ರಾಮ​ನಗರ: ರೇಷ್ಮೆನಾಡಲ್ಲಿ ಜೆಡಿ​ಎಸ್‌-ಕಾಂಗ್ರೆಸ್‌ ಮಧ್ಯೆ ಬಿಜೆಪಿ ಕಾದಾಟ..!

ಎಂ.ಅ​ಫ್ರೋಜ್‌ ಖಾನ್‌

ರಾಮ​ನಗರ(ಮೇ.06): ರೇಷ್ಮೆ ನಗರಿ ಎಂದು ಹೆಸರು ಪಡೆದಿರುವ ರಾಮನಗರ ಕ್ಷೇತ್ರ ಎರಡು ದಶ​ಕ​ಗ​ಳಿಂದ ಜೆಡಿಎಸ್‌ನ ಪಾರು​ಪ​ತ್ಯದ ಜೊತೆಗೆ ಕುಟುಂಬ ರಾಜಕಾರಣಕ್ಕೆ ನೆಲೆಯಾಗಿ ನಿಂತಿದೆ. ಇದಕ್ಕೆ ಶತಾ​ಯ​ಗ​ತಾಯ ಇತಿಶ್ರೀ ಹಾಡಲು ಕಾಂಗ್ರೆಸ್‌ ಮತ್ತು ಬಿಜೆಪಿ ಮುಂದಾ​ಗಿ​ರುವ ಕಾರಣ ತ್ರಿಕೋನ ಸ್ಪರ್ಧೆಗೆ ಮುನ್ನುಡಿ ಬರೆ​ದಿದೆ.

ಈವ​ರೆಗಿನ ಚುನಾ​ವ​ಣೆ​ಗ​ಳಲ್ಲಿ ಕ್ಷೇತ್ರ​ದೊ​ಳಗೆ ಜೆಡಿ​ಎಸ್‌ ಮತ್ತು ಕಾಂಗ್ರೆಸ್‌ ಪಕ್ಷ​ಗಳು ಸಾಂಪ್ರ​ದಾಯಿಕ ಎದು​ರಾ​ಳಿ​ಗ​ಳಾ​ಗಿ​ದ್ದವು. ಆದರೆ, ಈ ಬಾರಿ ಬಿಜೆಪಿ ಸಹ ಎರಡು ಪಕ್ಷ​ಗ​ಳಿಗೆ ಪ್ರಬಲ ಪೈಪೋಟಿ ನೀಡಲು ಮುಂದಾ​ಗಿದೆ.
ಕಳೆದ ಚುನಾ​ವ​ಣೆ​ಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ಇಕ್ಬಾಲ್‌ ಹುಸೇನ್‌ ಇದೇ ಕ್ಷೇತ್ರ​ದಲ್ಲಿ ಪರಾ​ಭ​ವ​ಗೊಂಡಿ​ದ್ದರೆ, ಜೆಡಿ​ಎಸ್‌ ಅಭ್ಯರ್ಥಿ ನಿಖಿಲ್‌ ಕುಮಾ​ರ​ಸ್ವಾಮಿ ಮಂಡ್ಯ ಸಂಸತ್‌ ಚುನಾ​ವಣೆ ಸೋಲು ಕಂಡ​ವರು. ಬಿಜೆಪಿ ಅಭ್ಯರ್ಥಿ ಗೌತಮ್‌ ಗೌಡ ಅವ​ರಿಗೆ ಮೊದಲ ಚುನಾ​ವಣೆಯಾಗಿ​ದೆ.

ಮಂಡ್ಯದಲ್ಲಿ ನಿಖಿಲ್ ಕುಮಾರಸ್ವಾಮಿಯನ್ನ ಮೋಸದಿಂದ ಸೋಲಿಸಿದ್ರು: ದೇವೇಗೌಡ ಕಣ್ಣೀರು!

