ಶೌರ್ಯ ಚಕ್ರ ಪುರಸ್ಕೃತ ಹುತಾತ್ಮ ಮುದಾಸಿರ್ ತಾಯಿಯೂ ಪಾಕಿಸ್ತಾನಕ್ಕೆ ಗಡೀಪಾರು!
Follow Us
Synopsis
ಕಾಶ್ಮೀರದಲ್ಲಿ ವಾಸಿಸುತ್ತಿರುವ 60 ಪಾಕಿಸ್ತಾನಿ ನಾಗರಿಕರನ್ನು ಗಡೀಪಾರು ಮಾಡಲಾಗುತ್ತಿದೆ. ಇವರಲ್ಲಿ ಶೌರ್ಯ ಚಕ್ರ ವಿಜೇತ ಹುತಾತ್ಮ ಯೋಧನ ತಾಯಿ ಮತ್ತು ಸಿಆರ್‌ಪಿಎಫ್ ಜವಾನನ ಪತ್ನಿ ಸೇರಿದ್ದಾರೆ.
ನವದೆಹಲಿ (ಏ.29): ಕಾಶ್ಮೀರದಲ್ಲಿ ವಾಸಿಸುತ್ತಿರುವ 60 ಪಾಕಿಸ್ತಾನಿ ನಾಗರಿಕರನ್ನು ಪಾಕಿಸ್ತಾನಕ್ಕೆ ಗಡೀಪಾರು ಮಾಡಲಾಗುತ್ತಿದೆ. ಇವರಲ್ಲಿ ಜಮ್ಮು ಮತ್ತು ಕಾಶ್ಮೀರ ಪೊಲೀಸರ ಶೌರ್ಯ ಚಕ್ರ ವಿಜೇತ (ಮರಣೋತ್ತರ) ಹುತಾತ್ಮರ ತಾಯಿ ಮತ್ತು ಪಾಕಿಸ್ತಾನದಲ್ಲಿ ವಾಸಿಸುತ್ತಿರುವ ಸಿಆರ್‌ಪಿಎಫ್ ಜವಾನರ ಪತ್ನಿ ಕೂಡ ಸೇರಿದ್ದಾರೆ.
ಹುತಾತ್ಮ ಯೋಧ ಮುದಾಸಿರ್ ಅಹ್ಮದ್ ಶೇಖ್ ಅವರ ತಾಯಿ ಶಮೀಮಾ ಅಖ್ತರ್ ಅವರು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (ಪಿಒಕೆ) ಮೂಲದವರು ಎಂದು ಅಧಿಕಾರಿಗಳನ್ನು ಉಲ್ಲೇಖಿಸಿ ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ. ಅವರು 45 ವರ್ಷಗಳಿಂದ ಉರಿಯಲ್ಲಿ ವಾಸಿಸುತ್ತಿದ್ದರು. ಈ 60 ಜನರಲ್ಲಿ 36 ಜನರು ಶ್ರೀನಗರದಲ್ಲಿ, 9 ಜನರು ಬಾರಾಮುಲ್ಲಾದಲ್ಲಿ, 9 ಜನರು ಕುಪ್ವಾರಾದಲ್ಲಿ, 4 ಜನರು ಬುದ್ಗಾಮ್‌ನಲ್ಲಿ ಮತ್ತು 2 ಜನರು ಶೋಪಿಯಾನ್ ಜಿಲ್ಲೆಯಲ್ಲಿ ವಾಸಿಸುತ್ತಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಮುದಾಸಿರ್ ಅವರ ಚಿಕ್ಕಪ್ಪ ಮೊಹಮ್ಮದ್ ಯೂನಸ್ ಈ ಬಗ್ಗೆ ಮಾತನಾಡಿದ್ದು, ಅತ್ತಿಗೆ ಶಮಿಮಾ ನನ್ನ ಸಹೋದರ ಮೊಹಮ್ಮದ್ ಮಕ್ಸೂದ್ ಅವರನ್ನು 20 ವರ್ಷದವಳಿದ್ದಾಗ ವಿವಾಹವಾದರು. ಅವರು ಜಮ್ಮು ಮತ್ತು ಕಾಶ್ಮೀರದಲ್ಲೂ ಇದ್ದರು. ಸರ್ಕಾರ ಪಾಕಿಸ್ತಾನಿಗಳನ್ನು ಮಾತ್ರ ಗಡೀಪಾರು ಮಾಡಬೇಕು. ಪಿಒಕೆ ನಮ್ಮ ಪ್ರದೇಶ ಎಂದು ಹೇಳಿದ್ದಾರೆ.
ಮುದಾಸಿರ್ ಅವರ ಮರಣದ ನಂತರ, ಗೃಹ ಸಚಿವ ಅಮಿತ್ ಶಾ ಅವರು ಇಡೀ ಕುಟುಂಬವನ್ನು ಭೇಟಿ ಮಾಡಿದ್ದಾರೆ ಎಂದು ಯೂನಸ್ ಹೇಳಿದರು. ಲೆಫ್ಟಿನೆಂಟ್‌ ಗವರ್ನರ್‌ ಮನೋಜ್ ಸಿನ್ಹಾ ಕೂಡ ಅವರನ್ನು ಎರಡು ಬಾರಿ ಭೇಟಿ ಮಾಡಿದ್ದಾರೆ. ಸರ್ಕಾರ ಅವರನ್ನು ಗಡೀಪಾರು ಮಾಡದೇ ಇರುವುದನ್ನು ಪರಿಗಣಿಸಬೇಕು ಎಂದಿದ್ದಾರೆ.
ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ, ಭಾರತ ಸರ್ಕಾರವು 14 ಮಾದರಿ ವೀಸಾ ಹೊಂದಿರುವವ ಪಾಕಿಸ್ತಾನಿಗಳನ್ನು ಏಪ್ರಿಲ್ 27 ರೊಳಗೆ ಭಾರತವನ್ನು ತೊರೆಯುವಂತೆ ಆದೇಶಿಸಿತ್ತು. ವೈದ್ಯಕೀಯ ವೀಸಾ ಹೊಂದಿರುವವರಿಗೆ ಏಪ್ರಿಲ್ 29 ಕೊನೆಯ ದಿನಾಂಕವಾಗಿದೆ.
2023 ರಲ್ಲಿ ಮುದಾಸಿರ್ ಅವರಿಗೆ ಮರಣೋತ್ತರವಾಗಿ ಶೌರ್ಯ ಚಕ್ರ: ಜಮ್ಮು ಮತ್ತು ಕಾಶ್ಮೀರ ಪೊಲೀಸ್‌ನ ಕಾನ್‌ಸ್ಟೆಬಲ್ ಮುದಾಸಿರ್ ಅಹ್ಮದ್ ಶೇಖ್ ಅವರು ಪೊಲೀಸ್‌ನ ರಹಸ್ಯ ಕಾರ್ಯಾಚರಣೆಯ ತಂಡದ ಭಾಗವಾಗಿದ್ದರು. ಅವರು 2022 ಮೇ 25 ರಂದು ಬಾರಾಮುಲ್ಲಾದಲ್ಲಿ ನಡೆದ ಭಯೋತ್ಪಾದನಾ ವಿರೋಧಿ ಕಾರ್ಯಾಚರಣೆಯ ಸಮಯದಲ್ಲಿ ಹುತಾತ್ಮರಾದರು. ಮುದಾಸಿರ್ ಅವರಿಗೆ ಮರಣೋತ್ತರವಾಗಿ ಶೌರ್ಯ ಚಕ್ರವನ್ನು ನೀಡಲಾಯಿತು. ಶಮೀಮಾ ಅವರನ್ನು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಮೇ 2023 ರಲ್ಲಿ ದೆಹಲಿಯಲ್ಲಿ ಗೌರವಿಸಿದರು.
ಮೊಹಮ್ಮದ್ ಯೂನಸ್ ಅವರ ಪ್ರಕಾರ, ಬಾರಾಮುಲ್ಲಾ ನಗರದ ಮುಖ್ಯ ಚೌಕಕ್ಕೆ ಮುದಾಸಿರ್ ಅವರ ಸ್ಮರಣಾರ್ಥ ಶಹೀದ್ ಮುದಾಸಿರ್ ಚೌಕ್ ಎಂದು ಹೆಸರಿಸಲಾಗಿದೆ.
ಕಾಶ್ಮೀರಿ ಸೈನಿಕನ ಪಾಕಿಸ್ತಾನಿ ಪತ್ನಿ ಕೂಡ ಗಡೀಪಾರು: ಕೇಂದ್ರ ಮೀಸಲು ಪೊಲೀಸ್ ಪಡೆ (CRPF) ಜವಾನ ಮುನೀರ್ ಖಾನ್ ಅವರ ಪತ್ನಿ ಮಿನಾಲ್ ಖಾನ್ ಪಾಕಿಸ್ತಾನ ಮೂಲದವರು. ಮುನೀರ್ ಖಾನ್ ಘರೋಟಾ ಪ್ರದೇಶದ ನಿವಾಸಿ. ಮಂಗಳವಾರ, ಅವರು ತಮ್ಮ ಪತ್ನಿಯೊಂದಿಗೆ ಅಮೃತಸರಕ್ಕೆ ತೆರಳಿದ್ದಾರೆ. ಇಲ್ಲಿ ಅವರ ಪತ್ನಿಯನ್ನು ಅಟ್ಟಾರಿ ಗಡಿಯ ಮೂಲಕ ಪಾಕಿಸ್ತಾನಕ್ಕೆ ಗಡೀಪಾರು ಮಾಡಲಾಗುತ್ತದೆ.
ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳಲು ಸೇನೆಗೆ ಫ್ರೀ ಹ್ಯಾಂಡ್‌ ನೀಡಿದ ಪ್ರಧಾನಿ ಮೋದಿ!
ಮಿನಾಲ್ ಖಾನ್ ಮಾತನಾಡಿದ್ದು, ನಾನು ಮುನೀರ್ ಅವರನ್ನು ಆನ್‌ಲೈನ್‌ನಲ್ಲಿ ವಿವಾಹವಾದೆ. ನಮಗೆ ನಮ್ಮ ಕುಟುಂಬದೊಂದಿಗೆ ವಾಸಿಸಲು ಅವಕಾಶ ನೀಡಬೇಕು. ದಾಳಿಯಲ್ಲಿ ಅಮಾಯಕರ ಬರ್ಬರ ಹತ್ಯೆಯನ್ನು ನಾವು ಖಂಡಿಸುತ್ತೇವೆ. ಭಯೋತ್ಪಾದಕರಿಗೆ ಕಠಿಣ ಶಿಕ್ಷೆ ವಿಧಿಸಬೇಕು ಎಂದಿದ್ದಾರೆ.
ಬೆಳಗ್ಗೆ 6 ಗಂಟೆಗೆ ಯುದ್ದ ಸ್ಟಾರ್ಟ್‌ ಮಾಡಿ ಸಂಜೆ 6 ಗಂಟೆಗೆ ಮುಗಿಸಲಿ: ಸಚಿವ ಸತೀಶ್‌ ಜಾರಕಿಹೊಳಿ
