ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗಾಣಿಕೆ ನಿಂತರೆ ತೈಲ ಬೆಲೆ ನಿಯಂತ್ರಣ ತಪ್ಪುತ್ತೆ. ಕಚ್ಚಾ ತೈಲ ಬೆಲೆ ಬ್ಯಾರೆಲ್ಗೆ 5.5% ರಷ್ಟು ಏರಿಕೆಯಾಗಿ 76 ಡಾಲರ್ಗೆ ತಲುಪಿದೆ.
ನವದೆಹಲಿ: ಜಾಗತಿಕಮಟ್ಟದಲ್ಲಿ ತೈಲ ಬೆಲೆಗಳು ಏರಿಕೆ ಕಂಡಿವೆ. ಇರಾನ್ನ ಸೌತ್ ಪಾರ್ಸ್ ಅನಿಲ ಕ್ಷೇತ್ರದ ಮೇಲೆ ಇಸ್ರೇಲ್ ದಾಳಿ ನಡೆಸಿದ್ದೇ ಇದಕ್ಕೆ ಕಾರಣವಾಗಿದೆ. ಕಚ್ಚಾ ತೈಲ ಬೆಲೆ ಬ್ಯಾರೆಲ್ಗೆ 5.5% ರಷ್ಟು ಏರಿಕೆಯಾಗಿ 76 ಡಾಲರ್ಗೆ ತಲುಪಿದೆ. ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷ ಮುಂದುವರಿದರೆ ಜಾಗತಿಕ ಮಾರುಕಟ್ಟೆಯಲ್ಲಿ ದೀರ್ಘಕಾಲದ ಅನಿಶ್ಚಿತತೆ ಉಂಟಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಇಸ್ರೇಲ್ ದಾಳಿಗೆ ಇರಾನ್ ಪ್ರತೀಕಾರ ತೀರಿಸಿಕೊಂಡರೆ ಸಂಘರ್ಷ ಮತ್ತಷ್ಟು ಉಲ್ಬಣಗೊಳ್ಳುತ್ತದೆ. ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗಾಣಿಕೆ ನಿಂತರೆ ತೈಲ ಬೆಲೆ ನಿಯಂತ್ರಣ ತಪ್ಪುತ್ತದೆ. ಏಕೆಂದರೆ, ಸುಮಾರು 20% ರಷ್ಟು ತೈಲ ರಫ್ತು ಹಾರ್ಮುಜ್ ಜಲಸಂಧಿಯ ಮೂಲಕವೇ ನಡೆಯುತ್ತದೆ.
ಹಾರ್ಮುಜ್ ಜಲಸಂಧಿ ಅಪಾಯದಲ್ಲಿದೆಯೇ?
ಇರಾನ್ನ ಉತ್ತರ ಮತ್ತು ಅರೇಬಿಯನ್ ಪರ್ಯಾಯ ದ್ವೀಪದ ದಕ್ಷಿಣದಲ್ಲಿರುವ ಹಾರ್ಮುಜ್ ಜಲಸಂಧಿ ಪ್ರಮುಖ ಸರಕು ಸಾಗಣೆ ಮಾರ್ಗವಾಗಿದೆ. ಜಾಗತಿಕ ಎಲ್ಎನ್ಜಿ ವ್ಯಾಪಾರದ ಸುಮಾರು 20% ಮತ್ತು ಕಚ್ಚಾ ತೈಲ ರಫ್ತಿನ ದೊಡ್ಡ ಭಾಗವು ಈ ಜಲಸಂಧಿಯ ಮೂಲಕವೇ ಸಾಗುತ್ತದೆ. ಹಾರ್ಮುಜ್ ಜಲಸಂಧಿಯಲ್ಲಿ ಯಾವುದೇ ಅಡಚಣೆ ಉಂಟಾದರೆ ಇರಾಕ್, ಸೌದಿ ಅರೇಬಿಯಾ ಮತ್ತು ಯುಎಇಗಳಿಂದ ತೈಲ ರಫ್ತಿಗೆ ತೊಂದರೆಯಾಗುತ್ತದೆ ಎಂದು ತಜ್ಞರು ಹೇಳುತ್ತಾರೆ.
Related Articles
ಈ ದೇಶಗಳು ಭಾರತದ ಪ್ರಮುಖ ತೈಲ ಪೂರೈಕೆದಾರರು. ಈ ಮಾರ್ಗದಲ್ಲಿ ಯಾವುದೇ ಅಡಚಣೆ ಉಂಟಾದರೆ ರಫ್ತಿಗೆ ಹಾನಿಯಾಗುತ್ತದೆ. ಈ ಹಿಂದೆ ಈ ಮಾರ್ಗವನ್ನು ಮುಚ್ಚುವುದಾಗಿ ಇರಾನ್ ಎಚ್ಚರಿಕೆ ನೀಡಿತ್ತು. ಹಾರ್ಮುಜ್ ಜಲಸಂಧಿಯ ಮೂಲಕ ಇರಾನ್ ಪ್ರತೀಕಾರ ತೀರಿಸಿಕೊಳ್ಳಬಹುದು ಎಂಬುದು ಮಾರುಕಟ್ಟೆಯಲ್ಲಿನ ದೊಡ್ಡ ಆತಂಕವಾಗಿದೆ.
