ರಾತ್ರಿಯೇ ರೈಲು ಸಂಚಾರ ಶುರು: ಭಾವುಕರಾಗಿ ರೈಲಿನತ್ತ ಕೈಬೀಸಿ, ಕೈಮುಗಿದ ಸಚಿವ ವೈಷ್ಣವ್
ಈ ಶತಮಾನದಲ್ಲೇ ಅತ್ಯಂತ ಭೀಕರವಾದ ರೈಲು ಅಪಘಾತ ಸಂಭವಿಸಿದ ಎರಡೇ ದಿನದಲ್ಲಿ ಒಡಿಶಾದ ಬಾಲಸೋರ್ ಬಳಿ ರೈಲು ಮಾರ್ಗ ಪುನರ್ನಿರ್ಮಾಣ ಮಾಡಲಾಗಿದ್ದು, ಭಾನುವಾರ ರಾತ್ರಿಯೇ ಸಂಚಾರ ಆರಂಭವಾಗಿದೆ. ಮೊದಲ ರೈಲು ರಾತ್ರಿ 10.30ರ ಸುಮಾರಿಗೆ ಇಲ್ಲಿ ಸಂಚರಿಸಿತು.
ಬಾಲಸೋರ್: ಈ ಶತಮಾನದಲ್ಲೇ ಅತ್ಯಂತ ಭೀಕರವಾದ ರೈಲು ಅಪಘಾತ ಸಂಭವಿಸಿದ ಎರಡೇ ದಿನದಲ್ಲಿ ಒಡಿಶಾದ ಬಾಲಸೋರ್ ಬಳಿ ರೈಲು ಮಾರ್ಗ ಪುನರ್ನಿರ್ಮಾಣ ಮಾಡಲಾಗಿದ್ದು, ಭಾನುವಾರ ರಾತ್ರಿಯೇ ಸಂಚಾರ ಆರಂಭವಾಗಿದೆ. ಮೊದಲ ರೈಲು ರಾತ್ರಿ 10.30ರ ಸುಮಾರಿಗೆ ಇಲ್ಲಿ ಸಂಚರಿಸಿತು.
ಈ ರೈಲು ಸಂಚಾರ ಆರಂಭ ಮಾಡುತ್ತಿದ್ದಂತೆಯೇ ದುರ್ಘಟನಾ ಸ್ಥಳದ ಹಳಿಯ ಪಕ್ಕದಲ್ಲೇ ನಿಂತಿದ್ದ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ (Ashwin Vaishnav), ರೈಲ್ವೆ ಅಧಿಕಾರಿಗಳು, ದುರಸ್ತಿ ಸಿಬ್ಬಂದಿ ಹಾಗೂ ಸಾರ್ವಜನಿಕರು ಭಾವುಕರಾಗಿ ರೈಲಿನತ್ತ ಕೈಬೀಸಿ ಹರ್ಷ ವ್ಯಕ್ತಪಡಿಸಿದರು. ಇದೇ ವೇಳೆ ಅಶ್ವಿನಿ ವೈಷ್ಣವ್ ಅವರು ದೇವರನ್ನು ನೆನೆಯುತ್ತ ಸಾಗುತ್ತಿದ್ದ ರೈಲಿಗೆ ಕೈಮುಗಿದರು.ಭಾನುವಾರ ರಾತ್ರಿ ಸಂಚರಿಸಿದ ರೈಲು ಕಲ್ಲಿದ್ದಲು ಹೊತ್ತ ಗೂಡ್ಸ್ (Goods Train) ರೈಲಾಗಿದ್ದು, ವಿಶಾಖಪಟ್ಟಣದಿಂದ ಆಗಮಿಸಿತ್ತು. ಇದು ರೂರ್ಕೆಲಾ ಉಕ್ಕು ಘಟಕದತ್ತ ಪ್ರಯಾಣ ಬೆಳೆಸಿತು. ಇದೇ ಮಾರ್ಗದಲ್ಲಿ ಬೆಂಗಳೂರು-ಹೌರಾ ರೈಲಿಗೆ ಕೋರಮಂಡಲ್ ಎಕ್ಸ್ಪ್ರೆಸ್ ಡಿಕ್ಕಿ ಹೊಡೆದಿತ್ತು. ಬಹುಶಃ ಇಂದಿನಿಂದ ಪ್ರಯಾಣಿಕ ರೈಲುಗಳು ಸಂಚಾರ ಆರಂಭಿಸುವ ನಿರೀಕ್ಷೆಯಿದೆ.
