ಧೂಳು ತಿನ್ನುತ್ತಿದೆ ‘ಸಾಕು ನಾಯಿ ಲೈಸೆನ್ಸ್‌’ ಕಾಯ್ದೆ..!

*  3 ವರ್ಷ ಹಿಂದೆ ಕಾಯ್ದೆ ರೂಪಿಸಿರುವ ಬಿಬಿಎಂಪಿ*  ನಗರಾಭಿವೃದ್ಧಿ ಇಲಾಖೆಗೆ ಸಲ್ಲಿಕೆ*  ನಾಯಿ ಸಾಕಲು, ಅವುಗಳ ಆರೈಕೆ ಮೇಲೆ ಪಾಲಿಕೆ ನಿಗಾ 

pet dog

ವಿಶ್ವನಾಥ ಮಲೇಬೆನ್ನೂರು

ಬೆಂಗಳೂರು(ಜೂ.26): ನಗರದಲ್ಲಿ ನಾಯಿ ಸಾಕುವುದಕ್ಕೆ ಸಂಬಂಧಿಸಿದಂತೆ ಬಿಬಿಎಂಪಿ ಸಿದ್ಧಪಡಿಸಿರುವ ‘ಸಾಕು ನಾಯಿ ಪರವಾನಗಿ ಕರಡು ಉಪನಿಯಮ-2018’ ರಾಜ್ಯ ಸರ್ಕಾರ ಕಳೆದ ಮೂರು ವರ್ಷದಿಂದ ನಾಡಿನ ಶಕ್ತಿಸೌಧದಲ್ಲಿ ಧೂಳು ತಿನ್ನುತ್ತಿದೆ.

ಸಾಕು ನಾಯಿ ಸಂಬಂಧಿಸಿದಂತೆ ಬಿಬಿಎಂಪಿಯು 2018ರಲ್ಲಿ ‘ಸಾಕು ನಾಯಿ ಪರವಾನಗಿ ಬೈಲಾ’ ರೂಪಿಸಿ ನಗರಾಭಿವೃದ್ಧಿ ಇಲಾಖೆಗೆ ಸಲ್ಲಿಸಿತ್ತು. ಫ್ಲ್ಯಾಟ್‌ಗಳಲ್ಲಿ ಒಂದು ನಾಯಿ ಹಾಗೂ ಸ್ವತಂತ್ರ ವಾಸ ಮನೆಯಲ್ಲಿ ಗರಿಷ್ಠ ಮೂರು ನಾಯಿ ಸಾಕಬೇಕು. ಹೆಚ್ಚಿನ ನಾಯಿ ಸಾಕಿದರೆ ದಂಡ, ಪರವಾನಗಿ ಹಾಗೂ ಮೈಕ್ರೋ ಚಿಪ್‌ ಅಳವಡಿಕೆ ಕಡ್ಡಾಯ ಸೇರಿದಂತೆ ಹಲವಾರು ಷರತ್ತು ವಿಧಿಸಿತ್ತು. ಇದು ಪ್ರಾಣಿ ದಯಾ ಸಂಘಟನೆಗಳು ಮತ್ತು ಶ್ವಾನ ಪ್ರಿಯರಿಂದ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು. ಕೂಡಲೇ ಬೈಲಾವನ್ನು ಬಿಬಿಎಂಪಿ ವಾಪಾಸ್‌ ಪಡೆದು ಪ್ರಾಣಿ ದಯಾ ಸಂಘ ಸಂಸ್ಥೆಗಳೊಂದಿಗೆ ಚರ್ಚಿಸಿ ಪರಿಷ್ಕರಣೆ ಮಾಡಿ ಮತ್ತೆ 2020ರಲ್ಲಿ ನಗರಾಭಿವೃದ್ಧಿ ಇಲಾಖೆಗೆ ಸಲ್ಲಿಸಿತ್ತು.

