ಕಳ್ಳರ ಕೈಗೆ ಅಧಿಕಾರ ಕೊಡೋದಕ್ಕಿಂತ ದೇಶದ ಮೇಲೆ ಅಣ್ವಸ್ತ್ರ ಹಾಕಿ ಎಂದ ಪಾಕ್ ಮಾಜಿ ಪ್ರಧಾನಿ ಇಮ್ರಾನ್ ಖಾನ್!
ದೇಶದ ಮೇಲೆ ‘ಕಳ್ಳರ’ ಅಟ್ಟಹಾಸ ಮೆರೆದಿರುವುದನ್ನು ಕಂಡು ಬೆಚ್ಚಿಬಿದ್ದಿದ್ದೇನೆ ಎಂದಿರುವ ಇಮ್ರಾನ್ ಖಾನ್, ಇಂತವರಿಗೆ ಚುಕ್ಕಾಣಿ ಹಿಡಿಯುವುದಕ್ಕಿಂತ ದೇಶದ ಮೇಲೆ ಅಣುಬಾಂಬ್ ಹಾಕುವುದು ಒಳಿತು ಎಂದು ಹೇಳಿದ್ದಾರೆ.
ಇಸ್ಲಾಮಾಬಾದ್ (ಮೇ.14): ದೇಶದ ಅಧಿಕಾರವನ್ನು ಕಳ್ಳರ (thieves) ಕೈಗೆ ಕೊಟ್ಟು ಕಷ್ಟ ಅನುಭವಿಸುವುದಕ್ಕಿಂತ, ದೇಶದ ಮೇಲೆ ಪರಮಾಣು ಬಾಂಬ್ (atomic bomb) ಅನ್ನು ಎಸೆಯುವುದೇ ಉತ್ತಮವಾಗಿತ್ತು ಎಂದು ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ (former Prime Minister Imran Khan), ಶೆಹಬಾಜ್ ಷರೀಫ್ ( shehbaz sharif) ನೇತೃತ್ವದ ಪಾಕಿಸ್ತಾನದ ನೂತನ ಸರ್ಕಾರವನ್ನು ಕಟು ಶಬ್ದಗಳಲ್ಲಿ ಟೀಕಿಸಿದ್ದಾರೆ.
ದಿ ನ್ಯೂಸ್ ಇಂಟರ್‌ನ್ಯಾಶನಲ್ ಪ್ರಕಾರ, ಶುಕ್ರವಾರ ತಮ್ಮ ಬಾನಿಗಾಲ ನಿವಾಸದಲ್ಲಿ ಸುದ್ದಿಗಾರರೊಂದಿಗೆ ನಡೆಸಿದ ಸಂವಾದದ ವೇಳೆ ಇಮ್ರಾನ್ ಖಾನ್ ಈ ಹೇಳಿಕೆಗಳನ್ನು ನೀಡಿದ್ದಾರೆ. ಪಾಕಿಸ್ತಾನ್ ತೆಹ್ರೀಕ್-ಎ-ಇನ್ಸಾಫ್ ಪಕ್ಷದ ಅಧ್ಯಕ್ಷ ಇಮ್ರಾನ್ ಖಾನ್, "ದೇಶದ ಅಧಿಕಾರದಲ್ಲಿ ಕಳ್ಳರು ಇರುವುದನ್ನು ನೋಡಿ ಆಘಾತಕ್ಕೆ ಒಳಗಾಗಿದ್ದೇನೆ' ಎಂದು ಹೇಳಿದರು. ಇಂಥ ಕಳ್ಳರ ಕೈಗೆ ದೇಶವನ್ನು ನೀಡುವುದರ ಬದಲು, ಅಣ್ವಸ್ತ್ರವನ್ನು ನಮ್ಮ ದೇಶದ ಮೇಲೆ ಹಾಕಿಕೊಳ್ಳುವುದು ಒಳ್ಳೆಯದು ಎಂದು ಹೇಳಿದ್ದಾರೆ.
ದಿ ನ್ಯೂಸ್ ಇಂಟರ್‌ನ್ಯಾಶನಲ್ ಪ್ರಕಾರ, "ಹಿಂದಿನ ಆಡಳಿತಗಾರರ" ಭ್ರಷ್ಟಾಚಾರದ ಕಥೆಗಳನ್ನು ತನಗೆ ಹೇಳುವ ಪ್ರಬಲ ವ್ಯಕ್ತಿಗಳು ಇತರರ ವಿರುದ್ಧದ ಆರೋಪಗಳ ಪಟ್ಟಿಯನ್ನು ದಾಖಲಿಸುವ ಬದಲಿಗೆ ತಮ್ಮ ಸರ್ಕಾರದ ಕಾರ್ಯಕ್ಷಮತೆಯ ಮೇಲೆ ಕೇಂದ್ರೀಕರಿಸಲು ಸಲಹೆ ನೀಡಲು ಪ್ರಾರಂಭಿಸಿದರು ಎಂದು ಖಾನ್ ಹೇಳಿದರು. ಅಧಿಕಾರಕ್ಕೆ ಬಂದಿರುವ ಕಳ್ಳರು ಪ್ರತಿಯೊಂದು ಸಂಸ್ಥೆ ಮತ್ತು ನ್ಯಾಯಾಂಗ ವ್ಯವಸ್ಥೆಯನ್ನು ನಾಶಪಡಿಸಿದ್ದಾರೆ ಎಂದು ಹೇಳಿದ ಅವರು, ಈಗ ಯಾವ ಸರ್ಕಾರಿ ಅಧಿಕಾರಿ "ಈ ಅಪರಾಧಿಗಳ" ಪ್ರಕರಣಗಳನ್ನು ತನಿಖೆ ಮಾಡುತ್ತಾರೆ ಎಂದು ಕೇಳಿದರು.