ರೈಲು ದುರಂತದಲ್ಲಿ ಮೋದಿ ವೈಷ್ಣವ್ ಪ್ರಚಾರ ಗಿಮಿಕ್: ಖರ್ಗೆ ಆರೋಪ
ಈ ಬಗ್ಗೆ ಮಾಧ್ಯಮಗಳ ಜತೆ ಮಾತನಾಡಿದ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್, ‘ಕೇವಲ 51 ತಾಸಿನಲ್ಲಿ ಎರಡೂ ಬದಿಯ ಹಳಿ ದುರಸ್ತಿ ಪೂರ್ಣಗೊಳಿಸಲಾಗಿದೆ. ಇನ್ನು ರೈಲು ಸಂಚಾರ ಸಹಜ ಸ್ಥಿತಿಗೆ ಮರಳಲಿದ್ದು, ಈಗಿನಿಂದಲೇ ಎಂದಿನ ಸಂಚಾರ ಆರಂಭವಾಗಲಿದೆ ಎಂದರು. ಹೌರಾದಿಂದ ಚೆನ್ನೈ/ಬೆಂಗಳೂರು ಕಡೆ ಬರುವ ಹಾಗೂ ಹೌರಾ (Howrah) ಕಡೆ ಹೋಗುವ ಎರಡೂ ಮಾರ್ಗಗಳ ಹಳಿ ದುರಸ್ತಿ ಶನಿವಾರ ರಾತ್ರಿ ಆರಂಭವಾಗಿತ್ತು. ಮೊದಲು ಹಳಿ ಜೋಡಿಸಿದ ಕಾರ್ಮಿಕರು, ನಂತರ ಸಿಗ್ನಲಿಂಗ್ ಹಾಗೂ ವಿದ್ಯುದೀಕರಣ ವ್ಯವಸ್ಥೆ ಸರಿಪಡಿಸಿದರು.
ಕವಚ ವ್ಯವಸ್ಥೆ ದೇಶಾದ್ಯಂತ ತ್ವರಿತವಾಗಿ ಅಳವಡಿಕೆ ಭರವಸೆ
ನವದೆಹಲಿ: ಬಾಲಸೋರ್ ದುರಂತದಿಂದ ಎಚ್ಚೆತ್ತಿರುವ ರೈಲ್ವೆ ಇಲಾಖೆ ರೈಲ್ವೆ ಸುರಕ್ಷತೆಗಾಗಿ ಅಭಿವೃದ್ಧಿಪಡಿಸಿರುವ ‘ಕವಚ’ ವ್ಯವಸ್ಥೆಯನ್ನು ತ್ವರಿತವಾಗಿ ಇಡೀ ದೇಶದಲ್ಲಿ ಅಳವಡಿಸುವುದಾಗಿ ಪ್ರಕಟಿಸಿದೆ. ಇದಕ್ಕೆ ಬೇಕಾದ ಹಣವನ್ನು ಕೂಡ ಮಂಜೂರು ಮಾಡಿರುವುದಾಗಿ ತಿಳಿಸಿದೆ. ಆದರೆ ಇದೇ ವೇಳೆ, ‘ಕವಚ ವ್ಯವಸ್ಥೆ ಇದ್ದರೂ ಬಾಲಸೋರ್ ರೈಲು ದುರಂತ ತಪ್ಪಿಸಲು ಸಾಧ್ಯವಿರಲಿಲ್ಲ’ ಎಂದಿದೆ.
