ರಷ್ಯಾ ವಿರುದ್ದ ಭರ್ಜರಿ ಗೆಲುವು, ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದ ಹಾಕಿ ಇಂಡಿಯಾ!
ರಷ್ಯಾ ವಿರುದ್ಧ ಗೋಲುಗಳ ಸುರಿಮಳೆಗೈದ ಭಾರತ, ಒಲಿಂಪಿಕ್ಸ್ ಕೂಟಕ್ಕೆ ಅರ್ಹತೆ ಪಡೆದಿದೆ. ದ್ವಿತೀಯ ಲೆಗ್‌ನಲ್ಲಿ ಭಾರತದ ಗೋಲಿನ ಹೊಡೆತಕ್ಕೆ ರಷ್ಯಾ ಸುಸ್ತಾಯಿತು. ಇಷ್ಟೇ ಅಲ್ಲ ಭಾರತದ ಒಲಿಂಪಿಕ್ಸ್ ಕನಸಿಗೆ ಅಡ್ಡಿಯಾಗಲಿಲ್ಲ.
ಭುವನೇಶ್ವರ(ನ.02): ಭಾರತೀಯ ಹಾಕಿ ಗತವೈಭವ ಮರುಕಳಿಸುತ್ತಿದೆ. ಶನಿವಾರ(ನ.02) ಭಾರತದ ಪುರುಷ ಹಾಗೂ ಮಹಿಳಾ ತಂಡ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದುಕೊಂಡಿದೆ. ರಷ್ಯಾ ವಿರುದ್ಧದ ದ್ವಿತೀಯ ಲೆಗ್‌ನಲ್ಲಿ 7-1 ಅಂತರದಲ್ಲಿ ಗೆಲುವು ಸಾಧಿಸಿದ ಭಾರತದ ಪುರುಷರ ಹಾಕಿ ತಂಡ ಒಟ್ಟು 11-3 ಗೋಲುಗಳ ಅಂತರದಲ್ಲಿ ಗೆಲುವು ಸಾಧಿಸಿ, 2020ರ ಟೋಕಿಯೋ ಒಲಿಂಪಿಕ್ಸ್ ಕೂಟಕ್ಕೆ ಅರ್ಹತೆ ಪಡೆದಿದೆ.
ಇದನ್ನೂ ಓದಿ: ಟೊಕಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದ ಭಾರತ ಮಹಿಳಾ ಹಾಕಿ!
ಶುಕ್ರವಾರ(ನ.01) ನಡೆದ ಮೊದಲ ಲೆಗ್‌ನಲ್ಲಿ ಭಾರತ, ರಷ್ಯಾವನ್ನು 4-2 ಅಂತರದಲ್ಲಿ ಮಣಿಸಿತ್ತು. ಇದೀಗ ದ್ವಿತೀಯ ಲೆಗ್‌ನಲ್ಲಿ ರಷ್ಯಾ ವಿರುದ್ದದ 7-1 ಅಂತರದಲ್ಲಿ ಗೆಲುವು ಸಾಧಿಸಿತು. ಈ ಮೂಲಕ ಒಟ್ಟು 11-3 ಅಂತರದಲ್ಲಿ ಗೆಲುವು ಸಾಧಿಸಿ, ಒಲಿಂಪಿಕ್ಸ್ ಅರ್ಹತೆ ಗಿಟ್ಟಿಸಿಕೊಂಡಿತು.
ಲಲಿತ್ ಉಪಾಧ್ಯಾಯ್, ಅಕ್ಷದೀಪ್ ಸಿಂಗ್, ನೀಲಕಂಠ ಶರ್ಮಾ, ರೂಪಿಂದರ್ ಸಿಂಗ್, ಅಮಿತ್ ರೋಹಿದಾಸ್ ಸಿಡಿಸಿದ ಗೋಲುಗಳಿಂದ ಭಾರತ ದ್ವಿತೀಯ ಲೆಗ್‌ನಲ್ಲಿ 7-1 ಅಂತರದ ಗೆಲುವು ಸಾಧಿಸಿತು. ಭಾರತ ಮಹಿಳಾ ತಂಡ ಯುಎಸ್ಎ ವಿರುದ್ದ 6-5 ಸರಾಸರಿ ಗೋಲುಗಳ ಅಂತರದಲ್ಲಿ ಟೊಕಿಯೊ ಒಲಿಂಪಿಕ್ಸ್ ಕೂಟಕ್ಕೆ ಅರ್ಹತೆ ಪಡೆಯಿತು.
