ಶಿವಮೊಗ್ಗದ ಕೂಡಲಿ ಮಠದಲ್ಲಿ 100 ವರ್ಷದ ಪುರಾತನ ಚಿನ್ನದ ಪಾದುಕೆ ಕಳ್ಳತನವಾಗಿದೆ ಎಂದು ದೂರು ದಾಖಲಾಗಿತ್ತು. ಆದರೆ ಪೊಲೀಸರ ತನಿಖೆಯ ವೇಳೆ ಈ ಪ್ರಕರಣಕ್ಕೆ ದೊಡ್ಡ ತಿರುವು ಸಿಕ್ಕಿದೆ. ಕಳುವಾಗಿದೆ ಎನ್ನಲಾದ ಪಾದುಕೆ ದೂರುದಾರರ ಬ್ಯಾಂಕ್ ಲಾಕರ್ ನಲ್ಲಿಯೆ ಇತ್ತು.
ಶಿವಮೊಗ್ಗ: ಜಿಲ್ಲೆಯ ಕೂಡಲಿ ಮಠದಲ್ಲಿ 100 ವರ್ಷದ ಪುರಾತನ ಪಾದುಕೆ ಕಳ್ಳತನವಾಗಿದೆ ಅಂತ 2024ರಲ್ಲಿ ಎಫ್‌ಐಆರ್ ದಾಖಲಿಸಲಾಗಿತ್ತು. 400 ಗ್ರಾಂ ಚಿನ್ನದ ಪಾದುಕೆ ಕಳ್ಳತನ ಅಂತ ಹೇಳಲಾಗಿತ್ತು. ಆದರೆ ಈಗ ಈ ಪ್ರಕರಣಕ್ಕೆ ಬಿಗ್ ಟ್ವಿಸ್ಟ್ ಸಿಕ್ಕಿದೆ. ಪಾದುಕೆ ಕಳುವಾಗಿರಲೇ ಇಲ್ಲ, ಬದಲಾಗಿ ದೂರು ಕೊಟ್ಟ ಮಠದ ಹಿರಿಯ ಶ್ರೀಗಳಾದ ವಿಧ್ಯಾಭಿನವ ವಿದ್ಯಾರಣ್ಯ ಭಾರತಿ ಶ್ರೀಗಳ ಎಸ್‌ಬಿಐ ಬ್ಯಾಂಕ್ ಲಾಕರ್ ನಲ್ಲಿ ಸೇಫ್ ಆಗಿ ಇತ್ತು ಅನ್ನೋದು ಪತ್ತೆಯಾಗಿದೆ.
FIR ಆಗಿದ್ದು ಹೇಗೆ?
ಶಿವಮೊಗ್ಗದ ತುಂಗಭದ್ರಾ ಸಂಗಮದಲ್ಲಿರುವ ಕುಡಲಿ ಮಠದ ಪಾದುಕೆ ನಾಪತ್ತೆ ಆಗಿದೆ ಎಂದು 2024 ಆಗಸ್ಟ್ 19ರಂದು ಹೊಳೆಹೊನ್ನುರು ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಮಠದ ವ್ಯವಸ್ಥಾಪಕ ರಮೇಶ್ ಹುಲಿಮನಿ 70 ಲಕ್ಷ ಮೌಲ್ಯದ 400 ಗ್ರಾಂ ಚಿನ್ನದ ಪಾದುಕೆ ಕಳುವಾಗಿದೆ ಎಂದು ದೂರು ನೀಡಿದ್ದರು.
ಅನುಮಾನ ಯಾರ ಮೇಲೆ?
ಮಠದ ವ್ಯವಸ್ಥಾಪಕರು ನೀಡಿದ್ದ ದೂರಿಗೆ ಹಿರಿಯಗಳಾದ ಶ್ರೀ ವಿಧ್ಯಾಭಿನವ ವಿದ್ಯಾರಣ್ಯ ಭಾರತಿ ಸ್ವಾಮೀಜಿಗಳು ಆಕ್ಷೇಪ ವ್ಯಕ್ತಪಡಿಸಿ, ಡಿಜಿಪಿ, ಶಿವಮೊಗ್ಗ ಎಸ್‌ಪಿ, ಹೊಳೆಹೊನ್ನೂರು ಠಾಣೆಗೆ ಹೊಸದಾಗಿ ದೂರು ನೀಡಿದ್ದರು. ಮಠದ ಕಿರಿಯ ಶ್ರೀಗಳಾದ ಶ್ರೀ ಅಭಿನವ ಶಂಕರ ಭಾರತಿ ಸ್ವಾಮೀಜಿ ಹಾಗೂ ಮಠದ ಸಿಬ್ಬಂದಿ ಶ್ರೀನಿವಾಸ್ ಐಯ್ಯರ್ ವಿರುದ್ಧ ಕಳ್ಳತನದ ಆರೋಪ ವ್ಯಕ್ತಪಡಿಸಿ ಮತ್ತೊಮ್ಮೆ ದೂರು ನೀಡಿದ್ದರು.
