ಮದುವೆಗೆ ಮೊದಲು ಈ ಟೆಸ್ಟ್ ಮಾಡಿಸಿದ್ರೆ, ಜೀವನ ಸಖತ್ತಾಗಿರುತ್ತೆ !

ವಿವಾಹವು ಇಬ್ಬರು ವ್ಯಕ್ತಿಗಳ ನಡುವಿನ ಮಧುರ ಬಾಂಧವ್ಯ. ಅದು ಅರೇಂಜ್ಡ್ ಆಗಿರಲಿ ಅಥವಾ ಪ್ರೇಮ ವಿವಾಹವಾಗಿರಲಿ ಮದುವೆಗೆ ಅಪೂರ್ವ ಅರ್ಥವಿದೆ. ಮದುವೆ ನಂತರವೂ ಸಂಬಂಧ ಉತ್ತಮವಾಗಿರಲು, ನಂತರದ ಸಮಸ್ಯೆಗಳನ್ನು ತಪ್ಪಿಸಲು ಕೆಲವು ಟೆಸ್ಟ್ ಮಾಡಿಸೋದು ಮುಖ್ಯ. ಭಾರತೀಯ ಸಮಾಜದಲ್ಲಿ, ಮದುವೆಗೆ ಮೊದಲು ವೈದ್ಯಕೀಯ ಪರೀಕ್ಷೆ ಮಾಡಿಸಿಕೊಳ್ಳೋದಕ್ಕಿಂತ ಜಾತಕ ಹೊಂದಿಸುವ ಟ್ರೆಂಡ್ ಹೆಚ್ಚಾಗಿಯೇ ಇರುತ್ತೆ. ಹಾಗಿದ್ರೆ ಪರೀಕ್ಷೆ ಮಾಡಿಸಿಕೊಳ್ಳೋದು ಮುಖ್ಯ ಅಲ್ವಾ? 

ಮದುವೆಗೆ(Wedding) ಮುನ್ನ ಟೆಸ್ಟ್ ಮಾಡಿಸೋದು ತುಂಬಾ ಮುಖ್ಯ. ನೀವು ಮದುವೆಯಾಗಲು ಹೊರಟಿದ್ದರೆ, ನಿಮ್ಮ ಸಂಗಾತಿಯಿಂದ ನೀವು ಕೆಲವು ಅಗತ್ಯ ವೈದ್ಯಕೀಯ ಪರೀಕ್ಷೆಗಳನ್ನು ಮಾಡಿಸಬೇಕು ಎಂಬುದು ಮುಖ್ಯ. ಇದರಿಂದ ನಿಮಗೆ ಮುಂದೆ ಯಾವುದೇ ಸಮಸ್ಯೆ ಇರೋದಿಲ್ಲ. ನೀವು ಪರಸ್ಪರರ ವೈದ್ಯಕೀಯ ಆರೋಗ್ಯದ ಬಗ್ಗೆ ತಿಳಿದುಕೊಳ್ಳಬೇಕು.

1. ಬ್ಲಡ್(Blood) ಗ್ರೂಪ್

 ಬಹುತೇಕ ಎಲ್ಲರಿಗೂ ನಿಮ್ಮ ಬ್ಲಡ್ ಗ್ರೂಪ್ ತಿಳಿದಿದೆ, ಆದರೆ ನೀವು ಮದುವೆಯಾಗಲಿರುವ ವ್ಯಕ್ತಿಯ  ಬ್ಲಡ್ ಗ್ರೂಪ್ ಸಹ ನೀವು ತಿಳಿದಿರಬೇಕು. ಇದರಿಂದ ಭವಿಷ್ಯದಲ್ಲಿ ಯಾವುದೇ ಸಮಸ್ಯೆ ಇರೋದಿಲ್ಲ. ಏಕೆಂದರೆ ಪ್ರತಿಯೊಬ್ಬರೂ ಎಲ್ಲರಿಗೂ ರಕ್ತದಾನ ಮಾಡಲು ಸಾಧ್ಯವಿಲ್ಲ ಮತ್ತು ನೀವಿಬ್ಬರೂ ಒಬ್ಬರಿಗೊಬ್ಬರು ರಕ್ತವನ್ನು ನೀಡಬಹುದೇ ಎಂದು ತಿಳಿದುಕೊಳ್ಳೋದು ಮುಖ್ಯ.

