ಪುನೀತ್ ರಾಜ್ ಕುಮಾರ್ ಅವರ ಧ್ವನಿಯಲ್ಲೇ ಜೇಮ್ಸ್ ಸಿನಿಮಾವನ್ನು ರೀ ರಿಲೀಸ್ ಮಾಡಲು ಸಿನಿಮಾತಂಡ ತಯಾರಿ ನಡೆಸಿದೆ. ಅತ್ಯುತ್ತಮ ತಂತ್ರಜ್ಞಾನ ಬಳಸಿ ಪುನೀತ್ ಧ್ವನಿ ಮಿಕ್ಸ್ ಮಾಡಿ ಮತ್ತೆ ಬಿಡುಗಡೆ ಮಾಡಲು ತೆಲುಗು ಸ್ಟಾರ್ ಶ್ರೀಕಾಂತ್ ಸಹಾಯ ಮಾಡಿದರು ಎಂದು ಹೇಳಿದರು.

ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್(Puneth Rajkumar) ನಟನೆಯ ಕೊನೆಯ ಸಿನಿಮಾ ಜೇಮ್ಸ್ ಮಾರ್ಚ್ 17ರಂದು ಅದ್ದೂರಿಯಾಗಿ ತೆರೆಗೆ ಬಂದಿತ್ತು. ಅಪ್ಪು ಹುಟ್ಟುಹಬ್ಬದ ದಿನವೇ ಬಿಡುಗಡೆಯಾದ ಜೇಮ್ಸ್ ಚಿತ್ರಕ್ಕೆ ಭರ್ಜರಿ ಸ್ವಾಗತ ಸಿಗಿತ್ತು. ಅಭಿಮಾನಿಗಳು ಸಿನಿಮಾ ನೋಡಿ ಹಾಡಿಹೊಗಳಿದ್ದರು. ಬಾಕ್ಸ್ ಆಫೀಸ್ ನಲ್ಲೂ ಅಪ್ಪು ಜೇಮ್ಸ್ ಸಿನಿಮಾ ಉತ್ತಮ ಕಮಾಯಿ ಮಾಡಿತ್ತು. ಇದೀಗ ಸಿನಿಮಾ ಬಿಡುಗಡೆಯಾಗಿ 25 ದಿಗಳನ್ನು ಪೂರೈಸಿದೆ. ಈ ಹಿನ್ನಲೆಯಲ್ಲಿ ಸಿನಿಮಾತಂಡ ಸಕ್ಸಸ್ ಮೀಟ್ ಹಮ್ಮಿಕೊಂಡಿತ್ತು. ಜೇಮ್ಸ್ ಸಿನಿಮಾಗೆ ಚೇತನ್ ಕುಮಾರ್ ಆಕ್ಷನ್ ಕಟ್ ಹೇಳಿದ್ದಾರೆ. ಕಿಶೋರ್ ಪತ್ತಿಕೊಂಡ ನಿರ್ಮಾಣದಲ್ಲಿ ಸಿನಿಮಾ ಮೂಡಿಬಂದಿದೆ.