ರಾಜ​ಕೀಯ ಆಶ್ರಯ ಪಡೆ​ಯುವ ತವ​ಕ:

ಮಾಜಿ ಪ್ರಧಾನಿ ದೇವೇ​ಗೌ​ಡರ ರಾಜ​ಕೀಯ ಹಾಸ​ನ​ದಿಂದ ಆರಂಭ​ಗೊಂಡರೂ ಸೋತು ಸುಣ್ಣ​ವಾ​ಗಿದ್ದ ಅವ​ರಿಗೆ ರಾಮ​ನಗರ ರಾಜ​ಕೀಯವಾಗಿ ಮರು ಹುಟ್ಟು ನೀಡಿತು. ಮಾಜಿ ಸಿಎಂ ಕುಮಾ​ರ​ಸ್ವಾಮಿ ಹಾಗೂ ಶಾಸಕಿ ಅನಿ​ತಾ​ರ​ವರ ಪಾಲಿಗೆ ಕರ್ಮ​ಭೂಮಿ. ಈಗ ಅದೇ ಕುಟುಂಬದ ಮೂರನೇ ತಲೆ​ಮಾರಾಗಿರುವ ನಿಖಿಲ್‌ ಕುಮಾ​ರ​ಸ್ವಾಮಿ ಜೆಡಿ​ಎಸ್‌ ಹುರಿ​ಯಾ​ಳಾಗಿ ರಾಜ​ಕೀಯ ಆಶ್ರಯ ಪಡೆ​ಯುವ ತವ​ಕ​ದ​ಲ್ಲಿ​ದ್ದಾ​ರೆ.

ಕುಟುಂಬದ ಕುಡಿ ನಿಖಿಲ್‌ ಅ​ವರ ರಾಜ​ಕೀಯ ಮರು ಜನ್ಮಕ್ಕೆ ರಾಮ​ನ​ಗ​ರ​​ದಲ್ಲಿಯೇ ವೇದಿಕೆ ಕಲ್ಪಿ​ಸುವ ಆಲೋ​ಚನೆ ಕುಮಾ​ರ​ಸ್ವಾಮಿ ಅವ​ರ​ಲ್ಲಿತ್ತು. ಇದೇ ಉದ್ದೇ​ಶ​ದಿಂದ ನಿಖಿಲ್‌ ಮದು​ವೆ​ ರಾಮ​ನ​ಗ​ರ​ದಲ್ಲಿ ನೆರ​ವೇರಿಸಿದರು. ನಂತರ ಅವರ ತಾಯಿ ಅನಿ​ತಾ​ರ​ವರು ಪುತ್ರ​ನಿಗೆ ಕ್ಷೇತ್ರ ತ್ಯಾಗ ಮಾಡಿ​ದರು.

ಈಗ ರಾಮ​ನ​ಗ​ರವು ಜಿಲ್ಲಾ ಕೇಂದ್ರ​ವಾಗಿ ಅಸ್ತಿ​ತ್ವಕ್ಕೆ ಬಂದು 15 ವರ್ಷ ಪೂರೈ​ಸಿದೆ. ಸರ್ಕಾರಿ ಕಟ್ಟ​ಡ​ಗ​ಳು ತಲೆ ಎತ್ತಿ​ರು​ವುದು ಬಿಟ್ಟರೆ ಮಹ​ತ್ವದ ಬದ​ಲಾ​ವಣೆ ಏನೂ ಆಗಿಲ್ಲ. ನಿರೀ​ಕ್ಷೆ​ಯಂತೆ ಕ್ಷೇತ್ರ ಅಭಿ​ವೃದ್ಧಿ ಹೊಂದಿಲ್ಲ. ಇಲ್ಲಿಂದ ಗೆದ್ದ​ವರು ಕೈಗೆ ಸಿಗು​ವು​ದಿಲ್ಲ ಎಂಬ ಕೊರಗು ಜನ​ರನ್ನು ಪದೇ ಪದೇ ಕಾಡು​ತ್ತಿ​ದೆ.

