ಮದುವೆಯಾಗದೆ ಸಿಂಗಲ್ಲಾಗಿರೋ ಪುರುಷರಿಗೆ ಪ್ರವೇಶ ನಿಷೇಧಿಸಿದ ಮೃಗಾಲಯ! ಕಾರಣವೇನು?
ಜಪಾನ್‌ನ ಹೀಲಿಂಗ್ ಪೆವಿಲಿಯನ್ ಮೃಗಾಲಯವು ಒಂಟಿ ಪುರುಷ ಸಂದರ್ಶಕರ ಪ್ರವೇಶವನ್ನು ನಿಷೇಧಿಸಿದೆ. ಖಾಸಗಿ ಸಂಸ್ಥೆಯಿಂದ ಆರಂಭಿಸಲಾದ ಮೃಗಾಲಯದ ನಿರ್ದೇಶಕಿ ಹೇಳಿಕೆ ಹಾಗೂ ನೋಟೀಸ್‌ನಿಂದ ಪುರುಷರು ಶಾಕ್ ಆಗಿದ್ದಾರೆ.
Followಖಾಸಗಿ ಸಂಸ್ಥೆಯೊಂದರಿಂದ ಸರ್ಕಾರಿ ಸಹಭಾಗಿತ್ವದಲ್ಲಿ ನಿರ್ಮಾಣ ಮಾಡಿಕೊಂಡಿರುವ ಮೃಗಾಲಯಕ್ಕೆ ಒಂಟಿಯಾಗಿ ಭೇಟಿ ನೀಡುವ ಪುರುಷರಿಗೆ ಪ್ರವೇಶ ನಿಷೇಧಿಸಿದೆ. ಒಂಟಿಯಾಗಿ ಬರುವ ಪುರುಷರಿಂದ ಮೃಗಾಲಯದ ಮಹಿಳಾ ಸಿಬ್ಬಂದಿಗೆ ನಿರಂತರ ಕಿರುಕುಳವನ್ನು ಎದುರಿಸಬೇಕಾಗಿ ಬಂದಿದ್ದರಿಂದ ಮೃಗಾಲಯದ ಅಧಿಕಾರಿಗಳು ಈ ನಿರ್ಧಾರವನ್ನು ಜಾರಿಗೆ ತಂದಿದ್ದಾರೆ.
ಪೂರ್ವ ಜಪಾನ್‌ನ ಟೋಚಿಗಿ ಪ್ರಿಫೆಕ್ಚರ್‌ನಲ್ಲಿರುವ ಹೀಲಿಂಗ್ ಪೆವಿಲಿಯನ್ ಎಂಬ ಮೃಗಾಲಯವು ಪುರುಷರಿಗೆ ಈ ನಿಷೇಧವನ್ನು ವಿಧಿಸಿದೆ. ಪ್ರಾಣಿಗಳೊಂದಿಗೆ ಸಂವಹನ ನಡೆಸಲು, ಅವುಗಳಿಗೆ ಆಹಾರ ನೀಡಲು ಮತ್ತು ಅವುಗಳೊಂದಿಗೆ ಸಮಯ ಕಳೆಯಲು ಸಂದರ್ಶಕರಿಗೆ ಅವಕಾಶ ನೀಡುವ ಟೋಚಿಗಿಯಲ್ಲಿರುವ ಒಂದು ಪ್ರಸಿದ್ಧ ಮೃಗಾಲಯವಾಗಿದೆ ಹೀಲಿಂಗ್ ಪೆವಿಲಿಯನ್. ಆದರೆ, ಇಲ್ಲಿಗೆ ಒಂಟಿಯಾಗಿ ಬರುವ ಪುರುಷ ಸಂದರ್ಶಕರಿಂದ ಮೃಗಾಲಯದ ಸಿಬ್ಬಂದಿಗೆ ಕೆಟ್ಟ ಅನುಭವಗಳನ್ನು ಎದುರಿಸಬೇಕಾಗಿ ಬಂದಿದ್ದರಿಂದ ಮೃಗಾಲಯವು ಈ ಕಠಿಣ ನಿರ್ಧಾರವನ್ನು ತೆಗೆದುಕೊಂಡಿದೆ.