ಅಂದಹಾಗೆ ಜೇಮ್ಸ್ ಸಿನಿಮಾ ಈಗಾಗಲೇ ಒಟಿಟಿಯಲ್ಲೂ ಬಿಡುಗಡೆಯಾಗಿದೆ. ಏಪ್ರಿಲ್ 14ರಂದು ಸಿನಿಮಾ ಒಟಿಟಿ ಪ್ಲಾಟ್ ಫಾರ್ಮ್ ಗೆ ಎಂಟ್ರಿ ಕೊಟ್ಟಿದೆ. ಈ ನಡುವೆ ಸಿನಿಮಾತಂಡ ಮತ್ತೊಂದು ಸಾಹಸಕ್ಕೆ ಮುಂದಾಗಿದೆ. ಪುನೀತ್ ರಾಜ್ ಕುಮಾರ್ ಅವರ ಧ್ವನಿಯಲ್ಲೇ ಸಿನಿಮಾವನ್ನು ರೀ ರಿಲೀಸ್ ಮಾಡಲು ಸಿನಿಮಾತಂಡ ತಯಾರಿ ನಡೆಸಿದೆ. ಅತ್ಯುತ್ತಮ ತಂತ್ರಜ್ಞಾನ ಬಳಸಿ ಪುನೀತ್ ಧ್ವನಿ ಮಿಕ್ಸ್ ಮಾಡಿ ಮತ್ತೆ ಬಿಡುಗಡೆ ಮಾಡುತ್ತಿದೆ ಸಿನಿಮಾತಂಡ. ಇದೇ ಶುಕ್ರವಾರ ಏಪ್ರಿಲ್ 22ರಿಂದ ಜೇಮ್ಸ್ ಸಿನಿಮಾ ಹೊಸ ರೂಪದಲ್ಲಿ ಅಭಿಮಾನಿಗಳ ಮುಂದೆ ಬರುತ್ತಿದೆ. ಈ ಬಗ್ಗೆ ನಿರ್ದೇಶಕ ಚೇತನ್ ಮಾಹಿತಿ ನೀಡಿದ್ದಾರೆ. ಜೊತೆಗೆ ಜೇಮ್ಸ್ ಸಿನಿಮಾವನ್ನು ಪುನೀತ್ ಧ್ವನಿಯಲ್ಲೇ ಬಿಡುಗಡೆ ಮಾಡಲು ಸಹಾಯ ಮಾಡಿದ್ದು ತೆಲುಗು ಸ್ಟಾರ್ ಶ್ರೀಕಾಂತ್ ಎನ್ನುವ ವಿಚಾರವನ್ನು ಬಹಿರಂಗ ಪಡಿಸಿದ್ದಾರೆ.

ಅಂದಹಾಗೆ ತೆಲುಗು ನಟ ಶ್ರೀಕಾಂತ್ ಜೇಮ್ಸ್ ಸಿನಿಮಾದಲ್ಲೂ ನಟಿಸಿದ್ದಾರೆ. 'ಸಿನಿಮಾಗೆ ಶಿವರಾಜ್ ಕುಮಾರ್ ಧ್ವನಿ ನೀಡಿದ ಬಳಿಕ ಶ್ರೀಕಾಂತ್ ನಿರ್ದೇಶಕ ಚೇತನ್ ಅವರಿಗೆ ಕರೆ ಮಾಡಿ, ಮೂರು ವರ್ಷಗಳಿಂದ ಸತತವಾಗಿ ಪ್ರಯತ್ನ ಪಾಡುತ್ತಿದ್ದಾರೆ. ಹೈದರಾಬಾದ್ ಗೆ ಬಂದು ಸೌಂಡ್ ಇಂಜಿನಿಯರ್ ಶ್ರೀನಿವಾಸ್ ಸರ್ ಅವರು ರಿಸರ್ಚ್ ಮಾಡ್ತಾ ಇದ್ದಾರೆ ಇವರಿಗೆ ಧ್ವನಿ ಕಳುಹಿಸಿ ಎಂದು ಹೇಳಿದರು. ಬಳಿಕ ನಾವು ಅಪ್ಪು ಸರ್ ಅವರ ಸಂದರ್ಶನಗಳು, ಕನ್ನಡದ ಕೋಟ್ಯಾಧಿಪತಿ ಕಾರ್ಯಕ್ರಮ, ಅವರ ಸಿನಿಮಾಗಳ ವಾಯ್ಸ್ ಗಳನ್ನು ಕಲೆಕ್ಟ್ ಮಾಡಿ ಕಳುಹಿಸಿದೆವು. ಮೂರು ವರ್ಷಗಳಿಂದ ಇದರ ಮೇಲೆ ಕೆಲಸ ಮಾಡುತ್ತಿದ್ದಾರೆ. ಇದೀಗ ಮೊದಲ ಬಾರಿಗೆ ಈ ಪ್ರಯತ್ನ ಮಾಡಲಾಗಿದೆ. ಮೂರು ದಿನಗಳ ಹಿಂದೆ ಕರೆ ಮಾಡಿ ಅಪ್ಪು ಸರ್ ಧ್ವನಿ ಸಿಕ್ಕಿದೆ ಎಂದು ಕರೆ ಮಾಡಿದರು. ನಿಜವಾಗಲು ಶಾಕ್ ಆಯ್ತು. ವಾಯ್ಸ್ ಕ್ಲಿಪ್ಪಿಂಗ್ ಸಹ ಕಳುಹಿಸಿದ್ದರು. ಅದನ್ನು ಕೇಳಿ ನಿಜಕ್ಕೂ ಕಣ್ಣಲ್ಲಿ ನೀರು ಬಂತು. ನಮ್ಮ ದೇವರ ಧ್ವನಿ ಕೇಳಿದ ಹಾಗೆ ಆಯ್ತು. ಹೈದರಾಬಾದ್ ಗೆ ಹೋದ್ವಿ ಅಲ್ಲಿ ವಾಯ್ಸ್ ಮಿಕ್ಸ್ ಮಾಡಿ ಸಂಪೂರ್ಣ ಸಿನಿಮಾ ನೋಡಿದ್ವಿ ಮನಸ್ಸಿಗೆ ಬೇರೆ ತರ ಅನುಭವವಿದು' ಎಂದು ಹೇಳಿದರು.