ಜೆಡಿ​ಎಸ್‌ ಮೈತ್ರಿ ಸರ್ಕಾ​ರದ ಭಾಗ​ವಾ​ಗಿದ್ದಾಗ ಪಕ್ಷದ ಮುಖಂಡ​ರಿಗೆ ಸೂಕ್ತ ಸ್ಥಾನ​ಮಾನ ನೀಡ​ಲಿಲ್ಲ. ಕೋವಿಡ್‌ ಸಂಕಷ್ಟಕಾಲ​ದ​ಲ್ಲಿ ಶಾಸಕಿ ಅನಿತಾ ಕುಮಾ​ರ​ಸ್ವಾಮಿ ಐದಾರು ತಿಂಗಳು ಕ್ಷೇತ್ರ​ದತ್ತ ಸುಳಿ​ಯಲೇ ಇಲ್ಲ. ಕಾರ್ಯ​ಕ​ರ್ತರು ಸ್ಪರ್ಧಿ​ಸುವ ಸ್ಥಳೀಯ ಸಂಸ್ಥೆ​ಗಳ ಚುನಾ​ವ​ಣೆಗಳಿಂದ ಕುಮಾ​ರ​ಸ್ವಾಮಿ ಕುಟುಂಬ​ದವರು ದೂರ ಉಳಿ​ಯುತ್ತಾರೆ.

ಜೆಡಿ​ಎಸ್‌ ಅಭ್ಯ​ರ್ಥಿ​ಯ​ನ್ನಾಗಿ ನಿಖಿಲ್‌ ಅವ​ರನ್ನು ಘೋಷಿ​ಸು​ವು​ದಕ್ಕೂ ಮುನ್ನ ಪಕ್ಷದ ಮುಖಂಡರು - ಕಾರ್ಯ​ಕ​ರ್ತರ ಅಭಿ​ಪ್ರಾಯ ಸಂಗ್ರಹಿಸ​ಲಿಲ್ಲ. ಎಲ್ಲ​ದ​ಕ್ಕಿಂತ ಮುಖ್ಯ​ವಾಗಿ ತಾತಾ, ಮಗ, ಸೊಸೆ​ಗಾಗಿ ಹೋರಾಟ ನಡೆ​ಸಿ​ದ​ವರೇ ಈಗ ಮೊಮ್ಮ​ಗ​ನ ಗೆಲು​ವಿಗೂ ಶ್ರಮಿ​ಸ​ಬೇ​ಕಿದೆ. ಇದು ಪಕ್ಷದ ಹಿರಿಯ ಮುಖಂಡರಲ್ಲಿ ಹಿಂಜ​ರಿಕೆ ತರಿ​ಸಿದೆ. ಇದೆಲ್ಲ ಕಾರ​ಣ​ಗ​ಳಿಂದ ಮಾಜಿ ಸಿಎಂ ಕುಮಾ​ರ​ಸ್ವಾಮಿ ಬಗ್ಗೆ ಪಕ್ಷದ ಕೆಲ ಮುಖಂಡ​ರಲ್ಲಿ ಸ್ವಲ್ಪ ಮಟ್ಟಿನ ಬೇಸ​ರವೂ ಇದೆ.

ಸುಮ​ಲತಾ ಅವ​ರಿಂದ ಪ್ರತೀ​ಕಾ​ರಾಸ್ತ್ರ:

ಕುಮಾ​ರ​ಸ್ವಾಮಿ ವಿರುದ್ಧ ಪ್ರತೀ​ಕಾರ ತೀರಿ​ಸಿ​ಕೊ​ಳ್ಳಲು ಮಂಡ್ಯ ಸಂಸದೆ ಸುಮ​ಲತಾ ರಾಮ​ನ​ಗರಕ್ಕೂ ಕಾಲಿ​ಟ್ಟಿ​ರು​ವುದು ದಳ​ಪ​ತಿ​ಗಳ ನಿದ್ದೆಗೆಡಿ​ಸಿರುವು​ದಂತು ಸುಳ್ಳಲ್ಲ. ಆದರೆ, ದೇವೇಗೌಡರ ಕುಟುಂಬದ ಮೇಲೆ ಕ್ಷೇತ್ರದ ಜನರಿಗಿರುವ ಪ್ರೀತಿ, ಜೆಡಿಎಸ್‌ ಒಕ್ಕಲಿಗರ ಪಕ್ಷವೆಂಬ ಟ್ಯಾಗ್‌ ಲೈನ್‌ ಮತ್ತು ಬಲಿಷ್ಠ ಕಾರ್ಯ​ಕ​ರ್ತರ ಪಡೆ ನಿಖಿಲ… ಅವರನ್ನು ಈ ಬಾರಿ ಗೆಲುವಿನ ದಡ ಸೇರಿಸಲಿದೆ ಎಂಬುದು ಜೆಡಿಎಸ್‌ ಕಾರ್ಯಕರ್ತರ ಅಭಿಮತ.

