ವಿವಾಹೇತರ ಸಂಬಂಧಗಳಿಗಾಗಿ ಡೇಟಿಂಗ್ ಆಪ್ ಬಳಸುವ ಭಾರತೀಯರ ಸಂಖ್ಯೆ 3 ಮಿಲಿಯನ್ ದಾಟಿದೆ. ಬೆಂಗಳೂರಿನಲ್ಲಿ ಅತಿ ಹೆಚ್ಚು ಬಳಕೆದಾರರಿದ್ದು, ಮಹಿಳೆಯರ ಸಂಖ್ಯೆಯೂ ಗಣನೀಯವಾಗಿ ಏರಿಕೆಯಾಗಿದೆ. ಈ ಬೆಳವಣಿಗೆ ಬದಲಾಗುತ್ತಿರುವ ಸಾಮಾಜಿಕ ಸ್ಥಿತಿಗತಿಯ ಪ್ರತಿಬಿಂಬಿಸುತ್ತದೆ.
ಆಧುನಿಕತೆಗೆ ತಕ್ಕಂತೆ ಸಂಬಂಧಗಳು ವಿಭಿನ್ನ ಸ್ವರೂಪ ಪಡೆಯುತ್ತಿವೆ. ಇಲ್ಲಿವರೆಗೆ ಅವಿವಾಹಿತರಿಗೆ, ವಿಚ್ಚೇದಿತರಿಗೆ ಮಾತ್ರ ಇದ್ದ ಡೇಟಿಂಗ್ ಆಪ್ಗಳು ಈಗ ವಿವಾಹೇತರ ಸಂಬಂಧ ಹುಡುಕುವವರಿಗೂ ಇದೆ. ಹಾಗೆಯೇ ವಿವಾಹೇತರ ಸಂಬಂಧಗಳನ್ನು ಹೊಂದಲು ಬಯಸುವವರಿಗಾಗಿಯೇ ಇರುವ ಡೇಟಿಂಗ್ ಆಪ್ ಒಂದು ನೀಡಿದ ಮಾಹಿತಿ ಬೆಚ್ಚಿ ಬೀಳಿಸಿದೆ.
ಹೌದು, ಗ್ಲೀಡಿನ್ ಎಂಬುದು ವಿವಾಹೇತರ ಸಂಬಂಧ ಹುಡುಕುತ್ತಿರುವವರಿಗಾಗಿ ಇರುವಂತಹ ಒಂದು ಡೇಟಿಂಗ್ ಆಪ್ ಆಗಿದೆ. ಇದನ್ನು ಭಾರತದಲ್ಲಿ ಸುಮಾರು 3 ಮಿಲಿಯನ್ಗೂ ಹೆಚ್ಚು ಜನ ಬಳಸುತ್ತಿದ್ದಾರೆ ಎಂಬ ಮಾಹಿತಿ ಹೊರ ಬಿದ್ದಿದ್ದು ಅಚ್ಚರಿ ಮೂಡಿಸಿದೆ. 3 ಮಿಲಿಯನ್ಗೂ ಹೆಚ್ಚು ಭಾರತೀಯರು ಈ ಗ್ಲೀಡಿನ್ ಆಪ್ನಲ್ಲಿ ಆಕ್ಟಿವ್ ಆಗಿದ್ದು, ಭಾರತದಲ್ಲೇ ನಮ್ಮ ಬೆಂಗಳೂರು ಅತೀ ಹೆಚ್ಚು ಬಳಕೆದಾರರನ್ನು ಹೊಂದಿದೆ ಎಂಬ ಅಚ್ಚರಿಕರ ವಿಚಾರ ಬೆಳಕಿಗೆ ಬಂದಿದೆ.