'ಆದಿಪುರುಷ್' ಕೆಲಸ ನಿಲ್ಲಿಸಿ ಮೊದಲು 'ಜೇಮ್ಸ್' ಚಿತ್ರ ಮುಗಿಸಿ; ಪ್ರಭಾಸ್

'ಅಪ್ಪು ಅವರನ್ನು ದೇವರಾಗಿ ಕಾಣುತ್ತಿದ್ದಾರೆ. ಈ ಸಂಶೋದನೆಯಲ್ಲಿ ಮೊದಲ ಸಕ್ಸಸ್ ಸಿಕ್ಕಿದೆ. ಇದೀಗ ಸದ್ಯ ಇರುವ ಚಿತ್ರಮಂದಿರಗಳಲ್ಲಿ ಅಪ್ಪು ಸರ್ ವಾಯ್ಸ್ ಇರುವ ಸಿನಿಮಾ ರೀ ರಿಲೀಸ್ ಆಗುತ್ತಿದೆ. ಏಪ್ರಿಲ್ 22ರಿಂದ ಎಲ್ಲಾ ಚಿತ್ರಮಂದಿರಗಳಲ್ಲಿ ನೋಡಬಹುದು' ಎಂದು ಹೇಳಿದ್ದಾರೆ.

ಪ್ರಭಾಸ್ ಹೇಳಿದ್ದೇನು?

