*ಶಿಕ್ಷಣ ನಿಲ್ಲುವ ಆತಂಕದಲ್ಲಿದ್ದ ಸಾವಿರಾರು ವೈದ್ಯ ವಿದ್ಯಾರ್ಥಿಗಳ ಆತಂಕ ನಿವಾರಣೆ*ಸುರಕ್ಷಿತ ಸ್ಥಳಗಳಿಂದ ಪಾಠ ಮಾಡುತ್ತಿರುವ ಶಿಕ್ಷಕರು*ಬೆಳಗ್ಗೆ 10ರಿಂದ ಸಂಜೆ 6ರವರೆಗೆ ಆನ್ಲೈನ್ ಕ್ಲಾಸ್ ಶುರು*ತರಗತಿಗೆ ಹಾಜರು ಆರಂಭಿಸಿದ ಕನ್ನಡಿಗ ವಿದ್ಯಾರ್ಥಿಗಳು
ನವದೆಹಲಿ (ಮಾ. 16): ಯುದ್ಧಪೀಡಿತ ಉಕ್ರೇನಿನಿಂದ ಭಾರತಕ್ಕೆ ಮರಳಿರುವ ವೈದ್ಯ ವಿದ್ಯಾರ್ಥಿಗಳಿಗೆ ಉಕ್ರೇನಿನ ಹಲವು ವಿಶ್ವ ವಿದ್ಯಾಲಯಗಳು ಆನ್ಲೈನ್ ತರಗತಿಗಳನ್ನು ಆರಂಭಿಸಿವೆ. ತನ್ಮೂಲಕ ವಿದ್ಯಾಭ್ಯಾಸವನ್ನು ಅರ್ಧಕ್ಕೇ ಮೊಟಕುಗೊಳಿಸಿ ಮುಂದೇನು ಎಂದು ತಿಳಿಯದೆ ಕಂಗಾಲಾಗಿದ್ದ ಭಾರತೀಯ ವೈದ್ಯ ವಿದ್ಯಾರ್ಥಿಗಳ ಆತಂಕ ನಿವಾರಣೆಯಾಗಿದೆ. ವಿಷಯ ತಿಳಿದು ಹಲವು ವಿದ್ಯಾರ್ಥಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ. ಈ ನಡುವೆ ಕೆಲ ವಿದ್ಯಾರ್ಥಿಗಳು ಪ್ರಾಯೋಗಿಕ ತರಗತಿಯಲ್ಲಿ ಪಾಲ್ಗೊಳ್ಳಲು ಸಾಧ್ಯವಿಲ್ಲ ಎಂದು ಚಿಂತಿತರಾಗಿದ್ದಾರೆ.
ಹಲವು ವಿಶ್ವವಿದ್ಯಾಲಯಗಳು ಅದರಲ್ಲೂ ಪಶ್ಚಿಮ ಉಕ್ರೇನ್ನಲ್ಲಿರುವ ವಿಶ್ವವಿದ್ಯಾಲಯಗಳು ಸೋಮವಾರದಿಂದ ಆನ್ಲೈನ್ ತರಗತಿಗಳನ್ನು ಆರಂಭಿಸಿವೆ. ಲೀವ್ ನ್ಯಾಷನಲ್ ಮೆಡಿಕಲ್ ಯುನಿವರ್ಸಿಟಿ, ಇವಾನೋ-ಫ್ರಾಂಕಿವ್ಸ್ಕ್ ಮೆಡಿಕಲ್ ಯುನಿವರ್ಸಿಟಿ, ವಿನ್ನಿಸ್ತಿಯಾ ನ್ಯಾಷನಲ್ ಪಿರೋಗೋವ್ ಮೆಡಿಕಲ್ ಯುನಿವರ್ಸಿಟಿ ಮತ್ತು ಬೊಗೋಮೊಲೆಟ್ಸ್ ನ್ಯಾಷನಲ್ ಮೆಡಿಕಲ್ ವಿಶ್ವವಿದ್ಯಾಲಯಗಳು ಸೋಮವಾರದಿಂದ ತರಗತಿ ಆರಂಭಿಸಿದೆ. ಇನ್ನೂ ಹಲವು ವಿಶ್ವವಿದ್ಯಾಲಯಗಳು ಆನ್ಲೈನ್ ತರಗತಿ ಆರಂಭಿಸಲು ಯೋಜಿಸುತ್ತಿವೆ.
ಇದನ್ನೂ ಓದಿ: Russia-Ukraine War: 20 ದಿನವಾದರೂ ನಿಲ್ಲದ ಯುದ್ಧ: ಅಕ್ಷರಶಃ ಸ್ಮಶಾನವಾದ ಉಕ್ರೇನ್..!
