Office Air Theory: ಬೆಳಗ್ಗೆ ಕಚೇರಿಗೆ ಹೊರಡುವಾಗ ಇರುವ ಫ್ರೆಶ್ನೆಸ್ ಸಂಜೆಯಾಗುವಷ್ಟರಲ್ಲಿ ಮಾಯವಾಗುತ್ತಿದೆಯೇ? ಸೋಷಿಯಲ್ ಮೀಡಿಯಾದಲ್ಲಿ ಈಗ 'ಆಫೀಸ್ ಏರ್ ಥಿಯರಿ' ಎಂಬ ಹೊಸ ಟ್ರೆಂಡ್ ಸದ್ದು ಮಾಡುತ್ತಿದೆ. ಇದನ್ನು ತಡೆಯುವುದು ಹೇಗೆ ಎಂಬ ಆಸಕ್ತಿದಾಯಕ ಮಾಹಿತಿ ಇಲ್ಲಿದೆ.
ನೀವು ಬೆಳಗ್ಗೆ ಕೆಲಸಕ್ಕೆ ಹೊರಡುವಾಗ ತುಂಬಾ ಉತ್ಸಾಹದಿಂದ, ಅಚ್ಚುಕಟ್ಟಾಗಿ ತಯಾರಾಗಿರುತ್ತೀರಿ. ಸನ್ಸ್ಕ್ರೀನ್, ಐಲೈನರ್ ಮತ್ತು ಸುಂದರವಾದ ಕೇಶವಿನ್ಯಾಸ ಎಲ್ಲವೂ ಪರ್ಫೆಕ್ಟ್ ಆಗಿರುತ್ತದೆ. ಆದರೆ, ಮಧ್ಯಾಹ್ನ 12 ಗಂಟೆಯ ನಂತರ ಅಥವಾ ಆಫೀಸ್ ಮುಗಿಸಿ ಮನೆಗೆ ಹೊರಡುವಾಗ ಕನ್ನಡಿ ನೋಡಿಕೊಂಡರೆ ಮುಖ ಸುಸ್ತಾದಂತೆ, ಕಳೆಗುಂದಿದಂತೆ ಮತ್ತು ಕೂದಲು ಅಂಟಂಟಾದಂತೆ ಕಾಣುತ್ತದೆಯೇ? ಇದನ್ನು ಇಂಟರ್ನೆಟ್ ಲೋಕ “ಆಫೀಸ್ ಏರ್ ಗ್ಲೋ-ಡೌನ್” (Office Air Glow-down) ಎಂದು ಕರೆಯುತ್ತಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಭಾರಿ ಚರ್ಚೆ ನಡೆಯುತ್ತಿದೆ.
ಏನಿದು ‘ಆಫೀಸ್ ಏರ್ ಥಿಯರಿ’?
ಟಿಕ್ಟಾಕ್ ಮತ್ತು ಇನ್ಸ್ಟಾಗ್ರಾಮ್ನಲ್ಲಿ ಈ ಟ್ರೆಂಡ್ ಭಾರಿ ವೈರಲ್ ಆಗುತ್ತಿದೆ. ಅನೇಕ ಉದ್ಯೋಗಿಗಳು ತಾವು ಬೆಳಗ್ಗೆ ಆಫೀಸ್ಗೆ ಬಂದಾಗ ಎಷ್ಟು ಫ್ರೆಶ್ ಆಗಿದ್ದೆವು ಮತ್ತು ಮಧ್ಯಾಹ್ನವಾಗುವಷ್ಟರಲ್ಲಿ ಮುಖ ಹೇಗೆ ಡಲ್ ಆಯಿತು ಎಂಬುದನ್ನು ವಿಡಿಯೋ ಮಾಡಿ ಹಂಚಿಕೊಳ್ಳುತ್ತಿದ್ದಾರೆ. "ಆಫೀಸ್ ಗಾಳಿಯಲ್ಲಿ ಏನೋ ನಿಗೂಢ ವಿಷಕಾರಿ ಅಂಶವಿದೆ. ಅದು ನಮ್ಮ ಸೌಂದರ್ಯವನ್ನು ಹಾಳುಮಾಡುತ್ತಿದೆ ಮತ್ತು ನಮಗೆ ಅಕಾಲಿಕ ವಯಸ್ಸಾದಂತೆ ಕಾಣುವಂತೆ ಮಾಡುತ್ತಿದೆ" ಎಂಬುದು ಇವರ ವಾದ.
