'ಪ್ರೋಟೀನ್ Supplements ತೆಗೆದುಕೊಳ್ಳಬೇಡಿ..' ಎಚ್ಚರಿಕೆ ನೀಡಿದ ದೇಶದ ಉನ್ನತ ವೈದ್ಯಕೀಯ ಸಂಸ್ಥೆ ICMR!
ಐಸಿಎಂಆರ್-ಎನ್‌ಐಎನ್‌ನ ನಿರ್ದೇಶಕಿ ಡಾ ಹೇಮಲತಾ ಆರ್ ನೇತೃತ್ವದ ತಜ್ಞರ ಸಮಿತಿಯು ಡಿಜಿಐಗಳನ್ನು ರಚಿಸಿದೆ ಮತ್ತು ಹಲವಾರು ವೈಜ್ಞಾನಿಕ ವಿಮರ್ಶೆಗಳನ್ನೂ ಮಾಡಿದ್ದು, ಅದರಲ್ಲಿ ಹದಿನೇಳು ಮಾರ್ಗಸೂಚಿಗಳನ್ನು ಪಟ್ಟಿ ಮಾಡಲಾಗಿದೆ.
ನವದೆಹಲಿ (ಮೇ.9): ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್, ಅದ್ಭುತವಾದ ದೇಹವನ್ನು ಪಡೆಯುವ ನಿಟ್ಟಿನಲ್ಲಿ ಪ್ರೋಟೀನ್ ಸಪ್ಲಿಮೆಂಟ್‌ಗಳನ್ನು ತೆಗೆದುಕೊಳ್ಳಬೇಡಿ ಎಂದು ಎಚ್ಚರಿಕೆ ನೀಡಿದೆ. ಅದರೊಂದಿಗೆ ಉಪ್ಪು ಸೇವನೆಯಲ್ಲಿ ನಿಯಂತ್ರಣ, ಸಕ್ಕರೆ ಹಾಗೂ ಅಲ್ಟ್ರಾ ಪ್ರೊಸೆಸ್ಡ್‌ ಫುಡ್‌ಅನ್ನು ಆದಷ್ಟು ಕಡಿಮೆ ಮಾಡುವಂತೆ ಹೇಳಿದೆ. ಆರೋಗ್ಯಕರ ಆಹಾರ ಆಯ್ಕೆಯನ್ನು ಮಾಡುವ ನಿಟ್ಟಿನಲ್ಲಿ ಪ್ರತಿಬಾರಿಯೂ ಆಹಾರವನ್ನು ಆಯ್ಕೆ ಮಾಡುವಾಗ ಅದರ ಲೇಬಲ್‌ನ ಮೇಲಿನ ಮಾಹಿತಿಯನ್ನು ಕಡ್ಡಾಯವಾಗಿ ಓದುವಂತೆ ತಿಳಿಸಿದೆ. ದೇಶದ ಅತ್ಯುನ್ನತ ಆರೋಗ್ಯ ಸಂಶೋಧನಾ ಸಂಸ್ಥೆಯ ಅಡಿಯಲ್ಲಿ ಹೈದರಾಬಾದ್ ಮೂಲದ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ನ್ಯೂಟ್ರಿಷನ್ (ಎನ್‌ಐಎನ್) ಬುಧವಾರ ಅಗತ್ಯ ಪೋಷಕಾಂಶಗಳ ಅವಶ್ಯಕತೆಗಳನ್ನು ಪೂರೈಸಲು ಮತ್ತು ಸಾಂಕ್ರಾಮಿಕವಲ್ಲದ ರೋಗಗಳನ್ನು (ಎನ್‌ಸಿಡಿ) ತಡೆಗಟ್ಟಲು 'ಭಾರತೀಯರಿಗೆ (ಡಿಜಿಐ) ಆಹಾರ ಮಾರ್ಗಸೂಚಿಗಳ ಪರಿಷ್ಕೃತ ವರದಿಯನ್ನು ಬಿಡುಗಡೆ ಮಾಡಿದೆ.
