ರಾಮನ​ ಪ್ರಾಣ ಉಳಿಸಲು ಹೋದ ಅಶೋಕನೇ ಜೀವ ತೆತ್ತು ಬಿಟ್ಟನಾ? ಇದೇನಾಗೋಯ್ತು?

ರಾಮ್​ನ ಪ್ರಾಣ ಉಳಿಸಲು ಪ್ಲ್ಯಾನ್​ ಮಾಡಿದ್ದ ಅಶೋಕನ ಜೀವವೇ ಹೊರಟು ಹೋಗಿದೆಯಾ? ಇದೇನಿದು ಸೀತಾರಾಮ ಟ್ವಿಸ್ಟ್​? 

Seeta Rama Ashok

 ಸೀತಾ ಮತ್ತು ರಾಮ್​ ಇನ್ನೇನು ಒಂದಾಗುವ ಕಾಲ ಬಂದೇ ಬಿಟ್ಟಿದೆ. ಮದುವೆ ಮಾತುಕತೆಯೂ ನಡೆಯುತ್ತಿದೆ. ಇವರಿಬ್ಬರನ್ನೂ ಹೇಗಾದರೂ ದೂರ ಮಾಡಬೇಕು ಎಂದುಕೊಂಡಿದ್ದ ಭಾರ್ಗವಿ ತಂತ್ರವೆಲ್ಲಾ ವಿಫಲವಾಗಿದೆ. ಈಗ ಆಕೆಯೂ ಮದುವೆಗೆ ಓಕೆ ಎಂದಿದ್ದಾಳೆ. ಮದುವೆಯಾದ ಮೇಲೆ ಆಟವಾಡಿಸುವುದಾಗಿ ಹೇಳಿಕೊಂಡಿದ್ದಾಳೆ. ಆದರೆ ಇದಕ್ಕೂ ಮುನ್ನ ರಾಮ್​ನನ್ನು ಕೊಲ್ಲಲು ಚಿಕ್ಕಮ್ಮ ಭಾರ್ಗವಿ ಸಂಚು ರೂಪಿಸಿದ್ದಳು. ಆತನ ಕಾರನ್ನು ಆ್ಯಕ್ಸಿಡೆಂಟ್​ ಮಾಡಿಸಿದ್ದಳು. ಸೀತಾಳನ್ನು ತಾತ ದೇಸಾಯಿ ಮನೆಗೆ ಕರೆಸಿ ಇನ್ನೇನು ಮದುವೆ ಮಾತುಕತೆ ಮುಂದುವರೆಸಬೇಕು ಎನ್ನುವಾಗಲೇ ಇದು ಸಾಧ್ಯವಾಗಬಾರದು ಎನ್ನುವ ಕಾರಣಕ್ಕೆ ಭಾರ್ಗವಿ ಈ ತಂತ್ರವನ್ನು ರೂಪಿಸಿದ್ದಳು. ಇದಕ್ಕಾಗಿ ಎಲ್ಲರ ಎದುರು ಒಳ್ಳೆಯತನದ ಸೋಗು ಹಾಕಿಕೊಂಡಿರೋ ಭಾರ್ಗವಿ, ಯಾರಿಗೂ ಅನುಮಾನ ಬಾರದಂತೆ ರಾಮ್​ನನ್ನು ವಿದೇಶಕ್ಕೆ ಕಳುಹಿಸುವ ಸಂಚು ರೂಪಿಸಿದ್ದಳು. ಅಲ್ಲಿ ತುರ್ತಾಗಿ ಯಾವುದೇ ಆಫೀಸ್​ ಕೆಲಸಕ್ಕೆ ಸಂಬಂಧಿಸಿದಂತೆ ಮೀಟಿಂಗ್​ ಇದೆ ಎಂದು ಅವನನ್ನು ಕಳುಹಿಸಿದ್ದಳು.

ಆದರೆ ಅದೇ ಇನ್ನೊಂದೆಡೆ ಭಾರ್ಗವಿಯ ಕುತಂತ್ರ ಗೆಳೆಯ ಅಶೋಕ್​ಗೆ ತಿಳಿದಿತ್ತು. ಸತ್ಯಜೀತ್​ ಎಲ್ಲಾ ಸತ್ಯವನ್ನೂ ಹೇಳಿದ್ದ. ಇದಕ್ಕೂ ಮುನ್ನವೇ ಭಾರ್ಗವಿಯ ಎಲ್ಲಾ ತಂತ್ರಗಳೂ ಅವನಿಗೆ ಗೊತ್ತಿದ್ದರೂ, ರಾಮ್​ ಅದನ್ನು ನಂಬುವ ಸ್ಥಿತಿಯಲ್ಲಿ ಇರಲಿಲ್ಲ. ಏಕೆಂದರೆ ಅವನು ತನ್ನ ಚಿಕ್ಕಮ್ಮ ಒಳ್ಳೆಯವಳು ಎಂದೇ ಅಂದುಕೊಂಡಿದ್ದಾನೆ. ತನ್ನ ತಾಯಿಯ ಸಾವಿಗೆ ಅವಳೇ ಕಾರಣ ಎನ್ನುವುದೂ ಅವನಿಗೆ ಗೊತ್ತಿಲ್ಲ. ಅದರೆ ಸೀತಾ ಮತ್ತು ರಾಮ್​ನನ್ನು ಬೇರೆ ಮಾಡಲು ಅವನನ್ನು ವಿದೇಶಕ್ಕೆ ಕಳುಹಿಸುವ ಪ್ಲ್ಯಾನ್​ ಮಾಡಿರುವುದು ಅಶೋಕ್​ಗೆ ಗೊತ್ತಾಗಿ ಕೊನೆಗೂ ರಾಮ್​ನ ಜೀವ ಉಳಿಸಿದ್ದ. ರಾಮ್​ ಜಾಗದಲ್ಲಿ ತಾನು ಹೋಗಿದ್ದ. ಆದರೆ ಅಪಘಾತದಿಂದ ಪಾರಾಗಿ ಜೀವ ಉಳಿಸಿಕೊಂಡಿದ್ದ.

