ಕೋಲ್ಕತ್ತಾ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಕಾರ್ಯಾಚರಣಾ ಪ್ರದೇಶದಲ್ಲಿರುವ ದಶಕಗಳ ಹಳೆಯ ಮಸೀದಿಯನ್ನು ಸ್ಥಳಾಂತರಿಸುವ ಪ್ರಯತ್ನಗಳು ತೀವ್ರಗೊಂಡಿವೆ. ವಿಮಾನಗಳ ಸುರಕ್ಷತೆ ಮತ್ತು ಕಾರ್ಯಾಚರಣೆಗೆ ಅಡ್ಡಿಯಾಗಿರುವ ಈ ಮಸೀದಿಯ ಸ್ಥಳಾಂತರ ಕುರಿತು ಮಾತುಕತೆ ನಡೆದಿದೆ.
ಕೋಲ್ಕತ್ತಾ (ಮೇ.23): ಪಶ್ಚಿಮ ಬಂಗಾಳದ ರಾಜಕೀಯ ಚಿತ್ರಣ ಬದಲಾದ ಬೆನ್ನಲ್ಲೇ, ಕೋಲ್ಕತ್ತಾ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಅತ್ಯಂತ ಸೂಕ್ಷ್ಮ ಹಾಗೂ ಕಾರ್ಯಾಚರಣಾ ಪ್ರದೇಶದ (Operational Area) ಒಳಭಾಗದಲ್ಲಿರುವ ದಶಕಗಳ ಹಳೆಯ ಮಸೀದಿಯನ್ನು ಸ್ಥಳಾಂತರಿಸುವ ಪ್ರಯತ್ನಗಳು ಈಗ ತೀವ್ರ ವೇಗವನ್ನು ಪಡೆದುಕೊಂಡಿವೆ. ಕಳೆದ ಮಂಗಳವಾರ ಜಿಲ್ಲಾಡಳಿತ ಮತ್ತು ಭಾರತೀಯ ವಿಮಾನ ನಿಲ್ದಾಣಗಳ ಪ್ರಾಧಿಕಾರದ (AAI) ಉನ್ನತ ಅಧಿಕಾರಿಗಳ ಜಂಟಿ ತಂಡವು ಮಸೀದಿಯ ಸ್ಥಳ ಪರಿಶೀಲನೆ ನಡೆಸಿದೆ. ಇದರ ಬೆನ್ನಲ್ಲೇ ಬುಧವಾರ ರಾಜ್ಯ ಆಡಳಿತ ಮತ್ತು ಮಸೀದಿ ಸಮಿತಿಯ ಪ್ರತಿನಿಧಿಗಳ ನಡುವೆ ಮಹತ್ವದ ಸಭೆ ನಡೆದಿದ್ದು, ವಿಮಾನ ನಿಲ್ದಾಣದ ಭದ್ರತೆ ಹಾಗೂ ಸುರಕ್ಷತೆಯ ದೃಷ್ಟಿಯಿಂದ ಮಸೀದಿಯನ್ನು ಬೇರೆಡೆಗೆ ಸ್ಥಳಾಂತರಿಸುವಂತೆ ಕಠಿಣ ಒತ್ತಡ ಹೇರಲಾಗಿದೆ.
ಒಂದು ಕಾಲದಲ್ಲಿ ವಿಶಾಲವಾದ ನಿರ್ಜನ ಪ್ರದೇಶದಲ್ಲಿದ್ದ ಈ 136 ವರ್ಷಗಳ ಹಳೆಯ 'ಗೌರಿಪುರ ಜಾಮೇ ಮಸೀದಿ' (ಬಾಕ್ರಾ ಮಸೀದಿ ಎಂದು ಸಹ ಕರೆಯಲಾಗುತ್ತದೆ), ವಿಮಾನ ನಿಲ್ದಾಣದ ನಿರಂತರ ವಿಸ್ತರಣೆಯಿಂದಾಗಿ ಇಂದು ರನ್ವೇಯ ತೀರಾ ಒಳಗಿನ ಸೂಕ್ಷ್ಮ ವಲಯದಲ್ಲಿ ಸಿಲುಕಿಕೊಂಡಿದೆ.