Related Articles
ತನಿಖೆಯಲ್ಲಿ ಬಯಲಾದ ಸತ್ಯ!
ಸುಮಾರು ಎರಡು ವರ್ಷಗಳ ಕಾಲ ವಿಚಾರಣೆ ನಡೆಸಿದ್ದ ಪೊಲೀಸರ ತನಿಖೆಯಲ್ಲಿ ಪಾದುಕೆ ಕಳ್ಳತನ ಪ್ರಕರಣದಲ್ಲಿ ಟ್ವಿಸ್ಟ್ ಸಿಕ್ಕಿತ್ತು. ಅಸಲಿಗೆ ಪಾದುಕೆ ಕಳುವಾಗಿರಲಿಲ್ಲ, ಹಿರಿಯ ಶ್ರೀಗಳ ಹೆಸರಿನಲ್ಲಿದ್ದ ಎಸ್‌ಬಿಐ ಲಾಕರ್‌ನಲ್ಲೇ ಇತ್ತು.
SBI ಲಾಕರ್ ನಲ್ಲಿ ಪತ್ತೆ, ಕಳ್ಳತನ ಅಲ್ಲ Mistake of Fact!
ಶಿವಮೊಗ್ಗದ SBI ಬ್ಯಾಂಕ್ ನಲ್ಲಿ ಶ್ರೀ ವಿಧ್ಯಾಭಿನವ ವಿದ್ಯಾರಣ್ಯ ಭಾರತಿ ಶ್ರೀಗಳ ಹೆಸರಿನಲ್ಲಿ 91/92 ನಂಬರ್ ಲಾಕರ್ ಇತ್ತು. ಪೊಲೀಸರು ತನಿಖೆ ವೇಳೆ ಲಾಕರ್ ಓಪನ್ ಮಾಡಿಸಿದಾಗ ಅಲ್ಲೇ ಇದ್ದವು.
ಪ್ರಕರಣದಲ್ಲಿ ಬಿ ರಿಪೋರ್ಟ್ ಸಲ್ಲಿಕೆ ಆಗಿದ್ದು, ಪಾದುಕೆ ನಾಪತ್ತೆ ಪ್ರಕರಣದಲ್ಲಿ ಮಠದ ಕಿರಿಯ ಶ್ರೀಗಳಾದ ಅಭಿನವ ಶಂಕರ ಭಾರತಿ ಸ್ವಾಮೀಜಿ ಅವರ ಯಾವುದೇ ಪಾತ್ರ ಅಥವಾ ಹಸ್ತಕ್ಷೇಪ ಇಲ್ಲ ಎಂದು ತಿಳಿದಿದ್ದು, ಭಕ್ತರು ಹಿರಿಯ ಶ್ರೀಗಳು ನೀಡಿರುವ ದೂರಿನಲ್ಲಿ ದುರುದ್ದೇಶ ಇರಬಹುದು ಎಂಬ ಅನುಮಾನ ವ್ಯಕ್ತಪಡಿಸಿದ್ದಾರೆ. ಕಿರಿಯ ಸ್ವಾಮೀಜಿಗಳಾದ ಶ್ರೀ ಅಭಿನವ ಶಂಕರ ಭಾರತಿ ಅವರ ಕುರಿತಂತೆ ಅಪಪ್ರಚಾರ ಮಾಡಲಾಗಿತ್ತು ಎಂದು ಬೇಸರ ವ್ಯಕ್ತಪಡಿಸಿದರು. ಲಾಕರ್ನಲ್ಲಿದ್ದ ಪಾದುಕೆಗಳನ್ನು ಮರೆಮಾಚಿ ದುರುದ್ದೇಶದಿಂದ ದೂರು ನೀಡಲಾಗಿತ್ತಾ ಎಂಬ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ. ಕಿರಿಯ ಶ್ರೀಗಳಾದ ಅಭಿನವ ಶಂಕರ ಭಾರತಿ ಸ್ವಾಮೀಜಿ ಅವರನ್ನು ಮಠದಿಂದ ಉಚ್ಛಾಟಿಸುವ ಕುತಂತ್ರ ಎಂದು ಭಕ್ತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಒಟ್ಟಾರೆ 100 ವರ್ಷದ ಪಾದುಕೆ ಕಳ್ಳತನ ಅಂತ ಭಾರೀ ಸುದ್ದಿಯಾಗಿದ್ದ ಪ್ರಕರಣ ಅಂತಿಮವಾಗಿ ಲಾಕರ್ ನಲ್ಲೇ ಸೇಫ್ ಆಗಿ ಸಿಕ್ಕಿ ಸುಖಾಂತ್ಯ ಕಂಡಿದೆ.