ಐಸಿಎಂಆರ್-ಎನ್‌ಐಎನ್‌ನ ನಿರ್ದೇಶಕಿ ಡಾ ಹೇಮಲತಾ ಆರ್ ನೇತೃತ್ವದ ಬಹು ವಿಭಾಗದ ತಜ್ಞರ ಸಮಿತಿಯು ಡಿಜಿಐಗಳನ್ನು ರಚಿಸಿದೆ ಮತ್ತು ಹಲವಾರು ವೈಜ್ಞಾನಿಕ ವಿಮರ್ಶೆಗಳಿಗೂ ಇದು ಒಳಗಾಗಿದೆ. ಅದರಂತೆ ಹದಿನೇಳು ಮಾರ್ಗಸೂಚಿಗಳನ್ನು ಪಟ್ಟಿ ಮಾಡಲಾಗಿದೆ.
ಡಿಜಿಐಗಳಲ್ಲಿ, NIN ಹೆಚ್ಚಿನ ಪ್ರಮಾಣದ ಪ್ರೋಟೀನ್ ಪೌಡರ್‌ಗಳ ದೀರ್ಘಾವಧಿಯ ಸೇವನೆ ಅಥವಾ ಹೆಚ್ಚಿನ ಪ್ರೋಟೀನ್ ಸಾಂದ್ರತೆಯ ಸೇವನೆಯು ಮೂಳೆ ಖನಿಜ ನಷ್ಟ ಮತ್ತು ಮೂತ್ರಪಿಂಡದ ಹಾನಿಯಂತಹ ಸಂಭಾವ್ಯ ಅಪಾಯಗಳನ್ನು ಉಂಟು ಮಾಡುತ್ತದೆ ಎಂದಿದ್ದಾರೆ. ಸಕ್ಕರೆಯು ಒಟ್ಟು ಶಕ್ತಿಯ ಸೇವನೆಯ ಶೇಕಡಾ 5 ಕ್ಕಿಂತ ಕಡಿಮೆಯಿರಬೇಕು ಮತ್ತು ಸಮತೋಲಿತ ಆಹಾರವು ಧಾನ್ಯಗಳು ಮತ್ತು ರಾಗಿಗಳಿಂದ ಶೇಕಡಾ 45 ಕ್ಕಿಂತ ಹೆಚ್ಚು ಕ್ಯಾಲೊರಿಗಳನ್ನು ಮತ್ತು ದ್ವಿದಳ ಧಾನ್ಯಗಳು, ಬೀನ್ಸ್ ಮತ್ತು ಮಾಂಸದಿಂದ ಶೇಕಡಾ 15 ರಷ್ಟು ಕ್ಯಾಲೊರಿಗಳನ್ನು ಒದಗಿಸಬೇಕು ಎಂದು ಅದು ಹೇಳಿದೆ.
ಉಳಿದ ಕ್ಯಾಲೊರಿಗಳು ಬೀಜಗಳು, ತರಕಾರಿಗಳು, ಹಣ್ಣುಗಳು ಮತ್ತು ಹಾಲಿನಿಂದ ಬರಬೇಕು. ಒಟ್ಟು ಕೊಬ್ಬಿನ ಸೇವನೆಯು ಶೇಕಡಾ 30 ಕ್ಕಿಂತ ಕಡಿಮೆ ಅಥವಾ ಸಮನಾಗಿರಬೇಕು ಎಂದು ಮಾರ್ಗಸೂಚಿಗಳು ಹೇಳಿವೆ. ಸೀಮಿತ ಲಭ್ಯತೆ ಮತ್ತು ದ್ವಿದಳ ಧಾನ್ಯಗಳು ಮತ್ತು ಮಾಂಸದ ಹೆಚ್ಚಿನ ಬೆಲೆಯಿಂದಾಗಿ, ಭಾರತೀಯ ಜನಸಂಖ್ಯೆಯ ಗಮನಾರ್ಹ ಪ್ರಮಾಣವು ಸಿರಿಧಾನ್ಯಗಳ ಮೇಲೆ ಹೆಚ್ಚು ಅವಲಂಬಿತವಾಗಿದೆ, ಇದರ ಪರಿಣಾಮವಾಗಿ ಅಗತ್ಯವಾದ ಮ್ಯಾಕ್ರೋನ್ಯೂಟ್ರಿಯಂಟ್‌ಗಳು (ಅಗತ್ಯ ಅಮೈನೋ ಆಮ್ಲಗಳು ಮತ್ತು ಅಗತ್ಯ ಕೊಬ್ಬಿನಾಮ್ಲಗಳು) ಮತ್ತು ಸೂಕ್ಷ್ಮ ಪೋಷಕಾಂಶಗಳ ಕಳಪೆ ಸೇವನೆಯು ಕಂಡುಬರುತ್ತದೆ.
