ಸ್ಮೃತಿ ಇರಾನಿ 'ತುಲಸಿ' ಪಾತ್ರದಲ್ಲಿ ಮತ್ತೆ ಕಾಣಿಸಿಕೊಳ್ಳಲಿದ್ದಾರೆ. 'ಕ್ಯುಂಕಿ ಸಾಸ್ ಭಿ ಕಭಿ ಬಹು ಥಿ' ತನ್ನ ಎರಡನೇ ಸೀಸನ್ನೊಂದಿಗೆ ಮರಳುತ್ತಿದೆ. Z+ ಮಟ್ಟದ ಭದ್ರತೆಯೊಂದಿಗೆ ಶೂಟಿಂಗ್ ನಡೆಯುತ್ತಿದೆ. ಆದರೆ, ಮಾಹಿತಿ ಸೋರಿಕೆಯಾಗದಂತೆ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳಲಾಗಿದೆ.
ಮುಂಬೈ (ಜೂ.03): ಭಾರತೀಯ ಟೆಲಿವಿಷನ್ ಇತಿಹಾಸದಲ್ಲಿ ಐಕಾನಿಕ್ ಶೋ ಆಗಿರುವ 'ಕ್ಯುಂಕಿ ಸಾಸ್ ಭಿ ಕಭಿ ಬಹು ಥಿ' ತನ್ನ ಎರಡನೇ ಸೀಸನ್ನೊಂದಿಗೆ ಪುನರಾಗಮನ ಮಾಡುತ್ತಿದೆ. ಈ ಬಾರಿ, ಮಾಜಿ ಕೇಂದ್ರ ಸಚಿವೆಯಾದ ಸ್ಮೃತಿ ಇರಾನಿ ತಮ್ಮ ಪ್ರಸಿದ್ಧ 'ತುಲಸಿ ವಿರಾಣಿ' ಪಾತ್ರದಲ್ಲಿ ಮತ್ತೆ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಶೂಟಿಂಗ್ Z+ ಮಟ್ಟದ ಭದ್ರತೆಯೊಂದಿಗೆ ನಡೆಯುತ್ತಿದೆ.
ಶೋನ ಮೊದಲ ಸೀಸನ್ 2000 ರಿಂದ 2008 ರವರೆಗೆ ಪ್ರಸಾರಗೊಂಡು, ಭಾರತೀಯ ಮನೆಮನೆಗಳಲ್ಲಿ 'ತುಲಸಿ' ಪಾತ್ರದ ಮೂಲಕ ಸ್ಮೃತಿ ಇರಾನಿ ಜನಪ್ರಿಯತೆ ಗಳಿಸಿದ್ದರು. ಈಗ, 15 ವರ್ಷಗಳ ನಂತರ, ಅವರು ಮತ್ತೆ ತಮ್ಮ ನಟನೆಯ ಕರಿಯರ್ಗೆ ಕಾಲಿಟ್ಟಿದ್ದಾರೆ. ಶೂಟಿಂಗ್ ಸೆಟ್ನಲ್ಲಿ ಭದ್ರತೆ ಕಠಿಣವಾಗಿದ್ದು, ಸ್ಮೃತಿ ಇರಾನಿಗೆ Z+ ಭದ್ರತೆ ಒದಗಿಸಲಾಗಿದೆ. ಅಮರ್ ಉಪಾಧ್ಯಾಯ್ ಮತ್ತು ಏಕ್ತಾ ಕಪೂರ್ ಹೊರತುಪಡಿಸಿ, ಸೆಟ್ನಲ್ಲಿರುವ ಎಲ್ಲರ ಮೊಬೈಲ್ ಫೋನ್ಗಳನ್ನು ವಶಕ್ಕೆ ಪಡೆದು ಮತ್ತು ಆ ಸ್ಥಳದಲ್ಲಿ ಕೆಲಕಾಲ ಮೊಬೈಲ್ ಬಳಕೆ ನಿರ್ಬಂಧಿಸಲಾಗಿದೆ. ಇದು ಶೋನ ಮಾಹಿತಿಯು ಲೀಕ್ ಆಗದಂತೆ ತಡೆಯುವ ಉದ್ದೇಶದಿಂದ ಮಾಡಲಾಗಿದೆ ಎಂದು ತಿಳಿದುಬಂದಿದೆ.
