ವೃದ್ಧನನ್ನು 8 ಕಿ.ಮೀ. ಹೊತ್ತೊಯ್ದು ಕೊಂದ ಕಾರು: ಚಾಲಕ ಪರಾರಿ, ಕಾರು ವಶಕ್ಕೆ..!
ವೃದ್ಧನನ್ನು ಕಾರೊಂದು 8 ಕಿ.ಮೀ. ಹೊತ್ತೊಯ್ದು ಕೊಂದು ಹಾಕಿರುವ ಘಟನೆ ಬಿಹಾರದ ಚಂಪಾರಣ್‌ ಜಿಲ್ಲೆಯಲ್ಲಿ ನಡೆದಿದೆ. ಈ ಘಟನೆ ಸಂಬಂಧ ಆರೋಪಿ ಚಾಲಕ ಪರಾರಿಯಾಗಿದ್ದು, ಕಾರು ವಶಕ್ಕೆ ಪಡೆಯಲಾಗಿದೆ.
ಪಟನಾ (ಜನವರಿ 23, 2023): ದಿಲ್ಲಿ, ಬೆಂಗಳೂರು ಸೇರಿದಂತೆ ದೇಶದ ಬೇರೆ ಬೇರೆ ರಾಜ್ಯಗಳಲ್ಲಿ ಅಪಘಾತದ ವೇಳೆ ವಾಹನಗಳು ಮನುಷ್ಯರನ್ನು ಕಿ.ಮೀ.ಗಟ್ಟಲೇ ಎಳೆದೊಯ್ದಿರುವ ಘಟನೆಗಳು ನಡೆದ ಬೆನ್ನಲ್ಲೇ, ಬಿಹಾರದಲ್ಲೂ ಕೂಡ ಅಂಥದ್ದೇ ಘಟನೆ ಸಂಭವಿಸಿದೆ. ಕಾರೊಂದು ವೃದ್ಧರೊಬ್ಬರನ್ನು ಬಾನೆಟ್ ಮೇಲೆ ಕೂರಿಸಿಕೊಂಡು 8 ಕಿ.ಮೀ. ಎಳೆದೊಯ್ದಿದ್ದು, ಬಳಿಕ ಬಾನೆಟ್ ಮೇಲಿಂದ ಬಿದ್ದು ವೃದ್ಧ ದಾರುಣವಾಗಿ ಸಾವನ್ನಪ್ಪಿದ್ದಾರೆ. ಬಿಹಾರದ ಪೂರ್ವ ಚಂಪಾರಣ್‌ ಜಿಲ್ಲೆಯ ರಾಷ್ಟ್ರೀಯ ಹೆದ್ದಾರಿ 27ರಲ್ಲಿ ಈ ಘಟನೆ ನಡೆದಿದೆ. ಕಾರು ಚಾಲಕ ಪರಾರಿಯಾಗಿದ್ದು, ಕಾರನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಮೃತಪಟ್ಟ ವ್ಯಕ್ತಿಯನ್ನು ಬಾಂಗ್ರಾ ಗ್ರಾಮದ ಶಂಕರ್‌ ಚೌಧುರಿ (70) ಎಂದು ಗುರುತಿಸಲಾಗಿದೆ.
