ಸೀತಾರಾಮ ಸೀರಿಯಲ್ ಸೆಟ್ ಹೇಗಿದೆ? ಶೂಟಿಂಗ್ ಹೇಗೆ ಮಾಡ್ತಾರೆ? ವಿಡಿಯೋ ಮೂಲಕ ವೈಷ್ಣವಿ ಮಾಹಿತಿ
ಸೀತಾರಾಮ ಸೀರಿಯಲ್ನ ಶೂಟಿಂಗ್ ಸೆಟ್ ಅನ್ನು ಹೇಗೆ ರೂಪಿಸಲಾಗಿದೆ ಎಂಬ ಬಗ್ಗೆ ಸೀತಾ ಪಾತ್ರಧಾರಿ ವೈಷ್ಣವಿ ಅವರು ವಿಡಿಯೋ ಮೂಲಕ ಮಾಹಿತಿ ನೀಡಿದ್ದಾರೆ.
Followಪ್ರತಿಯೊಬ್ಬ ನಟ-ನಟಿಯರು ಅವರ ಮನೆಗಿಂತಲೂ ಹೆಚ್ಚಾಗಿ ಶೂಟಿಂಗ್ ಸ್ಪಾಟ್ನಲ್ಲಿಯೇ ಇರುತ್ತಾರೆ. ಸಿನಿಮಾಗಳಲ್ಲಿ ಈ ಸ್ಪಾಟ್ ವಿಭಿನ್ನ ಪ್ರದೇಶಗಳಲ್ಲಿ ನಡೆದರೆ, ಸಾಮಾನ್ಯವಾಗಿ ಸೀರಿಯಲ್ಗಳಲ್ಲಿ ಒಂದೇ ಕಡೆ ಸೆಟ್ ಮಾಡಿ ಅಲ್ಲಿಯೇ ಸಂಪೂರ್ಣ ಚಿತ್ರೀಕರಣ ನಡೆಯುತ್ತದೆ. ಇದೇ ಕಾರಣಕ್ಕೆ ಸಂಪೂರ್ಣ ವಾತಾವರಣವನ್ನೇ ಬದಲಾಯಿಸಲಾಗುತ್ತದೆ. ಒಂದು ಸೀರಿಯಲ್ ಐದಾರು ವರ್ಷಗಳು ನಡೆಯುವ ಕಾರಣ, ಇಲ್ಲಿ ಸೆಟ್ ಅತ್ಯಂತ ಪ್ರಾಮುಖ್ಯತೆ ವಹಿಸುತ್ತದೆ. ಬೆಂಗಳೂರಿನಂಥ ನಗರಗಳಲ್ಲಿ ಶೂಟಿಂಗ್ ಮನೆಗಳನ್ನು ಕಟ್ಟಿ ಅದನ್ನು ಬಾಡಿಗೆಗೆ ಕೊಡುವುದು ಇದೆ. ಇನ್ನು ಕೆಲವು ಸೀರಿಯಲ್ಗಳಲ್ಲಿ ತಮಗೆ ಬೇಕಾದಂತೆ ಹಳ್ಳಿಯ ವಾತಾವರಣ ನಿರ್ಮಾಣ ಮಾಡಿಕೊಂಡೋ ಅಥವಾ ಓಣಿ, ವಠಾರದ ರೀತಿಯಲ್ಲಿ ನೈಜ ಚಿತ್ರಣ ಬರುವಂತೆ ಶೂಟಿಂಗ್ ಮನೆಗಳನ್ನು ನಿರ್ಮಿಸಿಕೊಂಡಿರುತ್ತಾರೆ.