ಆದರೆ ಇದೀಗ ಬೇರೆಯದ್ದೇ ನಡೆದು ಹೋಗಿದೆ. ಸೀತಾ-ರಾಮ ಅಲ್ಲಿ ಒಟ್ಟಾಗಿರುವ ಸಂದರ್ಭದಲ್ಲಿ ಪ್ರಿಯಾಳ ಬಾಳಿನಲ್ಲಿ ಬರಸಿಡಿಲು ಬಂದೊದಗಿದೆ. ರಾಮ್​ ಪ್ರಾಣಕ್ಕೆ ಅಪಾಯವಿದೆ ಎಂದು ಅರಿತಿದ್ದ ಅಶೋಕ್​, ತಾನು ಫಾರಿನ್​ ಟ್ರಿಪ್​ಗೆ ಹೋಗುವುದಾಗಿ ಸುಳ್ಳು ಹೇಳಿದ್ದ. ಅವನು ಅದೇನೋ ಪ್ಲ್ಯಾನ್​ ಮಾಡಿದ್ದ. ರಾಮ್​ನನ್ನು ಕೊಲ್ಲುವ ತಂತ್ರ ರೂಪಿಸುತ್ತಿರುವುದು ಭಾರ್ಗವಿಯೇ ಎಂದು ಅವನಿಗೆ ತಿಳಿದಿದ್ದರೂ ರಾಮ್​ಗೆ ಅದನ್ನು ತೋರಿಸಲು ಸಾಕ್ಷಿ ಬೇಕಾಗಿತ್ತು. ಅದಕ್ಕಾಗಿ ಏನೋ ಒಂದು ತಂತ್ರ ರೂಪಿಸಿದ್ದ. ಈ ವಿಷಯವನ್ನು ಪ್ರಿಯಾಗೆ ಮಾತ್ರ ಹೇಳಿದ್ದ. ರಾಮ್​ಗೂ ವಿಷಯ ಗೊತ್ತಿರಲಿಲ್ಲ. ನಾನು ಇಲ್ಲಿಯೇ ಇರುತ್ತೇನೆ. ಫಾರಿನ್​​ಗೆ ಆಫೀಸ್​ ಕೆಲಸದ ನಿಮಿತ್ತ ಹೋಗಿರುವುದಾಗಿ ಸುಳ್ಳು ಹೇಳುವಂತೆ ಪ್ರಿಯಾಳಿಗೆ ಹೇಳಿದ್ದ. ಪ್ರಿಯಾ ಕೂಡ ಅದನ್ನೇ ಮಾಡಿದ್ದಳು.

ಆದರೆ ಇಲ್ಲಿ ಆಗಿರುವುದೇ ಬೇರೆ. ಅಶೋಕ್​ನ ಮನೆಯ ಗೇಟ್​ ಪ್ರಿಯಾ ತೆಗೆಯುತ್ತಿದ್ದಂತೆಯೇ ಅಶೋಕ್​ ಬಿದ್ದಿರುವುದು ಕಂಡಿದೆ. ಆತ ಸತ್ತಿದ್ದಾನೋ, ಬದುಕಿದ್ದಾನೋ ಗೊತ್ತಿಲ್ಲ. ಪ್ರಿಯಾ ಶಾಕ್​ನಿಂದ ಗೋಳಾಡುತ್ತಿದ್ದಾಳೆ. ಪ್ರಾಣ ಸ್ನೇಹಿತ ರಾಮ್​ನ ಪ್ರಾಣ ಉಳಿಸಲು ಹೋಗಿ, ಈ ಷಡ್ಯಂತ್ರದ ರೂವಾರಿ ಯಾರು ಎಂದು ಸಾಕ್ಷ್ಯಾಧಾರ ತರಲು ಹೋದ ಅಶೋಕ್​ ಪ್ರಾಣ ಬಿಟ್ಟು ಬಿಟ್ಟನಾ ಎನ್ನುವುದು ಈಗಿರುವ ಪ್ರಶ್ನೆ. ಅಶೋಕನನ್ನು ಯಾವುದೇ ಕಾರಣಕ್ಕೂ ಸಾಯಿಸಬೇಡಿ ಎನ್ನುತ್ತಿದ್ದಾರೆ ಸೀರಿಯಲ್​ ಪ್ರೇಮಿಗಳು. ಅದರೆ ಸೀರಿಯಲ್​ಗೆ ಏನು ಟ್ವಿಸ್ಟ್​ ಬರುವುದೋ ನೋಡಬೇಕಿದೆ.