ಆ.31ರೊಳಗೆ ಆಫ್ಘನ್ಗೆ ಬ್ರಿಟನ್ನೂ ಬೈ ಬೈ!
* ತಾಲಿಬಾನ್ ಕಪಿಮುಷ್ಟಿಗೆ ಸಿಲುಕಿರುವ ಅಷ್ಘಾನಿಸ್ತಾನ
* ತನ್ನ ಸೇನೆಯನ್ನು ಸಹ ಆ.31ರ ಒಳಗಾಗಿ ಸ್ವದೇಶಕ್ಕೆ ಕರೆಸಿಕೊಳ್ಳುವುದಾಗಿ ಬ್ರಿಟನ್ ಸಹ ಘೋಷಣೆ
ಲಂಡನ್(ಆ.26): ತಾಲಿಬಾನ್ ಕಪಿಮುಷ್ಟಿಗೆ ಸಿಲುಕಿರುವ ಅಷ್ಘಾನಿಸ್ತಾನದಿಂದ ತನ್ನ ಸೇನೆಯನ್ನು ಸಹ ಆ.31ರ ಒಳಗಾಗಿ ಸ್ವದೇಶಕ್ಕೆ ಕರೆಸಿಕೊಳ್ಳುವುದಾಗಿ ಬ್ರಿಟನ್ ಸಹ ಘೋಷಣೆ ಮಾಡಿದೆ.
ಆಫ್ಘನ್ನಲ್ಲಿರುವ ತನ್ನ ಸೇನೆಯನ್ನು ಈ ಹಿಂದೆ ನಿರ್ಧರಿಸಲಾದಂತೆ ಆ.31ರ ಒಳಗಾಗಿ ಕರೆಸಿಕೊಳ್ಳುವುದಾಗಿ ಅಮೆರಿಕ ಪುನರುಚ್ಚರಿಸಿದ ಬೆನ್ನಲ್ಲೇ, ಬ್ರಿಟನ್ ಸರ್ಕಾರದ ಹೇಳಿಕೆ ಹೊರಬಿದ್ದಿದೆ.
ಈ ಬಗ್ಗೆ ಬುಧವಾರ ಮಾತನಾಡಿದ ಬ್ರಿಟನ್ ವಿದೇಶಾಂಗ ಸಚಿವ ಡೊಮಿನಿಕ್ ರಾಬ್, ‘ತಾಲಿಬಾನ್ ಬಂಡುಕೋರರ ವಶವಾದ ಆಫ್ಘನ್ನಿಂದ ನಮ್ಮ ಪ್ರಜೆಗಳ ರಕ್ಷಣೆಗಾಗಿ ನಿಯೋಜಿಸಲಾಗಿರುವ ವಿಮಾನ ಕಾರ್ಯಾಚರಣೆ ಅಂತ್ಯದ ದಿನ ಖಚಿತಪಡಿಸಲಾಗದು. ಆದರೆ ಆ.31ರ ಒಳಗಾಗಿ ಈ ಮಿಷನ್ ಪೂರ್ಣಗೊಳ್ಳುವ ವಿಶ್ವಾಸವಿದೆ. ಮಾಸಾಂತ್ಯದೊಳಗೆ ನಮ್ಮ ಸೇನೆಯನ್ನು ಆಫ್ಘನ್ನಿಂದ ಹಿಂಪಡೆಯಲಾಗುತ್ತದೆ’ ಎಂದಿದ್ದಾರೆ.
ಬ್ರಿಟನ್ ಪಡೆಗಳು ಈಗಾಗಲೇ ತನ್ನ 9000 ಪ್ರಜೆಗಳನ್ನು ಕಾಬೂಲ್ ವಿಮಾನ ನಿಲ್ದಾಣದಿಂದ ರಕ್ಷಣೆ ಮಾಡಿವೆ. ಈವರೆಗೆ ಅಮೆರಿಕ ಪಡೆಗಳ ಜತೆ ಬ್ರಿಟನ್ ಸೇನೆ ಕೂಡ ಆಫ್ಘನ್ನಲ್ಲಿ ಭದ್ರತೆಗೆ ನಿಯೋಜಿತವಾಗಿತ್ತು.