ಜೇಸನ್ ರಾಯ್ ಅಬ್ಬರ: ಹೊಸ ಇತಿಹಾಸ ಬರೆದ ಇಂಗ್ಲೆಂಡ್
ವಿಶ್ವಕಪ್ ಟೂರ್ನಿಯಲ್ಲಿ ಇಂಗ್ಲೆಂಡ್ ಮತ್ತೊಮ್ಮೆ ಬೃಹತ್ ಮೊತ್ತ ಕಲೆಹಾಕುವಲ್ಲಿ ಸಫಲವಾಗಿದೆ. ಜೇಸನ್ ರಾಯ್ ಶತಕ ಹಾಗೂ ಬಟ್ಲರ್,ಬೇರ್‌ಸ್ಟೋ ಆಕರ್ಷಕ ಅರ್ಧಶತಕಗಳ ನೆರವಿನಿಂದ ಇಂಗ್ಲೆಂಡ್ 386 ರನ್ ಬಾರಿಸಿದೆ. ಇದರ ಜತೆಗೆ ಏಕದಿನ ಕ್ರಿಕೆಟ್‌ನಲ್ಲೊಂದು ಅಪರೂಪದ ದಾಖಲೆಯನ್ನೂ ಬರೆದಿದೆ.
ಕಾರ್ಡಿಫ್[ಜೂ.08]; ಜೇಸನ್ ರಾಯ್ ಆಕರ್ಷಕ ಶತಕ ಹಾಗೂ ಬೇರ್’ಸ್ಟೋ ಮತ್ತು ಬಟ್ಲರ್ ಸಿಡಿಲಬ್ಬರದ ಅರ್ಧಶತಕಗಳ ನೆರವಿನಿಂದ ಬರೋಬ್ಬರಿ 386 ರನ್ ಬಾರಿಸಿದ್ದು, ಬಾಂಗ್ಲಾದೇಶಕ್ಕೆ ಕಠಿಣ ಗುರಿ ನೀಡಿದೆ. ಇದರ ಜತೆಗೆ ಏಕದಿನ ಸತತ 7ನೇ ಬಾರಿಗೆ 300+ ರನ್ ಬಾರಿಸಿದ ಮೊದಲ ತಂಡ ಎನ್ನುವ ಅಪರೂಪದ ದಾಖಲೆ ಇಂಗ್ಲೆಂಡ್ ಪಾಲಾಗಿದೆ. ಈ ಮೊದಲು 2007ರಲ್ಲಿ ಆಸ್ಟ್ರೇಲಿಯಾ ಸತತ 6 ಬಾರಿ 300+ ರನ್ ಬಾರಿಸಿದ ಸಾಧನೆ ಮಾಡಿತ್ತು.
ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಇಂಗ್ಲೆಂಡ್ ಉತ್ತಮ ಆರಂಭವನ್ನು ಪಡೆಯಿತು. ಮೊದಲ ವಿಕೆಟ್’ಗೆ ಜಾನಿ ಬೇರ್’ಸ್ಟೋ-ಜೇಸನ್ ರಾಯ್ ಜೋಡಿ 19.1 ಓವರ್’ಗಳಲ್ಲಿ 128 ರನ್’ಗಳ ಜತೆಯಾಟವಾಡಿತು. ಬಾಂಗ್ಲಾ ಬೌಲರ್’ಗಳನ್ನು ಮನಬಂದಂತೆ ದಂಡಿಸಿದ ಈ ಜೋಡಿ ಇಂಗ್ಲೆಂಡ್ ಪರ 8ನೇ ಬಾರಿಗೆ ಶತಕದ ಜತೆಯಾಟ ನಿಭಾಯಿಸಿತು. ಎಚ್ಚರಿಕೆಯ ಆಟವಾಡಿದ ಬೇರ್’ಸ್ಟೋ 50 ಎಸೆತಗಳಲ್ಲಿ 6 ಬೌಂಡರಿ ಸಹಿತ 51 ರನ್ ಬಾರಿಸಿ ಮೊರ್ತಾಜಾಗೆ ವಿಕೆಟ್ ಒಪ್ಪಿಸಿದರು.
