ಒಂದೇ ಕುಟುಂಬದ ಮೂವರು ಸಹೋದರಿಯರು ತಮ್ಮಿಬ್ಬರ ಮಕ್ಕಳೊಂದಿಗೆ ಬಾವಿಗೆ ಬಿದ್ದು ಆತ್ಮಹತ್ಯೆ!
ಮೂವರು ಸಹೋದರಿಯರು ಓದುವ ಮೂಲಕ ಜೀವನ ಸಾಗಿಸಲು ಬಯಸಿದ್ದರು, ಆದರೆ ಅನಕ್ಷರಸ್ಥ ಮೂವರ ಗಂಡಂದಿರು ಮದ್ಯದ ಅಮಲಿನಲ್ಲಿ ಇವರ ಮೇಲೆ ಪ್ರತಿದಿನ ಹಲ್ಲೆ ನಡೆಸುತ್ತಿದ್ದರು. ಪಿತ್ರಾರ್ಜಿತ ಭೂಮಿಯನ್ನು ಮಾರುವ ಮೂಲಕ ಬಂದ ಹಣದಲ್ಲಿ ಯಾವುದೇ ಕೆಲಸ ಮಾಡದೆ ಜೀವನ ಕಳೆಯುತ್ತಿದ್ದರು.
ಜೈಪುರ (ಮೇ. 29): ರಾಜಸ್ಥಾನದಿಂದ ಹೃದಯ ವಿದ್ರಾವಕ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಜೈಪುರದ (Jaipur) ದುಡು (Dudu) ಪ್ರದೇಶದ ಬಾವಿಯೊಂದರಲ್ಲಿ ಒಂದೇ ಕುಟುಂಬದ ಐವರ ಶವ ಪತ್ತೆಯಾಗಿದ್ದು, ಪೊಲೀಸರು ಈ ಸಂಚಲನ ಮೂಡಿಸಿರುವ ಘಟನೆಯನ್ನು ಆತ್ಮಹತ್ಯೆ (Suicide) ಎಂದು ಪರಿಗಣಿಸಿದ್ದಾರೆ.
ಪೊಲೀಸರ ಪ್ರಕಾರ, ಮೃತರಲ್ಲಿ ಮೂವರು ಸಹೋದರಿಯರು (Three sisters) ಸೇರಿದ್ದಾರೆ, ಅವರು ಚಿಕ್ಕ ವಯಸ್ಸಿನಲ್ಲಿ ಒಂದೇ ಕುಟುಂಬದಲ್ಲಿ ಮದುವೆಯಾಗಿ ಇಬ್ಬರು ಮಕ್ಕಳನ್ನು ಹೊಂದಿದ್ದಾರೆ. ಇದರಲ್ಲಿ ಇಬ್ಬರು ಮಹಿಳೆಯರು ಗರ್ಭಿಣಿಯಾಗಿದ್ದರು. ಮೇ 25 ರಂದು ಮೂವರು ಸಹೋದರಿಯರು ತಮ್ಮ ಮಕ್ಕಳೊಂದಿಗೆ ಮಾರುಕಟ್ಟೆಗೆ ಹೋಗುವ ನೆಪದಲ್ಲಿ ಹೊರಗೆ ಹೋಗಿದ್ದರು, ಆದರೆ ಅವರು ಮನೆಗೆ ಹಿಂತಿರುಗದ ಕಾರಣ ಅವರ ಕುಟುಂಬಸ್ಥರು ವಿವಿಧೆಡೆ ಕಾಣೆಯಾದ ಪೋಸ್ಟರ್‌ಗಳನ್ನು ಅಂಟಿಸಿ ದೂರು ನೀಡಿದ್ದಾರೆ.
ಅದೇ ಸಮಯದಲ್ಲಿ, ಮೂವರು ಸಹೋದರಿಯರ ಸೋದರಸಂಬಂಧಿ ಹೇಮರಾಜ್ ಮೀನಾ (Hemaraj Meena), ನನ್ನ ಒಬ್ಬ ಸಹೋದರಿಯನ್ನು ಆಕೆಯ ಅತ್ತೆ ಮನೆಯವರು ಕೆಟ್ಟದಾಗಿ ಥಳಿಸಿದ್ದಾರೆ ಎಂದು ಆರೋಪ ಮಾಡಿದ್ದಾರೆ. ನಮ್ಮ ಸಹೋದರಿಯರನ್ನು ಹತ್ಯೆ ಮಾಡಲಾಗಿದೆ. ಶವ ಪತ್ತೆಗೆ ಪೊಲೀಸರು ಸಾಕಷ್ಟು ಸಮಯ ತೆಗೆದುಕೊಂಡಿದ್ದು, ಈ ನಡುವೆ ಅತ್ತೆ ಮನೆಯ ಕೆಲವು ಕುಟುಂಬ ಸದಸ್ಯರನ್ನು ಪೊಲೀಸರು ಬಂಧಿಸಿದ್ದಾರೆ. ಮೃತರನ್ನು ಕಾಳಿದೇವಿ (27), ಮಮತಾ ಮೀನಾ (23) ಮತ್ತು ಕಮಲೇಶ್ ಮೀನಾ (20) ಎಂದು ಗುರುತಿಸಲಾಗಿದೆ. ಮೃತರಲ್ಲಿ ಹರ್ಷಿತ್ (4) ಹಾಗೂ 20 ದಿನದ ಮಗುವೂ ಕೂಡ ಸೇರಿದೆ. ಮಮತಾ ಮತ್ತು ಕಮಲೇಶ್ ಗರ್ಭಿಣಿಯಾಗಿದ್ದರು.