2. ಫರ್ಟಿಲಿಟಿ ಟೆಸ್ಟ್ (Fertility Test)

ಅನೇಕ ದಂಪತಿ ಮದುವೆಯ ನಂತರ ಪೋಷಕರಾಗಬೇಕೆಂದು ಕನಸು ಕಾಣುತ್ತಾರೆ. ಆದರೆ ಅವರಲ್ಲಿ ಒಬ್ಬರಲ್ಲಿ ನಂತರ ಬಂಜೆತನದ ಸಮಸ್ಯೆ ಕಂಡುಬಂದರೆ, ಆಗ ಸಾಕಷ್ಟು ಸಮಸ್ಯೆಗಳು ಕಂಡುಬರುತ್ತವೆ. ಆದ್ದರಿಂದ, ಮದುವೆಗೆ ಮೊದಲು ಫರ್ಟಿಲಿಟಿ ಟೆಸ್ಟ್ ಮಾಡಿಸೋದು ಬಹಳ ಮುಖ್ಯ. ನೀವು ಸಂತಾನೋತ್ಪತ್ತಿಗೆ ಯೋಗ್ಯರಾಗಿದ್ದೀರಾ ಅಥವಾ ಇಲ್ಲವೇ ಎಂಬುದನ್ನು ಇದು ನಿಮಗೆ ತಿಳಿಸುತ್ತೆ .

3. ಜೆನೆಟಿಕ್ ಮೆಡಿಕಲ್ ಹಿಸ್ಟರಿ (Genetic Medical History)

ಹೃದ್ರೋಗ ಅಥವಾ ಮಧುಮೇಹದಂತಹ ಕುಟುಂಬ ಸಂಬಂಧಿತ ಕಾಯಿಲೆಗಳಂತಹ ಯಾವುದೇ ರೋಗ ನಿಮ್ಮ ಸಂಗಾತಿ ಹೊಂದಿಲ್ಲ ಎಂದು ತಿಳಿದುಕೊಳ್ಳೋದು ಉತ್ತಮ. ಆಗ, ಅವರ ಚಿಕಿತ್ಸೆಯನ್ನು ಮುಂಚಿತವಾಗಿ ಪ್ರಾರಂಭಿಸಬೇಕು. ಇಲ್ಲದಿದ್ದರೆ, ಇದು ನಿಮ್ಮ ಮಕ್ಕಳಲ್ಲಿ ಸಂಭವಿಸಬಹುದು.

4. HIV ಅಥವಾ ಲೈಂಗಿಕವಾಗಿ ಹರಡುವ ರೋಗ

ಈ ರೀತಿಯ ರೋಗಗಳು ಹೆಚ್ಚಾಗಿ ದೈಹಿಕ ಸಂಪರ್ಕದಿಂದ ಹರಡುತ್ತವೆ. ನಿಮ್ಮ ಸಂಗಾತಿಗೆ ಈ ರೀತಿಯ ಕಾಯಿಲೆ ಇದ್ದರೆ ಮತ್ತು ಆ ರೋಗಗಳನ್ನು ಹೊಂದಲು ನೀವು ಬಯಸದಿದ್ದರೆ, ಸಂಗಾತಿಗೆ ಈ ಪರೀಕ್ಷೆಯನ್ನು ಮುಂಚಿತವಾಗಿ ಮಾಡಿಸಿಕೊಳ್ಳಬೇಕು. ಇಲ್ಲದಿದ್ದರೆ, ನಂತರ ನಿಮಗೆ ತೊಂದರೆಯಾಗಬಹುದು.

