ಡಿಕೆಶಿಗೆ ಸಂಕಷ್ಟ ತಂದೊಡ್ಡಿದ ಕೃಷಿ ಆದಾಯ ಮೂಲ..!
59 ಎಕರೆ 31 ಗುಂಟೆ ಕೃಷಿ ಭೂಮಿಯ ಒಡೆಯ, ಕನಕಪುರ, ಬಿ.ಎಂ.ಕಾವಲ್‌ನಲ್ಲಿ ಹೆಚ್ಚಿನ ಭೂಮಿ, ಪುತ್ರಿ ಐಶ್ವರ್ಯ ಹೆಸರಲ್ಲೂ 10 ಗುಂಟೆ ಕೃಷಿ ಭೂಮಿ
Followಎಂ.ಅಫ್ರೋಜ್‌ ಖಾನ್‌
ರಾಮನಗರ(ಸೆ.30): ಕನ್ಯಾಕುಮಾರಿಯಿಂದ ಆರಂಭಗೊಂಡು ಕರ್ನಾಟಕದ ಮೂಲಕ ಹಾದು ಹೋಗುತ್ತಿರುವ ಭಾರತ್‌ ಜೋಡೋ ಯಾತ್ರೆಯನ್ನು ಯಶಸ್ವಿಗೊಳಿಸಲು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಸಿದ್ಧತೆಯಲ್ಲಿ ತೊಡಗಿರುವಾಗಲೇ ಸಿಬಿಐ ಶಾಕ್ ನೀಡಿದ್ದಾಗಿದೆ. ಆದರೆ, ಈ ದಾಳಿಗೆ ಡಿ.ಕೆ.ಶಿವಕುಮಾರ್‌ ಅವರೇ ಘೋಷಿಸಿಕೊಂಡಿರುವಂತೆ ಕೃಷಿ ಆದಾಯ ಕಾರಣ ಎನ್ನಲಾಗಿದೆ. ಯಾತ್ರೆ ಕರ್ನಾಟಕ ಪ್ರವೇಶಿವರು ಹೊತ್ತಿನಲ್ಲಿಯೇ ಡಿ.ಕೆ.ಶಿವಕುಮಾರ್‌ ಅವರಿಗೆ ಸೇರಿದ ಮನೆ, ಫಾಮ್‌ರ್‍ ಹೌಸ್‌ಗಳ ಮೇಲೆ ಸಿಬಿಐ ತಂಡ ದಾಳಿ ನಡೆಸಿದ್ದಲ್ಲದೆ, ಅವರ ಹೆಸರಿನಲ್ಲಿರುವ ಜಮೀನುಗಳನ್ನು ವೀಕ್ಷಿಸಿ ಮಾಹಿತಿ ಕಲೆ ಹಾಕಿದ್ದಾರೆ. ಇ.ಡಿ., ಆದಾಯ ತೆರಿಗೆ ಇಲಾಖೆ ದಾಳಿಗಳ ಬೆನ್ನಲ್ಲೆ ಸಿಬಿಐ ದಾಳಿಗೆ ಡಿ.ಕೆ.ಶಿವಕುಮಾರ್‌ ತಮ್ಮ ಆದಾಯ ಕುರಿತು ನೀಡಿದ್ದ ಹೇಳಿಕೆಗಳೇ ಕಾರಣ. ಅದರಲ್ಲಿ ಪ್ರಮುಖವಾಗಿ ನಾನು ಮೂಲತಃ ರೈತನಾಗಿದ್ದು ಕೃಷಿ ಆದಾಯದಿಂದ ಹೆಚ್ಚು ಸಂಪಾದನೆ ಮಾಡಿರುವುದಾಗಿ ಅವರು ಹೇಳಿಕೊಳ್ಳುತ್ತಿದ್ದರು. ಹೀಗಾಗಿ ಕೃಷಿ ಆದಾಯದ ಮೂಲವೇ ಡಿಕೆಶಿಗೆ ಸಂಕಷ್ಟತಂದೊಡ್ಡುವ ಆತಂಕ ಎದುರಾಗಿದೆ.
