WPL 2023: ಎಲಿಮಿನೇಟರ್‌ನಲ್ಲಿಂದು ಮುಂಬೈ vs ಯುಪಿ ವಾರಿಯರ್ಸ್‌ ಫೈಟ್
ವುಮೆನ್ಸ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿಂದು ಎಲಿಮಿನೇಟರ್ ಪಂದ್ಯ
ನಾಕೌಟ್ ಪಂದ್ಯದಲ್ಲಿಂದು ಮುಂಬೈ ಇಂಡಿಯನ್ಸ್-ಯುಪಿ ವಾರಿಯರ್ಸ್‌ ಫೈಟ್
ಇಂದು ಗೆದ್ದ ತಂಡವು ಫೈನಲ್ ಪ್ರವೇಶ, ಡೆಲ್ಲಿ ಜತೆಗೆ ಫೈನಲ್ ಫೈಟ್
ಮುಂಬೈ(ಮಾ.24): ಚೊಚ್ಚಲ ಆವೃತ್ತಿಯ ವುಮೆನ್ಸ್ ಪ್ರೀಮಿಯರ್ ಲೀಗ್(ಡಬ್ಲ್ಯುಪಿಎಲ್‌)ನ ನಾಕೌಟ್ ಹಂತಕ್ಕೆ ವೇದಿಕೆ ಸಜ್ಜುಗೊಂಡಿದ್ದು, ಶುಕ್ರವಾರ ಎಲಿಮಿನೇಟರ್ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಹಾಗೂ ಯುಪಿ ವಾರಿಯರ್ಸ್‌ ತಂಡಗಳು ಸೆಣಸಾಡಲಿವೆ. ಲೀಗ್ ಹಂತದಲ್ಲಿ 6 ಪಂದ್ಯ ಗೆದ್ದು ಅಗ್ರಸ್ಥಾನಿಯಾದ ಡೆಲ್ಲಿ ಕ್ಯಾಪಿಟಲ್ಸ್‌ ನೇರವಾಗಿ ಫೈನಲ್ ಪ್ರವೇಶಿಸಿದ್ದು, ಪ್ರಶಸ್ತಿ ಸುತ್ತಿಗೇರುವ ಮತ್ತೊಂದು ತಂಡ ಯಾವುದೆಂದು ಶುಕ್ರವಾರ ನಿರ್ಧಾರವಾಗಲಿದೆ.
ಟೂರ್ನಿಯ ಮೊದಲ ಐದೂ ಪಂದ್ಯಗಳಲ್ಲಿ ಗೆದ್ದಿದ್ದ ಮುಂಬೈ ಬಳಿಕ 2 ಪಂದ್ಯ ಸೋತಿತ್ತು. ಕೊನೆ ಪಂದ್ಯದಲ್ಲಿ ಗೆದ್ದರೂ ನೆಟ್‌ ರನ್‌ರೇಟ್‌ ಆಧಾರದಲ್ಲಿ 2ನೇ ಸ್ಥಾನ ಪಡೆದಿದ್ದು, ನೇರವಾಗಿ ಫೈನಲ್ ಪ್ರವೇಶಿಸುವ ಅವಕಾಶ ಕಳೆದುಕೊಂಡಿತ್ತು. ಅತ್ತ ಯುಪಿ ವಾರಿಯರ್ಸ್‌ ಆಡಿದ 8 ಪಂದ್ಯಗಳಲ್ಲಿ 4ರಲ್ಲಿ ಗೆದ್ದಿದ್ದು, ಅಂಕಪಟ್ಟಿಯಲ್ಲಿ 3ನೇ ಸ್ಥಾನಿಯಾಗಿ ನಾಕೌಟ್‌ಗೇರಿದೆ. ಉಭಯ ತಂಡಗಳು ಲೀಗ್ ಹಂತದಲ್ಲಿ 2 ಬಾರಿ ಮುಖಾಮುಖಿಯಾಗಿದ್ದು, ಮೊದಲ ಪಂದ್ಯದಲ್ಲಿ ಮುಂಬೈ 8 ವಿಕೆಟ್‌ಗಳಿಂದ ಗೆದ್ದಿದ್ದರೆ, 2ನೇ ಪಂದ್ಯವನ್ನು ಯುಪಿ 5 ವಿಕೆಟ್‌ಗಳಿಂದ ಜಯಿಸಿತ್ತು. ಟೂರ್ನಿಯ ಫೈನಲ್ ಪಂದ್ಯ ಮಾರ್ಚ್‌ 26ಕ್ಕೆ ನಡೆಯಲಿದೆ.
