4 ದಿನದಲ್ಲೇ 2 ಕೋಟಿಗೂ ಅಧಿಕ ವೀಕ್ಷಣೆ ಕಂಡ ವಿಜಯ್‌ ಮಲ್ಯ ಪಾಡ್‌ಕಾಸ್ಟ್‌, ಮದ್ಯದ ದೊರೆ ಫುಲ್‌ ಖುಷ್‌!

ವಂಚನೆ ಮತ್ತು ಅಕ್ರಮ ಹಣ ವರ್ಗಾವಣೆ ಆರೋಪದ ಮೇಲೆ ಭಾರತ ಸರ್ಕಾರಕ್ಕೆ ಮೋಸ್ಟ್‌ ವಾಂಟೆಡ್‌ ಆಗಿರುವ ವಿಜಯ್ ಮಲ್ಯ ಅವರ ಪಾಡ್‌ಕ್ಯಾಸ್ಟ್ 2.1 ಕೋಟಿ ವೀಕ್ಷಣೆಗಳನ್ನು ಗಳಿಸಿದೆ. ತಮ್ಮ ಜೀವನದ ಕಥೆ, ಆರೋಪಗಳು ಮತ್ತು ಭಾರತಕ್ಕೆ ಮರಳುವ ಸಾಧ್ಯತೆಯ ಬಗ್ಗೆ ಮಾತನಾಡಿದ್ದಾರೆ.

Image Credit: Screengrab@YouTube | Raj Shamani Podcast

ನವದೆಹಲಿ (ಜೂ.10): ವಂಚನೆ ಮತ್ತು ಅಕ್ರಮ ಹಣ ವರ್ಗಾವಣೆ ಆರೋಪದ ಮೇಲೆ ಭಾರತ ಸರ್ಕಾರಕ್ಕೆ ಮೋಸ್ಟ್‌ ವಾಂಟೆಂಡ್‌ ಆಗಿರುವ ವಿಜಯ್ ಮಲ್ಯ, ಯೂಟ್ಯೂಬರ್ ರಾಜ್ ಶಮಾನಿ ಅವರೊಂದಿಗೆ ನಡೆಸಿದ ಪಾಡ್‌ಕ್ಯಾಸ್ಟ್ ಭಾರೀ ವೈರಲ್‌ ಆಗಿದೆ. ಬಿಡುಗಡೆಯಾದ ನಾಲ್ಕು ದಿನಗಳಲ್ಲಿ 21 ಮಿಲಿಯನ್ ಅಂದರೆ 2.10 ಕೋಟಿ ವೀಕ್ಷಣೆಗಳನ್ನು ಗಳಿಸಿದೆ. ತಮ್ಮ ಜೀವನದ ಕಥೆ ತಿಳಿಸುವ ಪಾಡ್‌ಕಾಸ್ಟ್‌ ವೈರಲ್‌ ಆಗಿದ್ದಕ್ಕೆ ವಿಜಯ್‌ ಮಲ್ಯ ಜನರಿಗೆ ಧನ್ಯವಾದ ಹೇಳಿದ್ದಾರೆ. ತಮ್ಮ "ನಿಜವಾದ" ಕಥೆಯನ್ನು ಕೇಳಲಾಗುತ್ತಿದೆ ಎಂದು ತಿಳಿದು "ನನ್ನ ಹೃದಯ ಸಂತೋಷದಿಂದ ತುಂಬಿದೆ" ಎಂದು ಮಲ್ಯ ಹೇಳಿದ್ದಾರೆ.

ಕಿಂಗ್‌ಫಿಷರ್ ಏರ್‌ಲೈನ್ಸ್‌ನ ಮಾಜಿ ಅಧ್ಯಕ್ಷ ಶಮಾನಿ ಅವರೊಂದಿಗೆ ನಾಲ್ಕು ಗಂಟೆಗಳಿಗೂ ಹೆಚ್ಚು ಕಾಲ ಮಾತನಾಡಿದ್ದಾರೆ. ಅವರ ವಿರುದ್ಧದ ಆರೋಪಗಳು ಮತ್ತು ಅವರು ಭಾರತಕ್ಕೆ ಮರಳುವ ಸಾಧ್ಯತೆಯ ಬಗ್ಗೆ ಮಾತನಾಡಿದರು. ಪಾಡ್‌ಕ್ಯಾಸ್ಟ್ ವೇಗವಾಗಿ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