ಈ ಕುರಿತು ಮಾತನಾಡಿರುವ ರೈಲ್ವೆ ಮಂಡಳಿಯ ಕಾರ್ಯಾಚರಣೆ ಹಾಗೂ ವ್ಯವಹಾರ ಅಭಿವೃದ್ಧಿ ವಿಭಾಗದ ಸದಸ್ಯೆ ಜಯಾ ವರ್ಮಾ ಸಿನ್ಹಾ, ಬಾಲಸೋರ್ ಘಟನೆಯ ವಿಷಯದಲ್ಲಿ ಕವಚ ವ್ಯವಸ್ಥೆ ಇದ್ದಿದ್ದರೂ ಅದು ಕೆಲಸ ಮಾಡುವ ಸಾಧ್ಯತೆ ಇರಲಿಲ್ಲ. ಏಕೆಂದರೆ ಇಂಟರ್ಲಾಕಿಂಗ್ ಸಮಸ್ಯೆ ಕಾರಣ ಬೇರೆ ಮಾರ್ಗಕ್ಕೆ ರೈಲು ಏಕಾಏಕಿ ನುಗ್ಗಿತ್ತು. ಅಪಘಾತ ಆಗುತ್ತದೆ ಎಂದು ರೈಲು ಚಾಲಕನಿಗೆ ತಿಳಿದಾಗ ಕೋರಮಂಡಲ್ ಎಕ್ಸ್ಪ್ರೆಸ್ ರೈಲು ಹಾಗೂ ಗೂಡ್ಸ್ ರೈಲಿನ ಅಂತರ ಬಹಳ ಕಡಿಮೆಯಿತ್ತು. ಅಂದರೆ ಗೂಡ್ಸ್ ರೈಲು ಹಾಗೂ ಕೋರಮಂಡಲ್ ರೈಲಿನ ನಡುವೆ ಅಂತರ ಕೇವಲ 100 ಮೀ. ಇತ್ತು. ಗಂಟೆಗೆ 130 ಕಿ.ಮೀ. ವೇಗದಲ್ಲಿ ಸಾಗುತ್ತಿರುವ ರೈಲಿನ ಕವಚ ವ್ಯವಸ್ಥೆ ಕೆಲಸ ಮಾಡಬೇಕು ಎಂದರೆ ರೈಲನ್ನು ನಿಲ್ಲಿಸಲು 600 ಮೀ. ಅಂತರವಾದರೂ ಬೇಕು. ಮುಖ್ಯ ರೈಲು ಮಾರ್ಗ ಪಕ್ಕದ ದೊಡ್ಡ ಬಂಡೆ ರೈಲಿನ ಮುಂದೆ ಏಕಾಏಕಿ ಉರುಳಿ ಬಿದ್ದರೆ ಕವಚ ಕೆಲಸ ಮಾಡದು’ ಎಂದರು.
ಒಡಿಶಾ ತ್ರಿವಳಿ ರೈಲು ದುರಂತ: ತುಂಬಿ ತುಳುಕುತ್ತಿರುವ ಶವಾಗಾರಗಳು: ಮೃತರ ಗುರುತು ಪತ್ತೆ ಆಗದೆ ಸಂಕಟ
‘ಕವಚ ವ್ಯವಸ್ಥೆಯನ್ನು ಆದ್ಯತೆಯ ಮೇಲೆ ಶೀಘ್ರದಲ್ಲೇ ಎಲ್ಲಾ ರೈಲ್ವೆ ವಿಭಾಗಗಳಿಗೂ ವಿಸ್ತರಿಸಲು ನಿರ್ಧರಿಸಲಾಗಿದೆ. ಇದು ದೇಶದಲ್ಲೇ ಅಭಿವೃದ್ಧಿಪಡಿಸಿರುವ ತಂತ್ರಜ್ಞಾನವಾದ್ದರಿಂದ ಸಲಕರಣೆಗಳ ಉತ್ಪಾದನೆ ಸೀಮಿತವಾಗಿದೆ. ಆದರೂ ಸಾಧ್ಯವಾದಷ್ಟುಬೇಗ ಎಲ್ಲೆಡೆ ಈ ತಂತ್ರಜ್ಞಾನ ಅಳವಡಿಸಲಾಗುವುದು’ ಎಂದೂ ಅವರು ಸ್ಪಷ್ಟಪಡಿಸಿದರು.