New IPL Rules: ಐಪಿಎಲ್‌ ಅಭಿಮಾನಿಗಳು ತಿಳಿದಿರಲೇಬೇಕಾದ ಐಪಿಎಲ್‌ನಲ್ಲಿ ಬದಲಾದ ಮಹತ್ವದ ರೂಲ್ಸ್‌ಗಳಿವು..!
ಮುಂಬೈ ಇಂಡಿಯನ್ಸ್ ತಂಡವು ಬ್ಯಾಟಿಂಗ್‌ನಲ್ಲಿ ಹೆಚ್ಚಾಗಿ ಹೀಲಿ ಮ್ಯಾಥ್ಯೂಸ್, ನಥಾಲಿ ಶೀವರ್-ಬ್ರಂಟ್, ಹರ್ಮನ್‌ಪ್ರೀತ್ ಕೌರ್ ಹಾಗೂ ಯಾಶ್ತಿಕಾ ಭಾಟಿಯಾ ಅವರನ್ನು ನೆಚ್ಚಿಕೊಂಡಿದೆ. ಇನ್ನು ಆಲ್ರೌಂಡರ್‌ಗಳಾದ ಪೂಜಾ ವಸ್ತ್ರಾಕರ್, ಇಸ್ಸಿ ವಾಂಗ್ ಹಾಗೂ ಅಮೇಲಿಯಾ ಕೌರ್ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ.
ಇನ್ನೊಂದೆಡೆ ಯುಪಿ ವಾರಿಯರ್ಸ್‌ ತಂಡವು ಹೆಚ್ಚಾಗಿ ಬ್ಯಾಟಿಂಗ್‌ನಲ್ಲಿ ತಾಹಿಲಾ ಮೆಗ್ರಾಥ್ ಹಾಗೂ ಗ್ರೇಸ್ ಹ್ಯಾರಿಸ್ ಮೇಲೆ ಅವಲಂಭಿತವಾಗಿದೆ. ಸದ್ಯ ತಾಹಿಲಾ ಮೆಗ್ರಾಥ್ ಸದ್ಯ 8 ಪಂದ್ಯಗಳನ್ನಾಡಿ 295 ರನ್ ಬಾರಿಸಿದ್ದು, ಇನ್ನು ಕೇವಲ 15 ರನ್ ಬಾರಿಸಿದರೆ, ಆರೆಂಜ್ ಕ್ಯಾಪ್ ತಮ್ಮದಾಗಿಸಿಕೊಳ್ಳಲಿದ್ದಾರೆ. ಇನ್ನು ಗ್ರೇಸ್ ಹ್ಯಾರಿಸ್ ಕಳೆದ 5 ಪಂದ್ಯಗಳ ಪೈಕಿ 4 ಪಂದ್ಯಗಳಲ್ಲಿ ಕನಿಷ್ಠ 39 ರನ್ ಬಾರಿಸುವುದರೊಂದಿಗೆ ತಂಡಕ್ಕೆ ಸ್ಥಿರ ಪ್ರದರ್ಶನದ ಮೂಲಕ ನೆರವಾಗಿದ್ದಾರೆ.