ರಷ್ಯಾ ಪಡೆಗಳ ಬಾಂಬ್ ಮತ್ತು ಶೆಲ್ ದಾಳಿಯ ನಡುವೆಯೂ ಶಿಕ್ಷಕರು ತಮ್ಮ ಮನೆಗಳಿಂದ ಅಥವಾ ಸುರಕ್ಷಿತ ಸ್ಥಳಗಳಿಂದ ತರಗತಿ ನಡೆಸುತ್ತಿದ್ದಾರೆ. ಪರೀಕ್ಷೆಯನ್ನೂ ಆನ್ಲೈನ್ ಮೂಲಕವೇ ನಡೆಸುವುದಾಗಿ ತಿಳಿಸಿದ್ದಾರೆ ಎಂದು ಭಾರತೀಯ ವಿದ್ಯಾರ್ಥಿಗಳು ತಿಳಿಸಿದ್ದಾರೆ.ಉಕ್ರೇನ್ ಮೇಲೆ ರಷ್ಯಾ ಭೀಕರ ದಾಳಿ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ‘ಆಪರೇಷನ್ ಗಂಗಾ’ ಕಾರಾರಯಚರಣೆ ಮೂಲಕ 20,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಉಕ್ರೇನ್ನಿಂದ ಸ್ಥಳಾಂತರಿಸಲಾಗಿದೆ.
ಯುದ್ಧ ಮುಗಿಯಲಿದೆ, ನಂತರ ಬನ್ನಿ ಎನ್ನುತ್ತಿರುವ ವಿವಿಗಳು: ಯುದ್ಧಪೀಡಿತ ಉಕ್ರೇನ್ನಿಂದ ಗಾಬರಿ, ಆತಂಕದಿಂದ ಓಡೋಡಿ ತವರಿಗೆ ಬಂದಿದ್ದ ವೈದ್ಯ ವಿದ್ಯಾರ್ಥಿಗಳನ್ನು ಇದೀಗ ಅಲ್ಲಿನ ಕೆಲ ವಿವಿಗಳು ಹಲೋ, ಹೇಗಿದ್ದೀರಿ? ಹೇಗೆ ತಲುಪಿದಿರಿ? ಎಂದು ಕರೆ ಮಾಡಿ ವಿಚಾರಿಸಲಾರಂಭಿಸಿವೆ. ಯುದ್ಧದ ನಡುವೆ ಸೋಮವಾರದಿಂದ ಆನ್ಲೈನ್ ತರಗತಿಯನ್ನೂ ಆರಂಭಿಸಿವೆ. ಯುದ್ಧ ಶೀಘ್ರ ಅಂತ್ಯವಾಗಲಿದೆ. ಪ್ರ್ಯಾಕ್ಟಿಕಲ್ ಆರಂಭಗೊಳ್ಳುವ ಮುನ್ನ ಮತ್ತೆ ಉಕ್ರೇನ್ಗೆ ಬಂದುಬಿಡಿ ಎಂದು ಕೆಲ ಪ್ರಾಧ್ಯಾಪಕರು ಹೇಳಲಾರಂಭಿಸಿದ್ದಾರೆ.
ಉಕ್ರೇನ್ನ ಪಶ್ಚಿಮ ಭಾಗದಲ್ಲಿರುವ ಇವಾನೋ ನ್ಯಾಷನಲ್ ಮೆಡಿಕಲ್ ಕಾಲೇಜಿನ ದ್ವಿತೀಯ ವರ್ಷದ ವಿದ್ಯಾರ್ಥಿನಿಯರಾದ ಬಳ್ಳಾರಿಯ ಸಭಾ ಕೌಸರ್ ಹಾಗೂ ತಯ್ಯಾಬಾ ಕೌಸರ್ ಸೋದರಿಯರಿಗೆ ಬೆಳಗ್ಗೆ 10ರಿಂದ ಸಂಜೆ 6ರ ವರೆಗೆ ತರಗತಿಗಳು ನಡೆಯುತ್ತಿವೆ. ಮಧ್ಯೆ 20 ನಿಮಿಷಗಳ ವಿಶ್ರಾಂತಿ. ಎಲ್ಲ ವಿಷಯಗಳ ಪ್ರಾಧ್ಯಾಪಕರು ಮೆಡಿಕಲ್ ಕಾಲೇಜಿನಿಂದಲೇ ತರಗತಿ ನಡೆಸುತ್ತಿದ್ದಾರೆ.
