ಡ್ರ್ಯಾಗನ್ ಮೌನ: ಪಾಪಿ ಪಾಕ್‌ಗೆ ಪರೋಕ್ಷ ಬೆಂಬಲದ ಅನುಮಾನ!

ನವದೆಹಲಿ(ಫೆ.15): CRPF ವಾಹನದ ಮೇಲಿನ ಪಾಕ್ ಬೆಂಬಲಿತ ಉಗ್ರರ ಆತ್ಮಾಹುತಿ ದಾಳಿಯನ್ನು ಇಡೀ ವಿಶ್ವ ಖಂಡಿಸುತ್ತಿದೆ. ಅಮೆರಿಕ, ಫ್ರಾನ್ಸ್, ಜರ್ಮನಿ, ನೇಪಾಳ ಸೇರಿದಂತೆ ವಿಶ್ವದ ಹಲವು ಪ್ರಮುಖ ರಾಷ್ಟ್ರಗಳು ಉಗ್ರ ದಾಳಿಯನ್ನು ಬಲವಾಗಿ ಖಂಡಿಸಿವೆ.

ಆದರೆ ನೆರೆಯ ಚೀನಾ ಮಾತ್ರ ಭಾರತದ ಮೇಲಿನ ಉಗ್ರ ದಾಳಿಯನ್ನು ಕಾಟಾಚಾರಕ್ಕೆ ಎಂಬಂತೆ ಖಂಡಿಸಿದೆ. ದಾಳಿಯ ಕುರಿತು ಸಣ್ಣ ಧ್ವನಿಯಲ್ಲಿ ಅಧಿಕೃತ ಹೇಳಿಕೆ ನೀಡಿರುವ ಚೀನಾ ನಡೆ ಅನುಮಾನ ಮೂಡಿಸುತ್ತಿದೆ.

ಪಾಕಿಸ್ತಾನದೊಂದಿಗೆ ಗಾಢ ವ್ಯಾಪಾರ ಸಂಬಂಧ ಹೊಂದಿರುವ ಚೀನಾ, ಪಾಕ್ ಬೆಂಬಲಿತ ಉಗ್ರರ ದಾಳಿಯನ್ನು ಖಂಡಿಸದೇ ಆ ರಾಷ್ಟ್ರದ ಪರವಾಗಿ ನಿಂತಿರುವ ಅನುಮಾನ ಇದೀಗ ಕಾಡತೊಡಗಿದೆ. 

ಅಷ್ಟೇ ಅಲ್ಲದ ದಾಳಿಯ ಹೊಣೆ ಹೊತ್ತಿರುವ ಪಾಕ್ ಬೆಂಬಲಿತ ಜೈಶ್-ಎ-ಮೊಹ್ಮದ್ ಸಂಘಟನೆಯ ಮುಖ್ಯಸ್ಥ ಮಸೂದ್ ಅಜರ್‌ಗೆ ಚೀನಾ ಬೆಂಬಲ ನೀಡುತ್ತಿರುವುದು ಇಡೀ ಜಗತ್ತಿಗೆ ಗೊತ್ತಿರುವ ಸಂಗತಿ. ಭಾರತದ ಸತತ ಮನವಿಗಳ ಬಳಿಕವೂ ಮಸೂದ್ ಗೆ ಉಗ್ರ ಪಟ್ಟ ನೀಡಲು ಚೀನಾ ಹಿಂದೇಟು ಹಾಕುತ್ತಿದೆ.

ಇದೀಗ ಉಗ್ರರ ಭೀಕರ ದಾಳಿಯನ್ನೂ ಖಂಡಿಸದ ಚೀನಾ, ಭಯೋತ್ಪಾದನೆ ವಿಷಯದಲ್ಲಿ ಪಾಕಿಸ್ತಾನದ ಬೆಂಬಲಕ್ಕೆ ನಿಂತಿದೆಯಾ?, ಒಂದು ವೇಳೆ ನಿಂತಿದ್ದರೆ ಅದನ್ನು ಧೈರ್ಯವಾಗಿ ಏಕೆ ಘೋಷಿಸುತ್ತಿಲ್ಲ ಎಂಬ ಪ್ರಶ್ನೆಗಳು ಮೂಡತೊಡಗಿವೆ.