ವಿಜ್ಞಾನ ಏನು ಹೇಳುತ್ತದೆ?
ತಜ್ಞರ ಪ್ರಕಾರ, ಆಫೀಸ್ ಗಾಳಿ 'ವಿಷಕಾರಿ' ಏನಲ್ಲ, ಆದರೆ ಅಲ್ಲಿನ ನಿಯಂತ್ರಿತ ಪರಿಸರ ಚರ್ಮದ ಮೇಲೆ ಪ್ರಭಾವ ಬೀರುವುದು ನಿಜ. ಚರ್ಮರೋಗ ತಜ್ಞರಾದ ಡಾ. ಅಮೀಶಾ ಮಹಾಜನ್ ಈ ಬಗ್ಗೆ ಹೀಗೆ ವಿವರಿಸುತ್ತಾರೆ:
Related Articles
ಎಸಿ ಗಾಳಿಯ ಪ್ರಭಾವ
ಆಫೀಸ್ಗಳಲ್ಲಿ ನಿರಂತರವಾಗಿ ಎಸಿ (AC) ಇರುವುದರಿಂದ ಅಲ್ಲಿ ತೇವಾಂಶ (Humidity) ಅತ್ಯಂತ ಕಡಿಮೆ ಇರುತ್ತದೆ. ಇದರಿಂದ ಚರ್ಮದಲ್ಲಿನ ನೈಸರ್ಗಿಕ ನೀರಿನಾಂಶ ಆವಿಯಾಗಿ ಹೋಗುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ 'ಟ್ರಾನ್ಸ್ಎಪಿಡರ್ಮಲ್ ವಾಟರ್ ಲಾಸ್' ಎಂದು ಕರೆಯಲಾಗುತ್ತದೆ. ಪರಿಣಾಮವಾಗಿ ಚರ್ಮ ಬಿಗಿಯಾದಂತೆ, ನಿರ್ಜಲೀಕರಣಗೊಂಡಂತೆ ಮತ್ತು ಕಾಂತಿಯಿಲ್ಲದಂತೆ ಕಾಣುತ್ತದೆ.
ಎಣ್ಣೆಯುಕ್ತ ಕೂದಲು
ಗಾಳಿಯಲ್ಲಿ ತೇವಾಂಶ ಇಲ್ಲದಿದ್ದಾಗ, ತಲೆಯ ಚರ್ಮವು ಅತಿಯಾದ ಒಣಗುವಿಕೆಯನ್ನು ತಡೆಯಲು ತನ್ನಷ್ಟಕ್ಕೆ ತಾನೇ ಹೆಚ್ಚು ಎಣ್ಣೆಯನ್ನು (Sebum) ಉತ್ಪತ್ತಿ ಮಾಡುತ್ತದೆ. ಇದರಿಂದ ಬೆಳಗ್ಗೆ ಅಚ್ಚುಕಟ್ಟಾಗಿದ್ದ ಕೂದಲು ಸಂಜೆಯಾಗುವಷ್ಟರಲ್ಲಿ ಎಣ್ಣೆಯುಕ್ತವಾಗಿ ಚಪ್ಪಟೆಯಾಗುತ್ತದೆ.
