ಈಗೇನಿದ್ರೂ ದಕ್ಷಿಣ ಭಾರತದ ಚಿತ್ರಗಳದ್ದೇ ಹವಾ: ಸೌತ್‌ ಸಿನಿಮಾದತ್ತ ಮುಖಮಾಡಿದ ಬಾಲಿವುಡ್‌ ಸ್ಟಾರ್ಸ್‌!

ಇತ್ತೀಚೆಗೆ ಭಾರತದಲ್ಲಿ ಬಾಲಿವುಡ್‌ ಸಿನಿಮಾಗಿಂತ ಹೆಚ್ಚಾಗಿ ದಕ್ಷಿಣ ಭಾರತದ ಸಿನಿಮಾಗಳೇ ಗಲ್ಲಾ ಪೆಟ್ಟಿಗೆಯಲ್ಲಿ ಸದ್ದು ಮಾಡುತ್ತಿವೆ. ತೆಲುಗಿನ ಬಾಹುಬಲಿ, ಆರ್‌ಆರ್‌ಆರ್‌, ಪುಷ್ಪಾ, ಕನ್ನಡದ ಕೆಜಿಎಫ್‌, ಕಾಂತಾರಾ ಸೇರಿದಂತೆ ತಮಿಳು, ಮಲಯಾಳಂ ಚಿತ್ರಗಳನ್ನ ಭಾರತೀಯ ಸಿನಿ ಪ್ರೇಕ್ಷಕರು ಮುಕ್ತ ಮನಸ್ಸಿನಿಂದ ಅಪ್ಪಿಕೊಳ್ಳುತ್ತಿದ್ದಾರೆ. ಹೀಗಾಗಿಯೇ ಬಾಲಿವುಡ್‌ ನಟ,ನಟಿ ದಕ್ಷಿಣ ಭಾರತದ ಸಿನಿಮಾಗಳನ್ನ ಮುಖ ಮಾಡುತ್ತಿದ್ದಾರೆ. 

ಬಾಲಿವುಡ್‌ನ ಸಂಜಯ್ ದತ್, ಸೈಫ್ ಅಲಿ ಖಾನ್, ಜಾಹ್ನವಿ ಕಪೂರ್, ಸುನಿಲ್ ಶೆಟ್ಟಿ, ಅಜಯ್ ದೇವಗನ್ ಮುಂತಾದ ಅನೇಕ ಹಿಂದಿ ಚಲನಚಿತ್ರ ನಟರು ದಕ್ಷಿಣ ಚಿತ್ರರಂಗದಲ್ಲಿ ಕಾಣಿಸಿಕೊಂಡಿದ್ದಾರೆ. ಇನ್ನು ಕೆಲವು ನಟರೂ ಕೂಡ ದಕ್ಷಿಣ ಭಾರತ ಸಿನಿಮಾಗಳಲ್ಲಿ ನಟಿಸೋದಕ್ಕೆ ಸೈ ಎಂದಿದ್ದಾರೆ.  

ಬಾಬಿ ಡಿಯೋಲ್

ಬಾಲಿವುಡ್ ನಟ ಬಾಬಿ ಡಿಯೋಲ್ ಕೂಡ ಸೌತ್ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇದೇ ವರ್ಷದ ನವೆಂಬರ್ 14 ರಂದು ಬಿಡುಗಡೆಯಾಗಲಿರುವ ಈ ವರ್ಷದ ಬಹು ನಿರೀಕ್ಷಿತ ಚಿತ್ರ 'ಕಂಗುವ'ದಲ್ಲಿ ಸೌತ್ ಸೂಪರ್ ಸ್ಟಾರ್ ಸೂರ್ಯ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದ ಮೂಲಕ ಬಾಬಿ ಡಿಯೋಲ್ ದಕ್ಷಿಣ ಭಾರತ ಸಿನಿಮಾ ರಂಗಕ್ಕೆ ಪಾದಾರ್ಪಣೆ ಮಾಡಲಿದ್ದಾರೆ. ಪಿರಿಯಾಡಿಕಲ್ ಆಕ್ಷನ್ ಡ್ರಾಮಾ ಚಿತ್ರದಲ್ಲಿ ಬಾಬಿ ಡಿಯೋಲ್ ತುಂಬಾ ಭಯಾನಕ ಮತ್ತು ಅಪಾಯಕಾರಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ವರದಿಯಾಗಿದೆ. ಸಿರುಟ್ಟೈ ಶಿವ ನಿರ್ದೇಶನದ ಈ ಚಿತ್ರ ಸ್ಟುಡಿಯೋ ಗ್ರೀನ್, ಯುವಿ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಮೂಡಿಬರುತ್ತಿದೆ.

