Gadag: ದಶಕವಾದ್ರೂ ಪ್ರವಾಹ ಸಂತ್ರಸ್ತರಿಗೆ ಹಂಚಿಕೆಯಾಗದ ಆಸರೆ ಮನೆಗಳು..!
* ಪಂಚಾಯಿತಿಯಲ್ಲಿ ಠರಾವ್‌ ಪಾಸಾದರೂ ಹಂಚಿಕೆ ಮಾಡದ ಅಧಿಕಾರಿಗಳು
* ಪ್ರವಾಹಕ್ಕೆ ಸಂಕಷ್ಟಕ್ಕೀಡಾಗಿದ್ದ ಹೊಳೆಆಲೂರು ಹೋಬಳಿಯ ಗ್ರಾಮಗಳು
* ಮನೆಗಳ ಸಂಖ್ಯೆ ಮಾಯ
ಸಂಜೀವಕುಮಾರ ಹಿರೇಮಠ
ಹೊಳೆಆಲೂರ(ಫೆ.20): 2007, 2009ರಲ್ಲಿ ಬೆಣ್ಣೆಹಳ್ಳ, ಮಲಪ್ರಭಾ ನದಿ(Malaprabha River) ಪ್ರವಾಹಕ್ಕೆ(Flood) ಹೊಳೆಆಲೂರು ಹೋಬಳಿಯ ಗ್ರಾಮಗಳು ಸಂಕಷ್ಟಕ್ಕೀಡಾಗಿದ್ದವು. ಜನರ ಸಮಸ್ಯೆಗೆ ಸ್ಪಂದಿಸಿದ ಅಂದಿನ ಸಿಎಂ ಬಿಎಸ್‌ವೈ, ಎಲ್ಲಾ ಗ್ರಾಮಗಳ ಜನರಿಗಾಗಿ ಆಸರೆ ಯೋಜನೆಯಡಿ ನವಗ್ರಾಮಗಳನ್ನು ನಿರ್ಮಿಸಿದ್ದರು. ಆದರೆ, ನಿರ್ಮಾಣವಾಗಿರುವ ಮನೆಗಳ ಹಂಚಿಕೆಯಲ್ಲಿ ಗ್ರಾಪಂ ಅಧಿಕಾರಿಗಳು ಮಾಡುತ್ತಿರುವ ನಿರ್ಲಕ್ಷ್ಯದಿಂದಾಗಿ ಒಂದು ದಶಕದಿಂದ ಗ್ರಾಮಸ್ಥರು(Villagers) ತೀವ್ರ ತೊಂದರೆ ಅನುಭವಿಸುತ್ತಿದ್ದಾರೆ.
ಪ್ರವಾಹದಿಂದ ತತ್ತರಿಸುವ ಗ್ರಾಮಗಳ ಜನರಿಗೆ ಆಸರೆಯಾಗಬೇಕಾದಿದ್ದ ಯೋಜನೆ ಅಧಿಕಾರಿಗಳ ನಿರ್ಲಕ್ಷ್ಯ ಮತ್ತು ಪರಸ್ಪರ ದೋಷಾರೋಪಣೆಯಲ್ಲಿಯೇ ಮಾಡುತ್ತಿರುವ ಕಾಲ ಹರಣದಿಂದಾಗಿ ಸಮಸ್ಯೆ ಇಂದಿಗೂ ಜೀವಂತಾಗಿಯೇ ಉಳಿದಿದೆ. ಮೇಲ್ನೋಟಕ್ಕೆ ಯಾರಿಗೂ ಜವಾಬ್ದಾರಿ ಇಲ್ಲ ಎನ್ನುವುದು ಸ್ಪಷ್ಟವಾಗುತ್ತದೆ.