ಇಮ್ರಾನ್ ಖಾನ್ ಅವರು ಸರ್ಕಾರಿ ಸಂಸ್ಥೆಗಳನ್ನು ಗುರಿಯಾಗಿಸಿಕೊಂಡು ಭಾಷಣ ಮಾಡುವ ಮೂಲಕ ಪಾಕಿಸ್ತಾನದ ಜನರ ಮನಸ್ಸನ್ನು ವಿಷಪೂರಿತಗೊಳಿಸುತ್ತಿದ್ದಾರೆ ಎಂದು ಪ್ರಧಾನಿ ಶೆಹಬಾಜ್ ಷರೀಫ್ (shehbaz sharif) ಆರೋಪಿಸಿದ್ದರು. ಹೊಸ ಸರ್ಕಾರ ರಚನೆಯಾದ ನಂತರ ರಾಷ್ಟ್ರೀಯ ಅಸೆಂಬ್ಲಿಯ ಮೊದಲ ನಿಯಮಿತ ಅಧಿವೇಶನದಲ್ಲಿ ಶೆಹಬಾಜ್ ಅವರು "ಅಂದಿನ-ವಿರೋಧ ಮತ್ತು ಈಗಿನ ಸರ್ಕಾರ) ಕಳ್ಳರು ಮತ್ತು ಡಕಾಯಿಟ್‌ಗಳು ಎಂದು ಖಾನ್ ಪದೇ ಪದೇ ಕರೆಯುತ್ತಿದ್ದರಿಂದಲೇ ಇಂದು ರಾಷ್ಟ್ರ ವಿಭಜನೆ ಆದಂತಾಗಿದೆ.
ಮೇ 20 ರಂದು ನಡೆಯಲಿರುವ ಲಾಂಗ್ ಮಾರ್ಚ್‌ನಲ್ಲಿ ಫೆಡರಲ್ ರಾಜಧಾನಿಗೆ ಪ್ರವೇಶಿಸುವುದನ್ನು ಯಾವುದೇ ಶಕ್ತಿ ತಡೆಯಲು ಸಾಧ್ಯವಿಲ್ಲ ಎಂದು ಪಿಟಿಐ ಅಧ್ಯಕ್ಷರು ಶೆಹಬಾಜ್ ಷರೀಫ್ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದರು. ಪಾಕಿಸ್ತಾನ ಮುಸ್ಲಿಂ ಲೀಗ್ ನವಾಜ್ (ಪಿಎಂಎಲ್-ಎನ್) ನೇತೃತ್ವದ ಫೆಡರಲ್ ಸರ್ಕಾರದ ವಿರುದ್ಧ ಎರಡು ದಶಲಕ್ಷಕ್ಕೂ ಹೆಚ್ಚು ಜನರು ನಿಜವಾದ ಸ್ವಾತಂತ್ರ್ಯವನ್ನು ಪಡೆಯಲು ಇಸ್ಲಾಮಾಬಾದ್‌ಗೆ ತಲುಪುತ್ತಾರೆ ಮತ್ತು "ಆಮದು ಮಾಡಿಕೊಂಡ ಸರ್ಕಾರದ" ವಿರುದ್ಧ ಪ್ರತಿಭಟಿಸುತ್ತಾರೆ ಎಂದು ಅವರು ಎಚ್ಚರಿಸಿದ್ದಾರೆ ಎಂದು ಎಆರ್ ಐ ನ್ಯೂಸ್ ವರದಿ ಮಾಡಿದೆ. ಅಡೆತಡೆಗಳನ್ನು ಸೃಷ್ಟಿಸಲು ಎಷ್ಟು ಕಂಟೈನರ್‌ಗಳನ್ನು ಹಾಕಿದರೂ ಎರಡು ಮಿಲಿಯನ್ ಜನರು ಫೆಡರಲ್ ರಾಜಧಾನಿಗೆ ಬರುತ್ತಾರೆ ಎಂದು ಖಾನ್ ಶೆಹಬಾಜ್ ಷರೀಫ್ ನೇತೃತ್ವದ ಸರ್ಕಾರಕ್ಕೆ ಎಚ್ಚರಿಸಿದ್ದಾರೆ.
ತಾಪಮಾನ ಹೆಚ್ಚಾದರೆ ಜನ ಹೊರಗೆ ಬರುವುದಿಲ್ಲ ಎಂದು ನಮ್ಮ ವಿರೋಧಿಗಳು ಹೇಳುತ್ತಾರೆ, ಎಷ್ಟು ಕಂಟೈನರ್‌ಗಳನ್ನು ಬೇಕಾದರೂ ಹಾಕಿ, ಆದರೆ 2 ಮಿಲಿಯನ್ ಜನರು ಇಸ್ಲಾಮಾಬಾದ್‌ಗೆ ಬರುತ್ತಾರೆ ಎಂದು ಇಮ್ರಾನ್ ಖಾನ್ ಹೇಳಿದ್ದಾರೆ. ಅಧಿಕಾರದಲ್ಲಿರುವ ಸರ್ಕಾರವು ಅವರ ಉತ್ಸಾಹಕ್ಕೆ ಹೆದರುತ್ತದೆ ಎಂದು ಮಾಜಿ ಪ್ರಧಾನಿ ತಮ್ಮ ಬೆಂಬಲಿಗರಿಗೆ ಹೇಳಿದರು ಮತ್ತು ಅವರನ್ನು ಅಧಿಕಾರದಿಂದ ತೆಗೆದುಹಾಕಲು 11 ಪಕ್ಷಗಳು ಒಟ್ಟುಗೂಡಿವೆ ಎಂದು ಹೇಳಿದ್ದಾರೆ.
