ಡ್ರ್ಯಾಗನ್, ಆನೆ ಜೋಡಿ ಕುಣಿತ ಚೆಂದ: ವರ್ಣಿಸಲಸಾಧ್ಯ ಕ್ಸಿ ಹೇಳಿಕೆಯ ಅಂದ!
ಭಾರತ-ಚೀನಾ ಅನೌಪಚಾರಿಕ ಶೃಂಗಸಭೆ ಅಂತ್ಯ| ಮಹತ್ವದ ಒಪ್ಪಂದಗಳಿಗೆ ಸೈ ಎಂದ ಮೋದಿ-ಕ್ಸಿ| ಭಾರತ ಭೇಟಿಯನ್ನು ಫಲಪ್ರದ ಎಂದು ಬಣ್ಣಿಸಿದ ಚೀನಾ ಅಧ್ಯಕ್ಷ| ಡ್ರ್ಯಾಗನ್-ಆನೆ ಜೋಡಿ ಕುಣಿತ ನೋಡಲು ಚೆಂದ ಎಂದ ಕ್ಸಿ| ಭಾರತ-ಚೀನಾ ಸಂಬಂಧ ಅತ್ಯಂತ ಗಟ್ಟಿಯಾಗಿದೆ ಎಂದ ಜಿನ್ಪಿಂಗ್| ‘ಪರಸ್ಪರ ಅಭಿವೃದ್ಧಿಯೇ ಉಭಯ ರಾಷ್ಟ್ರಗಳ ಧ್ಯೇಯ ಮಂತ್ರ’|‘ನಮ್ಮ ಭವಿಷ್ಯ ರೂಪಿಸುವ ಜವಾಬ್ದಾರಿ ನಮ್ಮ ಮೇಲೆಯೇ ಇದೆ’| ಸಾಂಸ್ಕೃತಿಕ ಬೆಸುಗೆ ನಮ್ಮನ್ನು ಸದಾಕಾಲ ಬಂಧಿಸಿರಲಿ ಎಂದು ಹಾರೈಸಿದ ಕ್ಸಿ|
ನವದೆಹಲಿ(ಅ.13): ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರ ಅನೌಪಚಾರಿಕ ಭಾರತ ಭೇಟಿ ಮುಕ್ತಾಯ ಕಂಡಿದ್ದು, ಪ್ರಧಾನಿ ಮೋದಿ ಅವರೊಂದಿಗಿನ ಮಾತುಕತೆ ವೇಳೆ ಹಲವು ಮಹತ್ವದ ಒಪ್ಪಂದಗಳಿಗೆ ಸೈ ಎಂದಿದ್ದಾರೆ.
ಭಾರತ-ಚೀನಾ ಸಂಬಂಧವನ್ನು ತಮ್ಮದೇ ಆದ ವಿಶಿಷ್ಟ ಶೈಲಿಯಲ್ಲಿ ಬಣ್ಣಿಸಿರುವ ಚೀನಿ ಅಧ್ಯಕ್ಷ ಕ್ಸಿ ಜಿನ್ಪಿಂಗ್, ಡ್ರ್ಯಾಗನ್ ಹಾಗೂ ಆನೆಯ ಜೋಡಿ ಕುಣಿತ ನೋಡಲು ಚೆಂದ ಎಂದು ವರ್ಣಿಸಿದ್ದಾರೆ.
ಎಂತಹ ಕಠಿಣ ಪರಿಸ್ಥಿತಿಯಲ್ಲೂ ಭಾರತ-ಚೀನಾ ರಾಷ್ಟ್ರಗಳು ತಮ್ಮ ಸಂಬಂಧವನ್ನು ಕಾಪಾಡಿಕೊಳ್ಳುವ ಅಗತ್ಯವಿದೆ ಎಂದು ಕ್ಸಿ ಅಭಿಪ್ರಾಯಪಟ್ಟಿದ್ದಾರೆ.
ಪರಸ್ಪರ ಅಭಿವೃದ್ಧಿ ಉಭಯ ರಾಷ್ಟ್ರಗಳ ಧ್ಯೇಯ ಮಂತ್ರವಾಗಬೇಕು ಎಂದಿರುವ ಕ್ಸಿ, ನಮ್ಮ ಭವಿಷ್ಯ ರೂಪಿಸುವ ಜವಾಬ್ದಾರಿ ನಮ್ಮ ಮೇಲೆಯೇ ಇದೆ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ.
ಭಾರತದಿಂದ ವಾಪಸ್ಸಾದ ಬಳಿಕ ಈ ಕುರಿತು ಹೇಳಿಕೆ ನೀಡಿರುವ ಚೀನಾ ಅಧ್ಯಕ್ಷ, ಪ್ರಧಾನಿ ಮೋದಿ ಅವರೊಂದಿಗಿನ ಶೃಂಗಸಭೆ ಅತ್ಯಂತ ಫಲಪ್ರದ ಎಂದು ಬಣ್ಣಿಸಿದ್ದಾರೆ.
ವ್ಯಾಪಾರ ಸಂಬಂಧವನ್ನು ಉತ್ತಮಗೊಳಿಸಿವುದು ಉಭಯ ರಾಷ್ಟ್ರಗಳಿಗೂ ಅನಿವಾರ್ಯ ಕ್ರಮ ಎಂದಿರುವ ಕ್ಸಿ, ಸಾಂಸ್ಕೃತಿಕ ಬೆಸುಗೆ ನಮ್ಮನ್ನು ಸದಾಕಾಲ ಬಂಧಿಸಿರಲಿ ಎಂದು ಹಾರೈಸಿದ್ದಾರೆ.