ಪಾಕಿಸ್ತಾನದಿಂದ ಭಾರತ ಎಲ್ಲಾ ಆಮದುಗಳನ್ನು ನಿಷೇಧಿಸಿದೆ ಹಾಗೂ ಪಾಕಿಸ್ತಾನಿ ಹಡಗುಗಳ ಭಾರತೀಯ ಬಂದರು ಪ್ರವೇಶವನ್ನೂ ನಿರ್ಬಂಧಿಸಿದೆ. ಪಹಲ್ಗಾಮ್ ದಾಳಿಗೆ ಪ್ರತಿಕ್ರಿಯೆಯಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಈ ಹಿಂದೆ ರಫ್ತು ನಿಷೇಧಿಸಿದ್ದ ಭಾರತ ಈಗ ಪರೋಕ್ಷ ಆಮದು ಮಾರ್ಗಗಳನ್ನೂ ಮುಚ್ಚಿದೆ. ಇದು ಪಾಕಿಸ್ತಾನದ ಆರ್ಥಿಕತೆ ಮೇಲೆ ತೀವ್ರ ಪರಿಣಾಮ ಬೀರಲಿದೆ. ಔಷಧಿಗಳ ಪೂರೈಕೆಗೂ ಪಾಕಿಸ್ತಾನ ಭಾರತವನ್ನೇ ಅವಲಂಬಿಸಿತ್ತು.
ನವದೆಹಲಿ (ಮೇ.3): ತಿನ್ನೋಕೆ ಅನ್ನ, ಕುಡಿಯೋಕೆ ನೀರು.. ಎಲ್ಲದಕ್ಕೂ ಬಲಿಷ್ಠ ರಾಷ್ಟ್ರ ಭಾರತವನ್ನೇ ಅವಲಂಬಿಸಿರುವ ಪಾಕಿಸ್ತಾನ ಈಗ ಅಕ್ಷರಶಃ ಏಕಾಂಗಿಯಾಗಿದೆ. ಅಂದಾಜು 3200 ಕಿಲೋಮೀಟರ್ ಗಡಿಯನ್ನು ಭಾರತದೊಂದಿಗೆ ಹಂಚಿಕೊಂಡಿರುವ ಪಾಕಿಸ್ತಾನ ಪಹಲ್ಗಾಮ್ ದಾಳಿಯ ಬಳಿಕ ಒಂದರ ಮೇಲೆ ಒಂದರಂತೆ ಏಟು ತಿನ್ನುತ್ತಿದೆ.
ಈಗಾಗಲೇ ಆರ್ಥಿಕ ಸಂಕಷ್ಟದಲ್ಲಿ ನಲುಗಿರುವ ಪಾಕಿಸ್ತಾನಕ ಒಂದೆಡೆ ಭಾರತದ ಸೇನೆ ಏನಾದರೂ ಮಾಡಬಹುದು ಎನ್ನುವ ನಿಟ್ಟಿನಲ್ಲಿ ತನ್ನ ಸೇನೆಯನ್ನು ಫಾರ್ವರ್ಡ್ ಪೋಸ್ಟ್ಗೆ ಮುನ್ನೆಡಸಲು ಖರ್ಚು ಮಾಡುತ್ತಿದ್ದರೆ, ಇನ್ನೊಂದೆಡೆ ಆರ್ಥಿಕವಾಗಿ ಭಾರತದಿಂದ ಸಾಲು ಸಾಲು ಏಟು ತಿನ್ನುತ್ತಿದೆ. ಭಾರತ ಈವರೆಗೂ ಪಾಕಿಸ್ತಾನಕ್ಕೆ ರಫ್ತು ನಿಷೇಧ ಮಾಡಿತ್ತು. ಈಗ ಪಾಕಿಸ್ತಾನದಿಂದ ಆಮದು ಕೂಡ ನಿಷೇಧ ಮಾಡಿ ಭಾರತ ಅಧಿಸೂಚನೆ ಪ್ರಕಟಿಸಿದೆ.