ಕಳೆದ ಮಾರ್ಚ್‌ನಲ್ಲಿ ಈ ಮೃಗಾಲಯವು ಕಾರ್ಯಾರಂಭ ಮಾಡಿತು. ಪ್ರಾಣಿಗಳೊಂದಿಗೆ ಸಂವಹನ ನಡೆಸುವ ಮೂಲಕ ಜನರ ಮಾನಸಿಕ ಆರೋಗ್ಯವನ್ನು ಹೆಚ್ಚಿಸುವುದು ಈ ಮೃಗಾಲಯದ ಉದ್ದೇಶ. ಆದ್ದರಿಂದ, ಇಲ್ಲಿಗೆ ಬರುವ ಸಂದರ್ಶಕರು ತಮ್ಮ ಸಾಕುಪ್ರಾಣಿಗಳನ್ನು ಸಹ ಕರೆತರಬಹುದು. ಅವುಗಳೊಂದಿಗೆ ಸಮಯ ಕಳೆಯಲು ಪ್ರತ್ಯೇಕವಾಗಿ ತಯಾರಿಸಲಾದ ಒಂದು ಉದ್ಯಾನವನವೂ ಈ ಮೃಗಾಲಯದಲ್ಲಿದೆ.
ಇದನ್ನೂ ಓದಿ: ಹುಲಿ ಮೂತ್ರ ಮಾರಾಟ ಮಾಡಿದ ಮೃಗಾಲಯ: ಸಂಧಿವಾತಕ್ಕೆ ರಾಮಬಾಣವೆಂದು ಜನರಿಗೆ ವಂಚನೆ?
ಜನವರಿ 26 ರಂದು ಮೃಗಾಲಯದ ನಿರ್ದೇಶಕಿ ಮಿಸಾ ಮಾಮಾ ಅವರು ಒಬ್ಬಂಟಿ ಪುರುಷ ಸಂದರ್ಶಕರಿಗೆ ನಿರ್ಬಂಧವನ್ನು ವಿಧಿಸುವ ಪ್ರಕಟಣೆಯನ್ನು ಹೊರಡಿಸಿದರು. ಪುರುಷ ಸಂದರ್ಶಕರು ಒಂಟಿಯಾಗಿ ಮೃಗಾಲಯಕ್ಕೆ ಬರುವುದನ್ನು ನಿಷೇಧಿಸಲಾಗಿದೆ ಎಂದು ಅವರ ಸಾಮಾಜಿಕ ಮಾಧ್ಯಮ ಪೋಸ್ಟ್‌ ಮೂಲಕ ತಿಳಿಸಿದ್ದಾರೆ. ಇದನ್ನು ಸೂಚಿಸುವ ನೋಟಿಸ್ ಅನ್ನು ಮೃಗಾಲಯದ ಪ್ರವೇಶ ದ್ವಾರದಲ್ಲಿಯೂ ಅಂಟಿಸಲಾಗಿದೆ.
ಮೃಗಾಲಯದ ಆರಂಭದಿಂದಲೂ, ಸಂದರ್ಶಕರಲ್ಲಿ ಹೆಚ್ಚಿನವರು ಕುಟುಂಬಗಳು ಅಥವಾ ದಂಪತಿಗಳಾಗಿದ್ದರು ಎಂದು ಮಿಸಾ ಮಾಮಾ ಹೇಳುತ್ತಾರೆ. ಆದರೆ, ಇತ್ತೀಚೆಗೆ ಒಂಟಿ ಪುರುಷ ಸಂದರ್ಶಕರು ಹೆಚ್ಚಾಗಿದ್ದು, ಅವರು ಮಹಿಳಾ ಸಿಬ್ಬಂದಿಗೆ ಕಿರುಕುಳ ನೀಡುತ್ತಿದ್ದಾರೆ. ಪುರುಷರ ಬಗ್ಗೆ ತನಗೆ ಪೂರ್ವಾಗ್ರಹಗಳಿಲ್ಲ, ಆದರೆ ಮೃಗಾಲಯದ ಸುಗಮ ನಿರ್ವಹಣೆಗೆ ನಿರ್ದೇಶಕಿಯಾಗಿ ಈ ಕಠಿಣ ನಿರ್ಧಾರವನ್ನು ತೆಗೆದುಕೊಳ್ಳಬೇಕಾಯಿತು ಎಂದು ಅವರು ಹೇಳುತ್ತಾರೆ. ಈ ಸುದ್ದಿ ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆಯಾದ ನಂತರ, ಅನೇಕ ಸಾಮಾಜಿಕ ಮಾಧ್ಯಮ ಬಳಕೆದಾರರು ಈ ನಿರ್ಧಾರವನ್ನು ಬೆಂಬಲಿಸಿದ್ದಾರೆ.
ಇದನ್ನೂ ಓದಿ: ₹40 ಕೋಟಿಗೆ ಮಾರಾಟವಾದ ನೆಲ್ಲೂರು ತಳಿ ಹಸು; ತೂಕ, ಬೆಲೆಯಲ್ಲಿ ಗಿನ್ನೆಸ್ ದಾಖಲೆ
(ಎಐ ಸಾಂಕೇತಿಕ ಚಿತ್ರ)