'ಬಂದಿರುವ ಪ್ರತಿಕ್ರಿಯೆ ಕಂಡು ನಾನು ವಿನಮ್ರನಾಗಿದ್ದೇನೆ ಹಾಗೂ ನನಗೆ ಏನು ಹೇಳುಬೇಕು ಅಂತಲೇ ಗೊತ್ತಾಗುತ್ತಿಲ್ಲ ಎಂದಿದ್ದಾರೆ. ರಾಜ್ ಶಮಾನಿ ಅವರೊಂದಿಗಿನ ನನ್ನ 4 ಗಂಟೆಗಳಿಗಿಂತ ಹೆಚ್ಚಿನ ಪಾಡ್‌ಕ್ಯಾಸ್ಟ್ ಅನ್ನು ವೀಕ್ಷಿಸಲು ಸಮಯ ತೆಗೆದುಕೊಂಡ ಎಲ್ಲರಿಗೂ ಹೃತ್ಪೂರ್ವಕ ಧನ್ಯವಾದಗಳು. 4 ದಿನಗಳಲ್ಲಿ ಯೂಟ್ಯೂಬ್‌ನಲ್ಲಿ 20 ಮಿಲಿಯನ್ ವೀಕ್ಷಣೆಗಳು ಬಂದಿವೆ. ಇನ್‌ಸ್ಟಾಗ್ರಾಮ್ ಮತ್ತು ಫೇಸ್‌ಬುಕ್‌ನಲ್ಲಿ ಇನ್ನೂ ಎಷ್ಟು ಮರುಪೋಸ್ಟ್‌ಗಳು ಆಗಿವೆ ಅನ್ನೋದು ಗೊತ್ತಿಲ್ಲ. ನನ್ನ ನಿಜವಾದ ಕಥೆಯನ್ನು ಕೇಳಲಾಗುತ್ತಿದೆ ಎಂದು ತಿಳಿದು ನನ್ನ ಹೃದಯ ಎಷ್ಟು ಸಂತೋಷದಿಂದ ತುಂಬಿದೆ ಅನ್ನೋದನ್ನು ದೇವರೇ ಬಲ್ಲ. ದೇವರು ನಿಮ್ಮೆಲ್ಲರನ್ನು ಆಶೀರ್ವದಿಸಲಿ" ಎಂದು ಮಲ್ಯ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಮಂಗಳವಾರ ಮಧ್ಯಾಹ್ನದ ವೇಳೆಗೆ, ವೀಡಿಯೊ 21 ಮಿಲಿಯನ್ ವೀಕ್ಷಣೆಗಳನ್ನು ದಾಟಿತ್ತು. ಈ ಪಾಡ್‌ಕ್ಯಾಸ್ಟ್ ಮಲ್ಯ ಅವರ ಮೊದಲ ವ್ಯಾಪಕ ಸಾರ್ವಜನಿಕ ಮಾತುಕತೆಗಳಲ್ಲಿ ಒಂದಾಗಿದೆ, ಅಲ್ಲಿ ಅವರು ತಮ್ಮ ಜೀವನದ ವಿವರವಾದ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ಪಾಡ್‌ಕ್ಯಾಸ್ಟ್‌ನ ಪ್ರಮುಖ ಅಂಶಗಳು

ಸಂದರ್ಶನದ ಸಮಯದಲ್ಲಿ, ಮಲ್ಯ ತಮ್ಮ ಕಾನೂನು ಸವಾಲುಗಳು, ಭಾರತ ಬಿಟ್ಟು ಓಡಿಹೋಗಿದ್ದು ಮತ್ತು ತಮ್ಮ ವಿಮಾನಯಾನ ಸಂಸ್ಥೆಯ ಕುಸಿತದ ವಿವಿಧ ಅಂಶಗಳನ್ನು ಪ್ರಸ್ತಾಪಿಸಿದರು. ಅವರನ್ನು "ಚೋರ್" (ಕಳ್ಳ) ಎಂದು ಕರೆಯುವ ಬಗ್ಗೆಯೂ ಮಾತನಾಡಿದರು.