ಪಹಲ್ಗಾಮ್ ಭಯೋತ್ಪಾದಕ ದಾಳಿಗೆ ಪ್ರತೀಕಾರವಾಗಿ ಕಠಿಣ ಕ್ರಮಗಳಲ್ಲಿ, ಭಾರತವು ಪಾಕಿಸ್ತಾನದಿಂದ ನೇರ ಅಥವಾ ಪರೋಕ್ಷ ಸರಕುಗಳ ಆಮದನ್ನು ನಿಷೇಧಿಸಿದೆ ಮತ್ತು ಭಾರತೀಯ ಬಂದರುಗಳಿಗೆ ಪಾಕಿಸ್ತಾನಿ ಹಡಗುಗಳ ಪ್ರವೇಶವನ್ನು ನಿರ್ಬಂಧಿಸಿದೆ. ಪಾಕಿಸ್ತಾನದಿಂದ ನೇರ ಆಮದುಗಳು ಕಡಿಮೆಯಿದ್ದರೂ, ಕೆಲವು ಸರಕುಗಳು ಪರೋಕ್ಷ ಮಾರ್ಗಗಳ ಮೂಲಕ ಅಥವಾ ಮೂರನೇ ದೇಶಗಳ ಮೂಲಕ ಭಾರತವನ್ನು ಪ್ರವೇಶ ಮಾಡುತ್ತಿದ್ದವು. ಈಗ ಅದಕ್ಕೂ ನಿಷೇಧ ಬಿದ್ದಿದೆ.
ವಾಣಿಜ್ಯ ಸಚಿವಾಲಯದ ಅಧಿಸೂಚನೆಯ ಪ್ರಕಾರ, ವಿದೇಶಿ ವ್ಯಾಪಾರ ನೀತಿಯಲ್ಲಿ (FTP) ಹೊಸದಾಗಿ ಸೇರಿಸಲಾದ ನಿಬಂಧನೆಯು "ಮುಂದಿನ ಆದೇಶದವರೆಗೆ ತಕ್ಷಣದಿಂದ ಜಾರಿಗೆ ಬರುವಂತೆ ಪಾಕಿಸ್ತಾನದಲ್ಲಿ ನಿರ್ಮಾಣವಾಗುವ ಅಥವಾ ರಫ್ತು ಮಾಡುವ ಎಲ್ಲಾ ಸರಕುಗಳ ನೇರ ಅಥವಾ ಪರೋಕ್ಷ ಆಮದು ಅಥವಾ ಸಾಗಣೆಯನ್ನು" ನಿಷೇಧಿಸುತ್ತದೆ ಎಂದು ಉಲ್ಲೇಖಿಸುತ್ತದೆ. ರಾಷ್ಟ್ರೀಯ ಭದ್ರತೆ ಮತ್ತು ಸಾರ್ವಜನಿಕ ನೀತಿಯ ಹಿತದೃಷ್ಟಿಯಿಂದ ಈ ನಿಬಂಧನೆಯನ್ನು ವಿಧಿಸಲಾಗಿದೆ ಎಂದು ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ.
Related Articles
ಪಾಕಿಸ್ತಾನದ ಧ್ವಜವನ್ನು ಹೊಂದಿರುವ ಯಾವುದೇ ಹಡಗು ಯಾವುದೇ ಭಾರತೀಯ ಬಂದರಿಗೆ ಭೇಟಿ ನೀಡಲು ಅವಕಾಶವಿಲ್ಲ ಎಂದು ಶಿಪ್ಪಿಂಗ್ ಡೈರಕ್ಟರೇಟ್ ಮತ್ತೊಂದು ಆದೇಶ ತಿಳಿಸಿದೆ. "ಸಾರ್ವಜನಿಕ ಹಿತಾಸಕ್ತಿ ಮತ್ತು ಭಾರತೀಯ ಹಡಗು ಸಾಗಣೆಯ ಹಿತಾಸಕ್ತಿಗಾಗಿ, ಭಾರತೀಯ ಆಸ್ತಿಗಳು, ಸರಕು ಮತ್ತು ಸಂಪರ್ಕಿತ ಮೂಲಸೌಕರ್ಯಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಈ ಆದೇಶವನ್ನು ಹೊರಡಿಸಲಾಗಿದೆ" ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ವ್ಯಾಪಾರ ಕುಸಿತ: ಭಾರತ-ಪಾಕಿಸ್ತಾನ ಉದ್ವಿಗ್ನತೆ ಹೆಚ್ಚುತ್ತಿರುವ ನಡುವೆ ವ್ಯಾಪಾರ ಸಂಪೂರ್ಣವಾಗಿ ಬಂದ್ ಆಗಿದೆ/ ನವದೆಹಲಿ ಈಗಾಗಲೇ ಅಟ್ಟಾರಿ-ವಾಘಾ ಗಡಿಯ ಮೂಲಕ ವ್ಯಾಪಾರವನ್ನು ಮುಚ್ಚುವುದಾಗಿ ಘೋಷಣೆ ಮಾಡಿದ್ದು. ಇದು ಎರಡೂ ದೇಶಗಳ ನಡುವಿನ ಏಕೈಕ ಭೂ ಗಡಿ ದಾಟುವಿಕೆಯಾಗಿದೆ. ಪ್ರತಿಯಾಗಿ, ಪಾಕಿಸ್ತಾನವು ಭಾರತದೊಂದಿಗಿನ ಎಲ್ಲಾ ವ್ಯಾಪಾರವನ್ನು ಸ್ಥಗಿತಗೊಳಿಸಿದೆ.