ಅಗತ್ಯ ಪೋಷಕಾಂಶಗಳ ಕಡಿಮೆ ಸೇವನೆಯು ಚಯಾಪಚಯವನ್ನು ಅಡ್ಡಿಪಡಿಸುತ್ತದೆ ಮತ್ತು ಚಿಕ್ಕ ವಯಸ್ಸಿನಿಂದಲೇ ಇನ್ಸುಲಿನ್ ಪ್ರತಿರೋಧ ಮತ್ತು ಸಂಬಂಧಿತ ಅಸ್ವಸ್ಥತೆಗಳ ಅಪಾಯವನ್ನು ಹೆಚ್ಚಿಸುತ್ತದೆ. ಅಂದಾಜಿನ ಪ್ರಕಾರ ಭಾರತದಲ್ಲಿನ ಒಟ್ಟು ರೋಗಗಳ ಹೊರೆಯ ಶೇಕಡಾ 56.4 ರಷ್ಟು ಅನಾರೋಗ್ಯಕರ ಆಹಾರಕ್ರಮದಿಂದಾಗಿ ಎಂದು ಅದು ಹೇಳಿದೆ. ಆರೋಗ್ಯಕರ ಆಹಾರ ಮತ್ತು ದೈಹಿಕ ಚಟುವಟಿಕೆಯು ಪರಿಧಮನಿಯ ಹೃದಯ ಕಾಯಿಲೆ (CHD) ಮತ್ತು ಅಧಿಕ ರಕ್ತದೊತ್ತಡವನ್ನು (HTN) ಗಣನೀಯ ಪ್ರಮಾಣದಲ್ಲಿ ಕಡಿಮೆ ಮಾಡುತ್ತದೆ ಮತ್ತು ಟೈಪ್ 2 ಮಧುಮೇಹವನ್ನು 80 ಪ್ರತಿಶತದವರೆಗೆ ತಡೆಯುತ್ತದೆ.
ಪುರುಷರು ಆರೋಗ್ಯವಾಗಿರಲು ರೂಡಿಸಿಕೊಳ್ಳಲೇಬೇಕಾದ ಅಭ್ಯಾಸಗಳಿವು!
"ಆರೋಗ್ಯಕರ ಜೀವನಶೈಲಿಯನ್ನು ಅನುಸರಿಸುವ ಮೂಲಕ ಗಮನಾರ್ಹ ಪ್ರಮಾಣದ ಅಕಾಲಿಕ ಮರಣಗಳನ್ನು ತಪ್ಪಿಸಬಹುದು" ಎಂದು ಅದು ಹೇಳಿದೆ, ಸಕ್ಕರೆ ಮತ್ತು ಕೊಬ್ಬಿನಿಂದ ತುಂಬಿದ ಹೆಚ್ಚು ಸಂಸ್ಕರಿಸಿದ ಆಹಾರಗಳ ಸೇವನೆಯ ಏರಿಕೆ, ಕಡಿಮೆ ದೈಹಿಕ ಚಟುವಟಿಕೆ ದೇಶದಲ್ಲಿ ಸೂಕ್ಷ್ಮ ಪೋಷಕಾಂಶಗಳ ಕೊರತೆ ಮತ್ತು ಬೊಜ್ಜು ಸಮಸ್ಯೆಗೆ ಕಾರಣವಾಗಿದೆ ಎಂದಿದೆ.
ಹೃದಯಾಘಾತವಾದ ತಕ್ಷಣ ಹೃದಯದ ಸೆಲ್‌ ಬೇಗ ಸಾಯುವುದಿಲ್ಲ