2024 ರಲ್ಲಿ ಈ ಅಪ್ಲಿಕೇಶನ್ ಬಳಕೆದಾರರ ಸಂಖ್ಯೆಯಲ್ಲಿ ಶೇಕಡಾ 270 ರಷ್ಟು ಏರಿಕೆ ಕಂಡು ಬಂದಿದೆ ಎಂದು ಗ್ಲೀಡೆನ್ ಹೇಳಿಕೊಂಡಿದ್ದು, ಮಹಿಳಾ ಬಳಕೆದಾರರಲ್ಲಿ ಶೇಕಡಾ 128 ರಷ್ಟು ಹೆಚ್ಚಳ ಕಂಡು ಬಂದಿದೆ ಎಂಬ ಮಾಹಿತಿ ಹೊರಬಿದ್ದಿದೆ.
Related Articles
ಗ್ಲೀಡೆನ್ನ ಬಳಕೆದಾರರಲ್ಲಿ ಈಗ ಮಹಿಳೆಯರ ಪ್ರಮಾಣ ಶೇ. 58 ರಷ್ಟಿದೆಯಂತೆ ಅವರಲ್ಲಿ ಶೇ. 40 ರಷ್ಟು ಜನರು ಪ್ರತಿದಿನ 45 ನಿಮಿಷಗಳವರೆಗೆ ಅಪ್ಲಿಕೇಶನ್ನಲ್ಲಿ ಕಳೆಯುತ್ತಾರೆ. ಗಮನಾರ್ಹವಾಗಿ, ಅನೇಕ ಬಳಕೆದಾರರು 30 ರಿಂದ 45 ವಯಸ್ಸಿನ ನಡುವಿನಲ್ಲಿದ್ದಾರೆ ಎಂದು ಗ್ಲೀಡಿನ್ ಮಾಹಿತಿ ತಿಳಿಸಿದೆ.
ಗ್ಲೀಡೆನ್ ಅಪ್ನ ಭಾರತದ ಕಂಟ್ರಿ ಮ್ಯಾನೇಜರ್ ಸಿಬಿಲ್ ಶಿಡೆಲ್ ಅವರು, ಈ ಬೆಳವಣಿಗೆಯನ್ನು ಬದಲಾಗುತ್ತಿರುವ ಸಾಮಾಜಿಕ ಚಲನಶೀಲತೆಯ ಸಂಕೇತವೆಂದು ಪರಿಗಣಿಸಿದ್ದಾರೆ. ಭಾರತವು ಯಾವಾಗಲೂ ಗ್ಲೀಡೆನ್ಗೆ ಪ್ರಮುಖ ಮಾರುಕಟ್ಟೆಯಾಗಿದೆ ಮತ್ತು 3 ಮಿಲಿಯನ್ ಬಳಕೆದಾರರ ಗಡಿಯನ್ನು ತಲುಪುವುದು ದೇಶದಲ್ಲಿ ಸಂಬಂಧಗಳ ವಿಕಸನಗೊಳ್ಳುತ್ತಿರುವ ಗ್ರಹಿಕೆಗಳಿಗೆ ಸಾಕ್ಷಿಯಾಗಿದೆ. ಮಹಿಳಾ ಬಳಕೆದಾರರ ಹೆಚ್ಚುತ್ತಿರುವ ಆಸಕ್ತಿಯು ಇಂದಿನ ಜಗತ್ತಿನಲ್ಲಿ ಸುರಕ್ಷತೆ, ವಿವೇಚನೆ ಮತ್ತು ಆಯ್ಕೆಯ ಸ್ವಾತಂತ್ರ್ಯಕ್ಕೆ ಆದ್ಯತೆ ನೀಡುವ ವೇದಿಕೆಗಳ ಮಹತ್ವವನ್ನು ಎತ್ತಿ ತೋರಿಸುತ್ತದೆ ಎಂದು ಅವರು ಹೇಳಿಕೊಂಡಿದ್ದಾರೆ.