ಅದೇ ಒಂದು ಶೂಟಿಂಗ್ ಮನೆಯ ಚಿತ್ರಣವನ್ನು ತೋರಿಸಿದ್ದಾರೆ ನಟಿ ವೈಷ್ಣವಿ ಆರ್.ಬಿ.ಗೌಡ ಅರ್ಥಾತ್ ಜೀ ಕನ್ನಡ ಸೀರಿಯಲ್ನಲ್ಲಿ ಪ್ರಸಾರ ಆಗ್ತಿರೋ ಸೀತಾರಾಮ ಸೀರಿಯಲ್ ಸೀತಾ. ವೈಷ್ಣವಿ ಅವರು ಇದಾಗಲೇ ತಮ್ಮ ಸೋಷಿಯಲ್ ಮೀಡಿಯಾಗಳಲ್ಲಿ ಹಲವಾರು ವಿಷಯಗಳನ್ನು ಶೇರ್ ಮಾಡಿಕೊಳ್ಳುತ್ತಿರುತ್ತಾರೆ. ಇದೀಗ ತಮ್ಮ ಎರಡನೆಯ ಮನೆ ಎಂದೇ ಖ್ಯಾತಿ ಪಡೆದಿರುವ ಸೀತಾರಾಮ ಸೀರಿಯಲ್ ಸೆಟ್ ಕುರಿತು ಮಾಹಿತಿ ನೀಡಿದ್ದಾರೆ. ಮನೆಗಿಂತ ಸೆಟ್ನಲ್ಲಿ ಹೆಚ್ಚು ಹೊತ್ತು ಶೂಟಿಂಗ್ ಸೆಟ್ನಲ್ಲಿ ಇರುವುದರಿಂದ ಇದು ನಮ್ಮ ಸೆಕೆಂಡ್ ಮನೆ ಆಗಿದೆ. ಶೂಟಿಂಗ್ ಸಮಯದಲ್ಲಿ ಥೇಟ್ ವಠಾರ ಹಾಗೂ ಮನೆಯ ಚಿತ್ರವಣವನ್ನು ಇಲ್ಲಿ ಮಾಡಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಕಾಂತಾರ-1 ಚಿತ್ರದಲ್ಲಿ ನಟಿಸೋ ಆಸೆಯಿದ್ಯಾ? ಕಲಾವಿದರಿಗೆ ಇದೋ ಇಲ್ಲಿದೆ ಸುವರ್ಣಾವಕಾಶ...
ಸಾಮಾನ್ಯವಾಗಿ ಹಳ್ಳಿಗಳಲ್ಲಿ ಇರುವಂತೆ ಗೋಡೆಗಳ ಮೇಲೆ ಪೋಸ್ಟರ್ಗಳನ್ನು ಹಾಕಲಾಗುತ್ತದೆ. ಕಾಂಪೌಂಡ್ ಅಂತೆ ತೋರುವ ಗೋಡೆಗಳನ್ನೂ ಹಾಕಲಾಗುತ್ತದೆ. ಆದರೆ ಅಸಲಿಗೆ ಅದು ಗೋಡೆಗಳಲ್ಲ, ಬದಲಿಗೆ ಅದನ್ನೇ ಹೋಲುವ ರೀತಿಯಲ್ಲಿ ಕಟ್ಟಿಗೆಗಳ ಮೇಲೆ ಕ್ರೇಪ್ ವರ್ಕ್ ಮಾಡಿರುತ್ತಾರೆ. ಇದು ಸೆಟ್ ಆಗಿರುವ ಕಾರಣ, ನಿಜವಾದ ಗೋಡೆ ಅಂತ ಅನಿಸುತ್ತದೆ. ಸಾಮಾನ್ಯವಾಗಿ ಗೋಡೆಯನ್ನು ಯಾರೂ ಏರಬಾರದು ಎಂದು ಗಾಜು ಹಾಕಿಡಲಾಗುತ್ತದೆ. ಅದೇ ನೈಜತೆ ಕಾಣಿಸಲು ಸೀತಾರಾಮ ಸೀರಿಯಲ್ನ ನಕಲಿ ಗೋಡೆಗಳ ಮೇಲೂ ಗಾಜು ಹಾಕಲಾಗಿದೆ ಎಂಬ ಬಗ್ಗೆ ತೋರಿಸಿಕೊಟ್ಟಿದ್ದಾರೆ ವೈಷ್ಣವಿ.
