ನಿಮ್ಮ ಹಳೆಯ ಚಿನ್ನ ಬದಲಾಯಿಸಿ ಹೊಸ ಒಡವೆಗಳನ್ನು ಕೊಳ್ಳಬೇಕೇ ಅಥವಾ ಬೇಡವೇ?, ಯಾವುದು ಬೆಸ್ಟ್?
Old Gold Exchange: ಹಳೆಯ ಚಿನ್ನವನ್ನು ಮಾರುವ ಪ್ಲಾನ್ ಇದೆಯೇ? ಹಾಗಿದ್ದರೆ ಸ್ವಲ್ಪ ತಡೆಯಿರಿ! ಹಳೆಯ ಚಿನ್ನವನ್ನು ನಗದಾಗಿ ಪರಿವರ್ತಿಸುವುದಕ್ಕಿಂತ ಹೊಸ ಚಿನ್ನದೊಂದಿಗೆ ಬದಲಾಯಿಸಿಕೊಳ್ಳುವುದು ಹೇಗೆ ಹೆಚ್ಚು ಲಾಭದಾಯಕ? ನಿಮ್ಮ ಹಣವನ್ನು ಉಳಿಸಲು ನೀವು ತಿಳಿಯಲೇಬೇಕಾದ ಪ್ರಮುಖ ಲೆಕ್ಕಾಚಾರ ಇಲ್ಲಿದೆ ನೋಡಿ.
ಹಳೆಯ ಚಿನ್ನವನ್ನು ಮಾರಿ ಹಣ ಪಡೆಯುವುದು ಉತ್ತಮವೇ?
Gold Exchanging: ಭಾರತೀಯ ಸಂಪ್ರದಾಯ ಮತ್ತು ಸಂಸ್ಕೃತಿಯಲ್ಲಿ ಬಂಗಾರವು ಬಹಳ ಮುಖ್ಯವಾದ ಪಾತ್ರವನ್ನು ವಹಿಸುತ್ತದೆ. ತಲೆತಲಾಂತರಗಳಿಂದ ಜನರು ಚಿನ್ನವನ್ನು ಖರೀದಿಸಿ ಉಳಿತಾಯ ಮಾಡುತ್ತಿದ್ದಾರೆ. ಈ ಕಾರಣದಿಂದಾಗಿ ಬಹಳಷ್ಟು ಜನರ ಬಳಿ ಹಳೆಯ ಚಿನ್ನದ ಸಂಗ್ರಹವಿದೆ. ಇಂತಹ ಸಂದರ್ಭದಲ್ಲಿ ಹಳೆಯ ಚಿನ್ನವನ್ನು ಹೊಸ ಚಿನ್ನದೊಂದಿಗೆ ಬದಲಾಯಿಸಿಕೊಳ್ಳುವುದು ಲಾಭದಾಯಕವೇ? ಅಥವಾ ಹಳೆಯ ಚಿನ್ನವನ್ನು ಮಾರಿ ಹಣ ಪಡೆಯುವುದು ಉತ್ತಮವೇ? ಎಂಬ ಗೊಂದಲ ಅನೇಕರಲ್ಲಿದೆ. ಈ ಎರಡರಲ್ಲಿ ಯಾವುದು ಉತ್ತಮ ಎಂಬುದನ್ನು ಇಲ್ಲಿ ತಿಳಿಯೋಣ.
ಹಳೆಯ ಚಿನ್ನದ ಬಗ್ಗೆ ತಿಳಿಯಬೇಕಾದ ಪ್ರಮುಖ ವಿಷಯಗಳು
ನೀವು ಹಳೆಯ ಚಿನ್ನವನ್ನು ಬದಲಾಯಿಸಲು ಹೊರಟಿದ್ದೀರಾ ಅಥವಾ ಮಾರಾಟ ಮಾಡಬೇಕೆಂದುಕೊಂಡಿದ್ದೀರಾ? ನೀವು ಮೊದಲು ಮಾಡಬೇಕಾದ ಪ್ರಮುಖ ಕೆಲಸವೆಂದರೆ ಚಿನ್ನದ ಗುಣಮಟ್ಟವನ್ನು ಪರೀಕ್ಷಿಸುವುದು. ನೀವು ಇತ್ತೀಚಿನ ವರ್ಷಗಳಲ್ಲಿ ಚಿನ್ನವನ್ನು ಖರೀದಿಸಿದ್ದರೆ ಅದರ ಮೇಲೆ ಹಾಲ್ಮಾರ್ಕ್ (Hallmark) ಇರುತ್ತದೆ. ಆದರೆ ಹಳೆಯ ಚಿನ್ನದ ವಿಷಯದಲ್ಲಿ ಹಾಗಲ್ಲ. ಒಂದು ವೇಳೆ ನಿಮ್ಮ ಬಳಿ ಇರುವ ಚಿನ್ನಕ್ಕೆ ಹಾಲ್ಮಾರ್ಕ್ ಇದ್ದರೆ, ವ್ಯಾಪಾರಿಗಳು ಅದನ್ನು ಹೆಚ್ಚಿನ ಬೆಲೆಗೆ ಖರೀದಿಸುತ್ತಾರೆ. ಹಾಲ್ಮಾರ್ಕ್ ಇಲ್ಲದಿದ್ದರೆ ಬೆಲೆ ಸ್ವಲ್ಪ ಕಡಿಮೆಯಾಗುವ ಸಾಧ್ಯತೆ ಇರುತ್ತದೆ, ಇದರಿಂದ ನೀವು ಸ್ವಲ್ಪ ನಷ್ಟ ಅನುಭವಿಸಬೇಕಾಗಬಹುದು.