ಇದಾಗಿ ಮೂರು ವರ್ಷ ಕಳೆದಿದ್ದು, ಈವರೆಗೂ ಸಾಕು ನಾಯಿ ಪರವಾನಿಗೆ ಬೈಲಾಗೆ ನಗರಾಭಿವೃದ್ಧಿ ಇಲಾಖೆಯು ಅನುಮೋದನೆ ನೀಡಿಲ್ಲ. ರಾಜ್ಯಪತ್ರ ಪ್ರಕಟಿಸಿ ಸಾರ್ವಜನಿಕರಿಂದ ಆಕ್ಷೇಪಣೆ ಪಡೆದಿಲ್ಲ. ಮೂಲಗಳ ಪ್ರಕಾರ ಕಳೆದ ಆರು ತಿಂಗಳ ಹಿಂದೆ ನಗರಾವೃದ್ಧಿ ಇಲಾಖೆ ಅಧಿಕಾರಿಗಳು, ಬೆಂಗಳೂರಿನ ನಗರಾಭಿವೃದ್ಧಿ ಸಚಿವರು ಹಾಗೂ ಮುಖ್ಯಮಂತ್ರಿಗಳಾದ ಬಸವರಾಜ ಬೊಮ್ಮಾಯಿ ಅವರ ಕಚೇರಿ ಕಳುಹಿಸಿ ಕೊಡಲಾಗಿದೆ. ಮುಖ್ಯಮಂತ್ರಿಗಳು ಪರಿಶೀಲನೆ ಮಾಡಿ ಮುಂದಿನ ಕ್ರಮಕ್ಕೆ ಸೂಚನೆ ನೀಡಬೇಕಿದೆ ಎಂದು ತಿಳಿದು ಬಂದಿದೆ.

ಫ್ಲ್ಯಾಟ್‌ಗೆ 1, ಸ್ವತಂತ್ರ ಮನೆಗೆ ಗರಿಷ್ಠ 3 ನಾಯಿ

ಪರಿಷ್ಕೃತ ಕರಡು ಬೈಲಾದಲ್ಲಿ ಒಂದು ಫ್ಲ್ಯಾಟ್‌ಗೆ ಒಂದೇ ನಾಯಿ. ಸ್ವತಂತ್ರವಾಗಿ ಪ್ರತ್ಯೇಕ ವಾಸದ ಮನೆಯಿದ್ದರೆ ಮೂರು ನಾಯಿ ಸಾಕಬಹುದು. ಕಡ್ಡಾಯವಾಗಿ ನಾಯಿ ಸಾಕುವುದಕ್ಕೆ ಪರವಾನಗಿ ಪಡೆಯಬೇಕು ಹಾಗೂ ಪ್ರತಿ ವರ್ಷ ಪರವಾನಗಿ ನವೀಕರಿಸಬೇಕು ಎಂದು ಸೂಚಿಸಿದೆ. ಪರವಾನಗಿ ಪಡೆಯಲು ಬಿಬಿಎಂಪಿ ದೃಢಿಕರಿಸಿದ ಮೈಕ್ರೋ ಚಿಪ್‌ ಅಳವಡಿಕೆ, ಆ್ಯಂಟಿ ರೇಬಿಸ್‌ ಲಸಿಕೆ ಹಾಗೂ ಸಂತಾನಶಕ್ತಿ ಹರಣ ಚಿಕಿತ್ಸೆ ಮಾಡಿಸಿದ ಬಗ್ಗೆ ಪ್ರಮಾಣಪತ್ರ ಸಲ್ಲಿಸಿದರೆ ಮಾತ್ರ ನಾಯಿ ಸಾಕುವುದಕ್ಕೆ ಪರವಾನಗಿ ನೀಡಲಾಗುತ್ತದೆ ಎಂಬ ನಿಯಮ ರೂಪಿಸಲಾಗಿದೆ.