ವಿಮಾನ ಹಾರಾಟದ ಭದ್ರತೆಗೆ ಭಾರಿ ಆತಂಕ
ಉತ್ತರ 24 ಪರಗಣ ಜಿಲ್ಲಾಧಿಕಾರಿಗಳ (DM) ಕಚೇರಿಯಲ್ಲಿ ನಡೆದ ಸಭೆಯಲ್ಲಿ ವಿಮಾನ ನಿಲ್ದಾಣದ ಅಧಿಕಾರಿಗಳು, ಮಸೀದಿಯ ಉಪಸ್ಥಿತಿಯಿಂದಾಗಿ ವಿಮಾನಗಳ ಹಾರಾಟದ ಸುರಕ್ಷತೆಗೆ ಎದುರಾಗಿರುವ ಗಂಭೀರ ಸವಾಲುಗಳು ಮತ್ತು ತಾಂತ್ರಿಕ ಅಡೆತಡೆಗಳನ್ನು ನಕ್ಷೆಯ ಮೂಲಕ ಮನವರಿಕೆ ಮಾಡಿಕೊಟ್ಟರು. ಮಸೀದಿ ಸಮಿತಿಯ ನೇತೃತ್ವ ವಹಿಸಿದ್ದ ಮಾಜಿ ಶಾಸಕ ಸಿದ್ದಿಕುಲ್ಲಾ ಚೌಧರಿ ಅವರು, "ಈ ಬಗ್ಗೆ ಸ್ವತಂತ್ರವಾಗಿ ತೀರ್ಮಾನ ತೆಗೆದುಕೊಳ್ಳುವ ಶಕ್ತಿ ನಮಗಿಲ್ಲ. ಆದ್ದರಿಂದ ಮುಸ್ಲಿಂ ಪ್ರಮುಖ ಸಂಘಟನೆಗಳನ್ನು ಸಂಪರ್ಕಿಸಿ" ಎಂದು ಅಧಿಕಾರಿಗಳಿಗೆ ತಿಳಿಸಿದ್ದಾರೆ.
Related Articles
ಈ ಕುರಿತು ಪ್ರತಿಕ್ರಿಯಿಸಿರುವ ವಿಮಾನ ನಿಲ್ದಾಣದ ನಿರ್ದೇಶಕ ವಿಕ್ರಮ್ ಸಿಂಗ್, "ವಿಮಾನ ನಿಲ್ದಾಣದ ಆವರಣದೊಳಗೆ ಈ ಮಸೀದಿ ಇರುವುದು ದೀರ್ಘಕಾಲದ ವಿವಾದಾತ್ಮಕ ವಿಷಯವಾಗಿದೆ. ಇದರಿಂದ ವಿಮಾನಗಳ ಕಾರ್ಯಾಚರಣೆಗೆ ಆಗುತ್ತಿರುವ ತೊಂದರೆಗಳನ್ನು ನಾವು ಹಲವು ಬಾರಿ ಸರ್ಕಾರದ ಗಮನಕ್ಕೆ ತಂದಿದ್ದೇವೆ. ಬುಧವಾರ ಮತ್ತೊಂದು ಸುತ್ತಿನ ಸುದೀರ್ಘ ಚರ್ಚೆ ನಡೆದಿದ್ದು, ಶೀಘ್ರದಲ್ಲೇ ಸಕಾರಾತ್ಮಕ ಪ್ರತಿಕ್ರಿಯೆ ಸಿಗುವ ನಿರೀಕ್ಷೆಯಿದೆ" ಎಂದು ತಿಳಿಸಿದ್ದಾರೆ.