2019 ರಲ್ಲಿ ಪುಲ್ವಾಮಾ ದಾಳಿಯ ನಂತರ ಭಾರತವು ಪಾಕಿಸ್ತಾನಕ್ಕೆ ಅತ್ಯಂತ ಆಪ್ತ ರಾಷ್ಟ್ರ (MFN) ಸ್ಥಾನಮಾನವನ್ನು ಹಿಂತೆಗೆದುಕೊಂಡ ನಂತರ ಎರಡೂ ದೇಶಗಳ ನಡುವಿನ ನೇರ ವ್ಯಾಪಾರವು ಈಗಾಗಲೇ ತೀವ್ರವಾಗಿ ಕುಸಿದಿತ್ತು, ಇದರಲ್ಲಿ 40 ಕ್ಕೂ ಹೆಚ್ಚು ಸೈನಿಕರು ಸಾವನ್ನಪ್ಪಿದರು.
2023-24ರಲ್ಲಿ ಅಟ್ಟಾರಿ-ವಾಘಾ ಗಡಿಯಲ್ಲಿ 3,886.53 ಕೋಟಿ ರೂಪಾಯಿಗಳ ವ್ಯಾಪಾರ ನಡೆದಿದೆ. ಭಾರತದ ಕಾರ್ಯತಂತ್ರದ ನಡೆಗಳು ಪಾಕಿಸ್ತಾನದ ಸಣ್ಣ ವ್ಯಾಪಾರಿಗಳು ಮತ್ತು ತಯಾರಕರ ಮೇಲೆ ತೀವ್ರ ಆರ್ಥಿಕ ಪರಿಣಾಮ ಬೀರುವ ನಿರೀಕ್ಷೆಯಿದೆ.
ಇತ್ತೀಚಿನ ವರ್ಷಗಳಲ್ಲಿ ಪಾಕಿಸ್ತಾನದಿಂದ ಭಾರತದ ಆಮದುಗಳು ಕಡಿಮೆಯಿದ್ದರೂ, ವ್ಯಾಪಾರ ನಿರ್ಬಂಧಗಳನ್ನು ನಿವಾರಿಸಲು ಕೆಲವು ಸರಕುಗಳನ್ನು ದುಬೈ, ಸಿಂಗಾಪುರ ಮತ್ತು ಕೊಲಂಬೊ ಬಂದರುಗಳ ಮೂಲಕ ಸಾಗಿಸಲಾಗುತ್ತದೆ.
ಡೇಟಾ ಪ್ರಕಾರ, 2023-24ರಲ್ಲಿ, ಭಾರತವು ಪಾಕಿಸ್ತಾನದಿಂದ 3 ಮಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು, ಮುಖ್ಯವಾಗಿ ಕೃಷಿ ಸರಕುಗಳನ್ನು ಆಮದು ಮಾಡಿಕೊಂಡಿತು. ಆದರೆ, ಪಾಕಿಸ್ತಾನವು ಔಷಧೀಯ ಪೂರೈಕೆಗಾಗಿ ಭಾರತದ ಮೇಲೆ ಅವಲಂಬಿತವಾಗಿದೆ. ಭಾರತವು ಎಲ್ಲಾ ರೀತಿಯ ವ್ಯಾಪಾರವನ್ನು ಸ್ಥಗಿತಗೊಳಿಸುವುದರೊಂದಿಗೆ, ಜರ್ಜರಿತವಾಗಿರುವ ಪಾಕಿಸ್ತಾನವು ತನ್ನ ಔಷಧೀಯ ಅಗತ್ಯಗಳನ್ನು ಪೂರೈಸಲು ಪರ್ಯಾಯ ಮಾರ್ಗಗಳನ್ನು ಗಂಭೀರವಾಗಿ ನೋಡಲಾರಂಭಿಸಿದೆ.