ನಾಯಿ ವಾಸಕ್ಕೆ ಸ್ಥಳ, ಲಸಿಕೆ ಕಡ್ಡಾಯ: ಮೀರಿದರೆ ದಂಡ

ಇನ್ನು ಮಾಲಿಕರು ನಾಯಿ ವಾಸಕ್ಕೆ ಸೂಕ್ತ ವ್ಯವಸ್ಥೆ, ನಾಯಿಗೆ ಹಿಂಸೆ, ಪ್ರಾಣಕ್ಕೆ ಹಾಗೂ ಸ್ವಾತಂತ್ರಕ್ಕೆ ಧಕ್ಕೆ ಉಂಟು ಮಾಡುವಂತಿಲ್ಲ. ನಾಯಿಯಿಂದ ಬೇರೆ ಪ್ರಾಣಿಗೆ, ಮನುಷ್ಯರ ಮೇಲೆ ದಾಳಿಯಾದರೆ ಅದಕ್ಕೆ ಮಾಲಿಕರೇ ಹೊಣೆ. ರಸ್ತೆ, ಮೈದಾನ, ಪಾರ್ಕ್ ಹಾಗೂ ಇನ್ನಿತರ ಕಡೆ ನಾಯಿ ಕರೆದುಕೊಂಡು ಹೋಗುವಾಗ ಸರಪಳಿ ಅಥವಾ ಹಗ್ಗ ಬಳಸಬೇಕು ಎಂಬ ಷರತ್ತು ವಿಧಿಸಿದೆ. ಷರತ್ತು ಉಲ್ಲಂಘನೆಗೆ .500 ದಂಡ ವಿಧಿಸಲಾಗುವುದು. ಎರಡನೇ ಬಾರಿಗೆ ತಪ್ಪಿಗೆ ದುಪ್ಪಟ್ಟು ದಂಡ ವಿಧಿಸಲಾಗುವುದು ಎಂದು ತಿಳಿಸಲಾಗಿದೆ.

ಸಾರ್ವಜನಿಕರಿಗೆ ಹಾಗೂ ನೆರೆ ಹೊರೆಯವರಿಗೆ ತೊಂದರೆ ಉಂಟು ಮಾಡಿದರೆ ಪರಿಶೀಲಿಸುವ ಅಧಿಕಾರ ಬಿಬಿಎಂಪಿ ಪಶುಪಾಲನಾ ವಿಭಾಗದ ಅಧಿಕಾರಿಗಳಿಗೆ ಇರಲಿದೆ. ಈ ನಿಯಮ ಉಲ್ಲಂಘಿಸಿದರೆ .1 ಸಾವಿರ ದಂಡ ವಿಧಿಸಲಾಗುವುದು. ಇದೇ ತಪ್ಪು ಮುಂದುವರಿಸಿದರೆ ಸರಿಪಡಿಸಿಕೊಳ್ಳುವವರೆಗೆ ದಿನಕ್ಕೆ .300 ದಂತೆ ದಂಡ ವಿಧಿಸಲಾಗುತ್ತದೆ. ಜತೆಗೆ ನಾಯಿ ವಶಕ್ಕೆ ಪಡೆಯುವ ಮತ್ತು ಪರವಾನಗಿ ರದ್ದು ಪಡಿಸುವ ಅಧಿಕಾರ ಬಿಬಿಎಂಪಿ ಹೊಂದಿರಲಿದೆ.

ಮಾಲೀಕರಿಲ್ಲದಿದ್ದರೆ ನಾಯಿ ಹರಾಜು

ಒಂದು ವೇಳೆ ಸಾಕು ನಾಯಿ ರೈಲ್ವೆ, ಬಸ್‌ ನಿಲ್ದಾಣ, ರಸ್ತೆ, ಪಾರ್ಕ್ ಸೇರಿದಂತೆ ಇನ್ನಿತರ ಸಾರ್ವಜನಿಕ ಸ್ಥಳದಲ್ಲಿ ಅಲೆದಾಡುತ್ತಿದ್ದರೆ ವಶಕ್ಕೆ ಪಡೆಯುವ ಅಧಿಕಾರ ಪಾಲಿಕೆಗೆ ಇರಲಿದೆ. ನಾಯಿ ವಾಪಾಸ್‌ ಬಿಡಿಸಿಕೊಳ್ಳುವುದಕ್ಕೆ ಮಾಲಿಕ ಸೂಕ್ತ ದಾಖಲೆಯ ಜೊತೆಗೆ .1 ಸಾವಿರ ದಂಡ ಪಾವತಿಸಬೇಕು. ಒಂದು ವೇಳೆ ನಾಯಿ ಮಾಲಿಕರು ಬರದಿದ್ದರೆ ನಾಯಿಯನ್ನು ಹರಾಜು ಹಾಕುವ ಹಾಗೂ ದತ್ತು ನೀಡುವ ಅಧಿಕಾರ ಪಾಲಿಕೆ ಹೊಂದಿದೆ.