ಮೂರ್ನಾಲ್ಕು ವರ್ಷಗಳ ಹಿಂದೆ ದೆಹಲಿ, ಬೆಂಗಳೂರು ಹಾಗೂ ಕನಕಪುರ ಸೇರಿದಂತೆ ಏಕಕಾಲದಲ್ಲಿ ಡಿಕೆಶಿ ನಿವಾಸ, ಆಸ್ತಿಗಳ ಮೇಲೆ ದಾಳಿ ನಡೆದಿತ್ತು. ಆದಾಯದ ಮೂಲ ಹೇಳಿಕೊಳ್ಳುವ ವೇಳೆ ಡಿಕೆಶಿ, ಕೃಷಿಯಿಂದಲೇ ಅತಿ ಹೆಚ್ಚು ಆದಾಯ ಬಂದಿರುವುದಾಗಿ ಹೇಳಿದ್ದರು. ಬಳಿಕ ಸಿಬಿಐ ಅಧಿಕಾರಿಗಳು ದಾಳಿ ನಡೆಸಿ, ಕೃಷಿ ಇಲಾಖೆ, ತೋಟಗಾರಿಕೆ, ರೇಷ್ಮೆ ಇಲಾಖೆ ಅಧಿಕಾರಿಗಳು, ತಹಸೀಲ್ದಾರ್‌ ನೇತೃತ್ವದಲ್ಲಿ ಡಿಕೆಶಿ ಹೊಂದಿರುವ ಕೃಷಿಭೂಮಿಯ ಸರ್ವೆ ನಡೆಸಿ, ಒಂದು ಎಕರೆ ಜಮೀನಿಗೆ ಗಳಿಸಬಹುದಾದ ಲಾಭದ ಕುರಿತು ಅಧಿಕಾರಿಗಳಿಂದಲೇ ಮಾಹಿತಿ ಪಡೆದುಕೊಂಡಿದ್ದರು. ಅದರ ಮುಂದುವರೆದ ಭಾಗವಾಗಿ ಸಿಬಿಐ ತಂಡ ಬುಧವಾರ ಕನಕಪುರದಲ್ಲಿನ ನಿವಾಸದ ಮೇಲೆ ದಾಳಿ ನಡೆಸಿ, ತಹಸೀಲ್ದಾರ್‌ ಮೂಲಕ ಡಿಕೆಶಿ ಹಾಗೂ ಸಂಬಂಧಿಕರ ಹೆಸರಿನಲ್ಲಿನ ಕೃಷಿ ಭೂಮಿಗಳ ಬಗ್ಗೆ ಮಾಹಿತಿ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ.
ಭಾರತ್‌ ಜೋಡೋ ಯಾತ್ರೆ ವೇಳೆ ಡಿಕೆಶಿಗೆ ಸಿಬಿಐ ಶಾಕ್..!
ಕನಕಪುರ ನಗರದ ಮೈಸೂರು ರಸ್ತೆಯಲ್ಲಿ ಹೆಂಚಿನ ಫ್ಯಾಕ್ಟರಿ ಬಳಿಯಿರುವ ಮನೆ, ದೊಡ್ಡಾಲಹಳ್ಳಿಯ ಹಳೇ ಮನೆ ಹಾಗೂ ಸಂತೆ ಕೋಡಿಹಳ್ಳಿಯಲ್ಲಿ ಫಾಮ್‌ರ್‍ ಹೌಸ್‌ ಹಾಗೂ ಜಮೀನು ಮತ್ತಿತರ ಸ್ಥಳಗಳಿಗೂ ಸಿಬಿಐ ಅಧಿಕಾರಿಗಳು ಭೇಟಿ ನೀಡಿ ಸಂಪೂರ್ಣ ಮಾಹಿತಿ ಕಲೆ ಹಾಕಿದ್ದಾರೆ. ಡಿಕೆಶಿ ಹೇಳಿಕೊಂಡಿದ್ದ ಆದಾಯದ ಲೆಕ್ಕಕ್ಕೂ, ಅವರು ಬೆಳೆಯುತ್ತಿರುವ ಬೆಳೆಗೂ ತಾಳೆ ಹಾಕಿದ್ದಾರೆ ಎನ್ನಲಾಗಿದೆ.
ಒಂದೆಡೆ ಕಾಂಗ್ರೆಸ್‌ನ ಭಾರತ್‌ ಜೋಡೋ ಯಾತ್ರೆ, ಮತ್ತೊಂದೆಡೆ ವಿಧಾನಸಭೆ ಚುನಾವಣೆ ಸನಿಹದಲ್ಲಿರುವ ಕಾರಣ ಡಿಕೆಶಿಯನ್ನು ಕಟ್ಟಿಹಾಕುವ ಪ್ರಯತ್ನ ನಡೆಯುತ್ತಿದೆ ಎಂಬ ಮಾತುಗಳು ಬಲವಾಗಿ ಕೇಳಿ ಬರುತ್ತಿದೆ. ಕೃಷಿ ಆದಾಯಕ್ಕೆ ಆದಾಯ ತೆರಿಗೆ ಕಟ್ಟಬೇಕಿಲ್ಲ. ಹೀಗಾಗಿ ಡಿಕೆಶಿ ತಾತ್ಕಾಲಿಕವಾಗಿ ತಪ್ಪಿಸಿಕೊಳ್ಳುವ ಸಲುವಾಗಿ ತಮ್ಮ ಸಂಪತ್ತಿನ ವೃದ್ಧಿಯಲ್ಲಿ ಕೃಷಿಯಿಂದ ಹೆಚ್ಚು ಆದಾಯ ಬಂದಿರುವುದಾಗಿ ತೋರಿಸಿದ್ದರು. ಹೀಗಾಗಿ ಕೃಷಿ ಮೂಲವೇ ಡಿಕೆಶಿಗೆ ಮತ್ತೊಮ್ಮೆ ಹುರುಳಾಗಿ ಪರಿಣಮಿಸಿದೆ.