ಜೀವನಶೈಲಿಯೂ ಮುಖ್ಯ
ನಿಮ್ಮ ಅಂದಗೆಡಲು ಕೇವಲ ಆಫೀಸ್ ಗಾಳಿ ಮಾತ್ರವಲ್ಲದೆ, ಕಚೇರಿಗೆ ಬರುವಾಗ ಎದುರಿಸುವ ಸಂಚಾರ ದಟ್ಟಣೆ, ಬಿಸಿಲು, ಧೂಳು ಮತ್ತು ಮಾಲಿನ್ಯವೂ ಕಾರಣ. ಇದರೊಂದಿಗೆ ಕೆಲಸದ ಒತ್ತಡ ಮತ್ತು ಸರಿಯಾದ ನಿದ್ದೆಯಿಲ್ಲದ ಜೀವನಶೈಲಿಯೂ ನಿಮ್ಮ ಮುಖದ ಕಾಂತಿಯನ್ನು ಕುಂದಿಸುತ್ತದೆ.
ತಡೆಗಟ್ಟಲು ಸರಳ ಮಾರ್ಗಗಳು
*ಆಫೀಸ್ನಲ್ಲಿದ್ದರೂ ನಿಯಮಿತವಾಗಿ ನೀರು ಕುಡಿಯುವುದನ್ನು ಮರೆಯಬೇಡಿ.
*ಮುಖದ ತೇವಾಂಶ ಉಳಿಸಿಕೊಳ್ಳಲು ಹೈಲುರಾನಿಕ್ ಆಸಿಡ್ ಅಥವಾ ಸೆರಾಮೈಡ್ಸ್ ಇರುವ ಮಾಯಿಶ್ಚರೈಸರ್ ಬಳಸಿ.
*ಒಳಾಂಗಣದಲ್ಲಿದ್ದರೂ ಕಂಪ್ಯೂಟರ್ ಸ್ಕ್ರೀನ್ನಿಂದ ಬರುವ ಬೆಳಕಿನಿಂದ ರಕ್ಷಣೆ ಪಡೆಯಲು ಸನ್ಸ್ಕ್ರೀನ್ ಹಚ್ಚುವುದು ಉತ್ತಮ. ಮನೆಯಿಂದ ಆಫೀಸ್ಗೆ ಮತ್ತು ಆಫೀಸ್ನಿಂದ ಮನೆಗೆ ಹೋದ ತಕ್ಷಣ ಮುಖವನ್ನು ಮೃದುವಾದ ಕ್ಲೆನ್ಸರ್ನಿಂದ ತೊಳೆದು ಮಾಲಿನ್ಯವನ್ನು ನಿವಾರಿಸಿ.
ಒಟ್ಟಾರೆಯಾಗಿ, ಇದು ಯಾವುದೇ ನಿಗೂಢ ಶಕ್ತಿಯಲ್ಲ, ಬದಲಿಗೆ ಪರಿಸರದಿಂದ ಉಂಟಾಗುವ ಚರ್ಮದ ಬದಲಾವಣೆ ಅಷ್ಟೆ. ಸರಿಯಾದ ಸ್ಕಿನ್ಕೇರ್ ಮತ್ತು ಸಮತೋಲಿತ ಆಹಾರ ಕ್ರಮದ ಮೂಲಕ ನಿಮ್ಮ ನೈಸರ್ಗಿಕ ಗ್ಲೋ ಅನ್ನು ನೀವು ಕಾಪಾಡಿಕೊಳ್ಳಬಹುದು. ನಿಮ್ಮ ಬ್ಯಾಗ್ನಲ್ಲಿ ಒಂದು ಸಣ್ಣ ಟಚ್-ಅಪ್ ಕಿಟ್ ಇಟ್ಟುಕೊಳ್ಳುವುದು ಕೂಡ ದಿನದ ಕೊನೆಯಲ್ಲಿ ನೀವು ಫ್ರೆಶ್ ಆಗಿ ಕಾಣಲು ನೆರವಾಗುತ್ತದೆ.
ಇಲ್ಲಿದೆ ನೋಡಿ ವೈರಲ್ ವಿಡಿಯೋ