ಆನ್‌ಲೈನ್‌ನಲ್ಲಿ ಲೈಸೆನ್ಸ್‌

ಕರಡು ನೀತಿಯಲ್ಲಿ ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಿ ಸಾಕು ನಾಯಿ ಪರವಾನಗಿ ಪಡೆಯುವುದಕ್ಕೆ ಅವಕಾಶ ನೀಡಲಾಗಿದೆ. ಪರವಾನಗಿ ಪಡೆಯುವುದಕ್ಕೆ ಸಲ್ಲಿಸಿದ ಮಾಡಿದ ಮಾಹಿತಿಯನ್ನು ಮಾಲಿಕರ ಪತ್ತೆಗೆ ಬಳಸಲಾಗುತ್ತದೆ. ರೇಬಿಸ್‌ ಹಾಗೂ ಗಂಭೀರ ಸಾಂಕ್ರಾಮಿಕ ರೋಗದ ಲಕ್ಷಣ ಕಂಡು ಬಂದರೆ ಸಾರ್ವಜನಿಕ ಆರೋಗ್ಯಕ್ಕೆ ಮಹತ್ವ ನೀಡಿ ನಾಯಿಗೆ ದಯಾಮರಣ ನೀಡುವ ಅಧಿಕಾರ ಬಿಬಿಎಂಪಿಗೆ ಇರಲಿದೆ. ಇನ್ನು ಈ ನಿಯಮ ಕೇವಲ ಮನೆಯಲ್ಲಿ ನಾಯಿ ಸಾಕುವವರಿಗೆ ಮಾತ್ರ ಅನ್ವಯಿಸಲಿದೆ. ಸಾಕು ನಾಯಿ ಮಾರಾಟ ಹಾಗೂ ಸಂತಾನೋತ್ಪತ್ತಿಗೆ ಬಳಸುವ ನಾಯಿಗಳಿಗೆ ಅನ್ವಯವಾಗುವುದಿಲ್ಲ ಎಂದು ಬೈಲಾದಲ್ಲಿ ತಿಳಿಸಲಾಗಿದೆ.

ಹೆಚ್ಚು ನಾಯಿ ಸಾಕಿದ್ದರೆ ಈಗಲೇ ಲೈಸೆನ್ಸ್‌ ಮಾಡಿಸಿ

ನಿಮ್ಮ ಫ್ಲ್ಯಾಟ್‌ ಹಾಗೂ ಸ್ವತಂತ್ರ ಮನೆಯಲ್ಲಿ ಪಾಲಿಕೆಯ ಹೊಸ ನಿಯಮದಲ್ಲಿ ನಿಗದಿಪಡಿಸಿರುವ ಸಂಖ್ಯೆಗಿಂತ ಹೆಚ್ಚಿನ ನಾಯಿಗಳನ್ನು ಸಾಕುತ್ತಿದ್ದರೆ ‘ಸಾಕು ನಾಯಿ ಪರವಾನಗಿ ಉಪ ನಿಯಮ-2018’ ಜಾರಿಗೆ ಬರುವ ಮುನ್ನ ಬಿಬಿಎಂಪಿ ಪಶುಪಾಲನಾ ವಿಭಾಗದಿಂದ ಸಾಕಿದ ಎಲ್ಲ ನಾಯಿಗಳಿಗೆ ಪರವಾನಗಿ ಪಡೆದುಕೊಳ್ಳಿ. ಆಗ ಫ್ಲ್ಯಾಟ್‌ಗೆ ಒಂದು. ಸ್ವತಂತ್ರ ಮನೆಗೆ ಮೂರು ನಾಯಿ ಮಾತ್ರ ಸಾಕಬೇಕು ಎಂಬ ಹೊಸ ನಿಯಮ ನಿಮಗೆ ಅನ್ವಯವಾಗುವುದಿಲ್ಲ.

ಸಾಕು ನಾಯಿ ಕರಡು ಉಪ ನಿಯಮ-2018ಕ್ಕೆ ಸಂಬಂಧಿಸಿದಂತೆ ಸರ್ಕಾರದಿಂದ ಕೇಳಿದ ಸ್ಪಷ್ಟನೆಗಳಿಗೆ ಉತ್ತರ ನೀಡಲಾಗಿದ್ದು, ಸರ್ಕಾರದಿಂದ ರಾಜ್ಯಪತ್ರ ಹೊರಡಿಸಿ ಸಾರ್ವಜನಿಕರ ಆಕ್ಷೇಪಣೆ ಆಹ್ವಾನಿಸಬೇಕಿದೆ ಅಂತ ಬಿಬಿಎಂಪಿ ಆರೋಗ್ಯ ವಿಭಾಗದ ವಿಶೇಷ ಆಯುಕ್ತ ಡಾ. ತ್ರಿಲೋಕಚಂದ್ರ ತಿಳಿಸಿದ್ದಾರೆ.