5. ಮಾನಸಿಕ ಆರೋಗ್ಯ (Mentral Health) ಪರೀಕ್ಷೆ

ಸಂಗಾತಿಯು ಉತ್ತಮ ಮಾನಸಿಕ ಆರೋಗ್ಯ ಹೊಂದಿರಬೇಕು. ಸಂಗಾತಿಯ ಮಾನಸಿಕ ಆರೋಗ್ಯದಿಂದಾಗಿ ಕಿರಿಕಿರಿ ಉಂಟಾಗಲು ನೀವು ಬಯಸದಿದ್ದರೆ, ನೀವು ಇದನ್ನು ಮೊದಲೇ ಪರೀಕ್ಷಿಸಬಹುದು. ಅವರ ಮಾನಸಿಕ ಆರೋಗ್ಯವು ಮುಂದೆ ಇನ್ನೂ ಹದಗೆಡಬಹುದು. ಆದ್ದರಿಂದ ನೀವು ಅದರ ಬಗ್ಗೆ ಮುಂಚಿತವಾಗಿ ತಿಳಿದುಕೊಳ್ಳೋದು ಬಹಳ ಮುಖ್ಯ.

6. ಕ್ರೋನಿಕ್ ಡಿಸೀಸ್ ಟೆಸ್ಟ್

ಸಂಗಾತಿಯು ದೀರ್ಘಕಾಲದಿಂದ ಅನಾರೋಗ್ಯದಿಂದ ಬಳಲುತ್ತಿಲ್ಲ ಎಂದು ತಿಳಿಯಲು ಬಯಸಿದ್ರೆ, ಅವರನ್ನು ಕ್ರೋನಿಕ್ ಡಿಸೀಸ್ ಟೆಸ್ಟ್‌ಗೆ ಒಳಪಡಿಸಬಹುದು. ದಂಪತಿ ಪರಸ್ಪರರ ಮಧುಮೇಹ (Diabetes) ಮತ್ತು ಅಧಿಕ ರಕ್ತದೊತ್ತಡದ ಸ್ಥಿತಿಯನ್ನು ತಿಳಿದುಕೊಳ್ಳೋದು ಬಹಳ ಮುಖ್ಯ. ಇದರಿಂದ ಮುಂದೆ ಆರೋಗ್ಯದಿಂದ ಇರಲು ಸಾಧ್ಯವಾಗುತ್ತೆ.

7. ತಲಸ್ಸೇಮಿಯಾ (Thalassemia)ಪರೀಕ್ಷೆ

ಸಿಬಿಸಿ ಪರೀಕ್ಷೆಯನ್ನು ನಡೆಸುವ ಮೂಲಕ ತಲಸ್ಸೇಮಿಯಾವನ್ನು ಕಂಡು ಹಿಡಿಯಬಹುದು. ಮಕ್ಕಳಲ್ಲಿ ಜನನ ದೋಷಗಳ ಸಾಧ್ಯತೆ ತಡೆಗಟ್ಟಲು ಕಪಲ್‌ಗಳಿಬ್ಬರು ಮಾಡಿಸಿ ಕೊಳ್ಳಬೇಕಾದ ಪ್ರಮುಖ ಪರೀಕ್ಷೆ ಇದು. ಈ ಪರೀಕ್ಷೆಯು ನಿಮಗೆ ಥಲಸ್ಸೆಮಿಯಾ ಮೈನರ್ ಇದೆಯೇ ಎಂದು ಕಂಡುಹಿಡಿಯಲು ಸಹಾಯ ಮಾಡುತ್ತೆ.

ಇಬ್ಬರಲ್ಲಿ ಒಬ್ಬರಿಗೆ ಥಲಸ್ಸೆಮಿಯಾ ಮೈನರ್ ಇದ್ದರೆ ಯಾವುದೇ ಸಮಸ್ಯೆ ಇಲ್ಲ. ಆದರೆ ಇಬ್ಬರಿಗೂ ಸಣ್ಣ ಥಲಸ್ಸೆಮಿಯಾ ಇದ್ದರೆ, ಅದು ದೊಡ್ಡ ಸಮಸ್ಯೆಯ ಕಾರಣವಾಗಬಹುದು. ಹಾಗಾಗಿ  ಮದುವೆಗೆ ಮೊದಲು ಈ ಮೆಡಿಕಲ್ ಟೆಸ್ಟ್ ಮಾಡಿಸಿದ್ರೆ, ನಿಮ್ಮ ವೈವಾಹಿಕ ಜೀವನ (Married life)  ಸೂಪರ್ ಆಗಿರುತ್ತೆ.