ದೇವಯಾನಿಯ ಬಿರಿಯಾನಿ ಬಿಗ್ ಡೀಲ್, 419 ಕೋಟಿಗೆ ಸ್ಕೈ ಗೇಟ್ ಹಾಸ್ಪಿಟಾಲಿಟಿ ಸ್ವಾಧೀನ!
Follow Us
Synopsis
ದೇವಯಾನಿ ಇಂಟರ್ನ್ಯಾಷನಲ್ ₹419.6 ಕೋಟಿಗೆ ಸ್ಕೈ ಗೇಟ್ ಹಾಸ್ಪಿಟಾಲಿಟಿಯ 80.72% ಪಾಲನ್ನು ಸ್ವಾಧೀನಪಡಿಸಿಕೊಂಡಿದೆ. ಈ ಮೂಲಕ 'ಬಿರಿಯಾನಿ ಬೈ ಕಿಲೋ', 'ಗೋಯಿಲಾ ಬಟರ್ ಚಿಕನ್' ಮತ್ತು 'ದಿ ಭೋಜನ್' ಬ್ರ್ಯಾಂಡ್‌ಗಳು ಡಿಐಎಲ್‌ನ ಒಡೆತನಕ್ಕೆ ಬಂದಿವೆ.
ಕ್ವಿಕ್ ಸರ್ವಿಸ್ ರೆಸ್ಟೋರೆಂಟ್ (QSR) ಚೈನ್ ಆಪರೇಟರ್ ದೇವಯಾನಿ ಇಂಟರ್ನ್ಯಾಷನಲ್ ಲಿಮಿಟೆಡ್ (ಡಿಐಎಲ್) ಬೃಹತ್ ವಹಿವಾಟೊಂದರಲ್ಲಿ ‘ಬಿರಿಯಾನಿ ಬೈ ಕಿಲೋ’, ‘ಗೋಯಿಲಾ ಬಟರ್ ಚಿಕನ್’ ಹಾಗೂ ‘ದಿ ಭೋಜನ್’ ಬ್ರ್ಯಾಂಡ್‌ಗಳನ್ನು ಹೊಂದಿರುವ ಸ್ಕೈ ಗೇಟ್ ಹಾಸ್ಪಿಟಾಲಿಟಿ ಪ್ರೈವೇಟ್ ಲಿಮಿಟೆಡ್‌ನ 80.72% ಈಕ್ವಿಟಿ ಪಾಲನ್ನು ₹419.6 ಕೋಟಿಗೆ ಸ್ವಾಧೀನಪಡಿಸಿಕೊಳ್ಳಲಿದೆ ಎಂದು ಗುರುವಾರ ಘೋಷಿಸಿದೆ. ಡಿಐಎಲ್ ತನ್ನ ನಿಯಂತ್ರಕ ದಾಖಲೆ ಸಲ್ಲಿಕೆಯಲ್ಲಿ ಈ ವಿಚಾರವನ್ನು ಬಹಿರಂಗಪಡಿಸಿದ್ದು, ಸಂಸ್ಥೆಯ ಮಂಡಳಿ ಈ ವಹಿವಾಟಿಗೆ ಅನುಮೋದನೆ ನೀಡಿದೆ. ಈ ಡೀಲ್‌ಅನಂತರ ಸ್ಕೈ ಗೇಟ್ ಕಂಪನಿಯ ಅಂಗಸಂಸ್ಥೆಯಾಗಲಿದೆ ಎಂದು ತಿಳಿಸಿದೆ.
