ಕುಂದಾಪುರದಲ್ಲಿ ಹುಟ್ಟಿಕೊಂಡ ಕಾಂತಾರ ಅಂತಾರಾಷ್ಟ್ರೀಯ ಮಟ್ಟ ತಲುಪಿದೆ; ದಾಖಲೆ ಬಗ್ಗೆ ಸತ್ಯ ಹಂಚಿಕೊಂಡ ರಿಷಬ್ ಶೆಟ್ಟಿ

ಮುಂದೆ ಬರೋದು ಕಾಂತಾರ ಚಿತ್ರದ ಪಾರ್ಚ್‌ 2 ಅಲ್ಲ, ಭಾಗ 1: ರಿಷಬ್‌ ಶೆಟ್ಟಿ. ಪ್ರದರ್ಶಕರು, ಚಿತ್ರದ ತಾಂತ್ರಿಕ ತಂಡ, ಕಲಾವಿದರು, ವಿತರಕರು ಸೇರಿದಂತೆ 500ಕ್ಕೂ ಹೆಚ್ಚು ಮಂದಿಗೆ ‘ಕಾಂತಾರ’ ಚಿತ್ರದ ನೆನಪಿನ ಕಾಣಿಕೆಯನ್ನು ನೀಡಲಾಯಿತು.

ಒಂದು ಸಿನಿಮಾ 50, 75 ಅಥವಾ ನೂರು ದಿನ ಪ್ರದರ್ಶನ ಕಂಡರೆ ಆ ಚಿತ್ರತಂಡದವರು ಮಾಧ್ಯಮಗಳ ಮುಂದೆ ಬಂದು ಇಂತಿಷ್ಟುಚಿತ್ರಮಂದಿರಗಳಲ್ಲಿ, ಇಂತಿಷ್ಟುಗಳಿಕೆ, ಯಶಸ್ಸು, ಸಾಧನೆ, ಮುಂದಿನ ಯೋಜನೆಗಳು ಇತ್ಯಾದಿಗಳ ಬಗ್ಗೆ ವರದಿ ಒಪ್ಪಿಸುವುದು ಕಾಮನ್‌. 

ಆದರೆ, ಒಂದು ಚಿತ್ರಕ್ಕೆ ತೆರೆ ಮೇಲೆ, ತೆರೆ ಹಿಂದೆ ಹಾಗೂ ಚಿತ್ರದ ಆಚೆಗೆ ಚಿತ್ರದ ಯಶಸ್ಸಿಗೆ ಕಾರಣರಾದ ಮಾಧ್ಯಮಗಳು, ಅಭಿಮಾನಿಗಳು, ಬಂಧು-ಬಳಗ, ಸ್ನೇಹಿತರು ಒಟ್ಟಿಗೆ ಸೇರಿ ಹಬ್ಬದಂತೆ ಆಚರಿಸಿದ್ದು ‘ಕಾಂತಾರ’ ಚಿತ್ರದ ನೂರು ದಿನಗಳ ಸಂಭ್ರಮ ಆಚರಣೆಯ ವಿಶೇಷ. 

ಈ ಕಾರ್ಯಕ್ರಮಕ್ಕಾಗಿ ಬೆಂಗಳೂರಿನ ವಿಜಯನಗರದಲ್ಲಿರುವ ಬಂಟರ ಭವನ ‘ಕಾಂತಾರ’ ಚಿತ್ರದ ಸೆಟ್‌ನಂತೆ ಬದಲಾಗಿತ್ತು. ಇಡೀ ಭವನವನ್ನು ತುಳುನಾಡಿನ ಸಂಪ್ರದಾಯದಂತೆ ಸಿಂಗಾರ ಮಾಡಲಾಗಿತ್ತು. 

ಚಿತ್ರಕ್ಕೆ ಕೆಲಸ ಮಾಡಿದ ಪ್ರತಿಯೊಬ್ಬರಿಗೂ ನೆನಪಿನ ಕಾಣಿಗೆ ನೀಡುವ ಜತೆಗೆ ಎಲ್ಲರು ಒಟ್ಟಿಗೆ ಸೇರಿ ಊಟ ಮಾಡುವ ಮೂಲಕ ಚಿತ್ರದ ಯಶಸ್ಸನ್ನು ಊರಿನ ಹಬ್ಬದಂತೆ ಆಚರಿಸಲಾಯಿತು.

