Sagarika ghatge Love Story: ನಟಿ ಸಾಗರಿಕಾ ಘಾಟ್ಗೆ ಕ್ರಿಕೆಟಿಗ ಜಹೀರ್‌ ಖಾನ್‌ಗೆ ಮನಸೋತಿದ್ದು ಹೀಗೆ!

ಬಾಲಿವುಡ್ ನಟಿ ಸಾಗರಿಕಾ ಘಾಟ್ಗೆ (Sagarika Ghatge) ಜನವರಿ 8 ರಂದು ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಾರೆ. ಅವರು ಶಾರುಖ್ ಖಾನ್ (Shah rukh khan)ಅವರ 'ಚಕ್ ದೇ ಇಂಡಿಯಾ' ಸಿನಿಮಾದ ಮೂಲಕ ತಮ್ಮ ಛಾಪು ಮೂಡಿಸಿದರು. ಸಿನಿಮಾದಲ್ಲಿ ಪ್ರೀತಿ ಸಬರ್ವಾಲ್ ಅವರ ಸೌಂದರ್ಯಕ್ಕೆ ಎಲ್ಲರೂ ಬೆರಗಾದರು. ಈ ಚಿತ್ರದ ನಂತರ, ನಟಿ ಇನ್ನೂ ಅನೇಕ ಚಿತ್ರಗಳನ್ನು ಮಾಡಿದ್ದಾರೆ.ಆದರೆ ಇಂಡಸ್ಟ್ರಿಯಲ್ಲಿ ಅಷ್ಟೊಂದು ಯಶಸ್ಸು ಸಿಗಲಿಲ್ಲ. ಅವರು 2017 ರಲ್ಲಿ ಭಾರತೀಯ ಕ್ರಿಕೆಟಿಗ ಜಹೀರ್ ಖಾನ್ ಅವರನ್ನು ಮದುವೆಯಾಗುವ ಮೂಲಕ ಬಾಲಿವುಡ್‌ಗೆ ವಿದಾಯ ಹೇಳಿದರು. ಅವರ ಹುಟ್ಟುಹಬ್ಬದಂದು ನಟಿಗೆ ಸಂಬಂಧಿಸಿದ ಕೆಲವು ಇಂಟರೆಸ್ಟಿಂಗ್‌ ವಿಷಯಗಳು ಇಲ್ಲಿವೆ.

ಸಾಗರಿಕಾ ಘಾಟ್ಗೆ ಅವರು 8 ಜನವರಿ 1982 ರಂದು ಮಹಾರಾಷ್ಟ್ರದ ಕೊಲ್ಲಾಪುರದಲ್ಲಿ ಜನಿಸಿದರು. ಅವರು 8 ವರ್ಷದವರಿದ್ದಾಗ, ಪೋಷಕರು ರಾಜಸ್ಥಾನದ ಅಜ್ಮೀರ್‌ಗೆ ಸ್ಥಳಾಂತರಗೊಂಡರು. ಅವರು ಓದಿದ್ದು ಇಲ್ಲಿಯೇ. 

ಸಾಗರಿಕಾ ಘಾಟ್ಗೆ ಅವರ ತಂದೆ ವಿಜಯೇಂದ್ರ ಘಾಟ್ಗೆ ಚಿತ್ರರಂಗದಲ್ಲಿ ಹೆಸರಾಂತ ವ್ಯಕ್ತಿತ್ವ. ಅದೇ ಸಮಯದಲ್ಲಿ, ಅವರ ಅಜ್ಜಿ ಸೀತಾ ರಾಜೇ ಘಾಟ್ಗೆ ಇಂದೋರ್‌ನ ಮಹಾರಾಜ ತುಕೋಜಿರಾವ್ ಹೋಳ್ಕರ್ ಅವರ ಮಗಳು. ಇದರಿಂದಾಗಿ ಸಾಗರಿಕಾ ರಾಜಮನೆತನಕ್ಕೆ ಸೇರಿದ್ದಾರೆ.