ಡಿಐಎಲ್‌ನ ವಿಸ್ತರಣೆಯ ಹಾದಿಯಲ್ಲಿ ಬಿರಿಯಾನಿ ಬೈ ಕಿಲೋ
ಸ್ಕೈ ಗೇಟ್ ಹಾಸ್ಪಿಟಾಲಿಟಿ ದೇಶದಾದ್ಯಂತ 40ಕ್ಕೂ ಹೆಚ್ಚು ನಗರಗಳಲ್ಲಿ 100ಕ್ಕೂ ಹೆಚ್ಚು ಔಟ್‌ಲೆಟ್‌ಗಳ ಮೂಲಕ ಕಾರ್ಯನಿರ್ವಹಿಸುತ್ತಿದ್ದು, 'ಹಂಡಿ ಬಿರಿಯಾನಿ' ಪರಿಕಲ್ಪನೆಯ ಮೂಲಕ ತಾಜಾ ಬಿರಿಯಾನಿ ತಯಾರಿಸಿ ತಲುಪಿಸುವಲ್ಲಿ ಅಗ್ರಗಣ್ಯತೆಯನ್ನು ಹೊಂದಿದೆ. ಈ ಸ್ವಾಧೀನವು ಡಿಐಎಲ್ ತನ್ನ ಪಾಕ್ ವಿಭಾಗದಲ್ಲಿ ಪಾದಾರ್ಪಣೆ ಹೆಚ್ಚಿಸಲು ಕೈಗೊಂಡಿರುವ ತಂತ್ರಾತ್ಮಕ ಹೆಜ್ಜೆಯಾಗಿದೆ. ಡಿಐಎಲ್ ಈಗಾಗಲೇ ಕೆಎಫ್‌ಸಿ, ಪಿಜ್ಜಾ ಹಟ್ ಮತ್ತು ಕೋಸ್ಟಾ ಕಾಫಿಯಂತಹ ಅಂತರರಾಷ್ಟ್ರೀಯ ಬ್ರ್ಯಾಂಡ್‌ಗಳನ್ನು ಫ್ರಾಂಚೈಸ್ ಆಧಾರದ ಮೇಲೆ ಕಾರ್ಯ ನಿರ್ವಹಿಸುತ್ತದೆ.
ದೂರು ಅಲ್ಲ, ಪನ್ನೀರ್ ಬದಲು ಮಟನ್ ಬಿರಿಯಾನಿ ಕೊಟ್ಟ ಸ್ವಿಗ್ಗಿಗೆ ಗ್ರಾಹಕನ ಧನ್ಯವಾದ
ಕಾರ್ಯನಿರ್ವಾಹಕ ಪ್ರತಿಕ್ರಿಯೆ
ಡಿಐಎಲ್‌ನ ಕಾರ್ಯನಿರ್ವಾಹಕೇತರ ಅಧ್ಯಕ್ಷ ರವಿ ಜೈಪುರಿಯಾ ಪ್ರತಿಕ್ರಿಯೆ ನೀಡಿ, “ನಮ್ಮ ಪೋರ್ಟ್‌ಫೋಲಿಯೊದಲ್ಲಿ ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಬ್ರ್ಯಾಂಡ್‌ಗಳಿವೆ. ಆದರೆ ಭಾರತೀಯ ಆಹಾರದ ಪರಂಪರೆಯೊಂದಿಗೆ ಲಿಂಕ್‌ ಹೊಂದಿರುವ, ಹೆಚ್ಚು ಇಷ್ಟಪಡುವ ಸ್ವಾದಗಳನ್ನೂ ಸೇರಿಸುವ ಅಗತ್ಯವಿದೆ ಎಂಬುದನ್ನು ನಾವು ಗುರುತಿಸಿದ್ದೇವೆ. ಸ್ಕೈ ಗೇಟ್‌ನೊಂದಿಗೆ ಪಾಲುದಾರಿಕೆ ಮೂಲಕ ನಾವು ಈ ಅಗತ್ಯವನ್ನು ಪೂರೈಸುತ್ತಿದ್ದೇವೆ,” ಎಂದರು.