ಪ್ರದರ್ಶಕರು, ಚಿತ್ರದ ತಾಂತ್ರಿಕ ತಂಡ, ಕಲಾವಿದರು, ವಿತರಕರು ಸೇರಿದಂತೆ 500ಕ್ಕೂ ಹೆಚ್ಚು ಮಂದಿಗೆ ‘ಕಾಂತಾರ’ ಚಿತ್ರದ ನೆನಪಿನ ಕಾಣಿಕೆಯನ್ನು ನೀಡಲಾಯಿತು. ‘ಈ ಚಿತ್ರದ ಯಶಸ್ಸಿಗೆ ನಾನು ಒಬ್ಬನೇ ಕಾರಣ ಅಲ್ಲ. ನಮ್ಮ ಚಿತ್ರಕ್ಕೆ ಕೆಲಸ ಮಾಡಿದ ಕಲಾವಿದರು, ತಂತ್ರಜ್ಞರು, ಪ್ರಚಾರಕರ್ತರು, ಮಾಧ್ಯಮಗಳು, ಅಭಿಮಾನಿಗಳು, ಪ್ರೇಕ್ಷಕರು ಹೀಗೆ ಎಲ್ಲರ ಪ್ರೀತಿ- ಅಭಿಮಾನ ಮತ್ತು ಬೆಂಬಲ ಜತೆಯಾಗಿ ‘ಕಾಂತಾರ’ ಚಿತ್ರಕ್ಕೆ ಶತ ದಿನೋತ್ಸವ ಸಂಭ್ರಮ ತಂದು ಕೊಟ್ಟಿದೆ.

ಎಲ್ಲಕ್ಕಿಂತ ಮುಖ್ಯವಾಗಿ ಕುಂದಾಪುರದ ಕೆರಾಡಿ ಎಂಬ ಪುಟ್ಟಗ್ರಾಮದಲ್ಲಿ ಹುಟ್ಟಿಕೊಂಡ ನಮ್ಮ ಈ ಚಿತ್ರ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಲುಪಲು ಹೊಂಬಾಳೆ ಫಿಲಮ್ಸ್‌ ಕಾರಣ. ಚಿತ್ರಕ್ಕೆ ಬಜೆಟ್‌ಗಿಂತ ಕಂಟೆಂಟ್‌ ಮುಖ್ಯ ಎಂಬುದು ಸಾಬೀತು ಆಗಿದೆ. 

ಈ ಚಿತ್ರವನ್ನು ನೆಟ್‌ಫ್ಲಿಕ್ಸ್‌ನವರು ಡಬ್‌ ಮಾಡಿ ಬಿಡುಗಡೆ ಮಾಡಲು ರೆಡಿಯಾಗಿದ್ದಾರೆ. ಇದು ಸಾಧ್ಯವಾದರೆ 7 ಭಾಷೆಗಳಿಗೆ ‘ಕಾಂತಾರ’ ಚಿತ್ರ ಬಿಡುಗಡೆ ಆಗಲಿದೆ. ಇನ್ನೂ ಎಲ್ಲರು ಕಾಂತಾರ 2 ಯಾವಾಗ ಎಂದು ಕೇಳುತ್ತಿದ್ದಾರೆ. ನಿಜ ಹೇಳಬೇಕು ಎಂದರೆ ಈಗ ನೀವು ನೋಡಿರುವುದೇ ಕಾಂತಾರ 2. ಮುಂದೆ ಬರುವುದು ಕಾಂತಾರ 1’ ಎಂದು ರಿಷಬ್‌ ಶೆಟ್ಟಿಹೇಳಿಕೊಂಡರು.

ಅಂದಹಾಗೆ 2023ರ ಜನವರ 7ಕ್ಕೆ ‘ಕಾಂತಾರ’ ಸಿನಿಮಾ ತೆರೆಕಂಡು ನೂರು ದಿನಗಳನ್ನು ಪೂರೈಸಿತ್ತು. 300 ಕೇಂದ್ರಗಳಲ್ಲಿ 50 ದಿನ, 250 ಚಿತ್ರಮಂದಿರಗಳಲ್ಲಿ 75 ದಿನ, 100ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ 100 ದಿನಗಳನ್ನು ಯಶಸ್ವಿಯಾಗಿ ಪೂರೈಸುವ ಮೂಲಕ ‘ಕಾಂತಾರ’ ಸಿನಿಮಾ ಹೊಸ ದಾಖಲೆ ಮಾಡಿತ್ತು. 

ಕನ್ನಡದ ಚಿತ್ರವಾಗಿ ಸೆಟ್ಟೇರಿ, ಮುಂದೆ ಪ್ಯಾನ್‌ ಇಂಡಿಯಾ ಸಿನಿಮಾ ಆಗಿ ಎಲ್ಲ ಭಾಷೆಗಳಲ್ಲೂ ತೆರೆಕಂಡಿತು. ಅಲ್ಲದೆ ಪ್ರತಿಷ್ಠಿತ ಆಸ್ಕರ್‌ ಪ್ರಶಸ್ತಿ ಶಾರ್ಚ್‌ ಲೀಸ್ಟ್‌ಗೂ ಆಯ್ಕೆ ಆಗುವ ಮೂಲಕ ಮತ್ತೊಮ್ಮೆ ಭಾರತೀಯ ಚಿತ್ರರಂಗದ ಗಮನ ಸೆಳೆದ ಸಿನಿಮಾ ಎನಿಸಿಕೊಂಡಿದ್ದು ‘ಕಾಂತಾರ’ದ ಹೆಗ್ಗಳಿಕೆ.