ಕಾಂಗ್ರೆಸ್‌ ಭದ್ರ​ಕೋ​ಟೆ​ಯನ್ನು ಜೆಡಿ​ಎಸ್‌ ವಶ ಪಡಿ​ಸಿ​ಕೊಂಡ ನಂತರ 2013ರ ಚುನಾ​ವಣೆ ಹೊರತು ಪಡಿ​ಸಿ​ದರೆ ಬೇರೆ ಚುನಾ​ವ​ಣೆ​ಗ​ಳಲ್ಲಿ ಕೈಪಾಳ​ಯಕ್ಕೆ ಸಮರ್ಥ ಅಭ್ಯ​ರ್ಥಿ​ಗಳೇ ಸಿಗು​ತ್ತಿ​ರ​ಲಿಲ್ಲ. 2018ರ ಚುನಾ​ವ​ಣೆ​ಯಲ್ಲಿ ಕುಮಾ​ರ​ಸ್ವಾಮಿ ಅವ​ರಿಗೆ ಇಕ್ಬಾಲ್‌ ಹುಸೇನ್‌ ಪ್ರಬಲ ಪೈಪೋಟಿ ನೀಡಿ ಪರಾ​ಭ​ವ​ಗೊಂಡ​ರು. ಈಗ ಮತ್ತೊಮ್ಮೆ ಅದೃಷ್ಟಪರೀ​ಕ್ಷೆಗೆ ಮುಂದಾ​ಗಿ​ದ್ದಾ​ರೆ.

ಡಿಕೆಶಿ ಬರ​ದಿ​ದ್ದರೆ ವದಂತಿಗೆ ಪುಷ್ಠಿ:

ಕಳೆದ ಚುನಾ​ವ​ಣೆ​ಯ​ಲ್ಲಿನ ಸೋಲು, ಕೋವಿಡ್‌ ಸಂಕ​ಷ್ಟ​ದಲ್ಲಿ ಜನ​ರಿಗೆ ಸ್ಪಂದನೆ, ಕಷ್ಟ​ವೆಂದು ಹೇಳಿ​ಕೊಳ್ಳವ​ ಹಾಗೂ ಎಲ್ಲ ಧಾರ್ಮಿಕ ಕೇಂದ್ರ​ಗ​ಳಿಗೆ ಸಹಾಯ ಹಸ್ತ ಚಾಚು​ತ್ತಿ​ರು​ವ ಇಕ್ಬಾಲ್‌ ಪರ ಅನು​ಕಂಪವೂ ಇದೆ. ಜೆಡಿ​ಎಸ್‌ನ ಕುಟುಂಬ ರಾಜ​ಕಾ​ರಣ, ಕ್ಷೇತ್ರ ಅಭಿ​ವೃದ್ಧಿ ಹೊಂದ​ದಿ​ರು​ವ ಬಗ್ಗೆ ಕಾಂಗ್ರೆ​ಸ್ಸಿ​ಗರು ಮತ​ದಾ​ರ​ರಲ್ಲಿ ಅರಿವು ಮೂಡಿ​ಸುವ ಜೊತೆಗೆ ಸ್ವಾಭಿ​ಮಾ​ನದ ಕಿಚ್ಚು ಹಚ್ಚು​ತ್ತಿ​ದ್ದಾರೆ. ದಳದ ಮನೆ​ಯಲ್ಲಿ ಮುನಿ​ದಿರುವ ಮಖಂಡ​ರನ್ನು ಕೈ ಪಾಳಯ ತನ್ನತ್ತ ಸೆಳೆ​ದು​ಕೊಂಡು ಶಕ್ತಿ ವೃದ್ಧಿ​ಸಿ​ಕೊ​ಳ್ಳು​ತ್ತಿದೆ.