ಗ್ಲೀಡೆನ್ನ ಬಳಕೆದಾರರ ಸಂಖ್ಯೆಯಲ್ಲಿ ಬೆಂಗಳೂರು ಶೇ. 20 ರಷ್ಟು ಮುಂಚೂಣಿಯಲ್ಲಿದೆ ಹಾಗೆಯೇ ನಂತರದ ಸ್ಥಾನದಲ್ಲಿ ಮುಂಬೈ ಶೇ. 19 ರಷ್ಟು, ಕೋಲ್ಕತ್ತಾ ಶೇ. 18 ರಷ್ಟು ಮತ್ತು ದೆಹಲಿ ಶೇ. 15 ರಷ್ಟು ಬಳಕೆದಾರರನ್ನು ಹೊಂದಿದೆ. ಮೆಟ್ರೋ ನಗರಗಳು ಗರಿಷ್ಠ ಬಳಕೆದಾರರನ್ನು ಹೊಂದಿದ್ದರೂ, ಭೋಪಾಲ್, ವಡೋದರಾ ಮತ್ತು ಕೊಚ್ಚಿಯಂತಹ ಸಣ್ಣ ನಗರಗಳಿಂದ ಬಳಕೆದಾರರ ಸಂಖ್ಯೆಯಲ್ಲಿ ತ್ವರಿತ ಏರಿಕೆ ಕಂಡು ಬಂದಿದೆ ಎಂದು ಗ್ಲೀಡಿನ್ ಬಿಡುಗಡೆ ಮಾಡಿದ ವರದಿ ಹೇಳಿದೆ.
ಜನರ ಈ ಅನೈತಿಕ ಸಂಬಂಧದ ಮೇಲಿನ ಆಸಕ್ತಿಯನ್ನೇ ಬಂಡವಾಳವಾಗಿಸಿಕೊಂಡಿರುವ ಗ್ಲೀಡಿನ್ ತನ್ನ ಬಳಕೆದಾರರನ್ನು 3 ಮಿಲಿಯನ್ನಿಂದ 5 ಮಿಲಿಯನ್ಗೆ ಏರಿಸಿಕೊಳ್ಳುವ ಗುರಿಯನ್ನು ಹೊಂದಿದ್ದು, ಇದಕ್ಕಾಗಿ ಅದು ತನ್ನ ವ್ಯಾಪ್ತಿಯನ್ನು ಬೇರೆ ನಗರಗಳಿಗೆ ವಿಸ್ತರಿಸಲಿದೆ ಜೊತೆಗೆ ತನ್ನ ಆಪ್ನಲ್ಲಿ ನವೀನ ವೈಶಿಷ್ಟ್ಯಗಳನ್ನು ಹೊರತರಲು ಯೋಜನೆಗಳನ್ನು ಹಾಕಿಕೊಂಡಿದೆ. ಮುಂದಿನ ವರ್ಷದ ವೇಳೆಗೆ ವೇದಿಕೆಯು 5 ಮಿಲಿಯನ್ ಬಳಕೆದಾರರನ್ನು ಹೊಂದುವ ಗುರಿ ಹೊಂದಿದೆ.
ಗ್ಲೀಡಿನ್ ಬಹಿರಂಗಪಡಿಸಿದ ಈ ವಿಚಾರವೀಗ ಪತಿ ಪತ್ನಿಯರೇ ಪರಸ್ಪರ ಅನುಮಾನದಿಂದ ನೋಡುವಂತಾಗಿದೆ. ಏಕಪತ್ನಿತ್ವ, ಪತಿವೃತತೆ ಮುಂತಾದ ಪದಗಳಿಂದ ಸದಾ ನಮ್ಮ ಸಂಸ್ಕೃತಿಗಳು ಸಂಪ್ರದಾಯಗಳು ವೈಭವೀಕರಿಸಲ್ಪಟ್ಟಿವೆ. ಹೀಗಿರುವಾಗ ಗ್ಲೀಡಿನ್ ಹೊರಗಟ್ಟಿದ ಈ ವಿಚಾರ ಅನೇಕರು ಅಚ್ಚರಿಯಿಂದ ನೋಡುವಂತೆ ಮಾಡಿದೆ.