ಸು ಫ್ರಂ ಸೋ ಸೀಕ್ವೆಲ್ ಮಾಡಲ್ಲ, ಹೊಸ ಸಿನಿಮಾ ಮಾಡ್ತೀವಿ: ರಾಜ್ ಬಿ ಶೆಟ್ಟಿ
ಈ ಸಿನಿಮಾದ ಸೀಕ್ವೆಲ್ ಮಾಡುವ ಯೋಚನೆ ಇಲ್ಲ. ಅದು ನಮ್ಮ ನೈತಿಕತೆಗೆ ವಿರುದ್ಧವಾಗುತ್ತದೆ. ಮುಂದಿನ ಬಾರಿ ನಾವು ಹೊಸ ರೀತಿಯ ಸಿನಿಮಾ ಮಾಡುತ್ತೇವೆ ಎಂದರು ರಾಜ್ ಬಿ ಶೆಟ್ಟಿ.
‘ಸು ಫ್ರಂ ಸೋ’ ಸಿನಿಮಾದ ಗೆಲುವಿನ ಓಟ ವಾರದ ದಿನಗಳಲ್ಲೂ ಮುಂದುವರಿದಿದೆ. ಸೋಮವಾರ, ಮಂಗಳವಾರ ಹೆಚ್ಚಿನೆಲ್ಲಾ ಶೋಗಳು ಹೌಸ್ಫುಲ್ ಪ್ರದರ್ಶನ ಕಂಡಿವೆ. ಸಿನಿಮಾ ಬಿಡುಗಡೆಯಾದ ಐದನೇ ದಿನಕ್ಕೆ ಚಿತ್ರದ ಗಳಿಕೆ 13 ಕೋಟಿ ದಾಟಿದೆ ಎನ್ನಲಾಗಿದೆ.
ಈ ಸಿನಿಮಾದ ತೆಲುಗು ಡಬ್ಬಿಂಗ್ ವರ್ಶನ್ಗೆ ಬೇಡಿಕೆ ಬಂದಿದ್ದು, ಅತ್ಯಂತ ಪ್ರಸಿದ್ಧ ನಿರ್ಮಾಣ ಸಂಸ್ಥೆ ಮೈತ್ರಿ ಮೂವಿ ಮೇಕರ್ಸ್ ಆ.7ರಂದು ಈ ಸಿನಿಮಾ ರಿಲೀಸ್ ಮಾಡಲಿದೆ. ತಮಿಳು ವರ್ಶನ್ ಬಿಡುಗಡೆಗೂ ಬೇಡಿಕೆ ಕೇಳಿಬಂದಿದೆ.
ಇನ್ನೊಂದೆಡೆ ವಿದೇಶದಲ್ಲೂ ‘ಸು ಫ್ರಂ ಸೋ’ ಪ್ರದರ್ಶನಗೊಳ್ಳಲಿದೆ. ಆ.1ಕ್ಕೆ ಜರ್ಮನಿಯಲ್ಲಿ, ಅಮೆರಿಕಾ, ಇಂಗ್ಲೆಂಡ್, ದುಬೈ, ಆಸ್ಟ್ರೇಲಿಯಾದಲ್ಲಿಯೂ ಸಿನಿಮಾ ಪ್ರದರ್ಶನಗೊಳ್ಳಲಿದೆ.
ಇನ್ನೊಂದೆಡೆ ಸಿನಿಮಾ ಬಗ್ಗೆ ಮಾತನಾಡಿರುವ ರಾಜ್ ಬಿ. ಶೆಟ್ಟಿ, ಈ ಸಿನಿಮಾದ ಸೀಕ್ವೆಲ್ ಮಾಡುವ ಯೋಚನೆ ಇಲ್ಲ. ಅದು ನಮ್ಮ ನೈತಿಕತೆಗೆ ವಿರುದ್ಧವಾಗುತ್ತದೆ. ಮುಂದಿನ ಬಾರಿ ನಾವು ಹೊಸ ರೀತಿಯ ಸಿನಿಮಾ ಮಾಡುತ್ತೇವೆ.
ಅದನ್ನು ನೋಡಲು ಬರುವಾಗ ಈ ಸಿನಿಮಾದ ಮೇಲಿನ ನಿರೀಕ್ಷೆಯಿಂದ ಬರುವುದು ಬೇಡ. ಆ ಸಿನಿಮಾ ಗೆಲ್ಲುತ್ತದೋ ಇಲ್ಲವೋ ಬೇರೆ ಮಾತು. ಆದರೆ ಪ್ರಾಮಾಣಿಕ ಪ್ರಯತ್ನವಂತೂ ಇದ್ದೇ ಇರುತ್ತದೆ ಎಂದಿದ್ದಾರೆ.