ಕೆಜಿಎಫ್ 2ನಲ್ಲಿ Sanjay dutt ಜೊತೆ ಸೀನ್ ಇಲ್ಲ: Raveena tandon
ರಮಿಕಾ ಸೇನ್ ಪಾತ್ರ ಇಂದಿರಾ ಗಾಂಧಿ ಪಾತ್ರದ ಸ್ಫೂರ್ತಿ ಅಲ್ಲ - ರವೀನಾ ಟಂಡನ್
‘ನಾನೂ ಸಂಜಯ್ ಹಿಂದಿನಂತೇ ಕೆಜಿಎಫ್ 2 ಸೆಟ್ನಲ್ಲಿ ಧೂಳೆಬ್ಬಿಸುವ ಕನಸು ಕಾಣುತ್ತಿದ್ದೆವು. ಆದರೆ ನಾವಿಬ್ಬರೂ ಕೆಜಿಎಫ್ 2 ಚಿತ್ರದಲ್ಲಿ ನಟಿಸಿದ್ದರೂ ಜೊತೆಯಾಗಿ ಸ್ಕ್ರೀನ್ ಹಂಚಿಕೊಳ್ಳಲಾಗದ್ದಕ್ಕೆ ಬೇಸರವಿದೆ’ ಎಂದು ಬಾಲಿವುಡ್ ನಟಿ ರವೀನಾ ಟಂಡನ್ ಹೇಳಿದ್ದಾರೆ.
‘ನಾನು ಹಾಗೂ ಸಂಜಯ್ ಹೋಗಿ ಜೊತೆಯಾಗಿ ನಟಿಸಲು ಅವಕಾಶ ನೀಡುವಂತೆ ನಿರ್ದೇಶಕ ಪ್ರಶಾಂತ್ ನೀಲ್ ಅವರಿಗೆ ವಿನಂತಿ ಮಾಡಿಕೊಂಡಿದ್ದೆವು. ಆದರೆ ಕೆಜಿಎಫ್ 2 ಕಥೆಯಲ್ಲಿ ಈ ಸಾಧ್ಯತೆ ಇಲ್ಲದ ಕಾರಣ ಅವಕಾಶ ಸಿಗಲಿಲ್ಲ. ಜೊತೆಗೆ ನಮ್ಮಿಬ್ಬರ ಡೇಟ್ಗಳೂ ಹೊಂದಾಣಿಕೆ ಆಗುತ್ತಿರಲಿಲ್ಲ.
ಹಿಂದೆ ಸಾಕಷ್ಟುಚಿತ್ರಗಳಲ್ಲಿ ಜೊತೆಗೆ ನಟಿಸಿದ್ದ ನಾವು ಈ ಚಿತ್ರದಲ್ಲಿ ಮಾತ್ರ ಒಟ್ಟಿಗೇ ಸ್ಕ್ರೀನ್ ಹಂಚಿಕೊಳ್ಳಲು ಸಾಧ್ಯವಾಗಲಿಲ್ಲ’ ಎಂದು ಸಂದರ್ಶನವೊಂದರಲ್ಲಿ ರವೀನಾ ಬೇಸರ ವ್ಯಕ್ತಪಡಿಸಿದ್ದಾರೆ.
‘ಈ ಚಿತ್ರದಲ್ಲಿ ರಮಿಕಾ ಸೇನ್ ಎಂಬ ಪ್ರಧಾನ ಮಂತ್ರಿಯ ಪಾತ್ರ ಮಾಡುತ್ತಿದ್ದೇನೆ. ಇದು ಇಂದಿರಾ ಗಾಂಧಿ ಅವರ ಪಾತ್ರ ಎಂಬ ವದಂತಿ ಹಬ್ಬಿತ್ತು.
ಈ ಗಾಳಿಸುದ್ದಿ ನನ್ನ ಕಿವಿಗೂ ಬಿದ್ದಿದೆ. ಆದರೆ ಅದು ಸತ್ಯಕ್ಕೆ ದೂರವಾದದ್ದು. ನನ್ನ ನೋಟ, ಪಾತ್ರ ಅಥವಾ ಕಥೆಗೂ ಇಂದಿರಾ ಗಾಂಧಿ ಅವರಿಗೂ ಸಂಬಂಧ ಇಲ್ಲ. ಇದು ಅವರಿಂದ ಸ್ಫೂರ್ತಿ ಪಡೆದು ಮಾಡಿದ ಪಾತ್ರ ಅಲ್ಲ. ಬದಲಿಗೆ 80 ರ ದಶಕದ ಸಿನಿಮಾ ಕತೆಗೆ ಪೂರಕವಾಗಿ ನನ್ನ ಪಾತ್ರವಿದೆ’ ಎಂದು ಅವರು ಈ ವೇಳೆ ಸ್ಪಷ್ಟಪಡಿಸಿದ್ದಾರೆ.
ಯಶ್ ನಟನೆಯ ಕೆಜಿಎಫ್ 2 ಚಿತ್ರವನ್ನು ಪ್ರಶಾಂತ್ ನೀಲ್ ನಿರ್ದೇಶಿಸಿದ್ದು ವಿಜಯ್ ಕಿರಗಂದೂರು ನಿರ್ಮಿಸಿದ್ದಾರೆ. ಈ ಬಿಗ್ ಬಜೆಟ್ ಚಿತ್ರ ಏಪ್ರಿಲ್ 14ರಂದು ತೆರೆಗೆ ಬರಲಿದೆ.