"ಮಾರ್ಚ್ (2016) ನಂತರ ಭಾರತಕ್ಕೆ ಹೋಗದಿದ್ದಕ್ಕಾಗಿ ನನ್ನನ್ನು ಪರಾರಿಯಾಗಿದ್ದಾನೆ ಎಂದು ಕರೆಯಿರಿ. ಆದರೆ, ನಾನು ಓಡಿಹೋಗಲಿಲ್ಲ, ಪೂರ್ವ ನಿಗದಿತ ಭೇಟಿಗಾಗಿ ಭಾರತದಿಂದ ಹೋಗಿದ್ದೆ. ಆ ಬಳಿಕ, ನಾನು ಮಾನ್ಯವೆಂದು ಪರಿಗಣಿಸುವ ಕಾರಣಗಳಿಗಾಗಿ ಹಿಂತಿರುಗಲಿಲ್ಲ, ಆದ್ದರಿಂದ ನೀವು ನನ್ನನ್ನು ಪರಾರಿಯಾಗಿದ್ದಾನೆ ಎಂದು ಕರೆಯಲು ಬಯಸಿದರೆ, ಕರೆಯಬಹುದು. ಆದರೆ, ಚೋರ್‌ ಅನ್ನೋದು ಯಾಕಾಗಿ, ನಾನು ಏನನ್ನು ಕದ್ದಿದ್ದೇನೆ? ಎಂದು ಮಲ್ಯ ಹೇಳಿದ್ದಾರೆ.

2016 ರಿಂದ ಯುಕೆಯಲ್ಲಿ ವಾಸಿಸುತ್ತಿರುವ ಮಲ್ಯ, ವಿದೇಶದಲ್ಲಿ ಉಳಿಯುವುದರಿಂದ ತಮ್ಮ ಕಾನೂನು ಸಮಸ್ಯೆಗಳು ಇನ್ನಷ್ಟು ಹದಗೆಟ್ಟಿವೆಯೇ ಎಂಬ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. "ಭಾರತದಲ್ಲಿ ನ್ಯಾಯಯುತ ವಿಚಾರಣೆ ಮತ್ತು ಗೌರವಾನ್ವಿತ ಅಸ್ತಿತ್ವದ ಭರವಸೆ ಇದ್ದರೆ, ನೀವು ಹೇಳಿದ್ದು ಸರಿ ಇರಬಹುದು, ಆದರೆ ನಾನು ಹೇಳುತ್ತಿಲ್ಲ" ಎಂದು ಅವರು ಹೇಳಿದರು. ನ್ಯಾಯಯುತ ವಿಚಾರಣೆಯ ಭರವಸೆಯೊಂದಿಗೆ ಅವರು ಭಾರತಕ್ಕೆ ಹಿಂತಿರುಗುತ್ತಾರೆಯೇ ಎಂದು ಕೇಳಿದಾಗ, ಅವರು "ನನಗೆ ಭರವಸೆ ಸಿಕ್ಕರೆ, ಸಂಪೂರ್ಣವಾಗಿ. ನಾನು ಅದರ ಬಗ್ಗೆ ಗಂಭೀರವಾಗಿ ಯೋಚಿಸುತ್ತೇನೆ" ಎಂದು ಉತ್ತರಿಸಿದರು.