ಸ್ಕೈ ಗೇಟ್ ಸಂಸ್ಥಾಪಕರ ಮಾತು
2015ರಲ್ಲಿ ಕೌಶಿಕ್ ರಾಯ್ ಮತ್ತು ವಿಶಾಲ್ ಜಿಂದಾಲ್ ಸ್ಥಾಪಿಸಿದ ಸ್ಕೈ ಗೇಟ್, ಭಾರತದಲ್ಲಿ ಆಹಾರ ವಿತರಣಾ ಕ್ಷೇತ್ರದಲ್ಲಿ ಪ್ರಬಲವಾದ ಸ್ಥಾನವನ್ನು ಹೊಂದಿದೆ. "ನಮ್ಮ ಬ್ರ್ಯಾಂಡ್‌ಗಳು ಅಭಿವೃದ್ಧಿಗೆ ಸೂಕ್ತ ತಾಣವನ್ನು ಕಂಡುಕೊಂಡಿವೆ ಎಂಬ ನಂಬಿಕೆ ನಮಗಿದೆ. ಗ್ರಾಹಕ ಸೇವೆ ಮತ್ತು ಅನುಭವವನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯಲು ಡಿಐಎಲ್‌ನೊಂದಿಗೆ ಜ್ಞಾನ ಮತ್ತು ಅನುಭವ ಸಂಯೋಜಿಸಲು ನಾವು ಸಜ್ಜಾಗಿದ್ದೇವೆ" ಎಂದು ಸಂಸ್ಥಾಪಕರು ಹೇಳಿದ್ದಾರೆ.
ಈ ಹಲಸಿನ ತಂದೂರಿ ಕಬಾಬ್ ಕೋಳಿ ಮಾಂಸಕ್ಕಿಂತಲೂ ರುಚಿ! ಇಲ್ಲಿದೆ ರೆಸಿಪಿ ಟ್ರೈ ಮಾಡಿ!
ಡಿಐಎಲ್‌ನ ಪೋರ್ಟ್‌ಫೋಲಿಯೊ ವಿಸ್ತರಣೆ
ಈ ವಹಿವಾಟಿನೊಂದಿಗೆ ಡಿಐಎಲ್‌ನ ಪಾಕ್ ಮತ್ತು ಪಾನೀಯ ಬ್ರ್ಯಾಂಡ್‌ಗಳ ಪೋರ್ಟ್‌ಫೋಲಿಯೊ ಈಗ 10ಕ್ಕೆ ತಲುಪಿದ್ದು, ಇತ್ತೀಚೆಗೆ ಟೀಲಿವ್, ಸನೂಕ್ ಕಿಚನ್ ಮತ್ತು ನ್ಯೂಯಾರ್ಕ್ ಫ್ರೈಸ್‌ ಕೂಡ ಸೇರ್ಪಡೆಗೊಂಡಿವೆ. "ಈ ಸ್ವಾಧೀನವು ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ QSR ಸೆಕ್ಟರ್‌ನಲ್ಲಿ ಡಿಐಎಲ್‌ನ ಮುಂಚೂಣಿಯ ಸ್ಥಾನವನ್ನು ಮತ್ತಷ್ಟು ಬಲಪಡಿಸುತ್ತದೆ" ಎಂದು ಕಂಪನಿ ತಿಳಿಸಿದೆ.
ಬಿರಿಯಾನಿ ಬೈ ಕಿಲೋ (BBK) ಅನ್ನು ಸ್ವಾಧೀನಪಡಿಸಿಕೊಳ್ಳುವ ಮೂಲಕ, ದೇವಯಾನಿಗೆ ತನ್ನ ಅಂತರರಾಷ್ಟ್ರೀಯ ಫಾಸ್ಟ್‌ಫುಡ್ ಪೋರ್ಟ್‌ಫೋಲಿಯೊಗೆ ಭಾರತೀಯ ಪಾಕಪದ್ಧತಿಯ ವೈವಿಧ್ಯತೆಯನ್ನು ಸೇರ್ಪಡೆಗೊಳಿಸಲು ಅವಕಾಶ ಸಿಗುತ್ತದೆ; ಇದರೊಂದಿಗೆ ಬಿರಿಯಾನಿ ಕ್ಷೇತ್ರದಲ್ಲಿ ತನ್ನ ಸ್ಥಾನವನ್ನು ಬಲಪಡಿಸಿ, ಮುನ್ನಡೆಯುತ್ತಿರುವ ಆದರೆ ಛಿದ್ರಗೊಂಡ ಮಾರುಕಟ್ಟೆಯಲ್ಲಿ ಗಣನೀಯ ಪಾಲು ಸಾಧಿಸಲು ಅವಕಾಶ ದೊರೆಯುತ್ತದೆ.