ಇನ್ನು ಎರಡನೇ ವಿಕೆಟ್’ಗೆ ರೂಟ್-ರಾಯ್ ಜೋಡಿ 77 ರನ್’ಗಳ ಜತೆಯಾಟವಾಡುವ ಮೂಲಕ ತಂಡದ ಮೊತ್ತವನ್ನು ಇನ್ನೂರರ ಗಡಿ ದಾಟಿಸಿದರು. ಈ ವೇಳೆ ಜೇಸನ್ ರಾಯ್ ಶತಕ ಪೂರೈಸಿದರೆ, ರೂಟ್ 21 ರನ್ ಬಾರಿಸಿ ಸೈಫುದ್ದೀನ್ ಬೌಲಿಂಗ್’ನಲ್ಲಿ ಕ್ಲೀನ್ ಬೌಲ್ಡ್ ಆಗಿ ಪೆವಿಲಿಯನ್ ಸೇರಿದರು. ಆ ಬಳಿಕ ಅಗ್ರಕ್ರಮಾಂಕಕ್ಕೆ ಬಡ್ತಿ ಪಡೆದು ಆಡಲಿಳಿದ ಜೋಸ್ ಬಟ್ಲರ್ ಮತ್ತೊಮ್ಮೆ ರನ್ ಹೊಳೆ ಹರಿಸಿದರು. ಮತ್ತೊಂದೆಡೆ ಶತಕದ ಬಳಿಕ ಸ್ಫೊಟಕ ಇನಿಂಗ್ಸ್ ಕಟ್ಟಿದ ರಾಯ್ 121 ಎಸೆತಗಳಲ್ಲಿ 14 ಬೌಂಡರಿ ಹಾಗೂ 5 ಸಿಕ್ಸರ್ ನೆರವಿನಿಂದ 153 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಮೆಹದಿ ಹಸನ್ ಬೌಲಿಂಗ್’ನಲ್ಲಿ ಹ್ಯಾಟ್ರಿಕ್ ಸಿಕ್ಸರ್ ಸಿಡಿಸಿದ ರಾಯ್ ನಾಲ್ಕನೇ ಎಸೆತವೂ ಸಿಕ್ಸರ್ ಸಿಡಿಸುವ ಯತ್ನದಲ್ಲಿ ಮೊರ್ತಾಜಾಗೆ ಕ್ಯಾಚಿತ್ತು ಪೆವಿಲಿಯನ್ ಸೇರಿದರು. ಇನ್ನು ಬಟ್ಲರ್ 44 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 4 ಸಿಕ್ಸರ್ ಸಹಿತ 64 ರನ್ ಬಾರಿಸಿದರು. ಕೊನೆಯಲ್ಲಿ ನಾಯಕ ಮಾರ್ಗನ್[35], ಲಿಯಾಮ್ ಪ್ಲಂಕೆಟ್[27] ಹಾಗೂ ಕ್ರಿಸ್ ವೋಕ್ಸ್[18] ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ತಂಡದ ಮೊತ್ತವನ್ನು 380ರ ಗಡಿ ದಾಟಿಸಿದರು.
ಬಾಂಗ್ಲಾದೇಶದ ಪರ ಮೆಹದಿ ಹಸನ್ ಹಾಗೂ ಸೈಫುದ್ದೀನ್ ತಲಾ 2 ವಿಕೆಟ್ ಪಡೆದರೆ, ಮೊರ್ತಾಜಾ ಹಾಗೂ ಮುಷ್ತಾಫಿಜುರ್ ರೆಹಮಾನ್ ತಲಾ ಒಂದೊಂದು ವಿಕೆಟ್ ಪಡೆದರು.
ಸಂಕ್ಷಿಪ್ತ ಸ್ಕೋರ್:
ಇಂಗ್ಲೆಂಡ್: 386/6
ಜೇಸನ್ ರಾಯ್: 153
ಮೆಹದಿ ಹಸನ್: 67/2
[* ಇಂಗ್ಲೆಂಡ್ ಬ್ಯಾಟಿಂಗ್ ಮುಕ್ತಾಯದ ವೇಳೆಗೆ]
