ಭಾರತದ ವಿರೋಧವಿದ್ದರೂ ಲಂಕಾಗೆ ಬರಲಿದೆ ಚೀನಿ ಗೂಢಚಾರಿಕೆ ಹಡಗು
- ಆಗಸ್ಟ್ 16 ರಂದು ಶ್ರೀಲಂಕಾಗೆ ಬರಲಿರುವ ಹಡಗು
- ಸೇನಾ ನೆಲೆ, ಅಣು ಸ್ಥಾವರಕ್ಕೆ ಕಣ್ಣಿಡುವ ಭೀತಿ
- 22ರವರೆಗೆ ಚೀನಾ ನೌಕೆ ಲಂಕಾದಲ್ಲಿ ಲಂಗರು
ಭಾರತದ ವಿರೋಧದ ಹೊರತಾಗ್ಯೂ ‘ಪತ್ತೇದಾರಿ ಹಡಗು’ ಎಂದೇ ಕುಖ್ಯಾತಿ ಪಡೆದಿರುವ ‘ದ ಯಾನ್‌ ವಾಂಗ್‌ 5’ ಹೆಸರಿನ ಚೀನಾದ ಸಂಶೋಧನೆ ಹಾಗೂ ಸಮೀಕ್ಷಾ ಹಡಗು ಲಂಕಾದ ಹಂಬನ್‌ತೋಟ ಬಂದರಿಗೆ ಬರಲು ಶ್ರೀಲಂಕಾ ಸರ್ಕಾರ ಅನುಮತಿ ನೀಡಿದೆ. ಈ ಹಡಗು ಶ್ರೀಲಂಕಾ ಬಂದರಿಗೆ ಬಂದರೆ ಅದು ಪತ್ತೇದಾರಿಕೆ ಮಾಡಿ ಭಾರತದ ಸೇನಾ ನೆಲೆಗಳ ಸಮೀಕ್ಷೆ ನಡೆಸಬಹುದು ಎಂಬುದು ಭಾರತದ ಆತಂಕವಾಗಿತ್ತು. ಆಗಸ್ಟ್ 11ಕ್ಕೆ ಈ ಹಡಗು ಲಂಕಾಗೆ ಬಂದು ಲಂಗರು ಹಾಕಬೇಕಿತ್ತು. ಆದರೆ ಭಾರತದ ವಿರೋಧಕ್ಕೆ ಕೊಂಚ ಮಣಿದಿದ್ದ ಲಂಕಾ, ಹಡಗು ಆಗಮನವನ್ನು ಮುಂದೂಡಲು ಕೋರಿತ್ತು. ಆದರೆ ಈಗ ತನ್ನ ನಿಲುವು ಬದಲಾಯಿಸಿದ್ದು, ಹಡಗಿನ ಆಗಮನಕ್ಕೆ ಅನುಮತಿ ನೀಡಿದೆ. ಆಗಸ್ಟ್ 16ರಿಂದ 22ರವರೆಗೆ ಹಂಬನ್‌ತೋಟದಲ್ಲಿ ಲಂಗರು ಹಾಕಲಿದೆ.
