ತುಳಸಿ ವಿವಾಹ 2022; ತುಳಸಿಯ ಪ್ರಾಮುಖ್ಯತೆ, ಪೂಜಾ ವಿಧಿ, ಪುರಾಣ ಕತೆ..
ನವೆಂಬರ್ 5ರಂದು ತುಳಸಿ ವಿವಾಹ ನಡೆಯಲಿದೆ. ಈ ಸಂದರ್ಭದಲ್ಲಿ ನಡೆಸುವ ಪೂಜಾ ವಿಧಿವಿಧಾನ, ಪೌರಾಣಿಕ ಕತೆ, ತುಳಸಿಯ ಪ್ರಾಮುಖ್ಯತೆ ಎಲ್ಲವೂ ಇಲ್ಲಿವೆ..
ತುಳಸಿ ಅಥವಾ ವೃಂದಾ ಹಿಂದೂ ನಂಬಿಕೆಯಲ್ಲಿ ಪವಿತ್ರ ಸಸ್ಯವಾಗಿದೆ. ಹಿಂದೂಗಳು ಇದನ್ನು ತುಳಸಿ/ವೃಂದಾ ದೇವತೆಯ ಐಹಿಕ ಅಭಿವ್ಯಕ್ತಿ ಎಂದು ಪರಿಗಣಿಸುತ್ತಾರೆ; ಆಕೆಯನ್ನು ವಿಷ್ಣು ದೇವರ ಮಹಾನ್ ಆರಾಧಕಿ ಎಂದು ಪರಿಗಣಿಸಲಾಗಿದೆ. ಇದನ್ನು ಸ್ವರ್ಗ ಮತ್ತು ಭೂಮಿಯ ನಡುವಿನ ಹೊಸ್ತಿಲು ಎಂದು ಪರಿಗಣಿಸಲಾಗುತ್ತದೆ. ಬ್ರಹ್ಮ ದೇವರು ಅದರ ಶಾಖೆಗಳಲ್ಲಿ ನೆಲೆಸಿದ್ದಾನೆ ಎಂದು ನಂಬಲಾಗಿದೆ, ಎಲ್ಲಾ ಹಿಂದೂ ಯಾತ್ರಾ ಕೇಂದ್ರಗಳು ಅದರ ಬೇರುಗಳಲ್ಲಿ ವಾಸಿಸುತ್ತವೆ, ಗಂಗಾ ನೀರು ಅದರ ಬೇರುಗಳ ಮೂಲಕ ಹರಿಯುತ್ತದೆ, ಎಲ್ಲಾ ದೇವತೆಗಳು ಅದರ ಕಾಂಡ ಮತ್ತು ಎಲೆಗಳಲ್ಲಿ ವಾಸಿಸುತ್ತಾರೆ ಮತ್ತು ಅದರ ಶಾಖೆಗಳ ಮೇಲ್ಭಾಗದಲ್ಲಿ ವೇದಗಳು, ಹಿಂದೂ ಧರ್ಮಗ್ರಂಥಗಳು ಇವೆ ಎನ್ನಲಾಗುತ್ತದೆ. ಹೀಗಾಗಿ, ತುಳಸಿಯನ್ನು ಮನೆಯ ದೇವರು ಎಂದು ಪರಿಗಣಿಸಲಾಗುತ್ತದೆ. ಇದು ನಕಾರಾತ್ಮಕತೆಯನ್ನು ಹೋಗಲಾಡಿಸುತ್ತದೆ ಮತ್ತು ಮನೆಯ ವಾಸ್ತು ದೋಷವನ್ನು ನಿವಾರಿಸುತ್ತದೆ.
