ವನಿತಾ ಐಪಿಎಲ್ ಹರಾಜಿಗೆ ಡೇಟ್ ಫಿಕ್ಸ್‌; 409 ಆಟಗಾರ್ತಿಯರು ಹರಾಜಿನಲ್ಲಿ ಭಾಗಿ..!
ಮಹಿಳಾ ಐಪಿಎಲ್ ಟೂರ್ನಿಯ ಹರಾಜಿಗೆ ಕ್ಷಣಗಣನೆ
ಫೆಬ್ರವರಿ 13ರ ಮಧ್ಯಾಹ್ನ 2 ಗಂಟೆಯಿಂದ ಹರಾಜು ಆರಂಭ
ಕರ್ನಾಟಕದಿಂದ 21 ಆಟಗಾರ್ತಿಯರು ಹರಾಜಿನಲ್ಲಿ ಭಾಗಿ
ಮುಂಬೈ(ಫೆ.08): ಮುಂಬರು ಫೆಬ್ರವರಿ 13ರಂದು ನಡೆಯಲಿರುವ ವುಮೆನ್ಸ್‌ ಪ್ರೀಮಿಯರ್ ಲೀಗ್‌(ಮಹಿಳಾ ಐಪಿಎಲ್)ನ ಹರಾಜು ಪ್ರಕ್ರಿಯೆಗೆ 246 ಭಾರತೀಯರು ಸೇರಿದಂತೆ ಒಟ್ಟು 409 ಆಟಗಾರ್ತಿಯರ ಅಂತಿಮ ಪಟ್ಟಿಯನ್ನು ಬಿಸಿಸಿಐ ಮಂಗಳವಾರ ಪ್ರಕಟಿಸಿದೆ. ಪಟ್ಟಿಯಲ್ಲಿ 163 ವಿದೇಶಿ ಆಟಗಾರ್ತಿಯರ ಜೊತೆಗೆ, 199 ಅಂತಾರಾಷ್ಟ್ರೀಯ ಪಂದ್ಯವಾಡದ ಆಟಗಾರ್ತಿಯರೂ ಇದ್ದಾರೆ.
ಗರಿಷ್ಠ 90 ಆಟಗಾರ್ತಿಯರು ಹರಾಜಾಗಲಿದ್ದು, 30 ಸ್ಥಾನಗಳು ವಿದೇಶಿಗರಿಗೆ ಮೀಸಲಾಗಿದೆ. ಸ್ಮೃತಿ ಮಂಧನಾ, ಹರ್ಮನ್ಪ್ರೀತ್, ಶಫಾಲಿ, ಜೆಮಿಮಾ, ದೀಪ್ತಿ, ಅಲೀಸಾ ಹೀಲಿ, ಎಲೈಸಿ ಪೆರ್ರಿ, ಸೋಫಿ ಎಕ್ಲೆಸ್ಟೋನ್ ಸೇರಿದಂತೆ 24 ಆಟಗಾರ್ತಿಯರು ಅತಿಹೆಚ್ಚು ಅಂದರೆ 50 ಲಕ್ಷ ರುಪಾಯಿ ಮೂಲ ಬೆಲೆ ಹೊಂದಿದ್ದಾರೆ. 30 ಅಟಗಾರ್ತಿಯರು 40 ಲಕ್ಷ ರು. ಮೂಲಬೆಲೆಯ ಪಟ್ಟಿಯಲ್ಲಿದ್ದಾರೆ. ಪ್ರತೀ ತಂಡಕ್ಕೆ 15ರಿಂದ 18 ಆಟಗಾರ್ತಿಯರನ್ನು ಖರೀದಿಸಲು ಅವಕಾಶವಿದ್ದು, ಗರಿಷ್ಠ 12 ಕೋಟಿ ರುಪಾಯಿ ಬಳಸಬಹುದಾಗಿದೆ. ಟೂರ್ನಿಯಲ್ಲಿ 5 ತಂಡಗಳು ಕಣಕ್ಕಿಳಿಯಲಿವೆ.
ರಾಜ್ಯದ 21 ಮಂದಿ: ಹರಾಜು ಪಟ್ಟಿಯಲ್ಲಿ ಕರ್ನಾಟಕದ 21 ಆಟಗಾರ್ತಿಯರು ಸ್ಥಾನ ಪಡೆದಿದ್ದಾರೆ. ಬಿಸಿಸಿಐನಿಂದ ಮಾನ್ಯತೆ ಪಡೆದ ದೇಶದ ರಾಜ್ಯ ಸಂಸ್ಥೆಗಳ ಪೈಕಿ ಕರ್ನಾಟಕದವರೇ ಅತಿಹೆಚ್ಚು ಮಂದಿ ಹರಾಜಿನಲ್ಲಿ ಪಾಲ್ಗೊಳ್ಳಲಿದ್ದಾರೆ.