ಆಗಿದ್ದೇನು..?:
ಶಂಕರ್‌ ಚೌಧರಿ ತನ್ನ ಬೈಸಿಕಲ್‌ನಲ್ಲಿ ಹೆದ್ದಾರಿಯನ್ನು ದಾಟುತ್ತಿದ್ದ ವೇಳೆ ಗೋಪಾಲ್‌ಗಂಜ್‌ ನಗರದಿಂದ ಬರುತ್ತಿದ್ದ ಕಾರು ಡಿಕ್ಕಿ ಹೊಡೆದಿದೆ. ಈ ವೇಳೆ ಶಂಕರ್‌ ಕಾರಿನ ಬಾನೆಟ್ ಮೇಲೆ ಬಿದ್ದು, ವೈಪರ್‌ ಅನ್ನು ಆಸರೆಯಾಗಿ ಹಿಡಿದುಕೊಂಡಿದ್ದಾರೆ. ಕಾರು ನಿಲ್ಲಿಸುವಂತೆ ಕಿರುಚಿಕೊಂಡರೂ, ಕಾರು 8 ಕಿ.ಮೀ. ಸಾಗಿದೆ. ಆಗ ಮುಂದೆ ರಸ್ತೆಯಲ್ಲಿ ಹೆಚ್ಚಿನ ಜನರು ಇದ್ದ ಕಾರಣ, ಹೆದರಿದ ಚಾಲಕ ಬ್ರೇಕ್‌ ಹಾಕಿದ್ದಾನೆ. ಬ್ರೇಕ್‌ ಹಾಕಿದ ರಭಸಕ್ಕೆ ಬಾನೆಟ್‌ನಿಂದ ರಸ್ತೆಗೆ ಶಂಕರ್‌ ಬಿದ್ದಿದ್ದಾರೆ. ಅವರ ಮೇಲೆಯೇ ಕಾರು ಹರಿದಿದ್ದು, ಶಂಕರ್‌ ಸಾವನ್ನಪ್ಪಿದ್ದಾರೆ. ಈ ವೇಳೆ ಕಾರು ಸಮೇತ ಚಾಲಕ ಪರಾರಿಯಾಗಿದ್ದಾನೆ.
ಇದನ್ನು ಓದಿ: Bengaluru: ಕಾರ್‌ ಬಾನೆಟ್ ಮೇಲೆ ವ್ಯಕ್ತಿ ಇದ್ರೂ ಕಾರು ಓಡಿಸಿದ ಲೇಡಿ ಜೈಲಿಗೆ
ಈಗ ಕಾರನ್ನು ಪೋಲಿಸರು ವಶಪಡಿಸಿಕೊಂಡಿದ್ದು, ಆರೋಪಿ ಚಾಲಕನಿಗೆ ವ್ಯಾಪಕ ಶೋಧಕಾರ್ಯ ನಡೆಸುತ್ತಿದ್ದಾರೆ.
ಇತ್ತೀಚೆಗೆ ಇದೇ ರೀತಿ ಬಾನೆಟ್ ಮೇಲಿದ್ದ ವ್ಯಕ್ತಿಯೊಬ್ಬನನ್ನು ಬೆಂಗಳೂರಿನಲ್ಲಿ ಕಾರೊಂದು 2 ಕಿ.ಮೀ. ಎಳೆದುಕೊಂಡು ಹೋಗಿತ್ತು. ದಿಲ್ಲಿಯಲ್ಲಿ ಮಹಿಳೆಯೊಬ್ಬಳನ್ನು ಕಾರು 12 ಕಿ.ಮೀ.ನಷ್ಟು ಎಳೆದೊಯ್ದಿತ್ತು.
ಇದನ್ನೂ ಓದಿ: ಬಾನೆಟ್ ಮೇಲೆ ವ್ಯಕ್ತಿಯಿದ್ರೂ ಮೂರು ಕಿ.ಮೀ. ಕಾರು ಚಾಲನೆ: ಬೆಂಗಳೂರಲ್ಲಿ ಮತ್ತೊಂದು ಭಯಾನಕ ಘಟನೆ...!
- ಸೈಕಲ್‌ನಲ್ಲಿ ರಸ್ತೆ ದಾಟುತ್ತಿದ್ದ ವೃದ್ಧನಿಗೆ ಹಾಯ್ದ ಕಾರು
- ಆಗ ಕಾರಿನ ಬಾನೆಟ್ ಮೇಲೆ ಬಿದ್ದ ವೃದ್ಧ
- ಆತನನ್ನು 8 ಕಿ.ಮೀ.ನಷ್ಟುಎಳೆದೊಯ್ದ ಕಾರು-
- ಬ್ರೇಕ್‌ ಹಾಕಿದ ರಭಸಕ್ಕೆ ಬಾನೆಟ್ ಮೇಲಿಂದ ಬಿದ್ದ ವೃದ್ಧ
- ಆಗ ಆತನ ಮೇಲೆ ಕಾರು ಹರಿದು ವೃದ್ಧ ಸಾವು
ಇದನ್ನೂ ಓದಿ: ದಿಲ್ಲಿ ಮಹಿಳಾ ಆಯೋಗದ ಅಧ್ಯಕ್ಷೆಯನ್ನೇ ಎಳೆದೊಯ್ದ ಕಾರು!