ತುಳಸಿ ಪೂಜೆ ವಿಧಿ ಬಗ್ಗೆ
ತುಳಸಿ ಪೂಜೆಯು ಕುಟುಂಬಕ್ಕೆ ಸಮೃದ್ಧಿ ಮತ್ತು ಸಂತೋಷವನ್ನು ತರುತ್ತದೆ. ಇದು ಮೋಕ್ಷವನ್ನು ಪಡೆಯಲು ಮತ್ತು ಪಾಪಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದು ದೇವದೋಷವನ್ನು ಕಡಿಮೆ ಮಾಡುತ್ತದೆ. ತುಳಸಿಗೆ ಎಳನೀರನ್ನು ಅರ್ಪಿಸಬೇಕು ಮತ್ತು ತುಳಸಿ ಪ್ರಣಾಮ ಮಂತ್ರವನ್ನು ಪಠಿಸುತ್ತಾ ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ದೀಪವನ್ನು ಬೆಳಗಿಸಬೇಕು. ತುಳಸಿಯು ಕಾರ್ತಿಕ ಮಾಸದ ಅಮಾವಾಸ್ಯೆಯಂದು ಜನಿಸಿದಳು ಎಂದು ನಂಬಲಾಗಿದೆ. ಆದ್ದರಿಂದ ಕಾರ್ತಿಕ ಮಾಸದಲ್ಲಿ ತುಳಸಿಯನ್ನು ಪೂಜಿಸುವುದು ಅತ್ಯಂತ ಮಹತ್ವದ್ದಾಗಿದೆ.
ಮದುವೆ ಬೇಗ ಆಗ್ಬೇಕಾ? ಈ ಜ್ಯೋತಿಷ್ಯ ಸಲಹೆ ಪಾಲೋ ಮಾಡಿ
ತುಳಸಿ ವಿವಾಹ ಕುರಿತ ಕತೆ
ಒಂದಾನೊಂದು ಕಾಲದಲ್ಲಿ ಜಲಂಧರನೆಂಬ ರಾಕ್ಷಸನಿದ್ದ. ಅವನಿಗೆ ಬೃಂದಾ ಎಂಬ ಮಹಾಪತಿವ್ರತೆ ಹೆಂಡತಿ ಇದ್ದಳು. ಅವಳ ಧರ್ಮನಿಷ್ಠೆಯಿಂದಾಗಿ, ರಾಕ್ಷಸನು ಅಮರ ಶಕ್ತಿಯನ್ನು ಪಡೆದುಕೊಂಡನು ಮತ್ತು ಅಜೇಯನಾದನು. ಬೃಂದೆಯು ಪರಿಶುದ್ಧತೆ ತಪ್ಪದ ಹೊರತು ಆಕೆಯ ಪತಿಯನ್ನು ಸೋಲಿಸಲಾಗುವುದಿಲ್ಲ ಎಂಬುದು ದೇವಾನುದೇವತೆಗಳಿಗೆ ತಿಳಿಯಿತು. ದೇವತೆಗಳ ಕೋರಿಕೆಯ ಮೇರೆಗೆ, ವಿಷ್ಣುವು ಜಲಂಧರನ ರೂಪದಲ್ಲಿ ವೇಷ ಧರಿಸಿ ಅವಳ ಬಳಿ ಹೋದನು. ವಿಷ್ಣುವಿನ ರೂಪವೆಂದು ಅರಿಯದೆ ಆತ ತನ್ನ ಪತಿಯೆಂದೇ ಬೃಂದಾ ಭಾವಿಸಿದಳು. ಇದರಿಂದ ಆಕೆಯ ಪಾತಿವ್ರತ್ಯಕ್ಕೆ ಅಡ್ಡಿಯಾಯಿತು. ಜಲಂಧರನ ಶಕ್ತಿ ಕುಂದಿತು. ಇದೇ ಸಮಯ ನೋಡಿ ಶಿವನು ಜಲಂಧರನನ್ನು ಯುದ್ಧದಲ್ಲಿ ಕೊಂದನು. ಬೃಂದಾ ಭಗವಾನ್ ವಿಷ್ಣುವು ಕಪ್ಪಾಗುತ್ತಾನೆ ಮತ್ತು ತನ್ನ ಹೆಂಡತಿಯಿಂದ ಬೇರ್ಪಡುತ್ತಾನೆ ಎಂದು ಶಪಿಸಿದಳು. ಬೃಂದಾ ತನ್ನ ಪಾಪಕ್ಕೆ ಪ್ರಾಯಶ್ಚಿತ್ತವಾಗಿ ಸತಿ ಸಹಗಮನವಾದಳು. ಆ ಬೂದಿಯಿಂದ ತುಳಸಿ ಗಿಡ ಹುಟ್ಟಿತು. ಬೃಂದಾಳ ಪಾತಿವ್ರತ್ಯಕ್ಕೆ ಹಾನಿ ತಂದಿದ್ದನ್ನು ಸರಿಪಡಿಸಲು ತುಳಸಿಯನ್ನು ವಿಷ್ಣು ವಿವಾಹವಾದನು.