ಕೆಪಿ​ಸಿಸಿ ಅಧ್ಯಕ್ಷ ಡಿ.ಕೆ.​ಶಿ​ವ​ಕು​ಮಾರ್‌ ಅವ​ರಿಗೆ ತವರು ಜಿಲ್ಲೆ​ಯಲ್ಲಿ ಕನಿಷ್ಠ 3 ಕ್ಷೇತ್ರ​ಗ​ಳ​ಲ್ಲಾ​ದರು ಕಾಂಗ್ರೆಸ್‌ ಅನ್ನು ಗೆಲ್ಲಿ​ಸಿ​ಕೊ​ಳ್ಳುವ ಸವಾ​ಲಿದೆ. ಆದರೆ, ರಾಮನಗರಕ್ಕೆ ನಾನು ತಲೆಹಾಕುವುದಿಲ್ಲ, ಕನಕಪುರಕ್ಕೆ ನೀನು ತಲೆ ಹಾಕಬಾ​ರ​ದೆಂದು ಡಿಕೆಶಿ ಮತ್ತು ಎಚ್‌ ಡಿಕೆ ನಡುವೆ ಹೊಂದಾಣಿಕೆ ನಡೆ​ದಿದೆ ಎಂಬ ವದಂತಿ ಕೇಳಿ ಬರು​ತ್ತಿದೆ. ಹಾಗೊಂದು ವೇಳೆ ಡಿಕೆಶಿ ರಾಮ​ನ​ಗರ ಕ್ಷೇತ್ರ​ದ ಪ್ರಚಾರ ಕಾರ್ಯದಿಂದ ದೂರ ಉಳಿ​ದರೆ ವದಂತಿಗೆ ಪುಷ್ಠಿ ನೀಡಿ​ದಂತಾ​ಗು​ತ್ತ​ದೆ.

ಬಿಜೆಪಿ ಸರ್ಕಾರವಿದ್ದರೂ ರಾಮನಗರದಲ್ಲಿ ಆ ಪಕ್ಷಕ್ಕೆ ಯಾವುದೇ ನೆಲೆ ಇಲ್ಲ. ಈ ಕ್ಷೇತ್ರದಲ್ಲಿ ಇದುವರೆಗೆ ಒಮ್ಮೆಯೂ ಗೆಲ್ಲಲಾಗದ ಬಿಜೆಪಿ, ಎರಡು ಬಾರಿ ಮಾತ್ರ 2ನೇ ಸ್ಥಾನಕ್ಕೆ ತೃಪ್ತಿ ಪಟ್ಟು​ಕೊಂಡಿದೆ. ಈ ಬಾರಿ ವಿಧಾನ ಪರಿ​ಷತ್‌ ಮಾಜಿ ಸದಸ್ಯ ಮರಿ​ಲಿಂಗೇ​ಗೌ​ಡ​ರ​ ಪುತ್ರ ಗೌತಮ್‌ ಗೌಡ ಕಮಲ ಪಾಳ​ಯ​ದಿಂದ ಸ್ಪರ್ಧಿಸಿ​ದ್ದು, ಅಭಿ​ವೃದ್ಧಿ ಹೆಸ​ರಿ​ನಲ್ಲಿ ಮತ​ದಾ​ರ​ರನ್ನು ​ತ​ನ್ನತ್ತ ಸೆಳೆ​ಯು​ವ ಪ್ರಯತ್ನ ಮಾಡು​ತ್ತಿ​ದ್ದಾರೆ.