ಹಳೆಯ ಚಿನ್ನವನ್ನು ಬದಲಾಯಿಸಿಕೊಳ್ಳಬೇಕೇ ಅಥವಾ ಮಾರಾಟ ಮಾಡಬೇಕೇ?
ಪ್ರಸ್ತುತ ಮಾರುಕಟ್ಟೆಯ ಪರಿಸ್ಥಿತಿಯಲ್ಲಿ, ನೀವು ಹಳೆಯ ಚಿನ್ನವನ್ನು ಮಾರಿ ಹಣ ಪಡೆಯಲು (ನಗದು) ಬಯಸಿದರೆ, ನಿಮಗೆ ಸುಮಾರು ಶೇ. 20 ರಷ್ಟು ಕಡಿಮೆ ಹಣ ಸಿಗುತ್ತದೆ. ಉದಾಹರಣೆಗೆ ಇಂದಿನ ದರದಂತೆ ಒಂದು ಗ್ರಾಂ 22 ಕ್ಯಾರೆಟ್ ಚಿನ್ನದ ಬೆಲೆ ₹14,680 ಎಂದು ಅಂದುಕೊಳ್ಳೋಣ. ನೀವು 10 ಗ್ರಾಂ ಚಿನ್ನವನ್ನು ನಗದಾಗಿ ಪರಿವರ್ತಿಸಿದರೆ (ಮಾರಾಟ ಮಾಡಿದರೆ), ನಿಮಗೆ ಸುಮಾರು ₹1.35 ಲಕ್ಷ ಮಾತ್ರ ಸಿಗಬಹುದು.
10 ಗ್ರಾಂ ಹಳೆಯ ಚಿನ್ನ ಕೊಟ್ಟರೆ
ಅದೇ ರೀತಿ, ನೀವು ಆ 10 ಗ್ರಾಂ ಹಳೆಯ ಚಿನ್ನವನ್ನು ಕೊಟ್ಟು ಹೊಸ ಚಿನ್ನದ ಒಡವೆಗಳನ್ನು ತೆಗೆದುಕೊಳ್ಳಲು ಬಯಸಿದರೆ, ನಿಮಗೆ ಸುಮಾರು ₹1.45 ಲಕ್ಷ ಮೌಲ್ಯದ ಒಡವೆಗಳು ಸಿಗುತ್ತವೆ. ಅಂದರೆ ಇದರಲ್ಲಿ ಸ್ವಲ್ಪ ಮಾತ್ರ 'ತೇಜ್' ಅಥವಾ ಕರಗುವಿಕೆ (Wastage) ಕಡಿತಗೊಳಿಸಲಾಗುತ್ತದೆ.
ಅಂಗಡಿ ಮತ್ತು ಪ್ರದೇಶದ ಮೇಲೆ ಅವಲಂಬಿತ
ಅಲ್ಲದೆ, ನೀವು ಹಳೆಯ ಚಿನ್ನವನ್ನು ಮಾರುವುದು ಅಥವಾ ಹೊಸ ಒಡವೆಗಳನ್ನು ಮಾಡಿಸಿಕೊಳ್ಳುವುದು ನೀವು ಹೋಗುವ ಅಂಗಡಿ ಮತ್ತು ಪ್ರದೇಶದ ಮೇಲೆ ಅವಲಂಬಿತವಾಗಿರುತ್ತದೆ. ಕೆಲವರು ಹೆಚ್ಚು ಕಡಿತ (Wastage) ಮಾಡಿದರೆ, ಇನ್ನು ಕೆಲವರು ಕಡಿಮೆ ಮಾಡುತ್ತಾರೆ. ಒಂದು ವೇಳೆ ನೀವು ಈ ಹಿಂದೆ ಚಿನ್ನ ಖರೀದಿಸಿದ ಅಂಗಡಿಗೇ ಹೋದರೆ, ಅವರು ಕಡಿತವನ್ನು ಸ್ವಲ್ಪ ಕಡಿಮೆ ಮಾಡುವ ಸಾಧ್ಯತೆ ಇರುತ್ತದೆ.
ಮಾರುಕಟ್ಟೆ ತಜ್ಞರ ಪ್ರಕಾರ, ಹಳೆಯ ಚಿನ್ನವನ್ನು ಮಾರಿ ನಗದು ಪಡೆಯುವುದಕ್ಕಿಂತ, ಅದನ್ನು ನೀಡಿ ಹೊಸ ಚಿನ್ನದ ಒಡವೆಗಳನ್ನು ಖರೀದಿಸುವುದು ಹೆಚ್ಚು ಲಾಭದಾಯಕವಾಗಿದೆ.
ವ್ಯವಹಾರ (business ideas in kannada) , ಬ್ಯಾಂಕಿಂಗ್ (Banking News), ಹಣಕಾಸು, ಭಾರತೀಯ ಆರ್ಥಿಕತೆ, ಜಾಗತಿಕ ಮಾರುಕಟ್ಟೆ, ಷೇರು ಮಾರುಕಟ್ಟೆ, ಹೂಡಿಕೆ ಸೇರಿದಂತೆ ಇನ್ನಿತರ ಮತ್ತು ಇತ್ತೀಚಿನ ಹಣಕಾಸಿನ ಸುದ್ದಿಗಳನ್ನು ಏಷ್ಯಾನೆಟ್ ಸುವರ್ಣ ನ್ಯೂಸ್ನಲ್ಲಿ ಓದಿರಿ.