ಡಿಕೆಶಿ ಬಳಿ 59 ಎಕರೆ 31 ಗುಂಟೆ ಕೃಷಿ ಭೂಮಿ
ಡಿ.ಕೆ.ಶಿವಕುಮಾರ್‌ ಅವರ 2018ರ ಅಫಿಡೆವಿಟ್‌ ಪ್ರಕಾರ ಒಟ್ಟು 59 ಎಕರೆ 31 ಗುಂಟೆ ಕೃಷಿ ಭೂಮಿ ಹೊಂದಿದ್ದಾರೆ. ಈ ಪೈಕಿ ಹೆಚ್ಚಿನ ಪ್ರಮಾಣದ ಭೂಮಿ ಪಿತ್ರಾರ್ಜಿತವಾಗಿದ್ದು, ಶೇ.50ರಷ್ಟುಭೂಮಿ ಮಾತ್ರ ತಮ್ಮದೆಂದು ಹೇಳಿಕೊಂಡಿದ್ದಾರೆ. ಆಗ ಇದರ ಮಾರುಕಟ್ಟೆಅಂದಾಜು ಮೌಲ್ಯ 12.09 ಕೋಟಿ ರು.ಗಳಾಗಿದೆ.
ಸಿದ್ದರಾಮಯ್ಯ ಕಣ್ಣು ಮಂಕಾಗಿದ್ಯಾ: ಸಿದ್ದರಾಮಯ್ಯ ವಿರುದ್ಧ ಅಶ್ವತ್ಥ ನಾರಾಯಣ ಕಿಡಿ
ಕನಕಪುರ ತಾಲೂಕಿನ ಕೋಡಿಹಳ್ಳಿಯಲ್ಲಿ ಸ್ವಯಾರ್ಜಿತ 4 ಎಕರೆ, ಪಿತ್ರಾರ್ಜಿತ 6 ಎಕರೆ, ಗರಳಾಪುರ - 12 ಎಕರೆ, ದೆಶುವಳ್ಳಿ - 4 ಎಕರೆ, ಆಲಹಳ್ಳಿ - 5 ಎಕರೆ, ಚೀಲಂದವಾಡಿ - 2 ಎಕರೆ, ಮಹಿಮನಹಳ್ಳಿ - 1 ಎಕರೆ,ಅರಳಾಳು ಗ್ರಾಮ - ಪಿತ್ರಾರ್ಜಿತ 31 ಗುಂಟೆ, ಸಾತನೂರು - 5 ಎಕರೆ, ಮಕಲಂದ ಗ್ರಾಮ - ಪಿತ್ರಾರ್ಜಿತ 13 ಎಕರೆ, ಆನೇಕಲ… ತಾಲೂಕು ಗಟ್ಟಿಹಳ್ಳಿ 3 ಎಕರೆ , ಮತ್ತು ಕೆಂಗೇರಿ ಬಳಿಯ ಬಿ.ಎಂ.ಕಾವಲ್‌ನಲ್ಲಿ ಸ್ವಯಾರ್ಜಿತ 4 ಎಕರೆ ಕೃಷಿ ಭೂಮಿ ಹೊಂದಿದ್ದಾರೆ. ಇನ್ನು ಪುತ್ರಿ ಐಶ್ವರ್ಯ ಹೆಸರಿನಲ್ಲಿ ಬಿ.ಎಂ.ಕಾವಲ್‌ನಲ್ಲಿ 10 ಗುಂಟೆ ಕೃಷಿ ಭೂಮಿ ಇದೆ.
ಉತ್ತರಹಳ್ಳಿ ಹೋಬಳಿಯ ವಿಶ್ವೇಶ್ವರಯ್ಯ ಕೈಗಾರಿಕಾ ಲೇಔಚ್‌, ಭೂಪಸಂದ್ರ, ಮೈಸೂರು ನಜರಾಬಾದ್‌ ಮೊಹಲ್ಲಾ , ಕನಕಪುರ ಪಟ್ಟಣಗಳಲ್ಲಿ ಕೃಷಿಯೇತರ ಭೂಮಿ ಇದೆ. ಕನಕಪುರ ತಾಲೂಕು ಮರಳೇಬೇಕುಪ್ಪೆ ಗ್ರಾಮದಲ್ಲಿ ಗ್ರಾನೈಚ್‌ ಉಳ್ಳ ಭೂಮಿ, ಬೆಂಗಳೂರು ಉತ್ತರ ಹಳ್ಳಿಯಲ್ಲಿ ವಸತಿಗಾಗಿ ಪರಿವರ್ತನೆಯಾದ ಭೂಮಿ, ದೊಡ್ಡಾಲಹಳ್ಳಿಯಲ್ಲಿ ವಸತಿ ನಿವೇಶನ, ಹುನಸಣಹಳ್ಳಿಯಲ್ಲಿ ವಾಣಿಜ್ಯ ಬಳಕೆಗೆ ಭೂಮಿ ಇರುವುದಾಗಿ ಘೋಷಿಸಿಕೊಂಡಿದ್ದರು.