3 ದಶಕಗಳ ಹಳೆಯ ವಿವಾದ; ಹಿಂದೆ ತಣ್ಣೀರೆರಚಿದ್ದ ಜ್ಯೋತಿ ಬಸು, ಮಮತಾ ಬ್ಯಾನರ್ಜಿ!
ಈ ಸಣ್ಣ ಮಸೀದಿಯು ವಿಮಾನ ನಿಲ್ದಾಣದ ಎರಡನೇ (Secondary) ರನ್ವೇಯಿಂದ ಉತ್ತರಕ್ಕೆ ಕೇವಲ 165 ಮೀಟರ್ ಮತ್ತು ವಿಮಾನ ನಿಲ್ದಾಣದ ಕಾಂಪೌಂಡ್ ಗೋಡೆಯಿಂದ ಕೇವಲ 150 ಮೀಟರ್ ಒಳಗಡೆ ಇದೆ. ಅಂತರರಾಷ್ಟ್ರೀಯ ನಿಯಮಗಳ ಪ್ರಕಾರ, ರನ್ವೇಯಿಂದ ಯಾವುದೇ ಕಟ್ಟಡಕ್ಕಿರಬೇಕಾದ ಕನಿಷ್ಠ ದೂರ 240 ಮೀಟರ್. ಆದರೆ ಈ ನಿಯಮ ಇಲ್ಲಿ ಸಂಪೂರ್ಣ ಉಲ್ಲಂಘನೆಯಾಗಿದೆ.
ಈ ಹಿಂದೆ ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯವು ಮಸೀದಿ ಸ್ಥಳಾಂತರಕ್ಕೆ ನಡೆಸಿದ್ದ ಎಲ್ಲಾ ಪ್ರಯತ್ನಗಳನ್ನು ಅಂದಿನ ಮುಖ್ಯಮಂತ್ರಿಗಳಾದ ಜ್ಯೋತಿ ಬಸು, ಬುದ್ಧದೇವ್ ಭಟ್ಟಾಚಾರ್ಯ (ಸಿಪಿಎಂ) ಮತ್ತು ಮಮತಾ ಬ್ಯಾನರ್ಜಿ (ಟಿಎಂಸಿ) ನೇತೃತ್ವದ ಸರ್ಕಾರಗಳು ರಾಜಕೀಯ ಕಾರಣಗಳಿಗಾಗಿ ತಳ್ಳಿಹಾಕಿದ್ದವು. ಆದರೆ, ಪ್ರಸ್ತುತ ಕೇಂದ್ರದಲ್ಲಿ ಹಾಗೂ ಪಶ್ಚಿಮ ಬಂಗಾಳ ರಾಜ್ಯದಲ್ಲಿ ಬಿಜೆಪಿ ಸರ್ಕಾರ ಅಸ್ತಿತ್ವಕ್ಕೆ ಬಂದಿರುವುದರಿಂದ ಅಧಿಕಾರಿಗಳು ಈ ಬಾರಿ ಮಸೀದಿ ಸ್ಥಳಾಂತರ ಗ್ಯಾರಂಟಿ ಎಂಬ ಆಶಾವಾದದಲ್ಲಿದ್ದಾರೆ. ಪ್ರಸ್ತುತ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ಇತ್ತೀಚಿನ ದಿನಗಳಲ್ಲಿ ವಿಮಾನ ನಿಲ್ದಾಣದ ಭದ್ರತೆಯ ಕುರಿತು ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ಮಸೀದಿಯನ್ನು ತಕ್ಷಣವೇ ಸ್ಥಳಾಂತರಿಸಬೇಕೆಂದು ಬಹಿರಂಗವಾಗಿ ಕರೆ ನೀಡಿದ್ದಾರೆ.
ದೊಡ್ಡ ವಿಮಾನಗಳ ಹಾರಾಟಕ್ಕೆ ಬ್ರೇಕ್; ಎಮರ್ಜೆನ್ಸಿ ಲ್ಯಾಂಡಿಂಗ್ಗೆ ಕಂಟಕ!