ಬಾಲಿವುಡ್ ಪ್ರವೇಶಿಸಿದ ಸಾಗರಿಕಾ 2007 ರಲ್ಲಿ ಚಕ್ ದೇ ಇಂಡಿಯಾ ಚಲನಚಿತ್ರವನ್ನು ಮಾಡಿದರು, ಇದರಲ್ಲಿ ಅವರು ಪ್ರೀತಿ ಸಬರ್ವಾಲ್ ಪಾತ್ರವನ್ನು ನಿರ್ವಹಿಸಿದರು. ಈ ಚಿತ್ರದಲ್ಲಿ ಅವರ ಅಭಿನಯ ವಿಮರ್ಶಕರೂ ಕೂಡ  ಮೆಚ್ಚಿದ್ದರು.

ಅವರು ಜಹೀರ್ ಖಾನ್ ಅವರನ್ನು ಫ್ರೆಂಡ್‌ ಪಾರ್ಟಿಯಲ್ಲಿ ಭೇಟಿಯಾದರು. ಪರಿಚಯ, ಮಾತುಕತೆ, ನಂತರ ಕ್ರಮೇಣ ಸ್ನೇಹ ಬೆಳೆಸಿದರು. ಇದರ ನಂತರ, ಇಬ್ಬರೂ ರಹಸ್ಯವಾಗಿ ಪರಸ್ಪರ ಭೇಟಿಯಾದರು ಮತ್ತು ತಮ್ಮ ಪ್ರೀತಿಯನ್ನು ಶಾಶ್ವತವಾಗಿ ಮುಂದುವರೆಸಿದರು. ಆದರೆ ಯುವರಾಜ್ ಸಿಂಗ್ ಮದುವೆಯಲ್ಲಿ ಇಬ್ಬರೂ ಒಟ್ಟಿಗೆ ಕಾಣಿಸಿಕೊಂಡಾಗ, ಅವರ ಪ್ರೀತಿಯ ವಿಷಯ ಜಗತ್ತಿಗೆ ತಿಳಿಯಿತು.

ಸುಮಾರು 9 ತಿಂಗಳ ಡೇಟಿಂಗ್ ನಂತರ, ಸಾಗರಿಕಾ ಮತ್ತು ಜಹೀರ್ ಐಪಿಎಲ್-2017 ರ ಸಮಯದಲ್ಲಿ ನಿಶ್ಚಿತಾರ್ಥವನ್ನು ಘೋಷಿಸಿದರು. 23 ನವೆಂಬರ್ 2017 ರಂದು, ಇಬ್ಬರೂ ಮುಂಬೈನ ತಾಜ್ ಪ್ಯಾಲೇಸ್‌ನಲ್ಲಿ ಆರತಕ್ಷತೆಯ ನಂತರ ಕೋರ್ಟ್‌ ಮ್ಯಾರೇಜ್‌ ಮಾಡಿಕೊಂಡರು. ಇದಾದ ಬಳಿಕ ಬಹುತೇಕ ಸಿನಿಮಾ ಲೋಕಕ್ಕೆ ವಿದಾಯ ಹೇಳಿದ್ದಾರೆ ಸಾಗರಿಕಾ ಘಾಟ್ಗೆ.

ಸಾಗರಿಕಾ ಫಾಕ್ಸ್, ಮೈಲ್ ನಾ ಮೈಲ್ ಹಮ್, ರಶ್, ಜೀ ಭರ್ ಕೆ ಜಿಲ್ಲೆ ಮುಂತಾದ ಚಿತ್ರಗಳಲ್ಲಿ ಕಾಣಿಸಿಕೊಂಡರು. ಅವರು ಫಿಯರ್ ಫ್ಯಾಕ್ಟರ್, ಖತ್ರೋನ್ ಕೆ ಖಿಲಾಡಿಗಳಲ್ಲಿಯೂ ಕಾಣಿಸಿಕೊಂಡಿದ್ದಾರೆ. ಇದಲ್ಲದೆ, ಅವರು ವೆಬ್‌ಸರಣಿ ಬಾಸ್‌ನಲ್ಲಿ ಕೆಲಸ ಮಾಡಿದ್ದಾರೆ.