವಶಪಡಿಸಿಕೊಳ್ಳಲು ಸಾಮರ್ಥ್ಯ ಹೊಂದಿದೆ. ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಸಕ್ರಿಯ ಸೈನ್ಯವನ್ನು ಹೊಂದಿದೆ. ಸುಮಾರು 14.5 ಲಕ್ಷ ಸೈನಿಕರು ಸೇವೆಯಲ್ಲಿದ್ದಾರೆ. ದೇಶವು 72 ಪರಮಾಣು ಶಸ್ತ್ರಾಸ್ತ್ರಗಳು, ರಫೇಲ್ ಯುದ್ಧವಿಮಾನಗಳು, ಎಸ್-400 ವಾಯು ರಕ್ಷಣಾ ವ್ಯವಸ್ಥೆ ಮತ್ತು ಬ್ರಹ್ಮೋಸ್ ಸೂಪರ್‌ಸಾನಿಕ್ ಕ್ಷಿಪಣಿ ಸೇರಿದಂತೆ ಬಲಿಷ್ಠ ಸಾಧನಗಳನ್ನು ಹೊಂದಿದೆ. 2025-26ರ ರಕ್ಷಣಾ ಬಜೆಟ್ ಸುಮಾರು $81 ಬಿಲಿಯನ್ ಆಗಿದ್ದು, ಇದು ಪಾಕಿಸ್ತಾನದ ಬಜೆಟ್‌ಗಿಂತ ಎಂಟು ಪಟ್ಟು ಹೆಚ್ಚು. ಅಲ್ಲದೆ, ಭಾರತವು "ಶೀತಲ ಆರಂಭ" ಎಂಬ ಯುದ್ಧತಂತ್ರವನ್ನು ರೂಪಿಸಿಕೊಂಡಿದೆ, ಇದರಿಂದ ದಾಳಿ ತ್ವರಿತವಾಗಿ ಮತ್ತು ನಿರ್ದಿಷ್ಟ ಗುರಿಗಳನ್ನು ಸಮರ್ಥವಾಗಿ ಹೊಡೆಯುವಂತೆ ಮಾಡಬಹುದು.

ಪಿಒಕೆ ಪ್ರದೇಶದ ಭೂಭಾಗ ಯುದ್ಧಕ್ಕೆ ದೊಡ್ಡ ಸವಾಲು
ಪಿಒಕೆ ಭೂ ಭಾಗದ ಪ್ರದೇಶವು ಹೋರಾಟಕ್ಕೆ ಬಹಳ ಕಠಿಣವಾಗಿದೆ. ಇಲ್ಲಿ ಬೆಟ್ಟ-ಗುಡ್ಡಗಳು, ಎತ್ತರದ ಪರ್ವತಗಳು, ಕಡಿದಾದ ಕಣಿವೆ ಹಾಗೂ ಕಡಿಮೆ ಆಕ್ಸಿಜನ್‌ ಇರುವ ಕಠಿಣ ಪ್ರದೇಶವಾಗಿದೆ. ಪಾಕಿಸ್ತಾನವು ಈ ಪ್ರದೇಶದಲ್ಲಿ ತನ್ನ ಸೇನೆಯನ್ನು ಭಾರೀ ಪ್ರಮಾಣದಲ್ಲಿ ನಿಯೋಜಿಸಿದ್ದು, ರಾವಲ್ಪಿಂಡಿಯ "ಎಕ್ಸ್ ಕಾರ್ಪ್ಸ್" ಎಂಬ ಪ್ರಮುಖ ಸೇನಾ ಘಟಕ ಈ ಬಗ್ಗೆ ಇನ್ನು ಕೆಲಸ ಮಾಡುತ್ತಿದೆ. ಈ ಪ್ರದೇಶಗಳಲ್ಲಿ ಟ್ಯಾಂಕ್‌ ವಿರೋಧಿ ಕ್ಷಿಪಣಿಗಳು ಮತ್ತು HQ-9 ಎಂಬ ಅತಿ ಶಕ್ತಿಶಾಲಿ ವಾಯು ರಕ್ಷಣಾ ವ್ಯವಸ್ಥೆಗಳನ್ನು ಕೂಡ ಪಾಕಿಸ್ತಾನ ಇಟ್ಟಿದೆ. ಗಿಲ್ಗಿಟ್-ಬಾಲ್ಟಿಸ್ತಾನ್ ಭಾಗದಲ್ಲಿ 8,000 ಮೀಟರ್ ಎತ್ತರದ ಬೆಟ್ಟಗಳು ಇದ್ದು, ಅಲ್ಲಿ ಯಂತ್ರೋಪಕರಣಗಳೊಂದಿಗೆ ಹೋರಾಡುವುದು ಬಹಳ ಕಷ್ಟ. ಕಾರಕೋರಂ ಹೆದ್ದಾರಿ ಮುಂತಾದ ಪ್ರಮುಖ ರಸ್ತೆಗಳು ಹೆಚ್ಚು  ಭದ್ರತೆಯಲ್ಲಿ ಇವೆ, ಅಲ್ಲಿಗೆ ಪ್ರವೇಶಿಸುವುದು ಅಷ್ಟು ಸುಲಭವಲ್ಲ.