ಮಸೀದಿಯು ವಿಮಾನಗಳು ಲ್ಯಾಂಡ್ ಆಗುವ ರಸ್ತೆಯ (Approach Path) ಮಧ್ಯದಲ್ಲೇ ಇರುವುದರಿಂದ, ಸುರಕ್ಷತೆಯ ದೃಷ್ಟಿಯಿಂದ ಸೆಕೆಂಡರಿ ರನ್ವೇಯ ಟಚ್ಡೌನ್ ಪಾಯಿಂಟ್ ಅನ್ನು (ವಿಮಾನದ ಚಕ್ರ ಮೊದಲು ನೆಲಕ್ಕೆ ತಾಗುವ ಜಾಗ) ದಕ್ಷಿಣದ ಕಡೆಗೆ 88 ಮೀಟರ್ಗಳಷ್ಟು ಮುಂದಕ್ಕೆ ಸರಿಸಲಾಗಿದೆ. ಇದರಿಂದಾಗಿ ರನ್ವೇಯ ಒಟ್ಟು ಉದ್ದ ಕೇವಲ 2,832 ಮೀಟರ್ಗಳಿಗೆ ಕುಸಿದಿದೆ. ಇದು ಏರ್ಬಸ್ A320 ಮತ್ತು ಬೋಯಿಂಗ್ 737 ನಂತಹ ಸಣ್ಣ ವಿಮಾನಗಳ ಹಾರಾಟಕ್ಕೆ ಮಾತ್ರ ಸಾಕಾಗುತ್ತದೆ.
ಆದರೆ, ಬೋಯಿಂಗ್ 787 (B787) ಮತ್ತು ಏರ್ಬಸ್ A330 (A330) ನಂತಹ ದೈತ್ಯ ಹಾಗೂ ವೈಡ್-ಬಾಡಿ (Wide-body) ಜಗತ್ತಿನ ಪ್ರಮುಖ ವಿಮಾನಗಳ ಕಾರ್ಯಾಚರಣೆಗೆ ಈ ರನ್ವೇ ಸಾಕಾಗುತ್ತಿಲ್ಲ. ತುರ್ತು ಸಂದರ್ಭಗಳಲ್ಲಿ (Emergency Landings) ವಿಮಾನಗಳನ್ನು ಇಳಿಸಲು ಈ ಮಸೀದಿ ಅತ್ಯಂತ ಅಪಾಯಕಾರಿ ಕಂಟಕವಾಗಿ ಪರಿಣಮಿಸಿದೆ.
ಚಳಿಗಾಲದ ದಟ್ಟ ಮಂಜಿನ ದಿನಗಳಲ್ಲಿ ಪ್ರಮುಖ ರನ್ವೇ ಲಭ್ಯವಿಲ್ಲದಿದ್ದಾಗ ಪರ್ಯಾಯ ವ್ಯವಸ್ಥೆ ಕಲ್ಪಿಸುವುದು ಅಸಾಧ್ಯವಾಗಿದೆ. ಪ್ರೈಮರಿ ರನ್ವೇಯಲ್ಲಿ ಮುಂದುವರಿದ ಇನ್ಸ್ಟ್ರುಮೆಂಟ್ ಲ್ಯಾಂಡಿಂಗ್ ಸಿಸ್ಟಮ್ (ILS) ಇದ್ದು ಕಡಿಮೆ ದೃಶ್ಯಾವಳಿಯಲ್ಲೂ ವಿಮಾನ ಇಳಿಸಬಹುದು. ಆದರೆ ಮಸೀದಿಯ ಕಾರಣಕ್ಕೆ ಸೆಕೆಂಡರಿ ರನ್ವೇಯಲ್ಲಿ ಈ ಹೈಟೆಕ್ ಉಪಕರಣ ಅಳವಡಿಸಲು ಸಾಧ್ಯವಾಗುತ್ತಿಲ್ಲ.