ಮೂವರು ಮಹಿಳೆಯರಲ್ಲಿ ಒಬ್ಬರು ತಮ್ಮ ಗಂಡನ ಮನೆಯಲ್ಲಿ ಆಗುತ್ತಿರುವ ಕಿರುಕುಳದಿಂದ ಬೇಸರವಾಗಿದೆ, ಆದ್ದರಿಂದ ಸಾಯುವುದು ಉತ್ತಮ ಎಂದು ವಾಟ್ಸಾಪ್‌ನಲ್ಲಿ ಸ್ಟೇಟಸ್ ಕೂಡ ಹಾಕಿದ್ದಾರೆ ಎಂದು ಜೈಪುರ ಗ್ರಾಮಾಂತರ ಎಸ್ಪಿ ಮನೀಶ್ ಅಗರ್ವಾಲ್ ಹೇಳಿದ್ದಾರೆ. ಇದೇ ವೇಳೆ ಮೃತ ಮಹಿಳೆಯ ತಂದೆ ಗಂಡನ ಮನೆಯವರ ವಿರುದ್ಧ ವರದಕ್ಷಿಣೆಗಾಗಿ ನಿರಂತರ ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿ ಪ್ರಕರಣ ದಾಖಲಿಸಿದ್ದಾರೆ.
ಮೂವರು ಸಹೋದರಿಯರು ಓದುವ ಮೂಲಕ ಜೀವನ ಸಾಗಿಸಲು ಬಯಸಿದ್ದರು, ಆದರೆ ಅನಕ್ಷರಸ್ಥ ಮೂವರ ಗಂಡಂದಿರು ಮದ್ಯದ ಅಮಲಿನಲ್ಲಿ ಇವರ ಮೇಲೆ ಪ್ರತಿದಿನ ಹಲ್ಲೆ ನಡೆಸುತ್ತಿದ್ದರು. ಪಿತ್ರಾರ್ಜಿತ ಭೂಮಿಯನ್ನು ಮಾರುವ ಮೂಲಕ ಬಂದ ಹಣದಲ್ಲಿ ಯಾವುದೇ ಕೆಲಸ ಮಾಡದೆ ಜೀವನ ಕಳೆಯುತ್ತಿದ್ದರು.
ಮಾಹಿತಿಯ ಪ್ರಕಾರ, ಕಮಲೇಶ್ ಜೈಪುರದ ಮಹಾರಾಣಿ ಕಾಲೇಜಿನಲ್ಲಿ ಓದಿದ ನಂತರ ಸೆಂಟ್ರಲ್ ಯೂನಿವರ್ಸಿಟಿಗೆ ದಾಖಲಾಗಿದ್ದರೆ, ಆಕೆಯ ಆರೋಪಿ ಪತಿ ಐದನೇ-ಆರನೇ ತರಗತಿಯವರೆಗೆ ಮಾತ್ರ ಓದಿದ್ದ. ಅದೇ ಸಮಯದಲ್ಲಿ, ಮಮತಾ ಪೊಲೀಸ್ ಕಾನ್ಸ್‌ಟೇಬಲ್ ಪರೀಕ್ಷೆಯಲ್ಲಿ ಆಯ್ಕೆಯಾಗಿದ್ದರೆ, ಅಕ್ಕ ಕಾಳಿದೇವಿ ಬಿಎ ಅಂತಿಮ ವರ್ಷ ಓದುತ್ತಿದ್ದಳು.
Allu Arjun ವರದಕ್ಷಿಣೆ ಪಡೆದ್ರಾ? ಹೆಲಿಕಾಪ್ಟರ್‌ ಕೂಡಾ?: ಅಲ್ಲು ಬಗ್ಗೆ ಮಾವ ಹೇಳಿದ್ದೇನು?