ತೈಲ ಬೆಲೆ 13% ಕ್ಕಿಂತ ಹೆಚ್ಚು
ಕಳೆದ ಶುಕ್ರವಾರ, ಬ್ರೆಂಟ್ ಕಚ್ಚಾ ತೈಲ ಬೆಲೆ 13% ಕ್ಕಿಂತ ಹೆಚ್ಚು ಏರಿಕೆಯಾಗಿತ್ತು, ಇದು ಇತ್ತೀಚಿನ ದಿನಗಳಲ್ಲಿ ಅತಿ ಹೆಚ್ಚಿನ ಏರಿಕೆಯಾಗಿದೆ. ಇಂಧನ ಪೂರೈಕೆ ಸರಪಳಿಗೆ ಅಡಚಣೆಯಾಗಬಹುದು ಎಂಬ ಆತಂಕದಿಂದ ತೈಲ ವ್ಯಾಪಾರಿಗಳು ಹೆಚ್ಚಿನ ಬೆಲೆ ಏರಿಕೆಗೆ ಸಿದ್ಧರಾಗುತ್ತಿದ್ದಾರೆ ಎಂದು ವರದಿಯಾಗಿದೆ.
ಸೌದಿಯಲ್ಲಿಯೂ ಷೇರು ಮಾರುಕಟ್ಟೆ ಕುಸಿತ
ಇದೇ ವೇಳೆ, ಇಸ್ರೇಲ್ ಅನಿಲ ಉತ್ಪಾದನೆಯನ್ನು ನಿಲ್ಲಿಸಿದ್ದರಿಂದ ಇಂಧನ ಕೊರತೆ ಉಂಟಾಗಬಹುದು ಎಂಬ ಆತಂಕದಿಂದಾಗಿ ಈಜಿಪ್ಟ್ನ ಷೇರು ಮಾರುಕಟ್ಟೆ ಒಂದು ವರ್ಷದಲ್ಲಿಯೇ ಅತಿ ದೊಡ್ಡ ಏಕದಿನ ಕುಸಿತ ಕಂಡಿದೆ. ಸೌದಿ ಷೇರುಗಳು ಸಹ ಕುಸಿತ ಕಂಡಿವೆ.
ರಷ್ಯಾ-ಉಕ್ರೇನ್ ಯುದ್ಧ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜಾರಿಗೆ ತಂದ ಹೊಸ ಸುಂಕ ನೀತಿಗಳು ಮುಂತಾದ ಜಾಗತಿಕ ಭೂ-ರಾಜಕೀಯ ಒತ್ತಡಗಳ ಜೊತೆಗೆ ಮಧ್ಯಪ್ರಾಚ್ಯದಲ್ಲಿ ಈ ಹೊಸ ಸ್ಫೋಟ ಸಂಭವಿಸಿದೆ.
ಗಾಜಾದ ರಫಾ ಪ್ರದೇಶದ ನೆರವು ವಿತರಣಾ ಕೇಂದ್ರದ ಮೇಲೆಯೂ ದಾಳಿ
ಹಮಾಸ್ ಉಗ್ರಗಾಮಿಗಳು ಮತ್ತು ಇಸ್ರೇಲಿ ಸೇನೆಯ ನಡುವೆ ಒಂದು ವರ್ಷಕ್ಕೂ ಹೆಚ್ಚು ಕಾಲ ನಡೆದ ಹೋರಾಟದ ನಡುವೆಯೇ, ಗಾಜಾದ ರಫಾ ಪ್ರದೇಶದ ನೆರವು ವಿತರಣಾ ಕೇಂದ್ರದಲ್ಲಿ ನಡೆದ ಗುಂಡಿನ ದಾಳಿಯಲ್ಲಿ ಕನಿಷ್ಠ 25 ಪ್ಯಾಲೆಸ್ಟೀನಿಯನ್ನರು ಸಾವನ್ನಪ್ಪಿದ್ದು, 70 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಅಕ್ಟೋಬರ್ 7, 2023 ರಂದು, ಹಮಾಸ್ ಇಸ್ರೇಲ್ ಮೇಲೆ ದಾಳಿ ಮಾಡಿ 1,139 ಇಸ್ರೇಲಿಗಳನ್ನು ಕೊಂದು 251 ಒತ್ತೆಯಾಳುಗಳನ್ನು ತೆಗೆದುಕೊಂಡಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಇಸ್ರೇಲ್ ಗಾಜಾದ ಮೇಲೆ ಯುದ್ಧವನ್ನು ಪ್ರಾರಂಭಿಸಿತು.
ಇಸ್ರೇಲ್-ಹಮಾಸ್ ಯುದ್ಧವು ಗಾಜಾದಲ್ಲಿ ಇಲ್ಲಿಯವರೆಗೆ 54,000 ಕ್ಕೂ ಹೆಚ್ಚು ಜನರನ್ನು ಬಲಿ ತೆಗೆದುಕೊಂಡಿದೆ. 100,000 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ನಡೆಯುತ್ತಿರುವ ಯುದ್ಧವು ಗಾಜಾ ಪಟ್ಟಿಯಲ್ಲಿ ಅಗತ್ಯ ವಸ್ತುಗಳ ಕೊರತೆಗೆ ಕಾರಣವಾಗಿದೆ. ವಿವಿಧ ದೇಶಗಳು ಪರಿಹಾರ ಸಾಮಗ್ರಿಗಳನ್ನು ಕಳುಹಿಸುತ್ತಿವೆ. ಅಮೆರಿಕದ ದತ್ತಿ ಸಂಸ್ಥೆಯೊಂದು ಗಾಜಾದಲ್ಲಿ ಈ ಪರಿಹಾರ ಸಾಮಗ್ರಿಗಳನ್ನು ವಿತರಿಸುತ್ತಿದೆ.