ಈ ಹೊಸ ಸೀಸನ್ 150 ಎಪಿಸೋಡ್ಗಳೊಂದಿಗೆ ಸೀಮಿತವಾಗಿದ್ದು, ಮೂಲ ಶೋನ 2000 ಎಪಿಸೋಡ್ಗಳ ಗುರಿಯನ್ನು ಪೂರ್ಣಗೊಳಿಸಲು ಯೋಜಿಸಲಾಗಿದೆ. ಮೌನಿ ರಾಯ್ ಮತ್ತು ಕರಿಷ್ಮಾ ತನ್ನಾ ಅವರು ಪ್ರಚಾರ ವಿಡಿಯೋಗಳಲ್ಲಿ ಕ್ಯಾಮಿಯೋ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಧಾರಾವಾಹಿ ಪ್ರದರ್ಶನದ ಅಧಿಕೃತ ಪ್ರಾರಂಭ ದಿನಾಂಕ ಮತ್ತು ಟ್ರೇಲರ್ ಬಿಡುಗಡೆ ಕುರಿತು ಇನ್ನೂ ಮಾಹಿತಿ ನಿರೀಕ್ಷೆಯಲ್ಲಿದೆ. ಆದರೆ, ಸ್ಮೃತಿ ಇರಾನಿಯ ಪುನರಾಗಮನ ಮತ್ತು ಧಾರಾವಾಹಿ ಶೂಟಿಂಗ್ನ ಭದ್ರತಾ ಕ್ರಮಗಳು ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿವೆ. ಇದು ಭಾರತೀಯ ಟೆಲಿವಿಷನ್ ಪ್ರೇಕ್ಷಕರಿಗೆ ಮತ್ತೊಂದು ಸ್ಮರಣೀಯ ಅನುಭವವಾಗಲಿದೆ ಎಂಬ ನಿರೀಕ್ಷೆಯಿದೆ.
Related Articles
ಇನ್ನು ಮೃತಿ ಇರಾನಿ ಅವರು 2003ರಲ್ಲಿ ದೇಶದ ಪ್ರಭಲ ಪಕ್ಷವಾಗಿರುವ ಭಾರತೀಯ ಜನತಾ ಪಾರ್ಟಿಗೆ (ಬಿಜೆಪಿ) ಸೇರುವ ಮೂಲಕ ರಾಜಕೀಯಕ್ಕೆ ಬಂದರು. 2014 ರಿಂದ 2024ರ ವರೆಗೆ ಬಿಜೆಪಿಯಿಂದ ಸ್ಪರ್ಧಿಸಿ ಗೆದ್ದು ಲೋಕಸಭೆಗೆ ಆಯ್ಕೆಯಾಗುವ ಮೂಲಕ ಸಂಸದರಾಗಿದ್ದರು. ಮಹಿಳಾ ಸಂಸದೆಯಾಗಿದ್ದ ಸಮೃತಿ ಇರಾನಿಗೆ ಕೇಂದ್ರ ಸಚಿವ ಸ್ಥಾನವೂ ಒಲಿದು ಬಂದಿತ್ತು. ಹೀಗಾಗಿ, ಸ್ಮೃತಿ ಇರಾನಿ ಅವರು 10 ವರ್ಷಗಳ ಕಾಲ ಕೇಂದ್ರ ಸಚಿವರಾಗಿ ಕೆಲಸ ಮಾಡಿದ್ದಾರೆ. ಆದರೆ, 2024ರ ಲೋಕಸಭಾ ಚುನಾವಣೆಯಲ್ಲಿ ಅಮೇಥಿಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ವಿರುದ್ಧ ಸೋತರು. ಇದೀಗ ರಾಜಕೀಯದಲ್ಲಿ ಸ್ವಲ್ಪ ಬಿಡುವು ಪಡೆದುಕೊಂಡು ತಮಗೆ ಖ್ಯಾತಿಯನ್ನು ತಂದುಕೊಟ್ಟ ಧಾರಾವಾಹಿಗೆ ಮರಳಿ ಬಂದಿದ್ದಾರೆ. ಆದರೆ, ರಾಜಕಾರಣದಿಂದ ದೂರ ಸರಿದಿಲ್ಲ.