ಪೀಪಲ್ಸ್ ಯೂನಿಯನ್ ಫಾರ್ ಸಿವಿಲ್ ಲಿಬರ್ಟೀಸ್ ಕಾರ್ಯಕರ್ತೆ ಕವಿತಾ ಶ್ರೀವಾಸ್ತವ ಈ ಪ್ರಕರಣದ ಕುರಿತು ಮಾತನಾಡಿದ್ದು, ಇಬ್ಬರು ಮಹಿಳೆಯರು ಗರ್ಭಿಣಿಯಾಗಿದ್ದು, ಅವರ ಹುಟ್ಟಲಿರುವ ಮಗುವಿನೊಂದಿಗೆ ಸಾವು ಕಂಡಿರುವ ಕಾರಣ, ಇದನ್ನು ಏಳು ಜನರು ಆತ್ಮಹತ್ಯೆ ಎಂದು ಪರಿಗಣಿಸಬೇಕು. ಇದು ಅತ್ಯಂತ ಘೋರ ಅಪರಾಧವಾಗಿದ್ದು, ಮಹಿಳೆಯರು ಅನುಭವಿಸುತ್ತಿರುವ ನೋವು ಗ್ರಹಿಕೆಗೆ ಮೀರಿದ್ದು. ಸ್ಥಳೀಯ ಪೊಲೀಸರ ಬದಲಿಗೆ ಉನ್ನತ ಸ್ಥಾನದಲ್ಲಿರುವ ಅಧಿಕಾರಿಯಿಂದ ನ್ಯಾಯಯುತ ಮತ್ತು ಸಮಗ್ರ ತನಿಖೆಯಾಗಬೇಕು ಎಂದು ಆಗ್ರಹಿಸಿದ್ದಾರೆ.
ಹಾಸನ: ವರದಕ್ಷಿಣೆ ಕಿರುಕುಳ, ಮಕ್ಕಳಾಗದಿದ್ದಕ್ಕೆ ಚಿತ್ರಹಿಂಸೆ: ಗೃಹಿಣಿ ನೇಣಿಗೆ ಶರಣು
ಒಂದೇ ದಿನ, ಒಂದೇ ಮನೆಯ ಮೂವರೊಂದಿಗೆ ಮೂವರು ಸಹೋದರಿಯರ ಮದುವೆ: ವಿಶೇಷವೆಂದರೆ, ಈ ಮೂವರೂ ಸಹೋದರಿಯರ ಮದುವೆ 2005ರಲ್ಲಿ ಒಂದೇ ದಿನ, ಒಂದೇ ಮನೆಯ ಮೂವರೊಂದಿಗೆ ನಡೆದಿತ್ತು. ಕೇವಲ ಐದು ವರ್ಷದ ಹಿಂದೆಯಷ್ಟೇ ಹಿರಿಯ ಸಹೋದರಿ ಗಂಡನ ಮನೆಗೆ ಹೋಗಿದ್ದಳು. ಉಳಿದ ಇಬ್ಬರು ಸಹೋದರಿಯರು ಕೇವಲ ಒಂದೂವರೆ ವರ್ಷದ ಹಿಂದೆ ಗಂಡನ ಮನೆಗೆ ಪ್ರವೇಶ ಪಡೆದಿದ್ದರು. ಪೊಲೀಸರ ಮಾಹಿತಿಯ ಪ್ರಕಾರ, ಮದುವೆ ಸಮಯದಲ್ಲಿ ಹಿರಿಯವಳಾದ ಕಾಳಿಗೆ 10 ವರ್ಷವಾಗಿದ್ದರೆ, ಉಳಿದಿಬ್ಬರನ್ನು ಕ್ರಮವಾಗಿ 6 ಹಾಗೂ 3 ವರ್ಷಕ್ಕೆ ಮದುವೆ ಮಾಡಲಾಗಿತ್ತು. ಇವರು ಮದುವೆಯಾಗುವ ವೇಳೆ ಇವರ ಪತಿಯರ ವಯಸ್ಸು ಕ್ರಮವಾಗಿ 13, 10 ಹಾಗೂ 5 ವರ್ಷವಾಗಿತ್ತು. ಪ್ರಕರಣಕ್ಕೆ ಸಂಬಂಧಪಟ್ಟಂತೆ, ಕಾಳಿ ದೇವಿಯ ಪತಿ ನರಸಿಂಹ ಮೀನಾ (30), ಮಮತಾ ಅವರ ಪತಿ ಜಗದೀಶ್ ಮೀನಾ (27) ಹಾಗೂ ಕಮಲೇಶ್ ಅವರ ಪತಿ ಮುಕೇಶ್ ಮೀನಾ (22) ಅವರನ್ನು ಬಂಧಿಸಲಾಗಿದೆ. ಅವರೊಂದಿಗೆ ಇವರ ತಾಯಿ ಹಾಗೂ ಸಹೋದರಿಯನ್ನೂ ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