ಈ ಸಂಬಂಧ ಮಾಹಿತಿ ನೀಡಿದ ಶ್ರೀಲಂಕಾದ ವಿದೇಶಾಂಗ ಇಲಾಖೆ, "ಸ್ನೇಹ, ಪರಸ್ಪರ ನಂಬಿಕೆ ಮತ್ತು ರಚನಾತ್ಮಕ ಸಂಭಾಷಣೆಯ ಮನೋಭಾವದಲ್ಲಿ ವಿಷಯವನ್ನು ಪರಿಹರಿಸುವ ಉದ್ದೇಶದಿಂದ, ಸಂಬಂಧಿತ "ಎಲ್ಲ ಪಕ್ಷಗಳೊಂದಿಗೆ" ರಾಜತಾಂತ್ರಿಕ ಮಾರ್ಗಗಳ ಮೂಲಕ ಉನ್ನತ ಮಟ್ಟದಲ್ಲಿ ಸಂಬಂಧಪಟ್ಟ ಪಕ್ಷಗಳು ವಿಸ್ತೃತ ಸಮಾಲೋಚನೆ ನಡೆಸಿದೆ ಎಂದು ಹೇಳಿದೆ. ಈ ಬೆಳವಣಿಗೆಗಳು "ಸಚಿವಾಲಯದೊಂದಿಗೆ ಇತ್ತೀಚಿನ ಕೆಲವು ಕಾಳಜಿಗಳ ಬೆಳಕಿನಲ್ಲಿ" ಎಂದು ಅದು ಹೇಳಿದ್ದರೂ, ಅದು ತನ್ನ ಹೇಳಿಕೆಯಲ್ಲಿ ಭಾರತವನ್ನು ಹೆಸರಿಸಿಲ್ಲ.
ಭಾರತದ ಸನಿಹ ಬರಲಿದೆ ಚೀನಾದ ಗೂಢಚಾರ ಹಡಗು, ಇದರ ವಿಶೇಷತೆ ಕೇಳಿದ್ರೆ ಅಚ್ಚರಿಯಾಗೋದು ಖಂಡಿತ!
ಇದಲ್ಲದೆ, ಜುಲೈನಲ್ಲಿ ನಿಗದಿತ ಭೇಟಿಗೆ ಒಪ್ಪಿಗೆ ನೀಡಿದಾಗ, ಭೇಟಿ ನೀಡುವ ಚೀನಾದ ಹಡಗಿನ ಸ್ವಯಂಚಾಲಿತ ಗುರುತಿನ ವ್ಯವಸ್ಥೆ (AIS) ಅನ್ನು ಶ್ರೀಲಂಕಾದ EEZ ಒಳಗೆ ಸ್ವಿಚ್ ಆನ್ ಮಾಡಬೇಕೆಂದು ಮತ್ತು ಶ್ರೀಲಂಕಾದ ನೀರಿನ ಪ್ರದೇಶದಲ್ಲಿ ಯಾವುದೇ ವೈಜ್ಞಾನಿಕ ಸಂಶೋಧನೆ ನಡೆಸುವ ಹಾಗಿಲ್ಲ ಎಂಬ ರಕ್ಷಣಾ ಸಚಿವಾಲಯದ ಷರತ್ತುಗಳನ್ನು ಆಧರಿಸಿದೆ ಎಂದು ವಿದೇಶಾಂಗ ಸಚಿವಾಲಯ ಹೇಳಿದೆ.
ಭಾರತವು "ತನ್ನ ಭದ್ರತೆ ಮತ್ತು ಆರ್ಥಿಕ ಹಿತಾಸಕ್ತಿಗಳ ಮೇಲೆ ಪ್ರಭಾವ ಬೀರುವ ಯಾವುದೇ ಬೆಳವಣಿಗೆಯನ್ನು ಎಚ್ಚರಿಕೆಯಿಂದ ಮೇಲ್ವಿಚಾರಣೆ ಮಾಡುತ್ತದೆ" ಎಂದು MEA ವಕ್ತಾರ ಅರಿಂದಮ್ ಬಾಗ್ಚಿ ಈ ಹಿಂದೆ ಹೇಳಿದ್ದರು. ಮತ್ತು ಶ್ರೀಲಂಕಾಗೆ ಈ ವಿಚಾರದಲ್ಲಿ "ಒತ್ತಡ" ವಿದೆ ಎಂಬುದನ್ನು ತಿರಸ್ಕರಿಸಿದ್ದರು. ಶ್ರೀಲಂಕಾ ಮತ್ತು ಚೀನಾ ನಡುವಿನ "ಸಾಮಾನ್ಯ ವಿನಿಮಯವನ್ನು ತೊಂದರೆಗೊಳಿಸಬೇಡಿ" ಎಂದು ಚೀನಾ ಭಾರತಕ್ಕೆ ಹೇಳಿದ ಕೆಲವು ದಿನಗಳ ನಂತರ ಕೇಂದ್ರ ಸರ್ಕಾರ ಈ ಟೀಕೆ ಮಾಡಿದೆ. ಮತ್ತು ಹಡಗು ಭೇಟಿಯ ಬಗ್ಗೆ ಭಾರತದ ಭದ್ರತಾ ಕಾಳಜಿಯನ್ನು "ಪ್ರಜ್ಞಾಶೂನ್ಯ" ಎಂದು ಕರೆದಿದೆ.