ಸಿಐಎಸ್ಎಫ್ ಫ್ರಿಸ್ಕಿಂಗ್; ಬಸ್ಸಿಂಗ್ ವ್ಯವಸ್ಥೆ
ಪ್ರಸ್ತುತ ದಿನನಿತ್ಯದ ಐದು ಹೊತ್ತಿನ ನಮಾಜ್ಗಾಗಿ 10 ರಿಂದ 25 ಸ್ಥಳೀಯ ಮುಸ್ಲಿಮರು ಇಲ್ಲಿಗೆ ಬರುತ್ತಾರೆ. ಜೆಸ್ಸೋರ್ ರಸ್ತೆಯ ಗೇಟ್ ಬಳಿ ಇವರನ್ನು ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ (CISF) ತೀವ್ರ ತಪಾಸಣೆಗೆ ಒಳಪಡಿಸುತ್ತದೆ. ನಂತರ ಅವರನ್ನು ವಿಶೇಷ ಬಸ್ ಮೂಲಕ ರನ್ವೇ ದಾಟಿಸಿ ಮಸೀದಿಗೆ ಕರೆದೊಯ್ದು, ನಮಾಜ್ ಮುಗಿದ ಬಳಿಕ ಮರಳಿ ಬಸ್ನಲ್ಲೇ ಗೇಟ್ ತನಕ ಬಿಡಲಾಗುತ್ತದೆ. ಇನ್ನು ಶುಕ್ರವಾರದ ಜುಮ್ಮಾ ನಮಾಜ್ ವೇಳೆ ಸಂಖ್ಯೆ 80 ಕ್ಕೆ ಏರುತ್ತದೆ.
"ಕೇವಲ ಬಾಕ್ರಾ ಗ್ರಾಮದ ಸ್ಥಳೀಯರಿಗೆ ಮಾತ್ರ ಇಲ್ಲಿ ಪ್ರಾರ್ಥನೆಗೆ ಅವಕಾಶವಿದೆ. ಹೊರಗಿನವರಿಗೆ ಪ್ರವೇಶವಿಲ್ಲ. ನಾವು ದಶಕಗಳಿಂದ ಭದ್ರತಾ ಪಡೆಗಳಿಗೆ ಸಂಪೂರ್ಣ ಸಹಕಾರ ನೀಡುತ್ತಿದ್ದೇವೆ ಮತ್ತು ಐಡಿ ಕಾರ್ಡ್ ತೋರಿಸಲು ಯಾವುದೇ ಆಕ್ಷೇಪ ಎತ್ತಿಲ್ಲ. ಆದರೆ ಮಸೀದಿ ಸ್ಥಳಾಂತರದ ದೊಡ್ಡ ತೀರ್ಮಾನ ನಮ್ಮ ಕೈಯಲ್ಲಿಲ್ಲ. ನಾವು ಸರ್ಕಾರದ ಜೊತೆ ಸಂಘರ್ಷ ಬಯಸುವುದಿಲ್ಲ. ಈ ಬಗ್ಗೆ ತೀರ್ಮಾನ ಕೈಗೊಳ್ಳಲು ಮದರಸಾ ದಾರುಲ್ ಉಲೂಮ್ ದೇವಬಂದ್, ಮುಸ್ಲಿಂ ಪರ್ಸನಲ್ ಲಾ ಬೋರ್ಡ್ ಮತ್ತು ಜಮೀಯತ್ ಉಲಮಾ-ಎ-ಹಿಂದ್ ಸಂಘಟನೆಗಳೊಂದಿಗೆ ಮಾತನಾಡಿ ಎಂದು ಅಧಿಕಾರಿಗಳಿಗೆ ಸ್ಪಷ್ಟಪಡಿಸಿದ್ದೇವೆ" ಎಂದು ಮಸೀದಿ ಸಮಿತಿಯ ಸದಸ್ಯ ಅಬುಲ್ ಕಲಾಂ ತಿಳಿಸಿದ್ದಾರೆ.