ಈ ಸಲವೂ ಕರ್ನಾಟಕ ರನ್ನರ್‌-ಅಪ್‌
ರಾಂಚಿ: ರಾಷ್ಟ್ರೀಯ ಮಹಿಳಾ ಏಕದಿನ ಕ್ರಿಕೆಟ್‌ ಟೂರ್ನಿಯಲ್ಲಿ ಕರ್ನಾಟಕ ಸತತ 2ನೇ ಬಾರಿ ರನ್ನರ್‌-ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟಿದೆ. ಮಂಗಳವಾರ ನಡೆದ ಫೈನಲ್‌ನಲ್ಲಿ ರಾಜ್ಯ ತಂಡ ರೈಲ್ವೇಸ್‌ ವಿರುದ್ಧ 4 ವಿಕೆಟ್‌ ಸೋಲನುಭವಿಸಿತು. ಇದರೊಂದಿಗೆ ರೈಲ್ವೇಸ್‌ 16 ಆವೃತ್ತಿಗಳಲ್ಲಿ 14ನೇ ಬಾರಿ ಚಾಂಪಿಯನ್‌ ಪಟ್ಟಅಲಂಕರಿಸಿತು. ರಾಜ್ಯ ತಂಡದ ಚೊಚ್ಚಲ ಪ್ರಶಸ್ತಿ ಕನಸು ಮತ್ತೊಮ್ಮೆ ಭಗ್ನಗೊಂಡಿತು. ಕಳೆದ ಆವೃತ್ತಿಯಲ್ಲೂ ರಾಜ್ಯ ತಂಡ ರೈಲ್ವೇಸ್‌ ವಿರುದ್ಧವೇ ಫೈನಲ್‌ನಲ್ಲಿ ಪರಾಭವಗೊಂಡಿತ್ತು.
ಹೊಸ ಪೋನ್ ಕಳೆದುಕೊಂಡ ವಿರಾಟ್ ಕೊಹ್ಲಿ..! ಮಾಜಿ ನಾಯಕನ ಕಾಲೆಳೆದ ನೆಟ್ಟಿಗರು..!
ಮೊದಲು ಬ್ಯಾಟ್‌ ಮಾಡಿದ ಕರ್ನಾಟಕ 49.4 ಓವರ್‌ಗಳಲ್ಲಿ 163 ರನ್‌ಗೆ ಸರ್ವಪತನ ಕಂಡಿತು. ರಾಜ್ಯದ ಪರ ಟೂರ್ನಿಯ ಗರಿಷ್ಠ ಸ್ಕೋರರ್‌ ಎನಿಸಿಕೊಂಡಿದ್ದ ವೃಂದಾ 7 ರನ್‌ ಗಳಿಸಿ ನಿರ್ಗಮಿಸಿದರು. ನಾಯಕಿ ವೇದಾ ಕೃಷ್ಣಮೂರ್ತಿ(10), ಶಿಶಿರಾ ಗೌಡ(13) ಕೂಡ ಮಿಂಚಲಿಲ್ಲ. ಆದರೆ ದಿವ್ಯಾ 69 ರನ್‌ ಗಳಿಸಿ ತಂಡದ ಮೊತ್ತ 150ರ ಗಡಿ ದಾಟಿಸಿದರು. ಕಡಿಮೆ ರನ್‌ ಬೆನ್ನತ್ತಿದರೂ ರೈಲ್ವೇಸ್ಗೆ ಸುಲಭದಲ್ಲಿ ಗೆಲುವು ಸಿಗಲಿಲ್ಲ. 65 ರನ್‌ಗೆ 4 ವಿಕೆಟ್‌ ಕಬಳಿಸಿದ ರಾಜ್ಯದ ಬೌಲರ್‌ಗಳು ಪಂದ್ಯದ ಮೇಲೆ ಹಿಡಿತ ಸಾಧಿಸಿದರು. ಆದರೆ ಹೇಮಲತಾ(ಔಟಾಗದೆ 38), ತನುಜಾ(31) ಹೋರಾಡಿ ರೈಲ್ವೇಸ್ಗೆ 47.3 ಓವರ್‌ಗಳಲ್ಲಿ ಗೆಲುವು ತಂದುಕೊಟ್ಟರು.
ಸ್ಕೋರ್‌:
ಕರ್ನಾಟಕ 49.4 ಓವರಲ್ಲಿ 163/10 (ದಿವ್ಯಾ 69, ಪ್ರತ್ಯೂಷಾ 21, ತನುಜಾ 3-26)
ರೈಲ್ವೇಸ್‌ 47.3 ಓವರಲ್ಲಿ 169/6 (ಹೇಮಲತಾ 38*, ತನುಜಾ 31, ಶ್ರೇಯಾಂಕ 3-45)