Horoscope 2023: ಹೊಸ ವರ್ಷ ನಿಮ್ಮ ರಾಶಿಗೆ ಅದೃಷ್ಟ ತರಲಿದೆಯೇ?
ತುಳಸಿ ವಿವಾಹ ಪೂಜೆ
ಪ್ರತಿ ವರ್ಷ ಕಾರ್ತಿಕ ಶುಕ್ಲ ಏಕಾದಶಿ ಅಥವಾ ದೇವುತಾನಿ ಏಕಾದಶಿಯ ದಿನದಂದು ಭಕ್ತರು ಮುಂಜಾನೆಯೇ ಎದ್ದು ಪುಣ್ಯಸ್ನಾನ ಮಾಡಿ ತಮ್ಮ ಮನೆಗಳನ್ನು ಸ್ವಚ್ಛಗೊಳಿಸುತ್ತಾರೆ. ತುಳಸಿ ಗಿಡವನ್ನು ಮನೆಯ ಮಧ್ಯಭಾಗದಲ್ಲಿ ಇರಿಸಲಾಗುತ್ತದೆ. ಅದಕ್ಕೆ ಪವಿತ್ರ ಸ್ನಾನವನ್ನು ನೀಡಲಾಗುತ್ತದೆ ಮತ್ತು ಅರಿಶಿನ, ಸಿಂಧೂರ, ಪವಿತ್ರ ದಾರ, ಆಭರಣಗಳು ಮತ್ತು ಹೂವುಗಳಿಂದ ಅಲಂಕರಿಸಲಾಗುತ್ತದೆ. ಕೃಷ್ಣ/ಶಾಲಿಗ್ರಾಮದ ವಿಗ್ರಹವನ್ನು ಪುರುಷ ವೇಷದಿಂದ ಅಲಂಕರಿಸಲಾಗಿದೆ ಮತ್ತು ತುಳಸಿ ಗಿಡದ ಪಕ್ಕದಲ್ಲಿ ಇರಿಸಲಾಗುತ್ತದೆ. ಸಾಮಾನ್ಯವಾಗಿ, ತುಳಸಿ ವಿವಾಹದ ದಿನದಂದು, ಭಕ್ತರು ದಿನವಿಡೀ ಉಪವಾಸವನ್ನು ಆಚರಿಸುತ್ತಾರೆ ಮತ್ತು ವಿವಾಹವು ಸಂಜೆ ನಡೆಯುತ್ತದೆ. ತುಳಸಿ ಮತ್ತು ಕೃಷ್ಣನ ಉಪಸ್ಥಿತಿಯನ್ನು ಆಹ್ವಾನಿಸಿದ ನಂತರ, ಮಂತ್ರಗಳನ್ನು ಪಠಿಸಲಾಗುತ್ತದೆ ಮತ್ತು ಮದುವೆಯ ಗುರುತಾಗಿ ವಿಗ್ರಹ ಮತ್ತು ಸಸ್ಯದ ಸುತ್ತಲೂ ಹತ್ತಿ ದಾರವನ್ನು ಕಟ್ಟಲಾಗುತ್ತದೆ. ಸಮಾರಂಭದ ನಂತರ, ಎಲ್ಲ ಭಕ್ತರಿಗೆ 'ಪ್ರಸಾದ' ಅಥವಾ 'ಭೋಗ್' ವಿತರಿಸಲಾಗುತ್ತದೆ. ಈ ವರ್ಷ ತುಳಸಿ ವಿವಾಹವು ನವೆಂಬರ್ 5ರಂದು ಬರಲಿದೆ.