ಇನ್ನು ಬೌಲಿಂಗ್‌ ವಿಭಾಗವನ್ನು ಗಮನಿಸಿದರೆ, ಯುಪಿ ವಾರಿಯರ್ಸ್‌ಗೆ ಹೋಲಿಸಿದರೆ, ಮುಂಬೈ ಇಂಡಿಯನ್ಸ್ ಸಾಕಷ್ಟು ಸಮತೋಲಿತ ಪಡೆಯನ್ನು ಹೊಂದಿದಂತೆ ಕಂಡು ಬಂದಿದೆ. ತಂಡದ ಸ್ಪಿನ್ನರ್‌ಗಳಾದ ಅಮೆಲಿಯಾ ಕೆರ್ರ್(13 ವಿಕೆಟ್, ಎರಡನೇ ಸ್ಥಾನ), ಸಾಯಿಕಾ ಇಶಾಕ್(13 ವಿಕೆಟ್, ಮೂರನೇ ಸ್ಥಾನ), ಹೀಲಿ ಮ್ಯಾಥ್ಯೂಸ್(12 ವಿಕೆಟ್, ನಾಲ್ಕನೇ ಸ್ಥಾನ) ಗರಿಷ್ಠ ವಿಕೆಟ್ ಕಬಳಿಸಿದ ಟಾಪ್ 5 ಬೌಲರ್‌ಗಳ ಪಟ್ಟಿಯಲ್ಲಿ ಮೂವರು ಬೌಲರ್‌ಗಳು ಮುಂಬೈ ತಂಡದವರು ಎನ್ನುವುದು ವಿಶೇಷ. ಇನ್ನೊಂದೆಡೆ ಯುಪಿ ವಾರಿಯರ್ಸ್‌ ಪರ ಸೋಫಿ ಎಕ್ಲೆಸ್ಟೋನ್ 14 ವಿಕೆಟ್ ಕಬಳಿಸಿ, ಪರ್ಪಲ್‌ ಕ್ಯಾಪ್ ಮುಡಿಗೇರಿಸಿಕೊಂಡಿದ್ದಾರೆ. ಸೋಫಿ ಮತ್ತೊಮ್ಮೆ ಮುಂಬೈ ಇಂಡಿಯನ್ಸ್ ಎದುರು ಜಾದೂ ಮಾಡುತ್ತಾರಾ ಎನ್ನುವುದನ್ನು ಕಾದು ನೋಡಬೇಕಿದೆ.
ಸಂಭಾವ್ಯ ತಂಡಗಳು ಹೀಗಿವೆ ನೋಡಿ:
ಮುಂಬೈ ಇಂಡಿಯನ್ಸ್;
ಹೀಲಿ ಮ್ಯಾಥ್ಯೂಸ್, ಯಾಶ್ತಿಕಾ ಭಾಟಿಯಾ(ವಿಕೆಟ್ ಕೀಪರ್), ನಥಾಲಿ ಶೀವರ್-ಬ್ರಂಟ್, ಹರ್ಮನ್‌ಪ್ರೀತ್ ಕೌರ್(ನಾಯಕಿ), ಅಮೆಲಿ ಕೆರ್ರ್, ಇಸ್ಸಿ ವಾಂಗ್, ಅಮನ್‌ಜೋತ್ ಕೌರ್, ಪೂಜಾ ವಸ್ತ್ರಾಕರ್, ಹುಮೈರಾ ಖಾಜಿ, ಜಿಂತಿಮನಿ ಕಲಿತಾ, ಸಾಯಿಕಾ ಇಶಾಕ್.
ಯುಪಿ ವಾರಿಯರ್ಸ್‌:
ದೇವಿಕಾ ವೈದ್ಯಾ, ಎಲೈಸಾ ಹೀಲಿ(ಕ್ಯಾಪ್ಟನ್&ವಿಕೆಟ್ ಕೀಪರ್), ಕಿರನ್‌ ನವಗೆರೆ, ತಾಹಿಲಾ ಮೆಗ್ರಾಥ್, ಗ್ರೇಸ್ ಹ್ಯಾರಿಸ್, ದೀಪ್ತಿ ಶರ್ಮಾ, ಸೋಫಿ ಎಕ್ಲೆಸ್ಟೋನ್, ಸಿಮ್ರಾನ್ ಶೇಖ್, ಪರ್ಸಾವಿ ಚೋಪ್ರಾ, ಅಂಜಲಿ ಶರ್ವಾಣಿ, ರಾಜೇಶ್ವರಿ ಗಾಯಕ್ವಾಡ್.
ಪಂದ್ಯ: ಸಂಜೆ 7.30ಕ್ಕೆ
ನೇರಪ್ರಸಾರ: ಸ್ಪೋರ್ಟ್ಸ್ 18, ಜಿಯೋ ಸಿನೆಮಾ