ಒಕ್ಕ​ಲಿಗ ಮತ​ಗಳ ಇಬ್ಭಾ​ಗ​ವಾ​ಗುವ ಸಾಧ್ಯ​ತೆ:

ಹಿಂದಿನ ಚುನಾ​ವ​ಣೆ​ಗ​ಳಲ್ಲಿ ಬೇರೆ ಪಕ್ಷಗಳಲ್ಲಿ ಸಮರ್ಥ ಒಕ್ಕ​ಲಿಗ ಅಭ್ಯರ್ಥಿ ಸ್ಪರ್ಧಿ​ಸದ ಕಾರಣ ಒಕ್ಕ​ಲಿಗ ಸಮು​ದಾ​ಯದ ಮತ​ಗಳು ಜೆಡಿ​ಎಸ್‌ ಪಾಲಾ​ಗು​ತ್ತಿ​ದ್ದವು. ಆದ​ರೀಗ ನಿಖಿಲ್‌ ಜೊತೆಗೆ ಗೌತಮ್‌ ಕೂಡ ಒಕ್ಕ​ಲಿಗ ಸಮು​ದಾ​ಯಕ್ಕೆ ಸೇರಿ​ದ​ವರು. ಆ ಸಮು​ದಾ​ಯದ ಮತ​ಗಳು ಇಬ್ಭಾ​ಗ​ವಾ​ಗುವ ಸಾಧ್ಯ​ತೆ​ಗ​ಳಿ​ವೆ.

ಕುಮಾರಸ್ವಾಮಿಯಂಥ ಮತ್ತೊಬ್ಬ ಸಿಎಂ ಇಡೀ ದೇಶದಲ್ಲಿದ್ದರೆ ತೋರಿಸಿ: ದೇವೇಗೌಡ

ಮುಸ್ಲಿಂ ಸಮು​ದಾ​ಯಕ್ಕೆ ಸೇರಿ​ರುವ ​ಕಾ​ರಣ ಇಕ್ಬಾಲ್‌ ಹುಸೇನ್‌ ಗೆ ಆ ಸಮು​ದಾ​ಯದ ಮತ​ಗಳು ಬೆನ್ನಿ​ಗಿವೆ. ಡಿಕೆ ಸಹೋ​ದ​ರರು ಒಕ್ಕ​ಲಿಗರ ಮತ​ಗ​ಳನ್ನು ವಿಭ​ಜಿ​ಸಿ​ದರೆ ಹಾಗೂ ಬಿಜೆ​ಪಿಯ ಗೌತಮ್‌ ಗೌಡ ಜೆಡಿ​ಎಸ್‌ ಮತ​ಗ​ಳ ಬುಟ್ಟಿಗೆ ಕೈ ಹಾಕಿ​ದರೆ ಕಾಂಗ್ರೆಸ್‌ ಗೆ ವರ​ದಾ​ನ​ವಾ​ಗು​ತ್ತದೆ.

ಕ್ಷೇತ್ರದಲ್ಲಿ ಒಕ್ಕಲಿಗರ ಮತ​ಗಳು ಹೆಚ್ಚಿನ ಸಂಖ್ಯೆಯಲ್ಲಿದ್ದು, ಆ ಮತ​ಗಳು ಚದುರಿ ಹೋಗ​ದಂತೆ ಕುಮಾ​ರ​ಸ್ವಾಮಿ ಎಚ್ಚರ ವಹಿಸಿ ಪ್ರತಿ​ತಂತ್ರ ರೂಪಿ​ಸು​ತ್ತಿ​ದ್ದಾರೆ. ಪರಿ​ಶಿಷ್ಟಜಾತಿ - ಪರಿ​ಶಿಷ್ಟಪಂಗ​ಡ ಮತ್ತು ಅಲ್ಪಸಂಖ್ಯಾತ ಮತಗಳು ಒಗ್ಗಟ್ಟು ಪ್ರದರ್ಶಿಸಿದರೆ ಈ ಮತಗಳೂ ನಿರ್ಣಾಯಕವಾಗಲಿವೆ.