ಪಿಒಕೆ ವಿಚಾರದಲ್ಲಿ ಹೊಸ ತಲೆನೋವು ಚೀನಾ
ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (ಪಿಒಕೆ) ಮತ್ತು ಗಿಲ್ಗಿಟ್-ಬಾಲ್ಟಿಸ್ತಾನ್ ಪ್ರದೇಶಗಳಲ್ಲಿ ಚೀನಾ ದೊಡ್ಡ ಯೋಜನೆಗಳನ್ನು ಕೈಗೊಂಡಿದೆ. “ಸಿಪಿಇಸಿ” (ಚೀನಾ-ಪಾಕಿಸ್ತಾನ ಆರ್ಥಿಕ ಮಾರ್ಗ) ಎಂಬ ಯೋಜನೆಯಗೆ ಬೀಜಿಂಗ್ 60 ಶತಕೋಟಿ ಡಾಲರ್‌ಗಿಂತ ಹೆಚ್ಚು ಹೂಡಿಕೆ ಮಾಡಿದೆ. ಚೀನಾಕ್ಕೆ ತನ್ನ ಹಿತಾಸಕ್ತಿಗಳಿಗೆ ಪೆಟ್ಟು ಬಿದ್ದರೆ ಯುದ್ಧಕ್ಕೆ ಕೈಹಾಕುವ ಸಾಧ್ಯತೆ ಇದೆ. ಮತ್ತೊಂದು ಭೀತಿ ಅಂದ್ರೆ, ಚೀನಾ ಹಿಮಾಲಯದ ಇನ್ನೊಂದು ಭಾಗದಿಂದ ಭಾರತಕ್ಕೆ ದಾಳಿ ಮಾಡಿದರೆ, ಭಾರತ ಇಬ್ಬರ ವಿರುದ್ಧ ಹೋರಾಡಬೇಕಾದ ಪರಿಸ್ಥಿತಿ ಉಂಟಾಗಬಹುದು.

POK - Pakistan Occupied Kashmir

ಪರಮಾಣು ಬಾಂಬ್ ಭೀತಿ
ಇದರ ಜೊತೆಗೆ, ಪಾಕಿಸ್ತಾನವು ತನ್ನದೇ ಆದ ಪರಮಾಣು ಶಸ್ತ್ರಾಸ್ತ್ರಗಳನ್ನು ಹೊಂದಿದೆ. ಭಾರತ ಪಿಒಕೆಗೆ ದಾಳಿ ಮಾಡಿದರೆ, ಪಾಕಿಸ್ತಾನ ಇದನ್ನು ತನ್ನ ಅಸ್ತಿತ್ವಕ್ಕೆ ಆಗಿರುವ ದೊಡ್ಡ ಅಪಾಯವೆಂದು ನೋಡಿ ಪರಮಾಣು ಬಾಂಬ್ ಬಳಸುವ ಭೀತಿ ಇದೆ. 2019ರಲ್ಲಿ ಅಮೆರಿಕದ ಗುಪ್ತಚರ ಸಂಸ್ಥೆಗಳು ನೀಡಿದ ವರದಿ ಪ್ರಕಾರ, ಭಾರತ-ಪಾಕಿಸ್ತಾನ ನಡುವೆ ದೊಡ್ಡ ಯುದ್ಧ ನಡೆದರೆ 10-20% ಸಾಧ್ಯತೆಯಷ್ಟು ಪರಮಾಣು ಶಸ್ತ್ರಾಸ್ತ್ರ ಬಳಸುವ ಅಪಾಯವಿದೆ. ಅಷ್ಟೆಲ್ಲಾ ಅಂಕಿ-ಅಂಶಗಳನ್ನು ಗಮನಿಸಿದರೆ, ಹಲವು ತಜ್ಞರು ಪಿಒಕೆಯನ್ನು ಈಗಲೇ ಹಿಂದಕ್ಕೆ ಪಡೆಯುವುದು ಬಹಳ ಅಪಾಯಕಾರಿ ಮತ್ತು ಅಸಾಧ್ಯ ಎನ್ನುತ್ತಾರೆ. ಅಂತಹ ನಿರ್ಧಾರವು ಗಂಭೀರ ತಪ್ಪಾಗಬಹುದು ಎನ್ನುವುದು ಅವರ ಅಭಿಪ್ರಾಯ.