ಐಶ್ವರ್ಯಾ ರೈಗೆ ಮತ್ತೊಂದು ಮದ್ವೆ? ಇದೇನಿದು ಹೊಸ ಗಾಸಿಪ್?

ಅಭಿಷೇಕ್ ಬಚ್ಚನ್ ಜೊತೆ ವಿಚ್ಛೇದನದ ಗಾಳಿಸುದ್ದಿಗಳು ಹರಿದಾಡುತ್ತಿದ್ದರೂ, ಈ ಬಗ್ಗೆ ಇನ್ನೂ ಕುಟುಂಬದಿಂದ ಯಾವುದೇ ಸ್ಪಷ್ಟನೆ ನೀಡಿಲ್ಲ. ಆದರೆ, ಅವರೆಲ್ಲರ ನಡತೆ ನೋಡಿದರೆ ಇಬ್ಬರ ನಡುವೆ ಯಾವುದೂ ಸರಿ ಇಲ್ಲವೆನ್ನುವುದು ಸ್ಪಷ್ಟ. ಇದೇ ಸಂದರ್ಭದಲ್ಲಿ ಐಶ್ವರ್ಯಾ ರೈ ಮತ್ತೆ ಸುದ್ದಿಯಲ್ಲಿದ್ದು, ಮರಕ್ಕೆ ಮದುವೆಯಾದ್ರಂತ ಅನ್ನೋ ಹಳೇ ಸುದ್ದಿಯೊಂದು ಮತ್ತೆ ರೆಕ್ಕೆ ಪುಕ್ಕದೊಂದಿಗೆ ಹಾರಾಡುತ್ತಿದೆ.

ಮಾಜಿ ವಿಶ್ವ ಸುಂದರಿ ಮತ್ತು ಪ್ರಸಿದ್ಧ ಬಾಲಿವುಡ್ ನಟಿ ಐಶ್ವರ್ಯಾ ರೈ ಅವರು ಅಭಿಷೇಕ್ ಬಚ್ಚನ್ ಅವರೊಂದಿಗಿನ ವಿಚ್ಛೇದನದ ಗಾಳಿಸುದ್ದಿಗಳಿಂದಾಗಿ ಸುದ್ದಿಯಲ್ಲಿದ್ದಾರೆ. 2007ರಲ್ಲಿ ಮದುವೆಯಾದ ಈ ಜೋಡಿ ಬೇರೆಯಾಗಲು ಸಿದ್ಧರಾಗಿದ್ದಾರೆನ್ನಲಾಗುತ್ತಿದೆ. ಈ ಬಾಲಿವುಡ್ ಸೆಲೆಬ್ರಿಟಿ ಮದುವೆ ಬಹಳ ಪ್ರಚಾರ ಪಡೆದಿತ್ತು. ಆದರೆ, ಐಶ್ವರ್ಯಾ ಅಭಿಷೇಕ್ ಅವರನ್ನು ಮದುವೆಯಾಗುವ ಮುನ್ನವೇ ಮರದ ಜೊತೆ ದಾಂಪತ್ಯಕ್ಕೆ ಕಾಲಿಟ್ಟಿದ್ದರಂತೆ. 

ಐಶ್ವರ್ಯಾ ಮತ್ತು ಅಭಿಷೇಕ್ ಪ್ರೀತಿ 'ಧೂಮ್ 2' ಚಿತ್ರದ ಸೆಟ್‌ನಲ್ಳಲಿ ಶುರುವಾಗಿದ್ದು.  ಚಿತ್ರೀಕರಣದ ವೇಳೆಯೇ ಅವರಿಬ್ಬರ ಕೆಮಿಸ್ಟ್ರಿ ಬಗ್ಗೆ ಸಾಕಷ್ಟು ಸುದ್ದಿಯಾಗಿತ್ತು. 'ಗುರು' ಚಿತ್ರದಲ್ಲಿ ಕೆಲಸ ಮಾಡುವಾಗ ಪರಸ್ಪರ ತಮ್ಮ ಪ್ರೀತಿಯನ್ನು ಬಹಿರಂಗವಾಗಿ ವ್ಯಕ್ತಪಡಿಸುತ್ತಿದ್ದರು. ವರ್ಷ ಡೇಟಿಂಗ್ ಮಾಡಿದ ನಂತರ, ಈ ಜೋಡಿ ಅಭಿಮಾನಿಗಳು ಮತ್ತು ಮಾಧ್ಯಮಗಳ ಗಮನ ಸೆಳೆದ ಅದ್ದೂರಿ ಸಮಾರಂಭದಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು.

ಮರದೊಂದಿಗೆ ಮದುವೆ ವದಂತಿಯೂ ಈ ಜೋಡಿ ಮದ್ವೆ ವೇಳೆ ಸಾಕಷ್ಟು ಸುದ್ದಿಯಾಗಿತ್ತು. ಇದು ಐಶ್ವರ್ಯಾ ಅವರ ಮೇಲೆ ಆಳವಾದ ಪರಿಣಾಮ ಬೀರಿತು. 2008ರಲ್ಲಿ ನೀಡಿದ ಸಂದರ್ಶನವೊಂದರಲ್ಲಿ, ಈ ಊಹಾಪೋಹಗಳಿಗೆ ಸ್ಪಷ್ಟನೆ ನೀಡಿದ್ದರು. ಮಂಗಳ ದೋಷವಿದ್ದು, ತಾವು ಶಾಪಗ್ರಸ್ತೆ ಎಂದು ಜ್ಯೋತಿಷಿಗಳ ಸಲಹೆ ಮೇರೆಗೆ ವೃಕ್ಷದೊಂದಿಗೆ ವಿವಾಹವಾಗಿದ್ದಾಗಿ ಬಹಿರಂಗಗೊಳಿಸಿದ್ದರು. ಸತ್ಯವನ್ನು ತಿರುಚಿದ್ದಕ್ಕಾಗಿ ಮಾಧ್ಯಮವನ್ನು ಟೀಕಿಸುವ ಮೂಲಕ ಐಶ್ವರ್ಯಾ ಸಂವೇದನಾಶೀಲತೆಯ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದರು.

ವದಂತಿಗಳನ್ನು ಅರ್ಥಹೀನವೆಂದ ಐಶ್ವರ್ಯಾ, ಅವುಗಳ ಬಗ್ಗೆ ತಲೆ ಕೆಡಿಸಿಕೊಳ್ಳುವ ಅಗತ್ಯವಿಲ್ಲವೆಂದಿದ್ದರು. ಅಂತಹ ವಿಷಯಗಳನ್ನು ತಮ್ಮ ಕುಟುಂಬದ ಮುಖ್ಯಸ್ಥರಿಗೆ ಬಿಡುವುದಾಗಿ ಹೇಳಿ ಕೊಂಡಿದ್ದರು. ನಂತರ, ಅವರ ಮಾವ ಅಮಿತಾಬ್ ಬಚ್ಚನ್, ಹರಿದಾಡುತ್ತಿದ್ದ ಗಾಳಿ ಸುದ್ದಿಗೆ ಸ್ಪಷ್ಟನೆ ನೀಡಲು ಮಾಧ್ಯಮವನ್ನು ಉದ್ದೇಶಿಸಿ ಮಾತನಾಡಿ, ಊಹಾಪೋಹಗಳಿಗೆ ತೆರೆ ಎಳೆದರು.