8 ತಿಂಗಳಲ್ಲಿ 46,000 ಮನೆ ನಿರ್ಮಾಣ: ಸಚಿವ ಸೋಮಣ್ಣ
ಮನೆಗಳ ಸಂಖ್ಯೆ ಮಾಯ:
ಅಮರಗೋಳ ಗ್ರಾಪಂ ವ್ಯಾಪ್ತಿಯ ಹೊಳೆ ಹಡಗಲಿ ಗ್ರಾಮದಲ್ಲಿನ ಮನೆ(House) ಹಂಚಿಕೆಯಲ್ಲಿ ವ್ಯತ್ಯಾಸವಾಗಿದ್ದು, ಹಳೆಯ ಗ್ರಾಮದಲ್ಲಿ 305 ಮನೆಗಳಿವೆ. ಇಲಾಖೆ ದಾಖಲೆಗಳ ಪ್ರಕಾರ 304 ಮನೆಗಳನ್ನು ಹಂಚಿಕೆ ಮಾಡಲಾಗಿದೆ. ವಿಶೇಷವೆಂದರೆ 3 ಬಾರಿ ಮನೆ ಹಂಚಿಕೆಯಾಗಿದ್ದರೂ ಇನ್ನೂ ಹಲವಾರು ಅರ್ಹ ಫಲಾನುಭವಿಗಳ(Beneficiaries) ಉಳಿದುಕೊಂಡಿದ್ದಾರೆ. ಅಂದು ಅಧಿಕಾರ ನಡೆಸಿದವರು ತಮಗೆ ಬೇಕಾದವರಿಗೆ ನೀಡಿದ್ದು, ಅರ್ಹರೇ ಉಳಿದುಕೊಂಡಿದ್ದಾರೆ ಎನ್ನುವುದು ಗ್ರಾಮಸ್ಥರ ಆರೋಪವಾಗಿದೆ. ಈ ಕುರಿತು ತಾಪಂ ಇಒ, ತಹಸೀಲ್ದಾರ್‌, ಜಿಲ್ಲಾಧಿಕಾರಿ ಸೇರಿದಂತೆ ಎಲ್ಲ ಹಿರಿಯ ಅಧಿಕಾರಿಗಳು, ಶಾಸಕ ಸಚಿವರು, ಮಾಜಿ ಶಾಸಕರಿಗೆ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎನ್ನುತ್ತಾರೆ ಗ್ರಾಮಸ್ಥರು.
ಗ್ರಾಪಂನಿಂದ ಠರಾವ್‌ ಪಾಸ್‌
ಅಕ್ಟೋಬರ್‌ 8, 2021ರ ಸಾಮಾನ್ಯ ಸಭೆಯಲ್ಲಿ ಸರ್ವ ಸದಸ್ಯರ ಸಹಿಯೊಂದಿಗೆ ಠರಾವು ಪಾಸ್‌ ಮಾಡಿ, ಹೊಳೆಹಡಗಲಿ ನವಗ್ರಾಮ ಮನೆ ಹಂಚಿಕೆಯಲ್ಲಿ ಅರ್ಹ ಫಲಾನುಭವಿಗಳಿಗೆ ಮನೆ ಸಿಕ್ಕಿಲ್ಲ. ಆದ್ದರಿಂದ ಮರು ಹಂಚಿಕೆ ಮಾಡಬೇಕು ಎಂದು ಠರಾವ್‌ ಪಾಸ್‌ ಮಾಡಲಾಗಿದೆ. ಇದನ್ನು ರೋಣ(Ron) ತಹಸೀಲ್ದಾರರಿಗೆ ತಿಳಿಸಿದರೂ ಅವರು ಜಿಲ್ಲಾಡಳಿತಕ್ಕೆ ಮಾಹಿತಿ ನೀಡಿಲ್ಲ ಎಂದು ಗ್ರಾಮಸ್ಥರು ಗಂಭೀರ ಆರೋಪ ಮಾಡುತ್ತಿದ್ದಾರೆ.
ಈ ಸಮಸ್ಯೆ ಮನೆಗಳು ಹಂಚಿಕೆಯಾದ ವೇಳೆಯಿಂದಲೂ ಇದೆ. ನಾನು ಕಳೆದ 3 ತಿಂಗಳ ಹಿಂದೆ ಅಧಿಕಾರ ವಹಿಸಿಕೊಂಡಿದ್ದೇನೆ, ಸರ್ವಸದಸ್ಯರು, ಗ್ರಾಮಸ್ಥರ ಬೇಡಿಕೆಯಂತೆ ಮರು ಹಂಚಿಕೆ ಮಾಡಲು ಠರಾವ್‌ ಮಾಡಿ ಮೇಲಧಿಕಾರಿಗಳಿಗೆ ರವಾನಿಸಲಾಗಿದೆ ಅಂತ ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಸಿ.ಎಲ್‌. ಇಂಬ್ರಾಪೂರ ತಿಳಿಸಿದ್ದಾರೆ.