ಶ್ರೀಲಂಕಾ ಬಂದರಿಗೆ ಬರಲಿದೆ ಚೀನಾದ ಹಡಗು, ನೌಕಾಸೇನೆ ಹೈ ಅಲರ್ಟ್‌!
ಭಾರತದ ವಿರೋಧ ಏಕೆ?:
ಹಂಬನ್‌ತೋಟ ಬಂದರನ್ನು ಚೀನಾ ಅಭಿವೃದ್ಧಿಪಡಿಸಿದೆ. ಆದರೆ ಅಭಿವೃದ್ಧಿಪಡಿಸಿದ್ದಕ್ಕೆ ಶ್ರೀಲಂಕಾ ಹಣ ಪಾವತಿ ಮಾಡದ ಕಾರಣ, ಬಂದರನ್ನು 99 ವರ್ಷ ಕಾಲ ಚೀನಾ ಮೂಲದ ಕಂಪನಿಗೆ ಲೀಸ್‌ ನೀಡಿದೆ. ಈ ಬಂದರನ್ನು ಚೀನಾ ತಮ್ಮ ಮಿಲಿಟರಿ ನೆಲೆಯನ್ನಾಗಿ ಬಳಸಬಹುದು ಎಂಬುದು ಭಾರತದ ಆತಂಕಕ್ಕೆ ಕಾರಣ. ಜೊತೆಗೆ ದ ಯಾನ್‌ ವಾಂಗ್‌ ಹಡಗು, ಬಾಹ್ಯಾಕಾಶದ ಮೇಲೆ ನಿಗಾ ಇಡುವ ಸಾಮರ್ಥ್ಯ ಹೊಂದಿದೆ. ಅಂದರೆ ಅದನ್ನು ಉಪಗ್ರಹಗಳ ಮೇಲೆ ಕಣ್ಗಾವಲು ಇಡಲು, ರಾಕೆಟ್‌, ಖಂಡಾಂತರ ಕ್ಷಿಪಣಿ ಪ್ರಯೋಗದ ಮೇಲೆ ನಿಗಾ ಇಡಲು ಮತ್ತು ದಾಳಿ ನಡೆಸಲು ಬಳಸಬಹುದು. ಅಲ್ಲದೆ ಈ ನೌಕೆ ಕಲ್ಪಕಂ, ಕೂದಂಕುಳಂ ಪರಮಾಣು ಸ್ಥಾವರ, ಪರಮಾಣು ಸಂಶೋಧನಾ ಕೇಂದ್ರಗಳು, ಕೇರಳ, ತಮಿಳುನಾಡು, ಆಂಧ್ರಪ್ರದೇಶ ವ್ಯಾಪ್ತಿಯ ಬಂದರುಗಳ ಮಾಹಿತಿ ಕದಿಯಬಹುದು ಎಂಬುದು ಸರ್ಕಾರದ ಆತಂಕಕ್ಕೆ ಕಾರಣ. ಹೀಗಾಗಿ ಈ ಗೂಢಚರ ನೌಕೆ ತನ್ನ ದೇಶದ ಗಡಿಯಲ್ಲಿ ಲಂಗರು ಹಾಕುವುದಕ್ಕೆ ಭಾರತ ಆಕ್ಷೇಪ ವ್ಯಕ್ತಪಡಿಸಿತ್ತು.