‘ನಮಗೆ ಯಾವುದೇ ಯುದ್ಧ ಭೀತಿ ಇಲ್ಲ. ನಮ್ಮ ಭಾಗದಲ್ಲಿ ರಷ್ಯಾ ಸೇನೆ ದಾಳಿ ನಡೆಸುತ್ತಿಲ್ಲ. ನಾವು ನಿರಾಳವಾಗಿದ್ದೇವೆ. ಯುದ್ಧ ಶೀಘ್ರ ಅಂತ್ಯವಾಗಲಿದೆ. ಪ್ರಾಕ್ಟಿಕಲ್ ಆರಂಭಗೊಳ್ಳುವ ಮುನ್ನ ಮತ್ತೆ ಉಕ್ರೇನ್ಗೆ ಬಂದುಬಿಡಿ’ ಎಂದು ಅಧ್ಯಾಪಕರು ಹೇಳುತ್ತಿದ್ದಾರಂತೆ.
ಇದನ್ನೂ ಓದಿ: Russia Ukraine War: ಚೀನಾದಿಂದ ಸೇನಾ ನೆರವು ಕೋರಿದ ರಷ್ಯಾ?: ಅಮೆರಿಕ ಗಂಭೀರ ಆರೋಪ!
ಪಾಠ ಸರಿಯಾಗಿ ಅರ್ಥವಾಗದಿದ್ದರೆ ಹೇಳಿ, ಹೆಚ್ಚುವರಿ ತರಗತಿ ನಡೆಸಲು ಸಿದ್ಧರಿದ್ದೇವೆ. ಯುದ್ಧದ ಸ್ಥಿತಿಯಲ್ಲೂ ನಾವು ಮಾನಸಿಕವಾಗಿ ಗಟ್ಟಿಯಾಗಿದ್ದೇವೆ. ನಿಮ್ಮ ಶಿಕ್ಷಣ ಕುಂಠಿತವಾಗಬಾರದು ಎಂಬುದಷ್ಟೇ ನಮ್ಮ ಕಾಳಜಿ ಎಂದು ಅಧ್ಯಾಪಕರು ತಿಳಿಸಿದ್ದಾರೆಂದು ಹೇಳುತ್ತಾರೆ ಕೌಸರ್ ಸೋದರಿಯರು.
ಇನ್ನು ರೊಮೋನಿಯಾದಿಂದ 40 ಕಿ.ಮೀ. ದೂರದ ಬುಕೊವೆನಿಯಾ ವಿವಿಯ ದ್ವಿತೀಯ ವರ್ಷದ ಎಂಬಿಬಿಎಸ್ ವಿದ್ಯಾರ್ಥಿನಿ ಮೈಸೂರಿನ ಪ್ರಿಯಾಂಕಾಗೆ ಕೆಲ ವಿಷಯಗಳ ತರಗತಿಗಳು ಮಾತ್ರ ನಡೆಯುತ್ತಿವೆ. ಕಾರಣ ವಿವಿಯ ಇಬ್ಬರು ಪ್ರಾಧ್ಯಾಪಕರು ಸೇನೆಗೆ ಸೇರ್ಪಡೆಗೊಂಡಿರುವುದರಿಂದ ಅವರು ತರಗತಿ ತೆಗೆದುಕೊಳ್ಳುತ್ತಿಲ್ಲವಂತೆ.
‘ನಮ್ಮ ಕೆಲ ಪ್ರೊಫೆಸರ್ಗಳು ಕ್ಲಾಸ್ ತೆಗೆದುಕೊಳ್ಳುತ್ತಿಲ್ಲ, ಯಾರಾರಯರಿಗೆ ಏನೇನು ಆಗಿದೆಯೋ ಎಂಬುದೇ ಗೊತ್ತಾಗುತ್ತಿಲ್ಲ’ ಎನ್ನುತ್ತಾನೆ ಒಡಿಸಿ ನ್ಯಾಷನಲ್ ಕಾಲೇಜಿನ 2ನೇ ವರ್ಷದ ಎಂಬಿಬಿಎಸ್ ವಿದ್ಯಾರ್ಥಿ, ಕೋಲಾರದ ವಿಶಾಲ್.
ಯುದ್ಧ ನಡೆಯುತ್ತಿದ್ದರೂ ವಿವಿಯವರು ಶಿಕ್ಷಣಕ್ಕೆ ಆದ್ಯತೆ ನೀಡುತ್ತಿದ್ದಾರೆ. ಇದಕ್ಕೆ ಆನ್ಲೈನ್ ಕ್ಲಾಸ್ ಸಾಕ್ಷಿ. ಆನ್ಲೈನ್ ಕ್ಲಾಸ್ದಿಂದ ಸಮಸ್ಯೆಯಾಗುತ್ತದೆ ಎನ್ನುವುದಕ್ಕಿಂತ ಯುದ್ಧದ ಸಂದರ್ಭದಲ್ಲೂ ವಿದ್ಯಾರ್ಥಿಗಳ ಬಗ್ಗೆ ಇಷ್ಟೊಂದು ಕಾಳಜಿ ಮಾಡುತ್ತಾರಲ್ಲ ಎನ್ನುವುದೇ ಸಮಾಧಾನ.