ಈ ವಿಷಯವಾಗಿ ಗ್ರಾಮಸ್ಥರಿಂದ ಹಲವಾರು ಬಾರಿ ಮನವಿಗಳು ಬಂದಿದ್ದು, ಇವುಗಳ ಆಧಾರದಲ್ಲಿ ತಹಸೀಲ್ದಾರ್‌ ಮತ್ತು ಜಿಲ್ಲಾಧಿಕಾರಿಗಳಿಗೆ ಅಗತ್ಯ ಮಾಹಿತಿ, ದಾಖಲೆ ಸಲ್ಲಿಸಿದ್ದೇನೆ. ನಾನೊಬ್ಬನೇ ಏನೂ ಮಾಡಲು ಸಾಧ್ಯವಿಲ್ಲ, ಮೇಲಾಧಿಕಾರಿಗಳಿಂದ ಇದಕ್ಕೆ ವಿಶೇಷ ಆದೇಶ ಬೇಕು ಅಂತ ರೋಣ ಇ.ಒ ಸಂತೋಷ ಪಾಟೀಲ ಹೇಳಿದ್ದಾರೆ.
ಈ ವಿಷಯವಾಗಿ ಈಗಾಗಲೇ ಜಿಲ್ಲಾಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ, ಅಲ್ಲಿಂದ ಬರುವ ನಿರ್ದೇಶನಕ್ಕಾಗಿ ಕಾಯುತ್ತಿದ್ದೇವೆ ಅಂತ ರೋಣ ತಹಸೀಲ್ದಾರ ಜೆ.ಬಿ. ಜಕ್ಕನಗೌಡ್ರ ತಿಳಿಸಿದ್ದಾರೆ.
ಕಾನೂನನ್ನು ಸರಳೀಕರಿಸುತ್ತೇವೆ: ಸಿಎಂ ಬೊಮ್ಮಾಯಿ
ಬೆಂಗಳೂರು: ವಸತಿ ಎಲ್ಲರ ಮೂಲಭೂತ ಹಕ್ಕಾಗಿದ್ದು, ಬಡವರಿಗೆ ನಿವೇಶನ ಮತ್ತು ಮನೆಗಳನ್ನು ನ್ಯಾಯಸಮ್ಮತವಾಗಿ ಒದಗಿಸಲು ಕಾನೂನಿನ ಸರಳೀಕರಣದ ಅವಶ್ಯಕತೆ ಇದೆ. ಹೀಗಾದಾಗ ಮಾತ್ರ ಎಲ್ಲರಿಗೂ ವಸತಿ ಲಭ್ಯವಾಗಲಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ(Basavaraj Bommai) ಅಭಿಪ್ರಾಯಪಟ್ಟಿದ್ದಾರೆ.
ನಗರ ಪ್ರದೇಶದ ಎಲ್ಲ ಬಡವರಿಗೆ ಸೂರು ಕಲ್ಪಿಸುವೆ: ಸಚಿವ ಸೋಮಣ್ಣ
ಜ.31 ರಂದು ಗೃಹ ಕಚೇರಿ ಕೃಷ್ಣಾದಲ್ಲಿ ರಾಜೀವ್‌ ಗಾಂಧಿ ವಸತಿ ನಿಗಮದ ವತಿಯಿಂದ ಮುಖ್ಯಮಂತ್ರಿಗಳ ರಾಜಧಾನಿ ಬೆಂಗಳೂರಿನ(Bengaluru) 1 ಲಕ್ಷ ಬಹುಮಹಡಿ ವಸತಿ ಯೋಜನೆಯಡಿ(Housing Plan) ಆಯ್ಕೆಯಾಗಿರುವ ಅರ್ಹ ಫಲಾನುಭವಿಗಳಿಗೆ ಸಾಂಕೇತಿಕವಾಗಿ ಹಂಚಿಕೆ ಪತ್ರ ವಿತರಿಸಿ ಮಾತನಾಡಿದರು.
ಬಡಾವಣೆಗಳು ಕಾನೂನುಬದ್ಧವಾಗಿ ಅಭಿವೃದ್ಧಿಯಾಗದಿದ್ದರೆ, ಮೂಲಭೂತ ಸೌಕರ್ಯಗಳ ಕೊರತೆಗಳಿರುವ ಕಂದಾಯ ನಿವೇಶನಗಳು ದೊಡ್ಡ ಸಂಖ್ಯೆಯಲ್ಲಿ ಹೆಚ್ಚಾಗುತ್ತದೆ. ಈ ಸಮಸ್ಯೆಗಳನ್ನು ನಿವಾರಿಸಲು ಮತ್ತು ಬಡವರಿಗೆ ಮನೆ, ನಿವೇಶನ ಪಡೆಯಲು ಸರ್ಕಾರ ಕಾನೂನಿನ ಸರಳೀಕರಣ ಮಾಡಲಿದೆ ಎಂದು ಹೇಳಿದ್ದರು.