ಶೂಟಿಂಗ್ ಸೆಟ್ನಲ್ಲಿಯೇ ಅಂಗಡಿಗಳೂ ಇವೆ. ಬೆಳಿಗ್ಗೆ ಎದ್ದು ತಕ್ಷಣ ನಂದಿನಿ ಪಾರ್ಲರ್ನಿಂದ ನಮ್ಮ ದಿನ ಪ್ರಾರಂಭವಾಗುತ್ತದೆ ಎಂದಿರುವ ನಟಿ, ಸೆಟ್ನಲ್ಲಿ ಸಿಗುವ ಪ್ರೊವಿಷನ್ ಸ್ಟೋರ್ಸ್, ಕಾಫಿ ಅಂಗಡಿಯ ಮಾಹಿತಿ ನೀಡಿದ್ದಾರೆ. ವಠಾರದಂತೆ ಕಾಣಿಸಲು ಒಂದು ಕಟ್ಟೆ ಅಲ್ಲೊಂದು ಹುಣಸೆ ಮರ ಹೇಗೆ ಸೆಟ್ ಮಾಡಲಾಗಿದೆ ಎಂಬ ಅಂಶವನ್ನು ತೋರಿಸಿದ್ದಾರೆ.
ಅಲ್ಲಿಂದ ವಠಾರದ ಒಳಗೆ ನಮ್ಮನ್ನು ಕರೆದುಕೊಂಡು ಹೋಗಿರುವ ವೈಷ್ಣವಿ, ಅಲ್ಲಿ ಶಾಂತಮ್ಮನ ವಠಾರ ಬೋರ್ಡ್ ತೋರಿಸಿದ್ದಾರೆ. ಮಿಡ್ಲ್ ಕ್ಲಾಸ್ ಮನೆಯ ಸಂಪೂರ್ಣ ಚಿತ್ರಣ ಈ ಸೆಟ್ನಲ್ಲಿ ತೋರಿಸಲಾಗಿದೆ. ಗಾಜು ಒಡೆದದ್ದು, ಬಟ್ಟೆ ಒಣ ಹಾಕುವುದು ಎಲ್ಲವನ್ನೂ ನೈಜತೆ ಬರುವಂತೆ ಸೆಟ್ನಲ್ಲಿ ಇಡಲಾಗಿದೆ. ಎಲ್ಲಾ ಡಿಟೇಲ್ಗಳನ್ನು ನಟಿ ತೋರಿಸಿದ್ದಾರೆ. ಸಾಮಾನ್ಯವಾಗಿ ವಠಾರಗಳಲ್ಲಿ ನೀರು ಹಿಡಿಯಬೇಕಾದರೆ ಜಗಳವಾಗುವುದು ಮಾಮೂಲು. ಆದ್ರೆ ಸೀತಾರಾಮದಲ್ಲಿ ಹೀಗೆ ಇರದ ಕಾರಣ, ಎಲ್ಲರೂ ಪೀಸ್ಫುಲ್ ಆಗಿ ನೀರು ಹಿಡಿಯುತ್ತೇವೆ ಎಂದು ತಮಾಷೆ ಮಾಡಿದ್ದಾರೆ. ಮನೆಯಲ್ಲಿ ಏನೇನು ಇರುತ್ತದೆಯೋ ಅವೆಲ್ಲವನ್ನೂ ಸೆಟ್ನಲ್ಲಿ ನೈಜತೆ ಇರುವಂತೆ ಬಿಂಬಿಸಲಾಗಿದೆ ಎಂಬ ಬಗ್ಗೆ ಸಂಪೂರ್ಣ ವಿವರಣೆ ನೀಡಿರುವ ನಟಿ, ಮನೆಯೂ ಈ ಸೀರಿಯಲ್ನ ಒಂದು ಪಾತ್ರವೇ ಆಗಿರುವ ಕಾರಣ, ನಟ-ನಟಿಯರಂತೆ ಇದಕ್ಕೂ ಅಷ್ಟೇ ಪ್ರಾಮುಖ್ಯತೆ ಇದೆ ಎಂದಿದ್ದಾರೆ. ಇನ್ನು ಮನೆಯ ಒಳಗಡೆ ಏನೆಲ್ಲಾ ಇದೆ ಎಂಬುದನ್ನು ಮುಂದಿನ ವಿಡಿಯೋದಲ್ಲಿ ತೋರಿಸುವುದಾಗಿ ಹೇಳಿದ್ದಾರೆ. ಶೂಟಿಂಗ್ ಸ್ಪಾಟ್ ಹೇಗೆಲ್ಲಾ ಇರುತ್ತದೆ ಎನ್ನುವುದನ್ನು ನೋಡಿದ ನೆಟ್ಟಿಗರು ಥಹರೇವಾರಿ ಪ್ರತಿಕ್ರಿಯೆ ನೀಡಿದ್ದಾರೆ.