ಜೇಮ್ಸ್ ಸಿನಿಮಾಗೆ ವಾಯ್ಸ್ ಮಿಕ್ಸಿಂಗ್ ಮಾಡಿದ ತಂತ್ರಜ್ಞರು ಪ್ರಭಾಸ್ ನಟನೆಯ ಆದಿಪುರುಷ್ ಸಿನಿಮಾದ ಕೆಲಸ ಮಾಡುತ್ತಿದ್ದಾರೆ. ಅವರ ಬಳಿ ಜೇಮ್ಸ್ ಸಿನಿಮಾದ ಕೆಲಸ ಮಾಡಿಕೊಡಲು ಕೇಳಿದಾಗ ಅವರು ಪ್ರಭಾಸ್ ಬಳಿ ಈ ವಿಚಾರವನ್ನು ಚರ್ಚಿಸಿದ್ದಾರೆ. ಕನ್ನಡದ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರ ಜೇಮ್ಸ್ ಸಿನಿಮಾದ ವಾಯ್ಸ್ ಮಿಕ್ಸಿಂಗ್ ಕೆಲಸ ಬಂದಿದೆ ಎಂದು ತಂತ್ರಜ್ಞರು ಪ್ರಭಾಸ್ ಬಳಿ ಹೇಳಿದಾಗ ಬಾಹುಬಲಿ ಸ್ಟಾರ್ 'ಆದಿಪುರುಷ್ ಚಿತ್ರದ ಕೆಲಸ ನಿಲ್ಲಿಸಿ ಮೊದಲು ಪುನೀತ್ ಸಿನಿಮಾದ ಕೆಲಸ ಮುಗಿಸಿ' ಎಂದು ಹೇಳಿದ್ದರಂತೆ. ಈ ವಿಚಾರವನ್ನು ತಂತ್ರಜ್ಞರು ಪತ್ರಿಕಾಗೋಷ್ಠಿಯಲ್ಲಿ ಬಹಿರಂಗ ಪಡಿಸಿದ್ದಾರೆ.

ಪುನೀತ್‌ ವಾಯ್ಸನಲ್ಲೇ ಜೇಮ್ಸ್‌ ಚಿತ್ರ; ಪವರ್‌ ಧ್ವನಿಯನ್ನು ಮರು ಸೃಷ್ಟಿಸಿರುವ ಸೌಂಡ್‌ ಇಂಜಿನಿಯರ್‌!

ಕನ್ನಡ ಸಿನಿಮಾದಲ್ಲಿ ಅದರಲ್ಲೂ ಪುನೀತ್ ರಾಜ್ ಕುಮಾರ್ ಸಿನಿಮಾಗೆ ಕೆಲಸ ಮಾಡಲು ಅವಕಾಶ ಸಿಕ್ಕಿದ್ದು ತುಂಬಾ ಸಂತಸವಾಗಿದೆ ಎಂದು ತಂತ್ರಜ್ಞರು ಹೇಳಿದ್ದಾರೆ. ಬಹುನಿರೀಕ್ಷೆಯ ಜೇಮ್ಸ್ ಸಿನಿಮಾ ಬಿಡುಗಡೆಗೂ ಮೊದಲು ಅಪ್ಪು ಇಹಲೋಕ ತ್ಯಜಿಸಿದರು. ಚಿತ್ರೀಕರಣ ಮುಗಿಸಿದ್ದ ಪುನೀತ್ ಡಬ್ಬಿಂಗ್ ಬಾಕಿ ಇತ್ತು. ಅಪ್ಪು ಸಿನಿಮಾಗೆ ಸಹೋದರ ಶಿವರಾಜ್ ಕುಮಾರ್ ಧ್ವನಿ ನೀಡುವ ಮೂಲಕ ನೋವಿನಲ್ಲೂ ತಮ್ಮನ ಸಿನಿಮಾ ಬಿಡುಗಡೆಗೆ ಸಾಥ್ ನೀಡಿದ್ದರು. ಇದೀಗ ತಂತ್ರಜ್ಞಾನದ ಮೂಲಕ ಪುನೀತ್ ಧ್ವನಿಯಲ್ಲೇ ಬರ್ತಿದೆ ಜೇಮ್ಸ್. ಮತ್ತೊಮ್ಮೆ ಪ್ರೀತಿಯ ಅಪ್ಪುನನ್ನು ತೆರೆಮೇಲೆ ನೋಡಿ ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿದ್ದಾರೆ. ಅಪ್ಪು ಧ್ವನಿಯಲ್ಲೇ ಬರ್ತಿರುವ ಜೇಮ್ಸ್ ಹೇಗಿರಲಿದೆ ಎಂದು ಏಪ್ರಿಲ್ 22ರಂದು ಗೊತ್ತಾಗಲಿದೆ.