ಇಮ್ರಾನ್ ಹಶ್ಮಿ

ಬಾಲಿವುಡ್ ನ ಜನಪ್ರಿಯ ನಟ ಇಮ್ರಾನ್ ಹಶ್ಮಿ ಕೂಡ ಶೀಘ್ರದಲ್ಲೇ ದಕ್ಷಿಣದ ಸಿನಿಮಾ ಇಂಡಸ್ಟ್ರಿಗೆ ಎಂಟ್ರಿ ಕೊಡಲಿದ್ದಾರೆ. ನಿರ್ದೇಶಕ ಸುಜೀತ್ ಅವರ ಗ್ಯಾಂಗ್‌ಸ್ಟರ್ ಡ್ರಾಮಾ 'ಒಜಿ'ಯಲ್ಲಿ ಇಮ್ರಾನ್ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ಅವರು ದಕ್ಷಿಣದ ಖ್ಯಾತ ನಟ ಪವನ್ ಕಲ್ಯಾಣ್ ಅವರೊಂದಿಗೆ ತೆರೆ ಹಂಚಿಕೊಳ್ಳಲಿದ್ದಾರೆ. 

ಶನಯಾ ಕಪೂರ್

ಶನಯಾ ಕಪೂರ್ ಬಾಲಿವುಡ್‌ ನಟ ಸಂಜಯ್ ಕಪೂರ್ ಅವರ ಪುತ್ರಿನ. ಕಪೂರ್ ಕುಟುಂಬದಿಂದ ಬಂದ ನಟರಲ್ಲಿ ಒಬ್ಬರು. ಇವರ ಚಿಕ್ಕಪ್ಪ ಅನಿಲ್ ಕಪೂರ್, ಸೋದರ ಸಂಬಂಧಿಗಳಾದ ಅರ್ಜುನ್ ಕಪೂರ್, ಸೋನಮ್ ಕಪೂರ್, ಜಾನ್ವಿ ಕಪೂರ್, ಹರ್ಷವರ್ಧನ್ ಕಪೂರ್ ಸಿನಿಮಾ ಜಗತ್ತಿನ ಖ್ಯಾತ ತಾರೆಗಳು. ಈಗ ಶಾನಯಾ ಕೂಡ ಚಿತ್ರರಂಗಕ್ಕೆ ಎಂಟ್ರಿ ಕೊಡಲಿದ್ದಾರೆ. ಅವರು ದಕ್ಷಿಣದಿಂದ ತಮ್ಮ ಚಲನಚಿತ್ರ ವೃತ್ತಿಜೀವನವನ್ನು ಪ್ರಾರಂಭಿಸಲಿದ್ದಾರೆ. ಮಲಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಜೊತೆ ಮುಂಬರುವ ವೃಷಭ ಚಿತ್ರದಲ್ಲಿ ಶನಯಾ ಕಾಣಿಸಿಕೊಳ್ಳಲಿದ್ದಾರೆ. ಈ ಮಾಹಿತಿಯನ್ನು ಸ್ವತಃ ನಟಿಯೇ ತಮ್ಮ ಇನ್ಸ್ಟಾಗ್ರಾಮ್ ಮೂಲಕ ನೀಡಿದ್ದಾರೆ.

 ಸನ್ನಿ ಹಿಂದುಜಾ

'ದಿ ರೈಲ್ವೇ ಮೆನ್' ಮತ್ತು 'ಆಕಾಂಕ್ಷಿಗಳು' ಚಿತ್ರಗಳ ಮೂಲಕ ಚಿರಪರಿಚಿತರಾದ ನಟ ಸನ್ನಿ ಹಿಂದುಜಾ ದಕ್ಷಿಣ ಭಾರತ ಸಿನಿಮಾಕ್ಕೂ ಬರುತ್ತಿದ್ದಾರೆ. ಮಲಯಾಳಂ ಚಿತ್ರ ಹಲೋ ಮಮ್ಮಿ ಮೂಲಕ ದಕ್ಷಿಣ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಲಿದ್ದಾರೆ.