'ವಿಜಯ್ ಮಲ್ಯ ಪಾಡ್‌ಕ್ಯಾಸ್ಟ್: ರೈಸ್‌ & ಡೌನ್‌ಫಾಲ್‌ ಆಫ್‌ ಕಿಂಗ್‌ಫಿಷರ್ ಏರ್‌ಲೈನ್ಸ್, ಲೋನ್ಸ್‌ & ಆರ್‌ಸಿಬಿ' ಎಂಬ ಶೀರ್ಷಿಕೆಯ ಪಾಡ್‌ಕ್ಯಾಸ್ಟ್‌ನಲ್ಲಿ, ಕಿಂಗ್‌ಫಿಷರ್ ಏರ್‌ಲೈನ್ಸ್ ವಿಫಲವಾದ ನಂತರ "2012 ಮತ್ತು 2015 ರ ನಡುವೆ ಬ್ಯಾಂಕುಗಳಿಗೆ ನಾಲ್ಕು ವಿಭಿನ್ನ ಸೆಟಲ್‌ಮೆಂಟ್‌ ಆಫರ್‌ಗಳನ್ನು ನೀಡಿದ್ದೇನೆ" ಎಂದು ಮಲ್ಯ ಹೇಳಿಕೊಂಡಿದ್ದಾರೆ, ಆದರೆ ಯಾವುದನ್ನೂ ಸ್ವೀಕರಿಸಲಾಗಿಲ್ಲ. "ಇದು ಯಾವಾಗಲೋ ಮುಗಿಸುವುದು ನನ್ನ ಉದ್ದೇಶವಾಗಿತ್ತು. ನಾನು ಪಾವತಿಸಲು ಬಯಸಿಲ್ಲ ಎಂದು ನಾನು ಎಂದಿಗೂ ಹೇಳಲಿಲ್ಲ" ಎಂದು ಅವರು ಶಮಾನಿಗೆ ಹೇಳಿದರು. ಎಸ್‌ಬಿಐನ ಅಂದಿನ ಅಧ್ಯಕ್ಷರನ್ನು ನಾನು ಪ್ರಸ್ತಾವನೆಯೊಂದಿಗೆ ಭೇಟಿಯಾಗಿದ್ದೆ. ಆದರೆ, ಅವರು ನನ್ನಿಂದ 14 ಸಾವಿರ ಕೋಟಿ ಬಯಸಿದ್ದರು. ಅದಕ್ಕಾಗಿ ನನ್ನ ಪ್ರಸ್ತಾವನೆ ಒಪ್ಪಲಿಲ್ಲ ಎಂದಿದ್ದಾರೆ.

ಫೆಬ್ರವರಿಯಲ್ಲಿ ಮಲ್ಯ ಕರ್ನಾಟಕ ಹೈಕೋರ್ಟ್ ಮೊರೆ ಹೋಗಿ, ಬ್ಯಾಂಕುಗಳು ಕೈಗೊಂಡ ಸಾಲ ವಸೂಲಾತಿ ಪ್ರಕ್ರಿಯೆಯ ಬಗ್ಗೆ ಸ್ಪಷ್ಟತೆ ಕೋರಿದರು. ಎಎನ್‌ಐ ವರದಿಯ ಪ್ರಕಾರ, ಅವರ ವಕೀಲ, ಹಿರಿಯ ವಕೀಲ ಸಜನ್ ಪೂವಯ್ಯ, ಸುಮಾರು 6,200 ಕೋಟಿ ರೂ. ಮರುಪಾವತಿಸಿದ್ದರೂ, ಬ್ಯಾಂಕುಗಳು ಈಗಾಗಲೇ 14,000 ಕೋಟಿ ರೂ.ಗಳನ್ನು ವಸೂಲಿ ಮಾಡಿವೆ ಎಂದು ಹೇಳಿಕೊಂಡಿದ್ದಾರೆ. ವಸೂಲಾದ ಒಟ್ಟು ಮೊತ್ತದ ವಿವರವಾದ ಹೇಳಿಕೆಯನ್ನು ಅವರು ಬ್ಯಾಂಕುಗಳಿಂದ ಕೋರುತ್ತಿದ್ದಾರೆ.

ಮಲ್ಯ ವಿರುದ್ಧ ವಂಚನೆ, ಪಿತೂರಿ ಮತ್ತು ಹಣ ವರ್ಗಾವಣೆ ಸೇರಿದಂತೆ ಆರೋಪಗಳಿವೆ. ಅವರ ಕಂಪನಿಗಳಾದ ಕಿಂಗ್‌ಫಿಷರ್ ಏರ್‌ಲೈನ್ಸ್ ಮತ್ತು ಯುನೈಟೆಡ್ ಬ್ರೂವರೀಸ್ (ಹೋಲ್ಡಿಂಗ್ಸ್) ಲಿಮಿಟೆಡ್, ಆರೋಪದ ಉಲ್ಲಂಘನೆಗಾಗಿ ಪರಿಶೀಲನೆಯಲ್ಲಿದೆ.