ನಮ್ ಹುಡುಗರು ಟೀಸರ್ ಬಿಡುಗಡೆ ಮಾಡಿದ ಉಪೇಂದ್ರ!
ತನ್ನ ಅಣ್ಣನ ಮಗ ನಿರಂಜನ್ ನಾಯಕನಾಗಿರುವ ‘ನಮ್ ಹುಡುಗ್ರು’ ಚಿತ್ರದ ಟೀಸರ್‌ಅನ್ನು ನಟ ಉಪೇಂದ್ರ ಹಾಗೂ ಪ್ರಿಯಾಂಕಾ ಉಪೇಂದ್ರ ಬಿಡುಗಡೆ ಮಾಡಿದ್ದಾರೆ.
ಟೀಸರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ರಿಯಲ್ ಸ್ಟಾರ್ ಉಪೇಂದ್ರ ಉಪೇಂದ್ರ,‘ಟೀಸರ್ ಅದ್ಭುತವಾಗಿ ಮೂಡಿಬಂದಿದೆ. ಸಿನಿಮಾ ಬಗ್ಗೆ ನಿರೀಕ್ಷೆ ಹೆಚ್ಚಿಸುವಂತಿದೆ. ‘ಬಳ್ಳಾರಿ ನಾಗ’ ಚಿತ್ರದಲ್ಲಿ ನಿರಂಜನ್ ವಿಷ್ಣುವರ್ಧನ್ ಅವರ ಜೊತೆಗೆ ಅವರ ಬಾಲ್ಯದ ಪಾತ್ರ ಮಾಡಿದ್ದ. ಇದೀಗ ಈ ಸಿನಿಮಾದ ಓಪನಿಂಗ್‌ನಲ್ಲೇ ವಿಷ್ಣು ಅವರಿಂದ ವಿಭಿನ್ನವಾಗಿ ಆಶೀರ್ವಾದ ಪಡೆಯುವ ಸೀನ್ ಇದೆ. ಅಂಥಾ ಕಲಾವಿದರ ಆಶೀರ್ವಾದ ಸದಾ ಈತನ ಮೇಲಿರಲಿ’ ಎಂದು ಹಾರೈಸಿದರು.
ಪ್ರಿಯಾಂಕಾ ಉಪೇಂದ್ರ ಮಾತನಾಡಿ, ‘ನಿರಂಜನ್ ಅವರ ಕೆಲಸ, ಪರಿಶ್ರಮ ನೋಡಿದ್ದೀನಿ. ಈ ಸಿನಿಮಾದಲ್ಲೊಂದು ಫ್ರೆಶ್‌ನೆಸ್ ಇದೆ. ಇಡೀ ತಂಡಕ್ಕೆ ಶುಭವಾಗಲಿ’ ಎಂದರು.
ಇಡೀ ಚಿತ್ರರಂಗವನ್ನೇ ಬೆಚ್ಚಿ ಬೀಳಿಸಿದೆ ನಿರಂಜನ್ ಫೋಟೋಶೂಟ್!ನಾಯಕ ನಿರಂಜನ್, ‘ಈ ಸಿನಿಮಾದಲ್ಲಿ ನನ್ನದು ಬರ್ಮಾ ಎಂಬ ಹುಡುಗನ ಪಾತ್ರ. ಪಾತ್ರದ ಪೋಷಣೆ ಚೆನ್ನಾಗಿದೆ. ಇದೊಂದು ಇನೋಸೆಂಟ್ ಲವ್ ಸ್ಟೋರಿ, ಫ್ಯಾಮಿಲಿ ಡ್ರಾಮ’ ಎಂದರು. ನಾಯಕಿ ರಾಧ್ಯಾ ರಂಗಾಯಣ, ನಾಗತಿಹಳ್ಳಿ ಚಂದ್ರಶೇಖರ್ ಅವರ ‘ಟೆಂಟ್’ ಸಿನಿಮಾದಲ್ಲಿ ನಟನೆಯ ಪಾಠ ಕಲಿತವರು. ಮೊದಲ ಚಿತ್ರದಲ್ಲೇ ಉತ್ತಮ ಪಾತ್ರ ಸಿಕ್ಕಿದ್ದಕ್ಕೆ ಖುಷಿಯಾಗಿದ್ದರು. ನಿರ್ದೇಶಕ ಹೆಚ್ ಬಿ ಸಿದ್ದು, ‘ಆ 20 ರಂದು ಸಿನಿಮಾದ ಲಿರಿಕಲ್ ಆಡಿಯೋ ಬಿಡುಗಡೆ ಆಗಲಿದೆ. ಒಂದು ಸುಳ್ಳಿನಿಂದ ಆಗುವ ಅನಾಹುತದ ಬಗ್ಗೆ ಸಿನಿಮಾವಿದೆ’ ಎಂದು ವಿವರಿಸಿದರು.
ನಿರ್ಮಾಪಕ ಅಶ್ರಫ್, ಸಂಗೀತ ನೀಡಿರುವ ಅಭಿಮಾನ್ ರಾಯ್ ಹಾಗೂ ಚಿತ್ರತಂಡದವರು ಉಪಸ್ಥಿತರಿದ್ದರು.
